‘Sulela Moul Tu Kom Fwa Ku In Moul’
“Nga filiye tari ye mutom moul a mise, me insemwomwo a me selnga; a ke ma inge sulela moul, tu kom fwa ku in moul.”—DUTERONOMI 30:19.
1, 2. Ke inkanek puspus fuka met u orekla in luman God?
“LELA kut in oru met in lem lumem.” Kas inge kas lun God su simusyukla ke sapta se meet lun Baibel. Aok, Genesis 1:26, 27 el akkalemye kas inge, “God El orala met in lumal sifwana, in luman God El oralla.” Ke ma inge, met se emeet el siena liki na ma orekla nukemwa saye fwin fwalu. El oana Met Oralla, el ku in etawi oiya mwomwo lun God in sang me top ku in orekmakin nunak, in akkalemye lungse, nununku sumwos, lalmetmet, a ku. Oasr yurol conscience ku pulakin a nunak in kasrel in orala sulela puspus su ku in akinsemwomwoyel sifwana a in akinsemwomwoye Papa tumal in kosrao. (Rom 2:15) Ke kas futoto, oasr yurol Adam sukosok in orala sulela lal sifwana. Ke el liye a tuni ke oreyen ma orekla lal inge oana mwen natul fwin fwalu, Jeova el akkalemye kas ke ma orekla lal inge: “Liye! tu nu arulana mwo.”—Genesis 1:31; Sam 95:6.
2 Kut oana tulik natul Adam, kut orekla pa oana luman God pana. Tusruktu, ya oasr na paye sukosok lasr in orala sulela lasr ke ma kut oru? Fwinne oasr ku lun Jeova in etu ma e fwa sikyak ke pal fwasru, el tia oakiya orekma nukemwa lasr oana met se met se a ke fwako lun orekma lasr. El tiana lela tulik nukemwa natul fwin fwalu in moulkin moul su oakiyuki tari. In kasre kut in etu ke yok sripaiyen orekmakinyen sukosok lasr in oru sulela mwomwo, lela kut meet in lutlutkin sie me lutlut ke oiyen mutanfwal lun Israel.—Rom 15:4.
Oasr Sukosok lun Met Israel in Oru Sulela
3. Mea masap se meet ke Masap Sengoul, a fuka met Israel elos oru sulela lalos in akos ma inge?
3 “Nga Jeova God lom, su wiskomme liki fwal Ijipt, liki loom sin met kos,” Jeova el fwak nu sin met Israel. (Duteronomi 5:6) In yea 1513 B.C.E., mutanfwal Israel elos moliyukla liki sruo lalos fwin an Ijipt a ke ma inge wangin sripe lalos in alolo ke kas inge. Ke masap se meet in Masap Sengoul, Jeova ke inkanek lal Moses met kaskas lal el akkalemye: “Nik kom eis siena God sayuk.” (Exodus 20:1, 3) Ke pal se inge, mutanfwal Israel elos oru sulela lalos in akos. Elos sifwana akkalemye lungse lalos in alu nu sin Jeova mukena.—Exodus 20:5; Oekyuk 25:11.
4. (a) Sulela fuka Moses el akkalemye nu sin met Israel? (b) Sulela fuka oasr yurosr ke pal inge?
4 Yea 40 kutu tok, Moses el sifwil akesmakinye siepa fwil lun met Israel nu ke oreyen sulela su elos enenu in oru ingena. “Nga pangon kosrao a fwalu in orek lo lain kom misenge,” el fwak, “tu nga filiye tari ye mutom moul a mise, me insemwomwo a me selnga; ke ma inge sulela moul, tu kom fwa ku in moul, kom a fute lom.” (Duteronomi 30:19) Oapana ke pal inge, kut ku in oru sulela lasr. Aok, kut ku in oru sulela lasr in kulansapu Jeova ke oiyen oaru paye a in oasr fwinsrak lun moul ma patpat, ku kut ku in oru sulela lasr in seakos el a fwa eis fwako koluk puspus lun sulela lasr. Loang mwo nu ke me pupulyuk luo lun metu su orala sulela lalos su tia oana sie.
5, 6. Sulela fuka Josua el orala, a mea fwokin ma inge?
