Ku Lun God Akkalemyeyuk Ke Itu Nukewa
FWAT el sie itu su tia arulana yok. Fwinne oinge, lupan fwat el oasr ke pal 330,000 su yok liki fwalu. Itu puspus su apkurun ku fototo nu ke fwalu el srik liki fwatu. Tusruktu, itu puspus saye, oana itu se inge su pangpang V382 Cygni, el pal 27 yok liki fwatu.
Fuka lupan ku su fwatu el orala? Nunku ke lupan fwol lun sie e la fwinne kom tu ke lusen mael sengoul liki ma inge a kom srakna pula fwol su tuku ka. Fwatu el oasr ke lusen mael 93 million liki fwalu. Ne oinge, ke sie len fwin fwatu takak, fwol su tuku ka ku in oru kolun metu in fwolla! Sie me lut, meyen sie tafwu billion ke ku lun fwatu sun fwalu. Ne oinge, lupa inge ke ku lun fwatu su sun fwalu el arulana fwal in sang kasru moul nukewa fwin fwalu.
Ku lun fwatu orekla a tuku ke infwulwen fwatu, a oasr lupa yok ke ku lun fwatu su orekla we. Tusruktu ke sripen fwatu el yok a core ku infwulwen fwatu el arulana dense ku keke a toasr paenang enenu in oasr billion puspus yea ke ku lun fwatu su tuku ke core in som sasla liki fwatu. “Fwin Fwatu tui in orala ku lal ke pal inge,” Web site inge SWPC el akkalemye la, “enenu in oasr yea 50,000,000 meet liki kutena ma ekla ke kuiyen fwatu fwa liyeyuk ku pulakinyuk fwin Fwalu!”
Inge loang akmwoye nu ke ma paye inge: Kom fwin srukak mutom nu lung ke sie fong su wangin pukunyeng, kom ku in liye itu su oasr ke tausen puspus, su kais sie selos oasr ku yok ka, in oapana ke ma fwatu el oru. A in oapana ke scientist puspus elos motko mu oasr billion puspus ke itu in kosrao!
Itu nukewa inge tuku ya me! Pus sin met lalmetmet su oru sukok lalos ka elos lulalfongi ke sie sripe su elos tia ku in kalem ka, la kosrao a fwalu el sikyak ke yea 14 billion somla. Tusruktu Baibel el akkalemye: “Ke mutamwauk God el orala kosrao a fwalu.” (Genesis 1:1) Wangin alolo ka la, El su orala itu lulap puspus el ku in akkalemyeyuk mu oasr “ku lulap lal.”—Isaia 40:26.
Fuka God el Orekmakin Ku Lal
Jeova God el orekmakin ku lal in kasru met nukewa su oru ma lungse lal. Ke sie me pupulyuk, met sap Poul el orekmakin ku lal in luti met puspus ke God. Poul el tia sie met pengpeng ke ku, tusruktu el akpayeye orekma puspus fwinne oasr me kalyai upa orek nu sel. Efu? El akilen la el eis me akkeye mwomwo ke “yoklanu lun ku” sin God me.—2 Korint 4:7-9.
Jeova God el orekmakin pa ku lal in kunausla met nukewa su lungse na paye in kunausla masap sumwos lal ke oiyen nasnas. Jisus Kraist el akuteye ke kunanela lun an Sodom a Gomora a ke Sronot in len lal Noa oana me pupulyuk nu ke orekma lun Jeova in kunausla met koluk mukena. Jisus el palye la tia pat Jeova el fwa sifwil orekmakin ku lal in sang kunausla met nukewa su pulesru masap sumwosmwos lal.—Mattu 24:3, 37-39; Luk 17:26-30.
Mea Oiya Se Inge Ku In Oru Nu Sum?
Tokin el sifwilpa nunku yok ke ku lun God su liyeyuk ke itu puspus, saap kom ku in pula pa ka oana Togusra Devid el pula, el fwak: “Ke nga nunku ke kosrao lom, orekma lun kufinpoum, malem a itue ma kom pakiye, mea met tu kom in esmakunul, a mwen nutin met tu kom in tuku nu yurol?”—Sam 8:3, 4.
Aok, fwin oasr etauk lasr la kut arulana srikla fwin srikeyuk nu ke yokiyen ma in kosrao fwa ku in oru kut in pusisel. Tusruktu, kut tia enenu in lut a sangeng ke ku lun God. Jeova el kasrel Isaia met palu in simusla kas lal inge su oasr me akkeye ka: “El [God] sang ku nu selos su mulalla; a nu sel su wangin ku lal el akyokye ku. Aok tulik matu fwa mulalla a totola, a met fwusr fwa ikori, a elos su sano Jeova fwa aksasuye ku lalos. Elos fwa sokak ke po soksok oana ikul. Elos fwa kasrusr, a tia totola; elos fwa fwufwasryesr, a tia mulalla.”—Isaia 40:29-31.
Kom fwin lungse in oru ma lungse lun God, kom ku in lulalfongi la el fwa sot ngun mutal lal nu sum in kasre kom in oru ma lungse lal pal nukewa. Tusruktu kom enenu in siyuk ka. (Luk 11:13) Ke kasru lun God, kom ku in muteng ke kutena me srufwe a eis ku in oru ma sumwos.—Filippai 4:13.
[Pictures on page 6]
Clockwise mutamwauk ke leyen lese: Whirlpool galaxy, Pleiades star cluster, Orion Nebula, Andromeda Galaxy
[Pictures on page 6]
Fwat el pal 330,000 yok liki fwalu
[Picture Credit Lines on page 6]
Pleiades: NASA, ESA a AURA/Caltech; ma nukewa saye lung: National Optical Astronomy Observatories