“Akpayeye Komwos Sifwana”
“Komwos in sifwana srike komwos, komwos fwin muta in lalalfongi; akpayeye komwos sifwana.”—2 KORINT 13:5.
1, 2. (a) Fuka nunak luo ke lulalfongi lasr ku in akkolukye kut? (b) Mea sikyak in century se meet nu ke congregation lun met Korint su oru kutu met Kristian elos in fosek ka la piye inkanek sumwos elos fwal in fwasr ka?
OASR sie mokul el fwufwasryesr ke sie an, ne sun sie an ke inkanek el fwasr ka sengelik nu ke innek lukwe. Ke sripen el tia etu la piye inkanek soko su fwa kol nu ke an su el lungse in som nu we, el siyuk sin met puspus la piye innek soko su kol nu ke an su el e som nu we tusruktu el eis me top tia oana sie. Na oru el fosek, el kofla tafwela fwufwasryesr lal. Ke inkanek oapana inge, fwin oasr nunak luo ke lulalfongi lasr e ku in akkolukye kut pa. Kain in nunak luo inge ku in akmunasye ku akkolukye ku lasr in oru sulela, ku in oru in oasr nunak luo ke inkanek paye su kut enenu in fwasr ka.
2 Oasr sie oiya su sikyak ke congregation lun met Kristian in an Korint, in an Greece ke century se meet su ku in akkolukyelos. Oasr “met sap fulatlanu” su lain ku lun met sap Poul, fwakang: “Tu leta lal oasr koano a ku, a manol munas fwin liyeyuk, a kas lal piles.” (2 Korint 10:7-12; 11:5, 6) Kain in nunak inge ku in oru kutu met Kristian ke congregation fwin an Korint elos in fosek ke oiyen moul in fwufwasryesr lalos.
3, 4. Efu ku kut enenu pa in nunku yok ke kas in kai lal Poul nu sin met lili in an Korint?
3 Poul el oakiye congregation in an Korint ke el oru muteta lal nu we in yea 50 C.E. El muta in an Korint ke lusen “yea se a malem onkosr, a luti kas lun God inmasrlolos.” Paye la, “met Korint puspus, ke elos long, elos lulalfongi a baptaisla.” (Orekma 18:5-11) Poul el nunku yok ke ma mwomwo ke orekma in alu lun met lili wiyel nukemwa in an Korint. Sayen ma inge, met lili fwin an Korint elos simusla sie leta nu sel Poul a siyuk kas in kasru ke kutu ma. (1 Korint 7:1) Ke ma inge el sang kas in kasru mwomwo nu selos.
4 Poul el simusla, “Komwos in sifwana srike komwos, komwos fwin muta in lulalfongi, akpayeye komwos sifwana.” (2 Korint 13:5) In orekmakin kas in kai inge su ku in sang me kasru nu sin brother puspus fwin an Korint ke sripen alolo lalos ke inkanek su elos enenu in fwasr ka. Ma inge ku in sang pa me kasru nu sesr ke pal inge. Fuka kut ku in akos ku orekmakin kas in kai lal Poul inge? Fuka kut ku in etu fwin kut oasr ke lulalfongi ku tia? A mea eneneyuk nu ke orekma in akpayeye kut sifwana la mea oasr in kut?
“Komwos in Sifwana Srike Komwos Fwin Muta in Lulalfongi”
5, 6. Kain in akwuk mwomwo fuka oasr yurosr in srike fwin kut oasr ke lulalfongi, a efu oiya inge akwuk mwomwo?
5 Fwin srikeyuk sie orekma, pal nukemwa oasr sie met ku sie ma su eneneyuk in srikeyuk, a orekma in srikasrak inge enenu in orek fwal nu ke sie akwuk sumwos. Ke ma inge, tia lulalfongi lasr ku ma puspus su kut lulalfongi ka pa ma su fwa srikeyuk. A kut kais sie met fwa srikeyuk. In oru orekma in srike inge, oasr akwuk mwomwo lasr ka. On soko su Devid el orala el akkalemye: “Masap lun Jeova sumwosna, me aksasuye ngun; kas in luti lun Jeova payena, me aklalmetmetye met nukin. Ma lo lun Jeova sumwos, me akengunye inse; masap lun Jeova mutal, me akkalemye muta.” (Sam 19:7, 8) Oasr in Baibel masap sumwosmwos, kas in akesmakin mwomwo, a masap nasnaslanu lun Jeova. Kas mwomwo su oasr ka pa akwuk mwomwo nu ke orekma in srike.