5 In yea 1473 B.C.E., Josua el kol met Israel nu ke Fwal Mwolela. Oasr sie kas in kaifwe mwomwo su el akkalemye meet liki el mise, a Josua el akkeye mutanfwal se inge: “A fwin tia fwal nu sumwos in orekma nu sin Jeova, na komwos sulela misenge su komwos fwa orekma nu se, fwin god su papa tumomwos elos orekma nu se lefwalyat Infwalu, ku god lun met Amor su komwos muta in fwal selos.” Tokin ma inge, el sramsramkin sou lal, el tafwela: “A fono keik a loom sik, kut fwa orekma nu sin Jeova.”—Josua 24:15.
6 Meet liki pal se inge, Jeova el kaifwel Josua in akkalemye pulaik a in ku, sapkinyuk el an tia fwasr liki in akos Masap lun God. A, ke Josua el ridi buk lun Masap el enenu in rid in srik pusral ke len a fong, el fwa ku in oru inkanek lal in kapkapek. (Josua 1:7, 8) Josua el akos a el kapkapek a eis me insemwomwo ka. Sulela lal Josua kol nu ke me insemwomwo puspus. Josua el fwak: “A tia tula kutu srisrik sin kutena ma mwo su Jeova el kaskas ka nu ke loom sin Israel. Ma nukemwa akpayeyuk tari.”—Josua 21:45.
7. In len lal Isaia, sulela fuka kutu sin met Israel elos oru, a mea fwako koluk lun ma inge?
7 Ke oiya su tia oana sie, nunku ke ma sikyak nu sin met Israel tokin yea 700 kutu. In pal se inge, met Israel puspus elos orekmakin fasin puspus lun met pegan. Ke sie me pupulyuk, ke len safla lun sie yea, metu elos tukeni nu sie in orek kofwa su oasr me mongo yuyu puspus a wain mwomwo. Ma sikyak inge tia ma ke tukeni lun sou mukena. Tukeni inge el sie kain in tukeni in orek kofwa su sang akfulatye god luo lun met pegan. Met palu Isaia el simusla nunak lun God nu ke oiyen seakos lalos inge: “A komwos su fwasr liki Jeova, su mulkunla eol mutal sik, su ako sie tebu nu ke Engun, a su nekla ke wain karak nu ke Malane.” Elos lulalfongi mu lupa lulap ke ma elos fwa kosrani ke kais sie yea el tuku ke orekma lalos in akinsemwomwoye “god lun Engan” a “god lun Malane,” a tia ke sripen oasr me insemwomwo lun Jeova nu selos. Tusruktu, paye la, inkanek lalos in lain God a oru sulela lalos sifwana inge pa sripen ma upa nukemwa su elos sun. “Nga fwa filikomwosla nu ke kutlas,” Jeova el fwak, “a komwos nu kemwa fwa sumwoli nu ke anwuki; tu ke Nga pang, komwos tia topuk; ke Nga kaskas, komwos tia long; a komwos orekma koluk ye mutuk, a sulela ma Nga tia insemwomwo ka.” (Isaia 65:11, 12) Sulela koluk lalos kol nu ke kunanela lalos, a god lun Malane a Engan wangin ku lalos in kutongye ma inge.
Orekma in Oru Sulela Sumwos
8. In fwal nu ke Duteronomi 30:20, mea weang nu ke orekma in oru sulela sumwos?
8 Ke pal se Moses el kaifwe met Israel in sulela moul, el akkalemye ke inkanek tolu su elos enenu in oru: “In lungse Jeova God lom, in akos pusral, a in fulyung nu sel.” (Duteronomi 30:20) Lela kut in tuni kais sie inkanek inge in kasre kut in oru sulela sumwos.
