Ma God El Fwalseni Lela In Tia Eselik

“Eltal tia sifwel luo, a ikwe siefwanna. Ke ma inge, ma God el fwalseni, lela met in tia eselik.”​—MATTU 19:6.

1, 2. Efu ku fwal nu ke ma Simusla a mwo in tupan ku nunku la mokul a mutan su payuk tari elos ku in pulakin ma upa puspus kutu pal?

SRIKE lumala ke nunak lom fwin kom akola in mutamwauk som nu ke an loeloes kasrusr ke soko sitosa. Ya kom fwa sun kain in ma upa puspus ke inkaneku? Saap oasr tusruktu tia mwo in tupan ka! Ke sie me pupulyuk, saap ke kom kasrusr oasr ma upa sikyak nu sum ke oiyen pulanpal koluk, su oru kom in kasrusr kakasrisrikla kutu a kom arlanu sensen. Ke kutu pal tok, saap oasr ma musalla yok sikyak nu ke sitosa su kom tia ku in orala, paenang kom tui ke sisken inkaneku a suk me kasru nu ka. Ya ma sikyak puspus inge oru kom in nunku mu oasr ma tafongla yok ke fwufwasryesr lom paenang kom nunku in som a filiye sitosa okum? Mo. Fwin kom fwufwasryesr ke lusen mile loeloes, kom etu la oasr ma upa puspus ku in sikyak a kom nunku mu mwo in suk inkanek puspus in sang aksumwosye ma upa nukewa inge.

² Oiya inge el sikyak na paye nu ke akwuk lun payuk. Oasr ma upa puspus su ku in sikyak, a tia mwo nu sin sie mokul a mutan su nunku in payuk elos in nunku mu oasr me insemwomwo yok pal nukewa ke moul lun payuk. In 1 Korint 7:28, Baibel el akkalemye kalem la mokul a mutan payuk elos fwa “keok in ikwe.” Efu oinge? Ke kas fototo, ke sripen mokul a mutan payuk elos tia met sumwosmwos, a kut moul ke “pal in ongoiye lulap” su upa in muteng ka. (2 Timote 3:1; Rom 3:23) Ke ma inge, fwinne siyanyen se su ku in akfwalye oiya lalos in tukeni muta, a pala tari in orekmakin moul lalos ke nunak lun God, elos srakna ku in sun ma upa ke kutu pal.

3. (a) Mea nunak lun met puspus lun fwalu ke moul lun payuk? (b) Efu ku met Kristian elos kafweang in karungin moul lun payuk lalos?

³ Ke akwuk lun fwalu ke pal inge, fwin kutu siyanyen elos sun kain in ma upa puspus, ma se meet su elos lungse in oru pa in fwasrelik a aksafyela moul in payuk lalos. In an puspus, pisen siyanyen su orala akwuk nu ke divorce lalos el yokyokelik na paye. Tusruktu, met Kristian paye elos suk in aksumwosye ma upa puspus lalos liki na in silaklak suk inkanek in divorce lalos. Efu? Meyen elos nunku yok ke payuk oana sie me sang mwomwo a mutal sin Jeova. Jisus el fwakak ke siyanyen ku met payuk nukewa: “Ma God el fwalseni, lela met in tia eselik.” (Mattu 19:6) Paye la, in moulkin masap yok sripe su Jisus el akkalemye el tia fusrasr pal nukewa. Ke sie me pupulyuk, sou puspus a met puspus saye​—wekunang kutu met su sang kas in kai nu ke moul lun payuk—​su tia akilen akwuk mwomwo lun Baibel elos akkeye siyanyen puspus pal nukewa elos in fwasrelik ku divorce ke sripe puspus su tia fwal nu ke ma simusla.a Tusruktu met Kristian elos etu la mwo in akmwoye ma upa puspus a in karungin moul in payuk lalos liki na in silaklak suk in kunausla ku aksafyela ma inge. Aok, yok sripe la ke mutamwauk kut oru sulela mwomwo in orala ma puspus fwal nu ke inkanek lun Jeova​—a tia in fwal nu ke kas in kai lun met puspus saye.​—Soakas 14:12.

Orekma in Aksumwosye Ma Upa Puspus

4, 5. (a) Ma upa puspus fuka ku in sikyak ke moul in payuk? (b) Efu ku akwuk mwomwo nukewa su oasr ke Kas lun God ku in me kasru na paye, fwinne ke pal su oasr ma upa puspus sikyak ke moul in payuk?

