Kaifweung In Oru Mwo
“Fokin kalem on in mwo nu kemwa a sumwosmwos a paye.”—EFESUS 5:9.
1. Fuka million puspis sin met misinge elos ku in akkalemye la elos insese nu ke Sam 31:19?
OREKMA mwomwo su metu ku in oru pa in suk me akinsemwomwoye Jeova. Misinge, million puspis sin met elos oru ou inge in akkalemye kaksak nu ke mwolanu lal. In oanu sie Met Lo oaru paye lun Jeova, kut enenu in akkalemye ke insiesr nu fon in fwal nu ke on soko lun sam inge: “O fuka yokiyen mwo lom, su kom elosak nu selos su sangeng sum!”—Sam 31:19.
2, 3. Mea ku in sikyuk fwin orekma in oru met elos in ekla met Kristian el tia kasreyuk ke oiyen orekma mwomwo?
2 Sangeng sin Jeova mokle kut in kaksakunul ke mwolanu lal. Ma inge mokle kut in ‘kaksakin Jeova, akinsemwomwoyel, a in fwak ke mwolanu lun togusrai lal.’ (Sam 145:10-13) Pa inge sripe mwomwo su paenang kut ku in wi moniyuk ke orekma in luti lun peng mwo lun Togusrai a in oru orekma lun met tuma lutlut. (Mattu 24:14; 28:19, 20) Aok, orekma in luti lasr enenu in fwal nu ke orekma mwo nu kemwa. Fwin tia ou inge, kut fwa oru orekma in luti lasr in me akkolukye en Jeova su mutalanu.
3 Met puspis elos akkalemye mu elos alu nu sin God, tusruktu fwako lun orekma lalos tia na fwasr fwal nu ke akmwuk lun ma simusla in Kas Lal. Nu sin met puspis su oiyen moul lalos tia na fwal nu ke moul mwomwo su elos fwak mu elos oru: “Kom su, . . . luti siena met, ya kom tia sifwanu luti kom? Kom su luti met in ‘Tia pusr,’ ya kom pusr? Kom su fwak ‘Nik kom kosro,’ ya kom kosro? . . . ‘Tu met Pegan elos kaskaskou ke en God meyen keyumwos’; oanu ma simusla.”—Rom 2:21, 22, 24.
4. Orekma mwo lasr orala fwako fuka?
4 Kut tia akkolukye en Jeova, a kut kaifweung in akmutalye ma inge ke orekma mwo lasr. Ou inge e fwa sie me insemwomwo in liyeyuk yurin met su muta sayen congregation lun met Kristian. Saye liki ma inge, e ku pa in kasre kut in kutongye orekma in lain lalos su lain kut. (1 Piter 2:15) Yok liki nu kemwa, orekma mwo lasr ku in ikasla insien met in tuku nu ke u lun Jeova, wikin pa in ikasla nu selos inkanek in sang mwolanu nu sel a in ku in eis moul ma patpat.—Orekma 13:48.
5. Kain in kusensiyuk fuka kut fwa loang nu ka?
5 Ke sripen kut sesumwos, e fuka oreye kut in ku in kurungin kut in tia aktoasrye Jeova a in tia oru me aktukulkulye met su lungse in suk luti paye? Ke ma inge, kut e fwa oru fuka orekma mwomwo lasr in kalem?
Sie Fwako lun Kalem
6. Piye kutu “fwako lun orekma lun losr su wangin fwako mwo ka,” a enenu in kurunginyuk in tia sikyuk inmaslon met Kristian?
