Sifwil Isusla​—Mea Sripen Ma Inge?

MET puspus elos lulalfongi mu sie met el enenu in sifwil isusla in eis molela ma patpat. Ke ma inge, loang akmwoye ke ma Jisus sifwana el fwak ke akwuk lun sifwil isusla. El akkalemye: “Sie met el fwin tia sifwil isusla, el koflana liye togusrai lun God.” (Jon 3:3) Ke ma inge, sie met el enenu in sifwil isusla in ilyuk nu in Togusrai lun God a tia in eis molela. ‘Tusruktu,’ saap kutu met elos fwa fwak, ‘ya kas luo inge​—in ilyuk nu in Togusrai a in eis molela el sramsramkinyuk nu ke me sang sefwanna?’ Mo, ma luo inge tia oana sie. In eis kalem mwo nu ke ma tia oana sie ka, lela kut in tuni akmwoye meet ke kalmeyen kas inge “togusrai lun God.”

Togusrai el sie akwuk lun guferment. Ke ma inge, kas inge “togusrai lun God” el kalmekin nu ke “guferment lun God.” Baibel el luti la Jisus Kraist, su “mwen nutin met,” el pa Togusra ke Togusrai lun God a oasr met fwa welul Kraist kol. (Daniel 7:1, 13, 14; Mattu 26:63, 64) Sayen ma inge, ke arurruma se su met sap Jon el liye akkalemye la met welul Kraist kol inge elos met sulosolla su tuku liki “sruf nukewa a kaskas nukewa a fwil nukewa a mutanfwal nukewa” a elos fwa “togusra fwin fwalu.” (Fwakyuk 5:9, 10; 20:6) Kas lun God el akkalemye pa la met nukewa su fwa kol oana togusra elos orala sie “u srisrik” lun met 144,000 “su moliyukla tari liki fwalu.”​—Luk 12:32; Fwakyuk 14:1, 3.

Togusrai lun God el oakiyuki oya? “Togusrai lun God” el pangonyuk pa oana “togusrai in kosrao,” su akkalemye la Jisus a met su welul kol oana togusra elos oasr in kosrao. (Luk 8:10; Mattu 13:11) Ke ma inge, Togusrai lun God el sie guferment in kosrao su kolyuk sin Jisus Kraist a sie u lun met su fwa welul elos suleyukla liki inmasrlon metu.

Ke ma inge, mea Jisus el lungse in akkalemye ke el fwak la sie met el enenu in sifwil isusla in “ilyak nu in togusrai lun God”? Ma el lungse in akkalemye pa sie met el enenu in sifwil isusla tu el an ekla sie met kol welul Kraist in kosrao. Ke ma inge, ke kas fototo, akwuk lun sifwil isusla pa inkanek in akoela nu sin u srisrik lun met inge ke akwuk in kolyuk in kosrao.

Ke pal inge, kut ku in liye la sifwil isusla el arlana yok sripe, el akwuki sin God, in akola sie u lun met in karungin akwuk nu ke kolyuk in kosrao. Tusruktu, nu ke akwuk in kolyuk inge enenu in siyukyuk sie kusensiyuk. La met nukewa su sifwil isusla inge elos fwa kol oana togusra in kosrao, a su elos fwa oru kolyuk lalos nu se? Kusensiyuk se inge fwa akuteyuki ke me lutlut toko.

[Blurb on page 6]

Akwuk lun sifwil isusla pa inkanek in akola nu sin sie u srisrik lun met nu ke akwuk in oru kolyuk in kosrao

[Picture on page 6]

Jisus Kraist a sie u srisrik lun met su fwa welul elos suleyukla liki inmasrlon metu su fwa orala Togusrai lun God