6 In sramsramkin kas lun God inge, met sap Poul el fwak: “Tu kas lun God moul a ku a kosra liki kutlas su oasr luo muta, a fwakisye nu ke srela lun inse a ngun, a lun kupasr a marro, a sa in akilen nunak a papu lun inse.” (Hibru 4:12) Aok, Kas lun God ku in srike insiesr, la mea oasr ke nunak lasr. Fuka kais sie sesr ku in orekmakin ke moul lasr sifwana kas inge su arulanu kosra a ku? Met sim lun sam el akkalemye la fuka kut ku in orekmakin Kas lun God in srike insiesr. El fwak: “Insemwomwo met se . . . [su] engunak in masap lun Jeova; a el nunkauk ke masap Lal len a fong.” (Sam 1:1, 2) “Masap lun Jeova” el oasr ke Kas lun God, Baibel. Kut enenu in engankin in ridi Kas lun Jeova. Aok, kut enenu in orala sie akwuk in ridi ma inge ke inkanek su tia yok pusra, ku in sifwilpa nunku ka. Ke kut oru ma inge, kut enenu in lela ma nukemwa su simusyukla ka in srike kut.
7. Mea inkanek se meet kut in oru in srike fwin kut sruokye ma puspus su kut lulalfongi ka?
7 Ke ma inge, inkanek se meet in srike fwin kut srakna sruokye ma kut lulalfongi ka pa ke inkanek in rid a sifwilpa nunku ke Kas lun God a tuni la fuka lupan kaifweang lasr ku in akpayeye oiya lasr ke ma kut lotela tari. Kut ku in insemwomwo meyen kut eis me kasru puspus in etu a kalem ke Kas lun God.
8. Fuka me rid nukemwa su orekla sin “met kulansap oaru a lalmetmet” ku in kasre kut in srike kut fwin srakna sruokye ma paye puspus su kut lulalfongi ka?
8 Jeova el ase nu sesr me luti a kas in kasru puspus lal ke inkanek lun me rid nukemwa su orekla sin “met kulansap oaru a lalmetmet,” su aketeye Ma Simusla puspus. (Mattu 24:45) Ke me pupulyuk, srike nunku ke kusensiyuk puspus su oasr ke pok inge pangpang “Questions for Meditation” su oasr ke saflaiyen kais sie sapta in buk inge Draw Close to Jehovah.a Kusensiyuk nu ke me kalweni puspus su oasr ke buk inge orala pal mwomwo lasr kut in sifwilpa nunku yok ke me lutlut mwomwo nukemwa ka! Me lutlut puspus su aketeyuki tari ke magasin natusr inge, Tauer in San a Awake!, kasre kut pa in tuni kut sifwana fwin kut srakna lulalfongi ke ma paye nukemwa su kut lotela tari. In sramsramkin me lutlut puspus ke buk lun Soakas su aketeyuki ke Tauer in San su orekla ke kutu malem somla, oasr sie mutan Kristian el fwak: “Nga liye tu me lutlut nukemwa inge ku in orala me kasru mwomwo, me lutlut inge kasre yu in tuni kas luk, oiya, a ella luk fwin ma inge fwal nu ke akwuk sumwosmwos lun Jeova.”
9, 10. Me kasru fuka lun Jeova kasre kut in srike kut sifwana fwin kut srakna sruokye ma puspus su kut lulalfongi?