⁴ Paye la moul lun payuk nukewa enenu in karunginyuk mwo tu in aksumwosye ma upa puspus ke kais kutu pal. Ke pal puspus, oasr ma eneneyuk in sang aksumwosye ma upa srisrik. Tusruktu, nu sin kutu siyanyen, saap oasr ma upa yok puspus su orala me sensen yok nu ke pelung mwomwo ke moul lun payuk. Oasr pal, saap kom enenu in siyuk ke kasru sin sie met Kristian elder su yok experience lalos ka. Tusruktu, ma sikyak nukewa inge tia kalmekin la moul in payuk lom tia mwo. Ma inge nukewa akkalemye ke yok sripaiyen orekma in akos akwuk mwomwo lun Baibel a in kafweang in suk ke me kasru puspus.

⁵ Oana Met Orala metu a Met Oakiye akwuk lun payuk, Jeova el etu yok liki kutena met ke ma kut enenu in engankin sie moul in payuk mwomwo. Kusensiyuk yoku pa, Ya kut fwa porongo kas in kasru su oasr ke Kas lal a akos ma inge? Paye la kut ku in eis ma lane ka kut fwin oru ma inge. Jeova el fwak nu sin met kulansap nukewa lal in pal meeta: “O ke kom in nu porongo masap luk! Na misla lom oana sie infwal, a sumwosmwos lom oana noa in mwea.” (Isaia 48:18) In orekmakin pal nukewa kas in kasru su akkalemyeyuk in Baibel fwa ku in sang me kasru mwomwo nu ke me insemwomwo lun moul in payuk. Lela kut in akuteye kas in kasru su Baibel el akkalemye nu sin mokul payuk nukewa.

“Komwos in Lungse Mutan Kiyomwos”

6. Mea kas in kasru su oasr ke ma Simusla nu sin mokul payuk nukewa?

⁶ Ke leta lun met sap Poul nu sin met Kristian in an Efesus el sang kas in kasru na kalem nu sin mokul payuk nukewa. Poul el simusla: “Mokul tuma, komwos in lungse mutan kiomwos, oana Kraist El ouyepa lungse surs [congregation, NW], a sifwana esalang ka. Oinge mwo tu mokul tuma elos in lungse pa mutan kielos sifwana oana manolos sifwana. El su lungse mutan kiel sifwana el sifwana lungse el, tu wangin met srunga ikwel sifwana; a el oakoakel a saokel, oana Kraist el oru ouyepa ke surs [congregation, NW]. Tusruktu, lela komwos nu kemwa in oru ouyepa, tu sie in lungse mutan kiel oana el sifwana.”​—Efesus 5:25, 28, 29, 33.

7. (a) Mea oasr pal nukewa ke pelung mwo lun moul in payuk lun met Kristian? (b) Fuka mokul payuk nukewa elos akkalemye lungse pal nukewa nu sin mutan kiyelos?

⁷ Poul el tia akuteye ke kain in ma upa nukewa su ku in sikyak inmasrlon sie mokul a mutan payuk. A, el orekmakin inkanek se meet in aksumwosye ma upa ke moul in payuk ke el akilen ke ma su eneneyuk in oasr ke pelung mwo lun kais sie met Kristian su payuk tari​—su pelung inge pa lungse. Aok, lungse el akkalemyeyuk pal onkosr ke fus nukewa lung inge. Loang akmwoye pa nu ka, la Poul el fwak nu sin mokul payuk nukewa: “[Kafweang in, NW] lungse mutan kiyomwos.” Wangin alolo ka la Poul el akilen la lungse su sie mutan ku mokul el pulakin ke pal se meet elos osun a liye sie sin sie el fusrasr liki in akkalemye lungse pal nukewa nu sin sie sin sie ke pal tok. Ma inge arlanu paye yokna ke “len safla,” su met puspus elos “lungselos sifwana” a “met sulallel, [met su srunga insese ke kutena ma, NW].” (2 Timote 3:1-3) Kain in oiya nukewa inge su tia mwo el akmunasye a kunausla moul in payuk lun siyanyen puspus ke pal inge, tusruktu sie mokul payuk su kulang el e fwa tia lela oiya koluk lun fwalu in akkolukye nunak a orekma lal.​—Rom 12:2.

Fuka Kom Ku in Sang Me Enenu lun Mutan Kiyom?

8, 9. Ke inkanek puspus fuka sie mokul payuk su met Kristian el sang ma enenu lun mutan kiyel?

