Peng Mwo Nu Sin Met In Mutanfwal Nukemwa
“Komwos fwa met orek lo keik . . . nu ke yen loesilanu fwalu.”—OREKMA 1:8.
1. In oana met luti ke kas lun God, mea kut enenu in loang mwo nu ka, a efu?
MET luti mwomwo elos tia loang mwo mukena nu ke ma elos srumon nu sin tulik lutlut lalos a elos oayepa loang mwo nu ke inkanek su elos orekmakin in luti ma inge. In oana met luti ke ma paye lun Baibel, kut oru pa ma inge. Kut loang mwo nu ke peng su kut fwakak a ke inkanek puspus kut orekmakin. Peng mwo lasr ke Togusrai lun God el tia ekyek, tusruktu kut akpayeye ku akfwalye inkanek lasr. Efu? In ku in sun kain in met puspus ke an sesr.
2. Ke kut akfwalye inkanek in luti lasr, kut etawi su?
2 In akfwalye inkanek lasr in luti peng mwo, kut etawi met kulansap puspus lun God in pal meeta. Ke sie me pupulyuk, nunku kel Poul. El fwak: “A nu sin met Ju Nga oana met Ju . . . Nu selos su wangin sap yurolos, oana wangin sap yuruk . . . Nu selos su munas, Nga munas, tu in sun met munas. Nga ma nu kemwa nu sin met nu kemwa, tu ke ma nu kemwa Nga in molela kutu.” (1 Korint 9:19-23) Oasr fwako mwo puspus ke orekma lal Poul ke el akfwalye inkanek in luti lal fwal nu ke ma enenu lun kais sie met. Oasr pa fwako mwo lun orekma in luti lasr kut fwin akpayeye ku akfwalye me sramsram lasr ku kas in mutamwauk lasr in akfwalye nu sin met puspus su kut sramsram nu se.
Nu ke “Saflaiyen Fwalu”
3. (a) WMa upa fuka kut sun ke orekma in luti lasr? b) Kas in Isaia 45:22 el akpayeyuk fuka ke pal inge?
3 Sie ma upa su sun met puspus su oru orekma in luti peng mwo pa ke yokiyen territory “fwin fwalu nufon.” (Mattu 24:14) Ke lusen century somla, pus sin met kulansap lun Jeova elos kaifweang yok in sun an sasu puspus in sulkakin peng mwo. Mea fwako mwo lun ma inge? Oasr kapkapak yok fwin fwalu nufon. Ke mutamweyen yea 1,900, orekma in luti peng mwo orek mukena ke kutu an, tusruktu ke pal inge Met Lo lun Jeova elos oru orekma inge in an 235! Paye, peng mwo lun Togusrai el sulkakinelik yen nukemwa sun “saflaiyen fwalu.”—Isaia 45:22
4, 5. (a) Su sang me kasru mwo in sulkakin peng mwo? (b) Mea kutu branch ofus elos fwak ke met lili puspus su tuku ke an saye in oru orekma in kulansap ke territory lun branch lalos?
4 Mea sripe puspus ke kapkapek inge? Oasr ma puspus. Missionary puspus elos eis akpa in akmwoye orekma in luti lalos ke Watchtower Bible School of Gilead, a ke kutupal somla, oasr met 20,000 srola tari ke Ministerial Training School su sang kasru yok nu ke kapkapek inge. Oayepa Met Lo puspus su som nu ke an puspus su oasr me enenu yok ke met luti peng mwo lun Togusrai we. Met Kristian inge nukemwa su akkalemye oiyen lafwekunelos sifwana, sin mokul a mutan puspus, met matou a met fwusr, elos sang kasru yok in luti peng mwo lun Togusrai fwin fwalu nu fon. (Sam 110:3; Rom 10:18) Elos nukemwa aksaokyeyuk na paye. Loang mwo la mea kutu branch ofus elos simusla ke met lili puspus su oru orekma in kulansap lalos in an saye su oasr me enenu yok ke territory lun branch we.