9 Kut eis pa kas in kasru a kas in akkeye puspus ke meeting nukemwa lun congregation, assembly, a toeni lulap nukemwa. Pa inge kutu inkanek su Jeova el orala in sang kasrelos nukemwa su met palu Isaia el palye ka: “A a fwa te oru in len safla, tu eol lun loom sin Jeova fwa oakiyuki fwin mangon eolu, a a fwa fulat liki toktoku; a mutanfwal nu kemwa fwa suror nu lu. A mutanfwal puspus fwa som a fwak: ‘Fwasru komwos, a lela kut in utyuk nu ke eol lun Jeova, . . . a El fwa luti nu sesr ke inkanek Lal, a kut fwa fwasr inkanek Lal.’ ” (Isaia 2:2, 3) Sie me insemwomwo in eis kas in kasru ke inkanek lun Jeova.
10 Sie pa inkanek in srike kut sifwana pa ke inkanek lun kas in kai su tuku sin met matou in ngun wekunang met Kristian elder nukemwa. Baibel el fwak kelos: “Met lili, sie met fwin konoiyukyak in kutena ma koluk, komwos su in ngun, fwa aksumwosye el su oinge in ngun lun fwokpap; a sifwana liyekomyung, saap kom ouyepa srifweyuk.” (Galetia 6:1) Kut arulanu engan ke me kasru mwo inge in sang aksumwosye kut.
11. Mea eneneyuk nu ke orekma in tuni lasr sifwana fwin kut srakna lulalfongi ke ma paye nukemwa ku tila?
11 Me rid nukemwa natusr su tuku ke Baibel, meeting nukemwa lasr, met elder ke congregation—ma inge nukemwa akkalemye me sang mwomwo su tuku sin Jeova me. Tusruktu, kut fwin lungse in etu la kut srakna sruokye lulalfongi ke ma paye nukemwa su kut lulalfongi meet, kut enenu in tuni kut sifwana. Paenang ke pal se kut ridi me rid natusr ku ke kut long ke sie kas in kasru su tuku ke Baibel, kut enenu in siyuk sesr sifwana: ‘Ya me lutlut se inge el akkeye yu oana sie met su oru ma mwo? Ku ya nga oru ma tia fwal? Ya nga fwasr fwal nu ke me luti mwomwo nukemwa su met Kristian elos lulalfongi?’Oiya lasr nu ke kas in kasru nukemwa su kut eis ku in sang kasru orekma in alu lasr nu sin God. Baibel el fwak: “Inge met, su luman met, el tia eis ma lun Ngun lun God, tu ma lalfon nu sel. Tusruktu, el su met matou in ngun, el tuni ma nu kemwa.” (1 Korint 2:14, 15, NW) Ya kut tia kaifweang in sruokye nunak mwo a oiya mwo nu ke ma kut ridi tari ke buk natusr, magasin natusr, a ke kutupa me rid natusr su tuku ke Baibel a ke ma kut long ke meeting nukemwa lasr a sin met elder nukemwa?
“Komwos in Akpayeye La Oiya Fuka Komwos Sifwana Akkalemye”
12. Mea eneneyuk nu ke orekma in akpayeye oiya paye lasr sifwana?
12 In akpayeye oiya paye lasr kut enenu pa in tuni kut sifwana. Aok, kut ku in oasr ke inkanek lun ma paye, tusruktu fuka lupan kaifweang lasr in akfwalye moul lasr nu ke ma paye. In wekunang nu ke orekma in akpayeye kut sifwana enenu in sang me akpayeye nu ke kapkapek lasr ke orekma in alu nu sin God a in akkalemye kulo lasr nu ke me sang nukemwa lun God in akkeye lulalfongi lasr.
13. In fwal nu ke Hibru 5:14, mea me akpayeye nu ke oiyen matu lasr?
13 Me akpayeye fuka ke oiyen matu lasr oana met Kristian kut ku in liye kesr sifwana? Met sap Poul el simusla: “A mongo upa fwal nu sin met matu, aok, nu selos su pala ka, a ku in akilen ma mwo a ma koluk.” (Hibru 5:14) Kut sang me akpayeye ke oiyen matu ku kapkapek lasr ke kut akpaye nunak lasr. Oana ke sie tulik sritel el asrosr a sang akpa nu ke muscles lun manol pal puspus meet liki el ku in mano ku sumat ke sritel lal, ku lasr in nunak enenu in akpayeyuk ke kut orekmakin masap sumwos ke Baibel pal nukemwa.