6 In oanu sie met Kristian su mwolela tari, kut engunkin kutena me kasru su ku in kasre kut in fwasr liki kutena “orekma lun losr.” Orekma nu kemwa su pilesru God pa, orekma lun kikiap nu kemwa, pusrapasr, kas fokfok, nunuk in rapku nu ke orekma lun kosro, kaskas lalfon, tafwunkas su tia fwal, a srui. (Efesus 4:25, 28, 31; 5:3, 4, 11, 12, 18) Lela kut in tia eis kut nu ke kain in orekma inge, a lela kut in “fwafwasyesr oanu tulik nutin kalem.” Met sap Poul el akkalemye la “fwokin kalem on in mwo nu kemwa a sumwosmwos a paye.” (Efesus 5:8, 9) Ke ma inge, kut fwin fwafwasyesr in kalem kut fwa ku in akkalemye fwako lun ma mwomwo nu kemwa. Tusruktu, kain kalem fuka se inge?
7. Mea kut enenu in oru tu kut fwa sruokye na fwako lun orekma mwo nu kemwa?
7 Fwinne kut sesumwos, kut ku in akkalemye fwako lun ma mwomwo kut fwin fwafwasyesr in kalem lun ngun. “Kas lom lamp nu ke niuk, a kalem nu ke inkanek luk,” pa inge on lun met sam. (Sam 119:105) Fwin kut lungse in akkalemye “fwako lun kalem” ke “orekma mwo nu kemwa,” kut enenu in eis etauk yok ke ngun su Kas lun God akkalemye, in loang akmwoye nu ke me rid su tuku sin met Kristian paye, a in sramsramkin pal nu kemwa ke meeting in alu lasr. (Luk 12:42; Rom 15:4; Hibru 10:24, 25) Kut enenu pa in loang akmwoye nu ke me srikasrak a me luti lun Jisus Kraist, su “kalem lun fwalu” a “saromrom lun mwolanu lun [Jeova].”—Jon 8:12; Hibru 1:1-3.
Sie Fwako lun Ngun
8. Efu kut ku in akkalemye orekma mwo?
8 Kalem in ngun el sie me kasru lasr in ku in akkalemye inkanek lun ma mwomwo. In wekunang ma inge, kut ku pa in moulkin fwako inge meyen ngun mutal lun God ku ku lun God el kol kut. Ma mwomwo el sie “fwako lun ngun mutal.” (Galetia 5:22, 23) Kut fwin lela ngun lun Jeova in kol kut, e fwa ku in oasr fwako mwomwo inge in kut.
9. Fuka kut ku in oru orekma fwal nu ke kas lal Jisus in Luk 11:9-13?
9 Lungse paye lasr in akinsemwomwoye Jeova su ku in akilenyuk ke fwako mwolanu lun ngun mokle kut in orekma fwal nu ke kas lal Jisus: “Siyuk a a fwa etukut nu sum; suk, a komwos fwa konoiyuk; a nu sel su tomwolak a a fwa ikasla nu sumwos. Tu met e nu kemwa su siyuk elos eis; a el su suk konoiyuk; a nu sel su tomwolak a fwa ikasla. A sin su sumwos sie mwen fwin fwa siyuk sie lof sin papa tumal, a el fwa sang soko serpent nu sel in aolla ik sokoa? Ku el fwin siyuk sie atro, el fwa sang soko scorpion nu sel? Na komwos met [koluk a sesumwos] fwin etu fuka in sang me sang mwo nu sin tulik nutumwos, fuka yokeyen Papa tumomwos in kosrao el fwa sang ngun mutal nu selos su siyuk sel!” (Luk 11:9-13) Lela kut in akos kas in kai lun Jisus fwin kut pre siyuk ke ngun mutal lun Jeova in kasre kut tu kut fwa ku in akkalemye fwako lun insemwomwo.