5 “Met Lo saoklana inge nukemwa elos akkalemye me srikasrak mwo ke orekma in luti peng mwo nu ke an loeslanu, elos sang kasru in oakiye congregation sasu puspus, a sang kasru in akkeye lalalfongi lun met lili mokul a mutan puspus.” (an Ecuador) “Fwin met lili puspus su tuku ke mutanfwal saye in oru orekma in luti in an inge elos folokla, congregation puspus inge efwa munasla. Sie me insemwomwo yok elos fwin mutana yurosr.” (an Dominican Republic) “Ke congregation puspus lasr, pisen sister pa pus kutu pal su piselos oasr ke percent 70. (Sam 68:11) Pus sin sister inge elos tufwana eis baptais lalos, tusruktu nu sin sister puspus su sonna payuk a elos wi ke orekma lun pioneer su tuku ke an puspus saye elos sang me kasru yok ke elos oru orekma in akpa nu sin met orekma sasu nukemwa inge. Sister nukemwa su tuku ke an saye inge pa sang me kasru mwomwo nu sesr!” (sie an in Eastern European) Ya kom nunku tari in oru orekma in kulansap ke mutanfwal saye?—Orekma 16:9, 10.
“Met Sengoul Tuku Liki Kas Nukemwa”
6. Fuka Zekaraia 8:23 el ku in sramsramkinyuk nu ke ma upa ke orekma in luti lasr?
6 Oasr sie ma upa yok ke kain in kas puspus su kaskaskinyuk fwin fwalu. Kas lun God el palye: “In len ingo a fwa te oru, met siengoul fwa srukye, liki kas nu kemwa lun mutanfwalu, elos fwa srukye nuknuk lun sie met Ju, fwakang: ‘Kut fwa wi kom som, tu kut long tu God el oasr yurumwos.’ (Zekaraia 8:23) In oana me akpayeye ke kas palu in pal inge, met sengoul el lumeyuk nu sin u lulap, su palyeyuk tari in Fwakyuk 7:9. Tusruktu, loang akwoye nu ka la in fwal nu ke kas palu lal Zekaraia, “met sengoul” inge tia tuku liki mutanfwal nukemwa a elos tuku pa liki kain in “kas nukemwa lun mutanfwal nukemwa.” Ya kut liye tari akpayeyen kas palu inge? Aok, kut liye tari.
7. Mea sikyuk in akkalemye la peng mwo el sun tari met puspus “liki kas nukemwa?”
7 Nunku ke ma puspus su sikyuk tari. Yea lumngoul somla me rid lasr orekla ke kas 90. Ke pal inge, pise inge oasr ke kas 400. “Met kulansap oaru a lalmetmet” elos orekmakin inkanek mwo nukemwa in orala me rid nukemwa fwinne ke kutu kas su kaskaskinyuk sin met pu na. (Mattu 24:45) Ke sie me pupulyuk, me rid su tuku ke Baibel oasr tari ke pal inge in kas Greenlandic (su kaskaskinyuk sin met 47,000), Palauan (su kaskaskinyuk sin met 15,000 tausen), a kas Yap (su kaskaskinyuk sin met su supus liki met 7,000 tausen).
“Sie Srungul Lulap” Kol nu ke Oiya Mwomwo Sasu
8, 9. Mea paenang in ikakla “sie srungul lulap” nu sesr, a fuka tausen puspus sin Met Lo elos akkalemye insemwomwo lalos nu ka?
