Ya Kom Ku In Konaok Misla ke Insiom?

In yiu 1854, Sie met Merike su orek buk pangpang Henry Thoreau el simusla: “Pus sin met elos moulkin moul misla ekla nu ke asor.”

Arulanu kalem, in len lal met puspis elos tianu pulakin misla ke insielos. Tusruktu ma inge sikyuk ke yiu apkurun 150 somla tari. Ya oasr ekla in len lasr misinge? Ku kas lal Thoreau srakna orekma? Na fuka nu sum sifwanu? Ya kom insemwomwo, muta in misla? Ku kom pulakin sensen, tia etu pal fwasru, ‘alollo wangin fwinsrak,’ in folokunak kas lal?

SIE ME ASOR, ma puspis fwin fwalu ku in eisla misla ke insien metu. Lela kut in sramsramkin kutu ma inge. In an puspis met su wangin orekmala a srikla molin orekma paenang moul sikasrup a wekunang upa lun mani. In kutu an met puspis elos orekmakin kuiyelos kemwa nu ke me kasrup a ma lun fwalu. A pal puspis akmwuk in alein lun moul orala me asor a wangin inse misla ka. Mas, meun, orekma silolel, nununku sesumwos, a me keok, ma inge nu kemwa eisla pa misla lun insien metu.

Elos Suk Misla ke Insielos

Met puspis tia insese nu ke akmwuk lun moul. Antônioa el sie met kol lun met orekma ke sie nien orekma fwin an São Paulo, Brazil. El fwinsrak in oasr akmwoyeyen akmwuk lun moul, paenang el wi orala me lain a me srikasrak puspis, tusruktu, ma inge koflanu akkeye nu sel inkanek in misla ke nunuk lal.

Kutu metu nunku mu moul in payuk el ku in akkeye misla yok ke moul lalos, tusruktu ma inge ku pa in orala me akasoryelos. Marcos el sie met business su arulanu orala mwo. El sroang nu ke politic a ekla sie mayor ke sie siti kasrup. Tusruktu, moul lal tianu mwo. Ke pal se tulik nutul som liki loom selos, el a mutan kiel fwasrelik ke sripen wangin insese inmaslolos.

Gerson, el sie tulik su kapek wangin kurunginye fwin an Salvador, Brazil, el lungse in som nu ke an puspis. El lungse in weot wema me kasrusr puspis nu ke siti nu ke siti. Tia pat tok el ekla sie met su orekmakin ono koluk pal nu kemwa, pusrela ma lun met in sang kasrel in moli me enenu koluk lal. Pal puspis policeman elos sroukilye. Tusruktu, el fwinne arulanu mongsa, a silolel, el suk pa misla ke insiel. Ya el ku in konaok ma inge?

Nine kiel mise ke pal se Vania el srakna fwusr, Vania el ekla met liaung lun loomu, wekunang tulik mutan se wiel su mas a srik lukel. Vania el wi alu tusruktu el pulakin mu God el som lukel tari. Paye wangin misla lal ke insiel.

Na oasr siepa mokul pangpang Marcelo. Marcelo el lungse na suk me akengun. El lungse na wi party yurin met fwusr​—dance, nimnim, a orekmakin ono koluk. Sie pal’a el wi anwuk a uni sie mokul fwusr. Tokin ma inge, el arulanu asor a auli ke ma el oru a pre nu sin God ke kasru. El lungse pa in oasr misla ke inse.

Experience inge nu kemwa akkalemye ke kutu ma sikyuk su ku in kunausla misla ke inse. Ya oasr kutena inkanek su ku in oru met kol lun met orekma, met kol lun politic, tulik se su wangin kurunginye, tulik mutan su oru orekma upa a tulik se su lungse in party in konaok misla ke inse su elos suk? Ya oasr kutena ma su kut ku in lotela ke ma sikyuk nu selos? Top nu ke kusensiyuk luo inge pa aok, oanu ma kut ku in liye ke me lutlut toko.

[Footnote]

[Picture on page 3]

Ya kom lungse misla ke inse?