⁸ Kom fwin sie mokul tuma su met Kristian, fuka kom ku in lain oiya su nunku keim sifwana a in akkalemye lungse paye lom nu sin mutan kiyom? Ke kas lal nu sin met Efesus su akkalemyeyuk tari ke me lutlut inge, Poul el akkalemye ma luo su kom enenu in oru​—pa in sang ma enenu lun mutan kiyom, a akkalemye lungse nu sel oana ma kom oru nu ke monum sifwana. Fuka kom ku in sang ma enenu lun mutan kiyom? Sie inkanek in oru ma inge pa ke me enenu lal nu ke ikwe​—ku in karungin ma enenu lun mutan kiyom ke nuknuk, loom, mongo a kutupa ma saye. Poul el simusla nu sel Timote: “A sie met fwin tia liaung met sral, a yokna kalos su muta in loom sel sifwana, el lafwekin lalalfongi a koluk liki met su tia lalalfongi.”​—1 Timote 5:8.

⁹ Tusruktu, srakna oasr ma eneneyuk saye liki na in sang mongo, nuknuk, a loom. Efu? Meyen sie mokul payuk el ku in arlanu mwo in sang ma enenu lun mutan kiyel ke ma lun ikwe, tusruktu el tia akinsemwomwoyel ke me enenu lal ke nunak a pulakin lal a ke ma lun ngun lal. In sang ma enenu lal ke nunak ku pulakin lal a ma lun ngun lal arlanu yok sripe. Paye, mokul puspus su met Kristian elos arlanu kafofo in karungin ma puspus lun congregation. Tusruktu, fwinne oasr kunokon yok puspus lalos mokul payuk elos tia enenu in mulkunla kunokon nukewa lal su God el sapkin nu sel in oru oana sie sifwen sou. (1 Timote 3:5, 12) Ke kutu yea somla, magasin se inge Tauer in San el akkalemye kas inge: “In fwal nu ke masap nukewa su oasr in Baibel, ma inge ku in akkalemye la ‘orekma in shepherding ku liaung el enenu in mutamwauk ke loomu.’ Fwin sie met elder el tia nunku ke sou lal, el ku in tula kunokon lal in oana sie met elder.”b Kalem la, arlanu yok sripe nu sum in sang ma enenu lun mutan kiyom​—ke mano, ke pulakin ku nunak a, yok sripe emeet, ke ma lun ngun.

Mea Kalmen in Lungse ku Aksaokye Mutan Kiyom?

10. Fuka sie mokul payuk el ku in aksaokye mutan kiyel?

¹⁰ Kom fwin lungse mutan kiyom, kom karungunul mwo meyen kom lungse el. Oasr inkanek puspus su kom ku in oru nu ke ma inge. Ma se meet, orekmakin pal su arlanu fwal yurin mutan kiyom. Kom fwin mulkunla mutan kiyom ke oiya inge, lungse lal nu sum ku in oulla. Nunku pa, la lupan pal a me karungin su kom nunku mu el enenu saap tia pa inge ma el nunku mu el enenu. Kom tia ku in fwak mukena la kom lungse mutan kiyom. Mutan kiyom el enenu in pulakin mu el aksaokyeyuk. Poul el simusla: “Wangin met in suk ma lal sifwana, a ma lun met tulan.” (1 Korint 10:24) Oana mokul payuk mwo a kulang, kom enenu in lungse na paye in eis etauk a in kalem na paye ke ma enenu nukewa lun mutan kiyom.​—Filippai 2:4.

11. Fuka fototo lun sie mokul payuk nu sin God a ke congregation ku in akkolukyeyuk ke oiya su el akkalemye nu sin mutan kiyel?

¹¹ Siepa inkanek su kom ku in akkalemye ka la kom aksaokye mutan kiyom pa ke kom akkalemye oiya mwo a kulang nu sel, ke inkanek lun kas a orekma lom. (Soakas 12:18) Poul el simusla nu sin met Kolosse: “Mokul tuma, komwos in lungse mutan kiomwos, a tia srasrol [mulat, NW] nu selos.” (Kolosse 3:19) In fwal nu ke sie buk, ke ip safla ke kas lal Poul ku in orekmakinyuk oana kas in pupulyuk inge “in tia nunku mu el sie met kulansap ke loomu” ku “in tia orel oana met kulansap.” Sie mokul payuk su sulallel ku arlanu koluk a upa oiya lal​—ke loomu ku ye mutan met puspus—​paye la el tia akkalemye la el aksaokye ku lungse mutan kiyel. Ke inkanek in akkalemye oiya upa a koluk nu sin mutan kiyel, el ku in akkolukye fototo lal nu sin God. Met sap Piter el simusla nu sin mokul payuk nukewa: “Komwos mokul tuma, in ouyepa, muta yurin mutan kiomwos oana ke lalmetmet, a akfulatye mutan, oana alu munas liki komwos, su ouyepa met usru yurumwos in lungkulang lun moul, tu in wangin ma kutongye pre lomwos.”c​—1 Piter 3:7.