14, 15. Efu kut enenu in kaifweang in lutlut ke ma loal ke Kas lun God?
14 Tusruktu meet liki kut ku in akpaye ku lasr in nunak, kut enenu in eis etauk. Ke ma inge, lutlut lasr sifwana el eneneyuk a yok sripe. Ke pal se kut oru lutlut lasr sifwana—yokna ke ma loal ke Kas lun God—ku lasr in nunak akkeyeyuk. In pal somla, me lutlut loal puspus aketeyuki ke magasin inge Tauer in San. Oiya fuka kut akkalemye ke kut lutlutkin sie me lutlut su aketeye ma loal ke ma paye? Ya kut tui ku fwasr liki in lutlutkin ma inge meyen oasr “kutu ma upa in eteyuk”? (2 Piter 3:16) Mo tia oinge, a kut kaifweang in suk la mea akkalemyeyuk ke me lutlut san.—Efesus 3:18.
15 Fuka fwin lutlut lasr sifwana el upa nu sesr in oru? Arulanu yok sripe kut in kaifweang in lutlut in orekmakin a engankin me lutlut su oasr kalem mwomwo ka.b (1 Piter 2:2) In kapkapek ke oiyen matu kut enenu in eis me akkeye su tuku ke me mongo upa, ku ma loal ke ma paye ke Kas lun God. Kut fwin tia oru ma inge, ku lasr in nunak fwa tia kapkapak pal nukemwa. Tusruktu, in sang me akpayeye nu ke oiyen matu, oasr ma eneneyuk su yok liki in eis ku in nunak mukena. Len nukemwa kut enenu in orekmakin ke moul lasr etauk su kut lotela ku eis tari ke inkanek in lutlut lasr sifwana.
16, 17. Kas in kasru fuka met tuma lutlut Jemes el sapkin kut in oru in ekla “met orekma ke kas lun God”?
16 Me akpayeye nu ke oiyen paye lasr sifwana ku in koneyukyak pa ke orekma puspus lasr nu ke ma paye wikin orekma su akkalemye kulo a insemwomwo lasr nu ke ma paye—pa inge orekma puspus lasr ke lalalfongi. Met tuma lutlut Jemes el orekmakin sie me pupulyuk in sang akkalemye oiya paye lasr nu ke ma inge, el fwak: “Komwos in met orekma ke kas lun God, a tia long mukena, tu komwos su oinge sifwana kiapekomwosla. Tu kutena met fwin long kas a tia orekma ka, el oana sie met su liye mutal in selngun. Tu el sifwana liyel, a ke el som a kitenmisenge el mulkunla lumal el la met su. Tu el su suiye ma sap fwal, su sap lun sukosok a muta lu, a el tia met long ou el su mulkunla, tu el met oru su orekma, met oinge fwa insemwomwo in orekma lal.”—Jemes 1:22-25.
17 Ke fus inge Jemes el kaifwe kut in: ‘Suiye selngun ke Kas lun God, a tuni kom sifwana. Kaifweang in oru ma inge, a tuni moul lom sifwana fwin ma inge fwal nu ke ma kom koneak ke kas lun God. Tokin ma inge, nik kom sa in mulkunla ma kom liye tari. Oru me aksumwos su eneneyuk.’ Oasr pal upa in orekmakin kas in kai inge.
18. Efu ku in akos kas in kai lal Jemes orala sie ma upa?
18 Nunku ke sie me pupulyuk, fwin sramsramkinyuk me enenu nu ke orekma in luti peng mwo lun Togusrai. Met sap Poul el simusla: “Tu ke insie sie met el lalalfongi nu ke sumwosmwos; a ke oalu el fwakak nu ke moul.” (Rom 10:10) In fwakak molela nu sin met puspus ke kut orekmakin oalusr, oasr me aksumwos puspus su eneneyuk. Apkurun kut nukemwa in etu la orekma in luti el upa tia ma fusrasr se nu sesr. Kut fwin akkalemye moniyuk in luti a in aksaokye orekma inge oana sie ma su arulanu yok sripe nu ke moul lasr, yok eneneya in oasr ekla yok akilenyuk wikin kaifweang puspus lasr. (Mattu 6:33) Tusruktu ke pal se kut wi ke orekma inge su God el sapkin nu sesr, kut insemwomwo ka ke sripen orekma inge ku in sang kaksak nu sin Jeova. Ke ma inge, ya kut sie sin met moniyuk in luti ke peng mwo lun Togusrai?