8 Tusruktu, ke pal inge, kut tia enenu in som nu ke an saye in sulkakin peng mwo nu sin met puspus ke kas ku loa nukemwa. Ke kutu yea somla, million puspus sin met su lungse in muta ke sie mutanfwal (immigrants) ku met puspus su kaengla liki mutanfwal selos (refugees) elos tuku nu ke mutanfwal mwo puspus su oasr akwuk mwo nu ke orekma lun kuka, orala in oasr kain in kas puspus su kaskaskinyuk ke mura san . Ke sie me pupulyuk, in an Paris, France, oasr kain in kas 100 su kaskaskinyuk in an inge. In an Toronto, Canada, pisen kas kaskaskinyuk oasr ke 125; a in an London, England, pus liki kas 300 kaskaskinyuk! Oasr lun met puspus su tuku ke mutanfwal puspus saye nu ke territory lun congregation puspus ikasla “srungul lulap” su kol nu ke oiya mwomwo puspus in sulkakin peng mwo nu sin met puspus in mutanfwal nukemwa.—1 Korint 16:9.
9 Tausen puspus sin met elos akkalemye lungse lalos in sulkakin peng mwo ke kas saye ke elos lotela kain in kas saye. Pus selos, oiya inge arulanu upa nu selos; tusruktu ke kaifweang lalos oasr me akinsemwomwo yok pulakinyuk su tuku ke orekma in kasru nu sin met puspus inge su pangpang immigrants a refugees in lotela ma paye su koneyukyak ke Kas lun God. Ke kutu yea somla, apkurun percent 40 sin met nukemwa su eis baptais ke toeni lulap lun district in sie an in an Western Europe elos tuku ke an puspus saye.
10. Kom orekmakin fuka buk srisrik inge Good News for People of All Nations? (Liye pok inge “Features of the Booklet Good News for People of All Nations,” in sra 16.)
10 Paye, pus inmasrlosr wangin pal mwomwo lalos in lotela kutena kas saye. Fwinne oinge, kut ku in kasru met puspus saye ke inkanek in orekmakin mwo buk srisrik inge su pangpang Good News for People of All Nations,a su koanon buk srisrik inge pa peng mwomwo lun Baibel ke kas puspus. (Jon 4:37) Ya kom orekmakin buk srisrik inge ke orekma in luti peng mwo?
Fwin Metu Tia Akkalemye Oiya Mwo nu ke Peng Mwo
11. Mea kutupa ma upa su sikyuk ke kutu an?
11 Ke orekma in akkoluk lal Setan yokyokelik fwin fwalu, oasr siepa ma upa akkalemyeyuk pal nukemwa, oiya se inge pa wanginla insemwomwo lun metu in long peng mwo ke kutu an. Aok, oiya inge tia me aklutye kut, meyen Jisus el palye tari la kain in oiya inge fwa sikyuk. In sramsramkin len lasr, el fwak: “Lungse lun met puspus fwa eoulla.” (Mattu 24:12) Paye la, lulalfongi nu sin God a akfulatyeyen Baibel sriksrikeni inmasrlon met puspus. (2 Piter 3:3, 4) Ke ma inge, oasr kutu an fwin fwalu, met pu na elos ekla met tuma lutlut lun Kraist. Tusruktu, oiya inge tia kalmekin la orekma lun met lili Kristian wiyesr su akkalemye oaru lalos pal nukemwa ke orekma in luti ke territory puspus inge wangin sripe. (Hibru 6:10) Efu? Meyen ke ma puspus su akkalemyeyuk inge.
12. Nien sun fuka luo oasr ke orekma in luti peng mwo lasr?
12 Gospel lun Mattu el akkalemye ke nien sun luo su eneneyuk yok ke orekma lun forfor lasr. Sie pa kut “oru met in mutanfwal nu kemwa tu elos in met tuma lutlut.” (Mattu 28:19) Sie pa ke peng mwo lun Togusrai el sie “ma lo.” (Mattu 24:14) Ma luo inge kewa yok sripe, tusruktu oasr kalme yok lun ma se safla inge. Efu?
13, 14. (a) Mea ma yok sripe ka in etu ke oasr tari lun Kraist? (b) Mea kut enenu in esam, yokna kut fwin oru orekma in luti ke territory puspus su met puspus elos tia insemwomwo in long ka?