12. Mea mokul payuk su met Kristian el ku in lotela ke oiya su Jisus el akkalemye nu sin congregation lun met Kristian?

¹² Nik kom nunku mu lungse lun mutan kiyom el oasr pal nukewa fwinne kom tia aksaokye ma inge. Akkalemye nu sel lungse lom in paye pal nukewa. Jisus el akkalemye me srikasrak nu sin mokul payuk nukewa su met Kristian nu ke oiya su el akkalemye nu sin congregation lun met Kristian. El kulang, pakoten a etu in sang nunak munas​—fwinne ke pal puspus su met tuma lutlut lal elos akkalemye oiya puspus su tia mwo. Ke ma inge Jisus el ku in fwak nu sin met puspus: “Fwasru nu Yuruk, . . . tu Nga fwokpap a inse pusisel; a komwos fwa konoiyuk mongla [me akkeye, NW] in ngunumwos.” (Mattu 11:28, 29) In etawi Jisus, sie mokul payuk su met Kristian el enenu in akkalemye oiya mwomwo nu sin mutan kiyel oana ke Jisus el oru nu sin congregation. Sie mokul su aksaokye ku lungse na paye mutan kiyel, su el akkalemye ke kas a orekma lal, el fwa sang mongla ku me akkeye na paye nu sin mutan kiyel.

Mutan Payuk Nukewa su Moulkin Akwuk Mwomwo lun Baibel

13. Akwuk mwomwo fuka su oasr in Baibel ku in kasru mutan payuk nukewa?

¹³ Oasr akwuk mwomwo ku me lutlut yok sripe puspus in Baibel su ku in kasru mutan payuk nukewa. Efesus 5:22-24, 33 el akkalemye: “Mutan kie, komwos in akpusiselye komwos nu sin mokul tumomwos, oana nu sin Leum, tu mokul el sifwen mutan kiel, oana Kraist el ouyepa sifwen surs [congregation, NW] a el sifwana Met Lango lun mano. A oana surs pusisel nu sin Kraist, ou inge mutan ouyepa nu sin mokul tumalos in ma nu kemwa. . . . Mutan fwa sangeng [akkalemye sunak paye, NW] nu sin mokul tumal.”

14. Efu ku akwuk mwomwo lun ma Simusla ke oiyen pusisel tia akkolukye mutan payuk puspus?

¹⁴ Loang akmwoye nu ke ma Poul el akkalemye yok nu ke orekma in akpusiselye a in akkalemye sunak. Sie mutan payuk el akesmakinyeyuk in akpusiselyel nu sin mokul tumal. Oiya inge el fwal nu ke akwuk lun God. Ma orekla moul nukewa in kosrao a fwin fwalu elos akpusiselyelos nu sin sie met. Jisus el akpusiselyel pa nu sin Jeova God. (1 Korint 11:3) Aok, sie mokul payuk su orekmakin kunokon lal oana sifwen sou ke inkanek fwal fwa oru mutan kiyel in fusrasr in akpusiselyel pal nukewa.

15. Mea kutu kas in kai su oasr in Baibel nu sin mutan payuk nukewa?

¹⁵ Poul el akkalemye pa la sie mutan payuk “el enenu in akkalemye sunak paye nu sin mokul tumal.” Sie mutan payuk su met Kristian el enenu in akkalemye oiyen “fulpap a ngun okak,” a el tia enenu in lain mokul tumal ku lungse in orekmakin inkanek lal sifwana. (1 Piter 3:4) Sie mutan su kulansap nu sin God el kafweang in oru ma mwomwo nu sin sou lal a sang me akfulat mwomwo nu sin mokul tuma su met kol lal. (Taitus 2:4, 5) El fwa kafweang in sramsramkin ma mwo ke oiyen mokul tumal a el tia oru kutena ma in pa inge sripe la met puspus elos in tia akkalemye sunak nu sel. El fwa kafweang yok pa in sang kasru nu ke sulela lun mokul tumal in fwal a mwo sulela lal.​—Soakas 14:1.

