Kas lun Jeova el Moul
Kas Fulat su Tuku ke Buk lun Rom
IN YEA 56 C.E., ke pal se el fwufwasryesr ke pal aktolu, met sap Poul el tuku nu in siti lun an Korint. El lotela la met Ju a met pegan puspus su ekla met Kristian in an Rom elos tia oana sie nunak lalos. Ke sripe se inge Poul el simusla leta nu selos in kasrelos orala in oasr nunak sefwanna lalos ke Kraist.
Ke leta se inge nu sin met Rom, Poul el akuteye la fuka metu elos akkalemyeyuk oana met sumwosmwos a la fuka met nukewa inge fwa moulkin moul lalos. Leta se inge sang kasru mwomwo in akyokye etauk lasr ke God a ke Kas lal, el akkalemye yok ke lungse kulang lun God, a in akfulatye kunokon lun Kraist nu ke molela lasr.—Hibru 4:12.
AKKALEMYEYUK OANA MET SUMWOSMWOS—FUKA?
“Tu met e nu kemwa orek ma koluk, a tia sun mwolana lun God,” Poul el simusla. “Aksumwosyeyuk tari, wangin mol, ke lungkulang [lun God] meyen molela se su on in Jisus Kraist.” Poul el akkalemye pa: “Sie met aksumwosmwosyeyuk ke lalalfongi srela liki orekma lun ma sap.” (Rom 3:23, 24, 28) Ke inkanek nu ke “sie orekma lun sumwosmwos,” met Kristian akmusrala a met nukewa su wi ke “u lulap” lun “sip ngie” ku in “akkalemyeyuk oana met sumwosmwos”—nu sin met akmusrala su moul in kosrao oana met usru yurin Kraist pa fwinsrak lalos a nu sin u lulap lun sip ngie elos fwa akkalemyeyuk oana met kawuk lun God, su oasr fwinsrak in moulla liki “ongoiye lulap.”—Rom 5:18; Fwakyuk 7:9, 14; Jon 10:16; Jemes 2:21-24; Mattu 25:46.
“Na mea? Kut fwa oru ma koluk, meyen kut tia muta ye masap, a ye me kulang?” Poul el siyuk. “God lan kutongye!” el topuk. Komwos met kulansap . . . , fwin lun ma koluk nu ke mise, ku lun akos nu ke sumwosmwos,” Poul el akuteye. (Rom 6:15, 16) “Komwos fwin uniye orekma lun monumwos ke ngun, komwos fwa moul,” el fwak.—Rom 8:13.
Kusensiyuk Puspus Ke Ma Simusla Eis Top Ka:
1:24-32—Ya oiya koluk lun ikwe su akkalemyeyuk ke fus inge el sramsramkinyuk nu sin met Ju ku nu sin met puspus saye su tia met Ju? Fwinne ma akkalemyeyuk inge ku in sramsramkinyuk nu sin u luo inge, tusruktu Poul el sramsramkin ma inge nu sin met Israel in pal meeta su tia akos Masap. Fwinne oasr etauk lalos ke masap sumwosmwos lun God, “elos tia lungse in etu God fwal nu ke etauk sumwos.” Ke ma inge elos arulana koluk.
3:24, 25—Fuka me lango ku “molela se su on in Kraist Jisus” el afwunye “ma koluk su orek tari” in pal meeta meet liki me lango el orekmakinyuk? Kas palu se meet ke Messaia, simusyukla in Genesis 3:15, el akpayeyuk in 33 C.E. ke pal se Jisus el anwuki fwin soko sak. (Galetia 3:13, 16) Tusruktu ke pal se Jeova el akkalemye kas palu se inge, el ku in akkalemye la me lango el orekmakinyuk tari, meyen wangin kutena ma ku in kutongye God in akpayeye ma el oakiya tari. Ke ma inge in fwal nu ke me kise lun Jisus Kraist, Jeova el ku in nunak munas ke ma koluk lun met nukewa su tuku kel Adam su akkalemye lulalfongi paye nu ke mwulela se inge. Me lango el orala pa inkanek in oasr sifwil moulyuk lun met puspus meet liki pal lun met Kristian.—Orekma 24:15.