13 Mattu su sie met sim lun Baibel el simusla la met sap puspus elos siyuk sin Jisus: “Mea akulin tuku lom a saflaiyen akwuk koluk inge?” (Mattu 24:3,NW) In topuk, Jisus el fwak ke sie me akul mwo nu ka pa orekma in luti peng mwo fwin fwalu nu fon. Ya el sramsramkin orekma in oru met tuma lutlut? Mo. El fwak: “A mwosasu inge lun togusrai fwa sulkakinelik fwin fwalu nufon tu in ma lo nu sin mutanfwal nu kemwa.” (Mattu 24:14) Ke ma inge Jisus el akkalemye la orekma in luti peng mwo lun Togusrai fwa sie ma yok ke akul puspus inge.
14 Ke ma inge, ke kut sulkakin peng mwo lun Togusrai, kut enenu in esam la fwinne kut tia kutangla in orala met tuma lutlut, paye kut kutangla in sang “ma lo.” Fwinne met puspus elos akkalemye lungse ku srunga lalos in long peng mwo, elos etu ma kut oru, ke ma inge kut sang kasru in akpayeye kas palu lun Jisus. (Isaia 52:7; Fwakyuk 14:6, 7) Jordy, sie mokul fwusr in an Western Europe el fwak: “In etu la Jeova el orekmakin yu in sang kasru in akpayeye Mattu 24:14 ore yu in arulanu engan.” (2 Korint 2:15-17) Wangin alolo la kom pula pa ma inge.
Fwin Orekma in Luti Peng Mwo Lasr Lainyuk
15. (a) Ke mea Jisus el sang kas in sensen nu sin met tuma lutlut lal? (b) Mea kasre kut in oru orekma in luti fwinne oasr me lain?
15 Me lain upa puspus orala siepa ma upa nu ke orekma in luti peng mwo lun Togusrai. Jisus el sang kas in sensen nu sin met tuma lutlut nukemwa lal: “Mutanfwal nu kemwa fwa srunge komwos ke ek.” (Mattu 24:9) In oana met Kristian in pal meeta, met kulansap nukemwa lun Jisus ke pal inge srungeyukla, lainyuk, a kalyaiyuk. (Orekma 5:17, 18, 40; 2 Timote 3:12; Fwakyuk 12:12, 17) In kutu an, orekma lalos tulokinyuk sin guferment puspus ke pal inge. Ne oinge, ke sripen elos lungse in akos God, met Kristian paye ke an puspus inge elos tafwela orekma lalos in luti peng mwo lun Togusrai. (Emos 3:8; Orekma 5:29; 1 Piter 2:21) Mea kasrelos in oru ma inge wekunang Met Lo puspus fwin fwalu na fon? Jeova el akkeyelos ke inkanek lun ngun mutal lal.—Zekaraia 4:6; Efesus 3:16; 2 Timote 4:17.
16. Fuka Jisus el akkalemye la oasr kasru lun ngun mutal lun God nu ke orekma in luti peng mwo?
16 Jisus el akkalemye yok la ngun lun God a orekma in luti peng mwo el kupasr nu sin sie sin sie ke pal se el fwak nu sin met tuma lutlut lal: “Komwos fwa eis ku, ke ngun mutal el tuku nu fwomwos, a komwos fwa met orek lo keik . . . nu ke yen loesilanu fwalu.” (Orekma 1:8; Fwakyuk 22:17) Ma sikyuk nukemwa su akkalemyeyuk ke ma simusla inge el yok sripe. Ma se meet, met tuma lutlut elos eis ngun mutal, a tokin ma inge elos oru orekma in sang ma lo fwin fwalu nu fon. Ke kasru lun ngun mutal lun God mukena elos ku in eis ku in muteng ke orekma in sang “ma lo nu ke mutanfwal nukemwa.” (Mattu 24:13, 14; Isaia 61:1, 2) Ke ma inge, arulanu fwal ke, Jisus el akkalemye la ngun mutal el oana sie “me kasru.” (Jon 15:26) El fwak la ngun mutal lun God fwa luti a kol met tuma lutlut nukemwa lal.—Jon 14:16, 26; 16:13.