“Kaifweung in Oru Mwo”
10. Mea kutu ma mwomwo lun Jeova su akkalemyeyuk in Exodus 34:6, 7?
10 Ke sripen kalem mwolanu lun ngun su tuku ke Kas lun God a wikin pa kasru su tuku ke ngun mutal lun God, ou inge kut ku in “oru ma mwo” pal nu kemwa. (Rom 13:3) Ke sripen lutlut lun Baibel, paenang kut ku in eis etauk mwomwo in moulkin inkanek mwolanu lun Jeova. Ke me lutlut taria kut lotela oiye mwo puspis lun God su akkalemyeyuk ke kas lal nu sel Moses a simusyukla in Exodus 34:6, 7, su fwak: “Jeova, Jeova, sie God pakomuta a kulang, tia sa in mulat, a yoklanu lungkulang a paye lal, in srukye lungkulang nu sin tausen, nunuk munas ke ma koluk a ma sito a meta, a su e fwa tia aksumwosmwosye met koluk.” In tuni ke oiye mwolanu lun Jeova su akkalemyeyuk inge fwa ku in kasre kut in “oru ma mwo” pal nu kemwa.
11. Kut ku in eis fuka ma mwomwo su tuku ke etauk nu ke lungkulang a pakoten lun Jeova?
11 Kas mwolanu ou inge ku in kasre kut in esam ke me enenu in etawi Jeova ke pakoten a kulang. “Insemwomwo elos su pakomuta,” Jisus el fwak, “tu elos fwa eis pakomuta.” (Mattu 5:7; Luk 6:36) Etauk lasr ke kulang lun Jeova, ku in kasre kut in kulang nu sin kutena pa met, wekunang met su kut lutlut nu se. Ou inge e fwa fwal nu ke kas in luti lal Poul: “Lela kas lomwos in kulang pal nu kemwa, solela ke sol, tu komwos fwa ku in etu fuka fwal in topuk nu sin kais sie met.”—Kolosse 4:6.
12. (a) Ke sripen God el pat in mulat, mea fwal kut in oru nu sin kutu met? (b) Lungkulang lun Jeova mokle kut in oru mea?
12 Ke sripen God el pat in mulat, paenang lungse lasr in “oru ma mwo” mokle kut in ku in muteng nu ke ma tafongla srisrik lun met wiesr in lalalfongi a in loang yok ke orekma mwo puspis lalos. (Mattu 7:5; Jemes 1:19) Lungkulang lun Jeova mokle kut moulkin lungse paye, fwinne oasr me keok upa. Ma inge oru sie met in lungseyuk.—Soakas 19:22.
13. Fuka kut ku in akkalemye la ‘ma paye nu kemwa oasr yurin Jeova’?
13 Ke sripen Papa tumasr su in kosrao el ‘tingtingi in ma paye,’ paenang mwo kut in ‘kaifwe kut sifwanu in oanu sie met kulansap lal ke kas paye.’ (2 Korint 6:3-7) Inmaslon me srungeyuk itkosr su Jeova el srunga pa “sie loa kikiap” a “sie met lo kikiap su fwakak kas kikiap.” (Soakas 6:16-19) Ke ma inge, lungse lasr in akinsemwomwoye God kasre kut in ‘sisla kas kikiap a in kaskas paye.’ (Efesus 4:25) Lela kut in tia fuleak in oru mwo ke inkanek yok sripe inge.
14. Efu ku kut enenu in orekmakin nunuk munas?
14 Kas lun God nu sel Moses enenu pa in mokle kut in orekmakin nunuk munas, meyen Jeova el akola in orekmakin nunuk munas pal nu kemwa. (Mattu 6:14, 15) Aok, Jeova el sang pa kas in kai nu sin met koluk su tia lungse in auliyuk. Ke ma inge lela kut in srukye ku akmwuk fulat lal ke inkanek nasnas lun ngun ke congregation pal e nu kemwa.—Livitikus 5:1; 1 Korint 5:11, 12; 1 Timote 5:22.
“Arulanu Liaung”
15, 16. Fuka kas in kai lal Poul in Efesus 5:15-19 ku in kasre kut in orekmakin na orekma mwo pal nu kemwa?