9. Fuka kut ku in akkalemye lungse lasr nu sin Jeova?
9 In lungse Jeova God lom: Kut oru sulela in kulansapu Jeova meyen kut lungse el. In loang mwo nu ke me sensen su tuku ke me srikasrak in len lun met Israel, ma inge kasre kut in lain me srife nukemwa in oru orekma lun kosro a kut fwasr liki inkanek lun moul su ku in akkolukye kut ke sripen me sruf lun fwalu in lungse yok ke ma puspus. (1 Korint 10:11; 1 Timote 6:6-10) Kut enenu in fulyung nu sin Jeova a orekmakin masap lal pal nukemwa. (Josua 23:8; Sam 119:5, 8) Meet liki met Israel elos ilyuk nu ke Fwal Mwolela, Moses el kaifwelos: “Liye, nga luti tari nu sumwos ma sap a ma lo, oana Jeova God luk El sapkin nu sik, tu komwos fwa oru oinge in maslon fwal sa yen komwos utyuk nu we in usru. Ke ma inge liaung a oru ma sap inge; tu pa inge lalmetmet lomwos a etauk lomwos ye mutun mutanfwalu, su fwa long ma sap inge nu kemwa.” (Duteronomi 4:5, 6) Pa inge pal kut in akkalemye lungse lasr nu sin Jeova ke kut oru meet ma lungse lal ke moul lasr. Paye la kut fwa akinsemwomwoyeyuk kut fwin sulela in oru oinge.—Mattu 6:33.
10-12. Me luti fuka kut ku in lotela ke ma sikyak in len lal Noa?
10 In akos pusren God: Noa el “sie met luti lun sumwosmwos.” (2 Piter 2:5) Apkurun met nukemwa fwin fwalu meet liki Sronot tuku elos nunku yok ke ma puspus a elos “tia etu” ku tia loang mwo nu ke kas in sensen nukemwa lal Noa. Mea fwokin ma inge? “Sronot tuku, a wiselosla nukemwa.” Jisus el akkalemye kas in sensen nu ka la ke len lasr, ke lusen pal nu ke “oasr tari lun Mwen nutin met,” e fwa oasr oiya akkalemyeyuk su oana sie nu ke len lal Noa. Ma sikyak in len lal Noa el sie me sensen upa nu sin met nukemwa ke pal inge su oru sulela lalos in tia porongo a akos kas in sensen lun God.—Mattu 24:39.
11 Elos nukemwa su aksruksruki kas in sensen lun God su akkalemyeyuk sin met kulansap nukemwa lun God ke pal inge elos enenu in etu la mea fwa sikyak fwin elos tia porongo kas in sensen inge. Nu sin met aksruksruk puspus inge, met sap Piter el fwak: “Tu elos lungse in mulkunla ma inge la kosrao oasr omeet me, a fwalu orekyuk liki kof a tu infulwen kof, ke kas lun God; ke ma inge fwalu su on meeta, salongla ke kof a musalla. A kosrao a fwalu, su oinge, ke kas sana karunginyukyung nu ke e, nu ke len nununku a kunausla lun met koluk.”—2 Piter 3:3-7.
12 Sulela lal Noa a sou lal tia oana sie nu ke sulela lun met nukemwa inge. “Ke lalalfongi Noa ke God El kaifwel ke ma su sumwena tuku, in sangeng lal sin God el akoela soko oak.” Ke sripen el akos kas in sensen inge paenang ma inge sang kasru yok in molela sou lal. (Hibru 11:7) Lela kut in sa in long kas in sensen lun God a kut akkalemye akosten lasr nu ke ma inge.—Jemes 1:19, 22-25.
13, 14. (a) Efu ku in ‘fulyung nu sin Jeova’ el yok sripe? (b) Ke inkanek fuka kut enenu in lela Jeova, “met Potter lasr,” in ekulla nunak a oiya lasr?
13 In fulyung nu sin Jeova: In ‘sulela moul tu kut fwa ku in moul,’ kut tia akkalemye lungse lasr nu sin Jeova a akos pusral mukena a kut enenu pa in ‘fulyung nu sin Jeova,’ kalmen ma inge pa, kut in kafweang in oru ma lungse lal. “Ke mongfusesr lomwos komwos fwa eis moul lomwos,” Jisus el fwak. (Luk 21:19, NW) Paye la, sulela su kut oru nu ka el akkalemye ma oasr ke insiyesr. “Insemwomwo met se su sangeng pal e nu kemwa, a el su akupaye insiel fwa putatla nu in ma koluk,” Soakas 28:14 el akkalemye. Fero lun an Ijipt in pal meeta el sie me srikasrak nu ka. Ke kais sie me keok nu ke Me Keok Sengoul su sikyak fwin an Ijipt, Fero el akupaye insiel a el tia akkalemye sangeng lal nu sin God. Jeova el tia patkol Fero in seakos a el lela met kol inse fulat inge in sifwana oru sulela lal. Ne oinge, ma lungse lun Jeova akpayeyuk, oana ma met sap Poul el aketeye ke nunak lun Jeova kel Fero: “Ke sripe se inge Nga akfulatye kom, tu Nga in fwakak ku luk in kom, a tu ek a fwa sulkakinyukelik fwin fwalu nu fon.”—Rom 9:17.