16. Mea mutan payuk su met Kristian elos ku in lotela ke me srikasrak lal Sera a Rebeka?

¹⁶ In oasr oiyen fulpap a ngun okak su tia kalmekin la sie mutan payuk el tia ku in akkalemye nunak lal ku la nunak lal tia yok sripe. Mutan puspus su kulansap nu sin God in pal meeta, oana Sara, Rebeka, elos sifwana akkalemye nunak lalos ke ma puspus, a ma simusla in Baibel el akkalemye la Jeova el insemwomwo ke ma elos oru. (Genesis 21:8-12; 27:46–28:4) Mutan payuk su met Kristian elos ku in akkalemye pa nunak ku pulakin lalos in eteyuk. Tusruktu, elos enenu in oru ma inge ke inkanek kulang, a tia ke sie pusra su wangin sunak ka. Elos fwa ku in liye la me sramsram ke inkanek inge fwa oru mokul tumalos in loang akmwoye nu ka.

Kunokon lun Orekma ke Mwulela

17, 18. Mea kutu inkanek su mokul a mutan payuk elos ku in oru in sang lain orekma lal Setan su suk in kunausla moul in payuk lalos?

¹⁷ Moul in payuk el sie mwulela ku kunokon lun mokul a mutan nu ke lusen moul nukewa lalos. Ke ma inge, mokul a mutan payuk elos enenu in akkalemye la elos lungse na paye in oru moul in payuk lalos in oasr me insemwomwo ka. Fwin wangin me sramsram mwomwo ma inge ku in orala kutena sripe in oasr ma upa yok sikyak. Sikyak ke pal nukewa, oasr mokul a mutan payuk elos tui in sramsram nu sin sie sin sie ke pal se su oasr ma upa sikyak, a fwa oru elos in amulati sie sin sie. Oasr kutu mokul a mutan payuk su lungse in suk inkanek in kunausla ku aksafyela moul in payuk lalos, saap elos lungse in oru fototo lalos nu sin sie mutan ku mokul su elos tia payuk se. Jisus el sang kas in sensen: “Kutena met su ngetang nu sin mutan se in lungse fwasr nu yurol, el tufwana orek kosro yurol insiel.”​—Mattu 5:28.

¹⁸ Met sap Poul el sang kai nu sin met Kristian nukewa, wekunang met Kristian nukewa su payuk tari: “Komwos in mulat, a tia orek ma koluk; tia lela fwatu in tilli fwin mulat lomwos, a komwos in tia sang an sin Devil.” (Efesus 4:26, 27) Met lokwalok se meet lasr, Setan, el srike a kafweang in orekmakin kain in ma upa puspus su ku in sikyak inmasrlon met Kristian puspus. Nikmet lela elan eis kutangla! Fwin oasr ma upa sikyak, kafweang in suk ke ma Baibel el akkalemye ke nunak lun Jeova nu ke ma sikyak inge, orekmakin me rid nukewa su tuku ke Baibel. Aksumwosye ma upa su sikyak ke inkanek misla a paye. Akfwalye ma kom etu ke akwuk sumwosmwos lun Jeova a fuka kom orekmakin ma inge nukewa nu sum. (Jemes 1:22-25) Ke moul in payuk lom, oru sulela mwo in fwufwasryesr wi God pal nukewa oana sie siyanyen, a nikmet lela kutena met ku kutena ma in kunausla ma God el fwalseni!​—Maika 6:8.

[Footnotes]

Ya Kom Esam?

• Efu ku moul in payuk lun met Kristian ku in sun pa ma upa puspus?

• Fuka sie mokul payuk el sang ma enenu lun mutan kiyel a akkalemye la el aksaokyel a lungse el?

• Mea sie mutan payuk el ku in oru in akkalemye la el akkalemye na paye sunak nu sin mokul tumal?

• Fuka mokul a mutan payuk elos ku in akkeye mwulela a kunokon lalos nu sin sie sin sie?

[Picture on page 20]

Sie mokul payuk el enenu in karungin mutan kiyel, tia ke me enenu in ikwe mukena a ke ma lun ngun pa

[Picture on page 19]

Sie mokul payuk su aksaokye a lungse mutan kiyel el sie sropon me akkeye nu sin mutan kiyel

[Picture on page 21]

Mutan Kristian payuk elos akkalemye pulakin a nunak lalos ke inkanek kulang su oasr sunak ka