15 In orekmakin inkanek mwomwo pal nu kemwa fwinne oasr ngun fokfok raunikutla, kut enenu in tingtingi ke ngun lun God a in arulanu liaung oiyen fwafwasyesr lasr. In oupanu, ke Poul el kaifwe nu sin met Kristian in an Efesus: “Ke ma inge, komwos in arulanu liaung oiyen fwafwasyesr lomwos, tia oanu met nukin, a oanu met lalmetmet, molela pal tu len koluk. Tu ou inge, komwos in tia lalfon, a komwos in etu mea lungse lun Jeova. A komwos in tia srui ke wain, ke kain nimnim, me nim ku a komwos in tingtinginu ke ngun, in kaskas nu sin sie sin sie in sam a on a onkakin ngun, alullul ke pusre siefwunnu insiomwos nu sin Jeova.” (Efesus 5:15-19) Kain in kas in kai ou inge arulanu fwal nu sesr ke len safla su ma koluk arulanu yokyokelik.—2 Timote 3:1.
16 Kut fwin kaifweung na in orekmakin moul mwomwo, kut enenu in arulanu kurunganang oiyen moul lasr in oanu met su orekmakin sumwosna lalmetmet lun God. (Jemes 3:17) Kut enenu in fwasr liki kain in ma koluk nu kemwa a in tingtingi ke ngun mutal, a in eiskutyung sifwanu in moul fwal nu ke ngun mutal. (Galetia 5:19-25) In orekmakin moul in ngun fwal nu ke me luti su lutiyuk ke pal in meeting lun met Kristian, assemblies, a toeni lulap nu kemwa, ou inge kut fwa ku in etu in oru ma mwo pal nu kemwa. Kas lal Poul nu sin met Efesus ku in kasre kut pa in esam la ke toeni nu kemwa lasr in alu, kut eis me insemwomwo kut fwin on kin “on in alu” ke insiesr kemwa—su on puspis fwakak ke fwako mwolanu lun ngun mutal, oanu orekma mwo.
17. Ke sripen luma a ma sikyuk nu selos su paenang elos tia wi meeting pal nu kemwa, mea met lili Kristian su arulanu mas elos ku in lalalfongi na paye?
17 Mea mwo in orek nu sin met wiesr in lalalfongi fwin elos tia ku in wi meeting pal nu kemwa lun met Kristian ke sripen mas? Saap elos pulakin keok ke sripen elos koflanu asrouki yurin met lili brother a sister wielos in alu nu sin Jeova. Tusruktu lela elos kalem ka la Jeova el etu ke oiye su elos oasr ka, kasru lal nu selos in muta na ke ma paye fwa tia wanginla, elos fwa kasreyuk ke ngun mutal, e fwa kasreyuk elos in tia fuleak in oru ma mwomwo.—Isaia 57:15.
18. Mea ku in kasre kut in oakiye sie inkanek in orekmakin nu ke kain in orekma mwo nu kemwa?
18 In srukye sie inkanek nu ke orekma mwo enenu in oasr kurunginyen asrouki lasr a in fwasr lukelos su “wangin lungse lun orekma mwomwo” in elos.” (2 Timote 3:2-5; 1 Korint 15:33) In akos kas in kai ou inge fwa ku in kasre kut in tia “aktoasrye ngun mutal lun God” ke orekma su kut oru tia fwal. (Efesus 4:30) Yok liki nu kemwa, kut fwa ku in kasreyuk in oru ma mwo kut fwin kaifweung in suk inkanek futoto nu selos su akkalemye lungse paye lalos nu selos su lungse in oru ma mwo a kolyuk ke ngun mutal lun Jeova.—Emos 5:15; Rom 8:14; Galetia 5:18.
Orekma Mwo Kol Nu Ke Me Insemwomwo
19-21. Akklemye kutu experiences su sikyuk ke sripen orekma mwomwo nu kemwa.