6:3-5—Mea kalmen baptaisla in Kraist a baptaisla nu ke mise lal? Ke pal se Jeova el akmusraela met tuma lutlut lun Kraist ke ngun mutal, elos inse sefwanna nu sin Jisus a elos wi ke congregation su lumeyuk nu ke monin Kraist, su el pa leum ku Sifwe ka. (1 Korint 12:12, 13, 27; Kolosse 1:18) Pa inge kalmeyen baptais lalos nu sin Kraist. Met Kristian akmusrala elos “baptaisla nu in mise lun [Kraist]” meyen elos moulkin moul in lafwekinelosla sifwana a likiye kutena kain in fwinsrak nu ke moul ma patpat fwin fwalu. Ke ma inge, mise lalos el oana me kise pa, oana ke mise lun Jisus, fwinne mise lalos el tia oana lupan saokiyen me lango. Baptais nu ke mise lun Kraist el akpayeyuk ke pal se elos mise a sifwil akmoulyeyukyak nu in kosrao.
7:8-11—Fuka ‘ma koluk el eis me akkeye ke inkanek lun masap’? Masap el kasru metu in akilen a kalem ka la mea se inge ma koluk, su orelos in etu la elos oru ma koluk. Ke ma inge, elos ku in akilen orekma puspus su elos orala in oana met orekma koluk. Ke sripe inge panang ma koluk el eis me akkeye ke inkanek lun Masap.
Me Lutlut Nu Sesr:
1:14, 15. Oasr sripe puspus lasr in akkalemye peng mwo ke inkanek moniyuk. Sie sripeu pa met puspus elos moliyukla ke sran Jisus, ke ma inge oasr somwe moul lasr nu selos a oasr kunokon lasr in kasrelos in etu God a akwuk lal.
1:18-20. Met puspus su sesumwos a tia etawi oiya mwomwo puspus lun God elos “tia ku in akkalemye kutena sripe lalos,” meyen oiya mwomwo puspus lun God su liyeyuk el arulana kalem ke ma orekla nukewa.
2:28; 3:1, 2; 7:6, 7. Tokin Poul el kaskas ke ma puspus su ku in aktoasrye met Ju, el sifwilpa kaskas in akfusrasrye ma el fwak tari. Ma inge el sie me srikasrak nu sesr ke inkanek in sang me top mwomwo nu ke me sramsram puspus.
3:4. Fwin kas lun met el lain kas lun God su akkalemyeyuk ke kas lal, kut “lela God lan konoiyukyak paye” ke kut lulalfongi ke kas mwomwo su oasr in Baibel a in orekma fwal nu ke ma lungse lun God. Kut fwin moniyuk in wi pal nukewa ke orekma in luti peng mwo lun Togusrai a ke orekma in oru met tuma lutlut, kut ku in kasru met puspus elos in koneak la God el paye.
4:9-12. Lulalfongi lal Ebream el oekyukla nu sel oana ma sumwosmwos ke pal loeloes meet liki el kosroila ke el yea 99 matwe. (Genesis 12:4; 15:6; 16:3; 17:1, 9, 10) In oekla lulalfongi lal Ebream oana ma sumwosmwos fwinne meet liki el kosroiyukla, God el akkalemye la mea oru sie met in sumwosmwos ye mutal.
4:18. Fwinsrak el sie ip yok sripe nu ke lulalfongi. Lulalfongi lasr el fwal nu ke fwinsrak.—Hibru 11:1.
5:18, 19. Poul el akuteye ke inkanek fusrasr a ke kas fototo la Jisus el oana Adam, a ke inkanek inge el akuteye kalem la fuka sie met el ku in “sang moul lal in moli met puspus.” (Mattu 20:28) Kut enenu in etawi inkanek mwo inge in luti ke inkanek kalem a ke kas fototo.—1 Korint 4:17.
7:23. Laan mano inge oana paosr, niyesr, a loasr ku in ‘sruo kut nu ke masap lun ma koluk,’ ke ma inge lela kut in karunganang ma inge in tia orekmakin nu ke inkanek tia fwal.
8:26, 27. Kut fwin sun kain in oiya puspus su oru kut in fosak ku oru in tia etu ma kut e fwa siyuk ke pre, “ngun sifwana kaifwe kasr.” Ke ma inge Jeova, “El su long pre,” el long ke pre mwo puspus su simusyukla ke Kas lal oana pre lasr sifwana nu sel.—Sam 65:2.
8:38, 39. Ongoiye puspus, ngun koluk puspus, a guferment lun metu tia ku in oru Jeova in tui tia lungse kut; a elos tia ku in oru kut in tui in lungse el.
9:22-28; 11:1, 5, 17-26. Oasr kas palu puspus ke sifwil folokla ke akwuk mwomwo nukewa lun met Israel el akpayeyuk ke congregation lun met Kristian akmusrala, su met nukewa wi ka el “pangonyuk tia sin met Ju mukena a ouyepa sin met pegan” ku sin mutanfwal puspus.