17. Fwin me lain upa sun kut, fuka ngun mutal el kasre kut?
17 Ke inkanek puspus fuka ngun mutal lun God el kasre kut ke pal inge kut fwin sun me kalyai upa ke orekma in luti peng mwo? Ngun mutal lun God akkeye kut, a el lain elos nukemwa su kalyai kut. In sang me pupulyuk nu ke ma inge, nunku ke ma sikyuk nu ke moul lal Togusra Soul.
Lainyuk ke Ngun Mutal lun God
18. (a) Ma koluk yok fuka Soul el sun? (b) Inkanek puspus fuka Soul el orekmakin in sang kalyael Devid?
18 Soul el mutamwauk mwo ke togusra lal oana togusra se meet lun an Israel, tusruktu ke pal tok, el seakos Jeova. (1 Samuel 10:1, 24; 11:14, 15; 15:17-23) Ke saflaiya, ngun lun God el tila kasru togusra inge. Soul el mutamwauk in akkalemye mulat lal nu sel Devid, su akmusrala tari oana sie togusra toko a ingena el engankin kasru lun ngun mutal lun God. (1 Samuel 16:1, 13, 14) Devid el arulanu fusrasr in akkolukyeyuk. Meyen oasr yurul me sritel nu ke on su pangpang arp, a Soul el oasr yurul sie me pusr. Oinge ke sie len ke Devid el sritelkin arp natul, “Soul el sisla me fwakfuk natul a fwak: ‘Nga fwa fwaksilye Devid nu ke sisken loomu!’ A Devid el srola liki ye mutal pal luo.” (1 Samuel 18:10, 11) Tokin ma inge, Soul el porongo mwen natul su pangpang Jonetan, met kawuk lal Devid, a el fulak: “Oana Jeova el moul, [Devid] el efwa tia anwuki.” Tia pat tokin ma inge, Soul el sifwil pa “srike in fwaksilye Devid nu ke sisken loomu ke mwusra soko.” Tusruktu, Devid el “srola liki ye mutal Soul, a el fwakisye sisken loomu ke mwusra sokoa.” Devid el kaengla, tusruktu Soul el ukwel. Ke pal in ma upa inge, ngun mutal lun God el ekla me lain nu sel Soul. Ke inkanek fuka?—1 Samuel 19:6, 10.
19. Fuka ngun lun God el karungunal Devid?
19 Devid el kaengla nu yurol Samuel met palu, tusruktu Soul el supwela met puspus lal in sruokilye Devid. Tusruktu ke elos tuku nu ke an in wukwuk lal Devid, “ngunin God tuku nu fwin met roso lal Soul, a elos ouyepa palye.” Ngun lun God nakulosla paenang elos mulkunla na paye nien sun lalos la efu ku elos som nu we. Oasr pa pal luo ke Soul el supwela met puspus in sruokilya Devid a usalla, sifwil pa na sikyuk oana ma sikyuk ke kais sie pal meet. Ke saflaiye, Togusra Soul el sifwana som nu yurol Devid, tusruktu Soul el tia pana ku in lain ngun lun God. Meyen ke payeiya, ngun lun God tingtingi in el oral in tia ku in mukuikui “len sa nufon a fong sa nufon”—in sang pal fwal nu sel Devid in kaengla.—1 Samuel 19:20-24.
20. Me lutlut fuka kut ku in lotela ke me sramsram ke orekma lal Soul in sang kalyael Devid.?
20 Oasr me akkeye mwomwo ke me sramsram inge kel Soul a Devid: Met nukemwa su lain met kulansap lun God tia ku in kutangla fwin lainyuk ke ngun lun God. (Sam 46:11; 125:2) Jeova el akoella Devid in fwa togusra fwin an Israel nufon. Wangin met ku in ekulla ma inge. Ke pal inge, Jeova el sapkin “peng mwo lun togusrai fwa sulkakinyukelik.” Wangin sie met ku in tulokinye orekma inge in akpayeyuk.—Orekma 5:40, 42.
