Key nu ke Sie Fwal Insemwomwo
“SIE met su ku emeet—tia ke millennium luo inge mukena, a, ke me sramsram nu kemwa lun met—pa Jisus lun Nazareth,” ke magasin lun Time inge el fwak. Ke pal se Jisus el srakna muta fwin fwalu, tausen puspis sin met oaru elos akilen, tia mwolanu lal mukena, a, elos akilen pa nunuk yok lal nu sin met puspis. Ke ma inge. tia me lut ke pal se elos lungse in aktogusrayel. (Jon 6:10, 14, 15) Tusruktu, in oanu ma akkalemyeyuk tari ke me lutlut somla a, la Jisus el srunga in esal nu ke politic.
Jisus el akkalemye ou inge ke sripe tolu: nunuk lun Papa tumal nu ke sifwanu sulela lun met, weang ma inge pa ke kolyuk lun met; Jisus el akilen la oasr ku su tia ku in liyeyuk el oru orekma in lain kolyuk mwomwo nu sin met; a akmwuk lun God in oakiye sie guferment in kosrao su akola in kol fwalu nu fon. Kut fwin loang akmwoye nu ke ma tolu inge, kut e fwa ku liye la kaifweung lun met in orala fwalu se inge in ekla sie an mwo fwa tia ku in sikyuk. Kut ku in liye pa la efuku oreya in ku in sikyuk.
Ya Met Elos Ku In Kololos Sifwanu?
Ke pal se God el orala metu, el sang nu selos ku in kurungin kosro nu kemwa ye koko lalos. (Genesis 1:26) Tusruktu, met nu kemwa elos muta ye koko lun God. Mokul a mutan se meet elos enenu in akkalemye pusisel lalos in akos God fwin elos tia kal a kang fwokinsak se, su “sak in etu ma mwo a ma koluk.” (Genesis 2:17) Sie me asor yok, meyen Edam a If elos pilesru sukosok lalos in oru sulela a elos seakos God. Ke pal se elos kangla fwokinsak sa, elos tia oru orekma lun pusrapasr mukena. Tusruktu ma inge akkalemye orekma in lain nu ke sumwos lun God in kol.
Ke sripen me sramsram yok ke sumwos lun God in kol sikyuk, paenang God el lela Edam a If a tulik nutulos nu kemwa in oru sulela ke inkanek in moul lalos sifwanu, a elos sifwanu oakiye akmwuk lalos nu ke ma sumwos a nu ke ma koluk. (Sam 147:19, 20; Rom 2:14) Ke sripe se inge, inkanek lun met in srike ma nu kemwa ke lungse lal sifwanu mutamwauk. Ya ma inge orala misla? Meyen oasr pal mwo lasr in liye ma sikyuk ke lusen tausen yiu somla, paenang kut ku in fwak la mo! Ekklisiastis 8:9 el fwak: “Oasr ku yurin sie met fwin siepa met nu ke ongoiye lal.” Me sramsram lun fwalu akkalemye la wangin ku lun met in kololos sifwanu fwin wangin kasru sin met su Oralosla.
Ma inge paenang kut in nunku ke sifwe se akluo su oru Jisus el an tia esalang nu ke politic.
Met Kol lun Fwal Se Inge Su Tia Eteyuk
Baibel el aketeye nu sesr, la Setan el srike in sang nu sel Jisus “togusrai nu kemwa fwalu, a mwolanu lalos” el fwin putati a alu nu sel. (Mattu 4:8-10) Aok, oasr pal mwo lal Jisus in ekla met kol lun fwalu—tusruktu ke inkanek lun Devil. Jisus el tia putati nu ke me srifwe se inge. Ya sie me srifwe na paye pa inge? Ya Setan el ku in oru na paye me sang mwolanu inge? Aok, meyen Jisus sifwanu el pangon Devil “leum lun fwal se inge,” a met sap Poul el akkalemyel oanu “god lun fwal se inge.”—Jon 14:30; 2 Korint 4:4; Efesus 6:12.
Paye, Jisus el etu la Devil el tia nunku ke me insemwomwo lun met nu kemwa. Arulanu kalem, la sie fwal su “muta ye koko” lun ngun fokfok inge tia ku in insemwomwo na paye ke kutena pal.—1 Jon 5:19.
Sie Guferment Su Wise Insemwomwo
Sripe se aktulo su oru Jisus el tia esalang nu ke politic pa, meyen el etu fwin sun pal pakiyuki in pal fwasru, God el fwa oakiye sie guferment in kosrao in kol fwalu nu fon. Baibel el pangon guferment se inge Togusrai, a pa inge sifwe se ma yok ke me luti lal Jisus. (Luk 4:43; Fwakyuk 11:15) Jisus el luti met tuma lutlut lal in pre ke Togusrai se inge in tuku, meyen ke inkanek in kolyuk mukena lun Togusrai se inge, na ‘ma lungse lun God in kosrao a fwa orek fwin fwalu.’ (Mattu 6:9, 10) Saap kom mutamwauk in nunku, ‘Fwin Togusrai se inge el akola in kol fwalu nu fon, na mea e fwa sikyuk ke guferment nu kemwa su metu orala?’
Top nu ke kusensiyuk inge ku in konoiyukyuk in Daniel 2:44: “A in len lun togusra ingo [met kol ke saflaiyen akmwuk inge] God on kosrao fwa tulokunak sie togusrai su fwa tianu kunausyukla, ku filiye mwal ka nu sin siepa mutanfwal. A a fwa musalsallu a kunausla togusrai inge nu kemwa [ma metu orala], a a fwa tu ma patpat.” Efu Togusrai lun God fwa “kunausyukla” togusrai nu kemwa fwin fwalu? Meyen akmwuk inge liksreni in patok nunuk koluk lun ngun in lain kolyuk lun God ke lungse in sifwanu kol su Setan el mokle mutamwauk na ke imae lun Eden in pal meeta. Sayen orekma in lain lalos nu ke me insemwomwo lun met, paenang kain in met su lungse in akkalemye kain in ngun ou inge, elos sifwanu oralos met lain Met Orekutla. (Sam 2:6-12; Fwakyuk 16:14, 16) Ke ma inge, kut enenu in siyuk sesr sifwanu, ‘La kut wi God ku kut lainul?’
Me Insemwomwo Puspis Nu Sin Met Nu Kemwa Su Oan Ye Koko lun Togusrai
Pal nu kemwa Jisus el oru ma nu kemwa ke inkanek lun God. Ke ma inge, el tia suk inkanek lal sifwanu in srike a in akkeye ku akmwoye akmwuk inge ke inkanek lun politic, a el oru orekma upa in akkeye ma lun Togusrai, meyen pa inge me top sifwanu nu ke ma upa lun fwalu.
Million puspis sin met misinge su etawi Jisus in suk meet Togusrai lun God a akpusisilyelos sifwanu nu sin God elos fwa ouyepa engunkin me sang mwolanu in pal fwasru—pal mwo in sa ekla sie met su wi ke koko lun Togusrai lun God fwin fwalu. (Mattu 6:33) Ye kolyuk mwolanu lal, metu fwa ekla met sumwosmwos, su oasr fwinsrak in moul ma patpat yurolos.—Fwakyuk 21:3, 4.
Aok, Togusrai lun God pa key paye nu ke sie fwal insemwomwo, a me sramsram su el akkalemye fwal in pangonyuk peng mwo. Kom fwin soenna eis ma inge, fwin oasr sie pal Met Lo lun Jeova el muteta nu in loom sum, efu kom ku tia eis peng mwo se inge su elos wis nu in loom sum?