10:10, 13, 14. Wekunang lungse nu sin God a nu sin met tulan lasr, lulalfongi fukoko nu sin Jeova a ke mwulela nukewa lal ku in akkeye kut in moniyuk in wi pal nukewa ke orekma in luti lasr oana met Kristian.
11:16-24, 33. Arulana fwal a sumwos “ma mwo a upa lun God”! Aok, “Eot ku, orekma lal sumwosna, tu inkanek lal nukewa nununku sumwos.”—Duteronomi 32:4.
MOULKIN MOUL FWAL NU KE OIYA SU AKKALEMYEYUK OANA MA SUMWOSMWOS
“Ke ma inge, nga kaifwe nu sumwos met lili, ke kulang lun God,” Poul el fwak, “in sang monumwos me kise moul, mutal, me akinsemwomwoye God.” (Rom 12:1) “Ke ma inge,” ku ke sripen met Kristian elos akkalemyeyuk oana met sumwosmwos ke lulalfongi lalos, paenang ma Poul el fwakak toko inge fwa sang me kasru yok nu ke oiya a ellalos nu selos sifwana, nu sin met puspus saye, a nu sin met kol puspus ke guferment.
“Tu nga fwak, ke kulang su ase nu sik, nu sin met nu kemwa in maslomwos, tu lan tia nunku ke el sifwana fulat liki ma fwal lan nunku,” Poul el simusla. “Lela lungse [lomwos] in tia kutasrik.” (Rom 12:3, 9) “Lela met nu kemwa in akos nu ke ku su fulat lukelos.” (Rom 13:1) El akkeye met Kristian elos in ‘tia nununku sie sin sie,’ yokna ke sulela puspus su orek sin met lili puspus fwal nu ke nunak ku conscience lalos sifwana.—Rom 14:13.
Kusensiyuk Puspus Ke Ma Simusla Eis Top Ka:
12:20—Fuka kut ku in “elosak mulut” fwin sifwen sie met lokwalok? In pal lun Baibel, kain in eot keke se inge su pangpang ore el filiyuki nu in fwunyu su oasr mulut fwin eot ore a oasr pa mulut yen eot ore. Ke pal se fwolu el yokelik fwin ore inge el ku in sang kasru yok in oru in molesrla eot inge a in sriyukla kain in kutkut nukewa ka. Ke inkanek oapana inge, kut filiye mulut fwin sifwen met lokwalok lasr kut fwin oru ma mwo nu sel, a ke sripe inge kutena kain in inkanek nu ke ma upa lal fwa molesrla ku ekla a el fwa mutamwauk in akkalemye oiya mwomwo puspus lal.
12:21—Fuka kut ku in “kutangla ma koluk ke ma mwo” pal nukewa? Sie inkanek in oru ma inge pa ke kut kafweang in pulaik in akpayeye orekma su God el sapkin nu sesr in sulkakin a luti peng mwo lun Togusrai nu ke pal se su ma inge akpayeyuk ke pal pakiyuki lun Jeova.—Mark 13:10.
13:1—Ke inkanek puspus fuka ke akwuk lun ku su fulat liki kut el “filiyuki ke an selos sin God”? Ku lun guferment su “filiyuki ke an selos sin God” elos in oru kolyuk lalos ke inkanek su God el lela, a ke kutu akwuk nu ke oiyen kolyuk lalos liyeyuk tari sin God meet liki ma inge sikyak. Ma inge akkalemyeyuk tari ke ma Baibel el palye ke met kol puspus.
Me Lutlut Nu Sesr:
12:17, 19. Kut fwin orek foloksak nu ke ma koluk lun met, kalmen ma inge pa kut oru orekma su fwal nu sin Jeova mukena in oru. Paye la kut akkalemye oiyen fulang kut fwin “sang ma koluk ke ma koluk nu sin sie met”!
14:14, 15. Kut tia enenu in aktoasrye ku aktukulkulye met lili wiyesr ke me mongo ku me nim su kut sang nu selos.
14:17. Fototo mwomwo nu sin God el tia tuku ke sripen ma sie met el kang ku nim ku ke sulela lun sie met ke ma el tia nim a ma el tia kang. A, ma inge el kupasr nu ke oiyen sumwosmwos, misla, a insemwomwo.
15:7. Kut enenu in paing met nukewa su tuku nu ke congregation ke paye lun insielos in suk ke ma paye a kut enenu in sulkakin peng mwo lun Togusrai nu sin met nukewa su kut osun nu se.
[Picture on page 31]
Ya me lango el ku in orekmakinyuk nu ke ma koluk nukewa su orek meet liki me lango el orekmakinyuk in moli ma koluk?