19 Fwafwasryesr ye kalem lun ngun, akos ke kolyuk lun ngun mutal lun God, a wikin in tuni oiyen fwafwasyesr lasr ku in kasre kut in fwasr liki orekma koluk nu kemwa a in “kaifweung in oru ma mwo.” Ou inge, fwa oasr kain in akmwuk mwomwo. Oasr sie experience lal Zongezile, sie Met Lo lun Jeova fwin an South Africa. Oasr lututeng se el fwasr in som nu ke lutlut a, ke el srike in koneak la lupa su oasr ke saving srisrik se lal a. El eis pepu se su orekla ke machine se ke saving lal a tafongla orala lupa na lulap se ke pepu in saving lal a su oasr ke lupan mani su oasr ke R42,000 ($6,000, U.S.). Oasr sie met su topang ke bank weang pa met puspis saye elos kaifwe nu sel elan eisla mani sa liki bank a usla filiye ke siepanu bank saye. Oasr sie seanyen su Met Lo el muta yurolos elos sang kas in kaksak nu sel meyen el tia eisla kutena mani liki lupan mani sa.
20 Ke len in orekma se tok a, Zongezile el som akkalemye nu sin bank ke tafongla se inge. Paenang konoiyukyuk tok la account number se lal a apkurun in oanu account numbu se lun met business kasrup se su tafongla filiye mani lal’a nu ke account se su tia ma lal. Arulanu yok me lut la Zongezile el tianu orekmakunla kutusrisrik mani se, paenang met business se siyuk sel: “Kain in alu fuka lom?” Na Zongezile el aketeye la el sie sin Met Lo lun Jeova. Ke oiye inge paenang met orekma puspis lun bank elos arulanu kaksakunul a fwak: “Kut arulanu lungse met nu kemwa in sumwos oanu Met Lo lun Jeova.” Aok, orekma sumwos nu kemwa a ouyepa in oru ma mwo ku in ekulla kutu met elos in kaksakin Jeova.—Hibru 13:18.
21 Akmwuk in orekma mwomwo tia enenu in suk me pengpeng nu ka in mu oasr me kaksak tuku ka. Nu ke me pupulyuk: Oasr sie tulik fwusr su wi Met Lo lun Jeova el oru orekma in kulansap oanu sie met luti ke len nu kemwa ke sie tuka fwin an Samoa el enenu in som nu ke loom ono we a. Met nu kemwa elos sano doctor lalos, a Met Lo se inge el liye la oasr sie mutan matu su muta siskel su arulanu mas upa. Paenang el lela mutan sa in eisla an lal a el an mu ku in sa sun taktu lal a. Ke kutu pal tok, Met Lo se inge el sun mutan matu sa ke nien market. Mutan matu sa liyelak na el esamak kasru lal nu sel loom ono a. “Inge Nga etu na paye la Met Lo lun Jeova elos lungse na paye met tulan lalos,” pa inge ma el fwak. Meyen meet el tia wi muta lungse long peng ke Togusrai lun God, tusruktu ke orekma mwo lun Met Lo se inge nu sel paenang oasr oiye mwomwo tuku ka. Mutan se inge lungse in oasr lutlut ke Baibel orek nu sel na el mutamwauk in eis etauk paye ke Kas lun God.
22. Piye sie sripe yok su akkalemyeyuk ke inkanek in “kaifweung in oru mwo”?
22 Kom ku in oru oupanu, in akkalemye ke kutu experience su kom pulakin ke orekma mwo su kom orala. Oasr sie inkanek su arulanu mwo nu ke orekma in “tafwela na in oru mwo” pa ke orekma lun forfor pal nu kemwa in luti ke peng mwo lun Togusrai lun God. (Mattu 24:14) Lela kut in tafwela na in moniyuk nu ke orekma ou inge, meyen ma na kalem se la pa inge inkanek in oru mwo, yokna nu selos su lungse in eis lutlut ou inge. Saye liki nu kemwa, orekma in luti, a orekma mwo nu kemwa me akinsemwomwoye Jeova, el su sropon orekma mwo nu kemwa.—Mattu 19:16, 17.