19. Mea eneneyuk nu ke orekma nukemwa lasr ke lulalfongi?
19 Fuka orekma nukemwa lasr ke lulalfongi arulana eneneyuk? Poul el fwak: “Ma su komwos lutlut ka, a eis, a long, a liye in nga, komwos in oru ma inge, a God lun misla El fwa muta yurumwos.” (Filippai 4:9) Kut akpayeye oiyen paye lasr ke kut orekmakin ma kut lotela tari, eis, long a liye tari, a akpayeye orekma nu ke mwolela lun moul lasr oana met Kristian a oru orekma mwo lasr oana met tuma lutlut ke inkanek nukemwa. Jeova el akkalemye kas inge ke inkanek lun met palu Isaia: “Pa inge inkaneku, komwos fwasr we.”—Isaia 30:21.
20. Kain in met puspus fuka ku in me akinsemwomwo yok nu ke congregation?
20 Mokul puspus a mutan puspus su moniyuk in lutlut ke Kas lun God, elos met moniyuk in luti ke peng mwo, su wangin metalos, a elos su oaru in sang kasru pal nukemwa nu ke Togusrai pa me insemwomwo yok nu ke congregation. Elos sang kasru in oru congregation su elos wi in ku a fukoko. Elos akpayeye la elos me kasru mwomwo, yokna nu sin met sasu puspus ke congregation su enenu in eis kasru. Ke kut nunku yok a orekmakin me kai lal Poul su fwak ‘komwos in sifwana srike komwos, komwos fwin muta in lulalfongi, akpayeye komwos sifwana,’ tu kut fwa ku in ekla me akkeye mwomwo nu sin met lili puspus.
Engankin in Oru Ma Lungse lun God
21, 22. Fuka kut ku in engankin in oru ma lungse lun God?
21 Togusra Devid lun Israel in pal meeta el on: “Nga engun in oru ma lungse lom, O God luk, aok, masap Lom on insiuk.” (Sam 40:8) Devid el engankin in oru ma lungse lun God. Efu? Meyen masap lun Jeova on ke insiel Devid. Devid el arulanu etu inkanek su el enenu in fwasr ka.
22 Fwin masap lun God on ke insiesr, kut tia enenu in akkalemye nunak luo la piye inkanek kut enenu in fwasr ka. Kut engankin in oru ma lungse lun God. Ke ma inge, ke inkanek nukemwa lela kut in ‘kaifweang na paye’ ke kut kulansap nu sin Jeova ke insiesr kemwa.—Luk 13:24.
[Footnotes]
a Orekla sin Met Lo lun Jeova.
b Oasr ke sra 27-32 ke buk inge Benefit From Theocratic Ministry School Education me kasru puspus ke inkanek in oru lutlut mwo, buk inge orekla sin Met Lo lun Jeova.
Ya Kom Esam?
• Kut ku in srike kut fuka fwin kut oasr ke lulalfongi?
• Mea eneneyuk nu ke orekma in akpayeye oiyen paye lasr?
• Me akpayeye fuka kut ku in akkalemye ke oiyen moul in met matu lasr oana met Kristian?
• Fuka orekma nukemwa lasr ke lulalfongi kasre kut in etu oiyen paye lasr?
[Petsa ke sra 9]
Ya kom etu ke inkanek su mwo emeet in sang srike kom fwin oasr ke lulalfongi?
[Petsa ke sra 10]
Kut akkalemye me akpayeye ke oiyen moul in met matu lasr oana met Kristian ke inkanek in orekmakin ku lun nunak lasr
[Petsa ke sra 11]
Kut akpayeye oiyen paye lasr ke kut ‘tia mulkunla ma kut long, a met orekma ke kas’