21. (a) Mea kutu met lain elos oru ke pal inge? (b) Ke mea kut lalalfongi?
21 Kutu met kol lun alu a met kol lun politic elos orekmakin kas kikiap a orekma sulallel in sang tulokinkuti. Tusruktu, in oana ke Jeova el karungunal Devid ke oiyen ngun, ke inkanek inge el fwa karungin pa met lal ke pal inge. (Malakai 3:6) Ke ma inge, in oana Devid, kut ku in fwak ke lalalfongi: “In God Nga lalalfongi. Nga fwa tia sangeng. Mea met elos ku in oru nu sik?” (Sam 56:11; 121:1-8; Rom 8:31) Ke kasru lun Jeova, lela kut in kaifweang in muteng ke ma upa nukemwa ke kut akpayeye kunokon lun God nu sesr in oru orekma in luti peng mwo lun Togusrai nu sin metu in mutanfwal nukemwa.
[Footnote]
a Orekla sin Met Lo lun Jeova.
Ya Kom Esam?
• Efu kut enenu in akfwalye inkanek puspus lasr in oru orekma in luti?
• Kain in “srungul lulap” fuka su kol nu ke pal mwo puspus ikakla tari?
• Mea orekma in luti lasr el akpayeye, fwinne ke territory puspus su metu tia loang mwo ke peng mwo?
• Efu ku wangin met lain ku in tulokinye orekma in luti peng mwo lun Togusrai?
[Box/Picture on page 16]
Koanon Buk Srisrik Inge Good News for People of All Nations
Oasr ke buk srisrik inge Good News for People of All Nations ke kas ke peng mwo su oasr ke kais sie sra in buk inge su akkalemyeyuk ke kas 92. Kas ke peng mwo inge simusyukla ke inkanek su orekmakinyuk nu ke sramsram sumwos nu sin sie met. Paenang ke pal se met in loomu el ridi ke peng ka, oana el an pulakin sramsram sumwos nu sel.
Oasr map ke fwalu on luen kolo ka u. Orekmakin map inge in oana sie inkanek in akwuk nu ke sie sramsram mwo nu sin met in loomu. Saap kom ku in srusngiye nu ke mutanfwal su kom muta we a akkalemye nu sel la kom lungse in etu an su el muta we. Ke inkanek inge, kom ku in kasrel in akkalemye nunak lal a in orala sie oiya mwo in oasr sramsram mwomwo inmasrlomwos.
Oasr inkanek puspus su oasr ke kas in mutamwauk ke buk srisrik inge su kut enenu in orekmakin ke kut sang kasru nu selos su kaskaskin sie kas su kut tia etu ka. Nunak munas ridi mwo inkanek puspus inge a orekmakin ma inge ke inkanek mwomwo.
Oasr ke sra in buk inge su akkalemye koanon buk inge ke kas pupsus a akul puspus lun kais sie kas. Ma inge kasre kom in akilen akul ke kais sie kas su simusyukla ke tracts natusr a ke kutupa me rid su simusyukla ke kas puspus.
[Picture]
Ya kom orekmakin buk srisrik inge ke orekma lom in luti peng mwo?
[Pictures on page 13]
Me rid natusr nukemwa su tuku in Baibel ke pal inge oasr ke kas 400 kutu
AN GHANA
AN LAPLAND (SWEDEN)
AN PHILIPPINES
[Pictures on page 14, 15]
Ya kom ku in oru orekma in kulansap in an su oasr me enenu yok ke met fwakak peng mwo lun Togusrai?
AN ECUADOR
AN DOMINICAN REPUBLIC