Kaifweung in “Oru Orekma Mwo”
23. Efu ku orekma lun forfor els sie orekma mwo?
23 Orekma in luti lasr wangin alolo ka la pa inge sie orekma mwo. El ku in ase nu sesr fwinsrak lun molela a nu selos su lungse in lutlutkin kas in Baibel a in kaifweung in ilyuk nu ke inkanek su kol nu ke moul ma patpat. (Mattu 7:13, 14; 1 Timote 4:16) Fwin oasr pal kut lungse in oru sulela, lungse lasr in oru ma mwo ku in mokle kut in siyuk sesr sifwanu: ‘Mea e fwa sikyuk nu ke orekma in forfor luti luk ke Togusrai ke sripen sulela se inge? Ya inkanek se su Nga sulela inge mwo na paye? Ya e fwa ku in kasre yu in sang kasru pa nu sin kutu met in lungse long “mwosasu ma patpat” a in oasr futoto paye nu sin Jeova God?’ (Fwakyuk 14:6) Yok me insemwomwo ku in sikyuk ke kain in sulela su akyokye peng ke Togusrai.—Mattu 6:33; Orekma 20:35.
24, 25. Piye kutu inkanek mwo in orekmakinyuk in congregation, a mea ku in akpayeyuk kut fwin kaifweung na in oru orekma mwo nu kemwa?
24 Lela in tia alollo nu ke me insemwomwo su e fwa me lane ke sripen orekma mwomwo. Kut ku pa in tafwela na in akkalemye fwako lun orekma mwo inge ke kasru su orek nu sin met Kristian congregation a in oru orekma mwo in sang kasru me enenu lun congregation a in kurunganang in mwo. Aok, kut ku in oru mwo kut fwin wi meeting pal nu kemwa a in wi sang me top nu ke kusensiyuk su muta orek ke pal in meeting lun met Kristian pal nu kemwa. Wi lasr nu ke pal in meeting nu kemwa sang me kasru na yok nu sin met wiesr in lalalfongi, a nu ke akola mwo lasr nu ke me top orala pa me kasru yok nu kapkapek lun moul in ngun lalos. Kut ku in orekma mwo pa ke pal se kut fwin lela kutena ma lasr in sang kasru me enenu lun Kingdom Hall a ke pal se kut srike in kurungin ma lun congregation. (2 Togusra 22:3-7; 2 Korint 9:6, 7) Aok, “oanu oasr pal fwal yurosr, lela kut in oru mwo nu sin met nu kemwa, a yokna nu selos su sou lun lalalfongi.”—Galetia 6:10.
25 Kut tia ku in etu ma nu kemwa su eneneyuk nu ke orekma mwo nu kemwa. Paenang, ke pal se kut fwin sun me lain puspis, lela kut in suk pal nu kemwa ke me luti lun Baibel, pre siyuk ke kasru lun ngun mutal lun Jeova, a srike in akos ma nu kemwa su akinsemwomwoye Jeova a akmwuk mwolanu lal. (Rom 2:9, 10; 12:2) Kut ku in lalalfongi na paye la Jeova el e fwa kasre kut ke me kasru puspis tu kut fwa ku in akkalemye kain in orekma mwolanu puspis.
Fuka Kom Topuk?
• Kut ku in orala fuka orekma su mwo liki nu kemwa?
• Efu ku orekma mwomwo nu kemwa pangpang ‘fwako lun kalem’?
• Efu ku orekma mwomwo nu kemwa pangpang ‘fwako lun ngun’?
• Orekma mwomwo lasr kol nu ke mea?
[Picture on page 17]
Kas lun God a ngun mutal lal ku in kasre kut in akkalemye orekma mwo nu kemwa
[Pictures on page 18]
Akkalemye orekma mwomwo ke saflaiye oasr me insemwomwo ka