14 Century puspus tokin met Israel elos moliyukla liki ku lal Fero, met palu Isaia el akkalemye: “O Jeova, Kom Papa tumasr. Kut kle, a kom met potter lasr; a kut nu kemwa orekma lun poum.” (Isaia 64:8) Ke kut lela Jeova in ekulla nunak a oiya lasr ke lusen sie pal ke inkanek lun lutlut lasr sifwana a in orekmakin Kas lal, ke inkanek inge kais kutu srisrik kut ku in nukomang oiyen met sasu. Kut ekla oana sie met fwokpap a fusrasr in lutiyuk, a oiya mwomwo inge kasre kut in fusrasr in akkalemye oaru lasr in fulyung nu sin Jeova meyen kut lungse na paye in akinsemwomwoyel.—Efesus 4:23, 24; Kolosse 3:8-10.
“Kom Fwakak Ma Inge Nu Selos”
15. In fwal nu ke Duteronomi 4:9, Moses el akesmakinye met Israel ke kunokon fuka luo?
15 Ke pal se met Israel elos apkurun in ilyuk nu ke Fwal Mwolela, Moses el fwak nu selos: “Ma sefwanna liyekomyung sifwana, a alken in liaung ngunum, saap kom mulkunla ma mutom liye, a saap elos wanginla liki insiom len nu kemwa in moul lom; a fwakak ma inge nu sin tulik nutum, a nu sin tulik nutin tulik nutum.” (Duteronomi 4:9) In eis me insemwomwo lun Jeova a in kapkapek ke fwal se su elos fwa usrui, met Israel elos enenu in akpayeye kunokon luo lalos ye mutun Jeova God lalos. Elos tia enenu in mulkunla ma mwomwo nukemwa su Jeova el orala ye mutalos, a elos enenu in luti ma inge nu sin tulik natulos. In oana met kulansap lun God ke pal inge, kut enenu pa in oru ma inge kut fwin lungse in ‘sulela moul tu kut fwa ku in moul.’ Mea kut liye tari ke mutasr sifwana su Jeova el oru tari kesr?
16, 17. (a) Mea missionary puspus su eis me akpa mwomwo ke Gilead elos akpayeye ke orekma in luti peng mwo lun Togusrai? (b) Me srikasrak puspus fuka sin met lili nukemwa su oru moniyuk lalos tia munasla kom etu?
16 Kut arulanu lut a insemwomwo in liye la fuka Jeova el akinsemwomwoye orekma lasr in luti peng mwo a orekma in oru met tuma lutlut. Ke mutamweyen Watchtower Bible School of Gilead in yea 1943, missionary puspus elos kol orekma in oru met tuma lutlut in an puspus. Mutamwauk in pal sa, missionary puspus su srola liki lutlut inge elos sruokye pal nukemwa ke oiyen moniyuk lalos nu ke orekma in luti peng mwo lun Togusrai, fwinne elos matu tari ke pal inge a kutu selos elos tia ku in sulkakin peng ke inkanek yok ke sripen manolos munasla. Sie me srikasrak mwo nu ka pa Mary Olson, su srola ke Gilead in yea 1944. El oru orekma lun missioanry in an Uruguay meet, tokin ma inge in an Colombia, a ingena in an Puerto Rico. Fwinne el munasla ke sripen el matu tari, Sister Olson el srakna akkalemye oiyen insemwomwo lal nu ke orekma in luti peng mwo. Ke sripen el lotela kas Spanish, paenang el orala akwuk in wi met luti puspus ke peng mwo in an se inge ke orekma lun forfor.
17 Oasr pa sie met lili su katinmas ke pal inge, inel pa Nancy Porter, su srola ke Gilead School in yea 1947, el srakna oru orekma in kulansap lal in an Bahamas. El siepa missionary su kafofo pal nukemwa ke orekma in luti peng mwo. “In luti met puspus ke ma paye lun Baibel el sropon me insemwomwo yok,” Sister Porter el fwak kas inge ke me sramsram lun moul lal.a “Ma inge kasre yu in oasr sie akwuk mwomwo nu ke orekma in alu nu sin God su use sie akwuk mwo a me akkeye ke moul luk.” Ke pal se Sister Porter a kutupa sin met kulansap oaru elos nunku ke pal somla, elos tia mulkunla ma Jeova el oru tari. Fuka nu sesr? Ya kut nunku ke inkanek lun Jeova la fuka el akinsemwomwoye orekma in luti peng mwo lun Togusrai ke an sesr a kut sang kulo wi kaksak lasr nu ka?—Sam 68:11.
18. Mea kut ku in lotela ke kut ridi me sramsram ke moul lun missionary puspus?
18 Kut arulanu kaksakin orekma mwomwo lun met puspus inge su kulansapu Jeova ke lusen pal loeloes ke ma elos orala tari a ke orekma su elos fwa akpayeye. Ke kut ridi me sramsram ke moul lalos paye la pa inge sropon me akkeye nu sesr meyen ke kut liye ma Jeova el oru nu sin met oaru nukemwa inge, el akkeye sulela lasr in kulansapu Jeova. Ya kom ridi pal nukemwa ke kain in me sramsram mwomwo inge su simusyukla ke Tauer in San a sifwilpa nunku ka?
19. Fuka papa a nine nukemwa su met Kristian elos ku in orekmakin mwo me sramsram ke moul lun met Kristian puspus su simusyukla ke Tauer in San?
19 Moses el akesmakinye met Israel la elos in tia mulkunla ma nukemwa su Jeova el oru nu selos a ma puspus inge enenu in oasr pal nukemwa ke insielos ke len nukemwa lun moul lalos. Tokin ma inge el akkalemye kutupa masap inge: “Kom fwakak ma inge nu sin tulik nutum, a nu sin tulik nutin tulik nutum.” (Duteronomi 4:9) Aok me sramsram ke moul lun sie met el sie me akkeye yok. Tulik fwusr su kapkapek elos enenu me srikasrak mwo puspus. Sister puspus wiyesr su soenna payuk elos ku in lotela me luti mwo puspus ke me srikasrak mwomwo lun sister matu wiyesr su sramsramkinyuk ke moul lalos oana ke akkalemyeyuk ke Tauer in San. Orekma in kulansap ke sie territory su kaskaskin kas saye ke an selos sifwana sang pal mwomwo nu sin brother a sister puspus in orekmakin pal yok lalos in kafofo ke orekma in luti peng mwo. Papa a nine nukemwa su met Kristian, efu ku komwos tia orekmakin experience lun missionary puspus su srola ke Gilead a sin kutupa met kulansap oaru in sang me akkeye nu sin tulik natumwos an in oru sulela lalos in sroang nu ke orekma in luti peng mwo pal nukemwa?
20. Mea kut enenu in oru in “sulela moul”?
20 Ke ma inge, fuka kais sie sesr ku in “sulela moul”? Ke inkanek in orekmakin me sang mwomwo ke oiyen sukosok in oru sulela in akkalemye nu sin Jeova la kut lungse el a ke kut tafwela in oru ke ku lasr kemwa in kulansapul ke el lela nu sesr in oru kunokon mwomwo inge. Aok, in oana ke Moses el akkalemye, Jeova “el moul lom a lusen len lom.”—Duteronomi 30:19, 20.
[Footnote]
a Srike liye “Insemwomwo a Sang Kulo Fwinne Oasr Ma Upa,” su simusyukla in Tauer in San ke malem lun June 1, 2001, sra 23-7.
Ya Kom Esam?
• Mea kom lotela ke me srikasrak puspus ke sulela su tia oana sie su kut akuteye?
• Inkanek puspus fuka kut enenu in oru in kasre kut in “sulela moul”?
• Kunokon fuka luo kut kaifweyuk in akpayeye?
[Petsa ke sra 13]
“Nga filiye tari ye mutum moul a mise”
[Petsa ke sra 16]
Orekma in porongo pusren God sang me molela nu sel Noa a nu sin sou lal
[Petsa ke sra 17]
Mary Olson
[Petsa ke sra 17]
Nancy Porter