Ya Kom lalalfongi ke reincarnation?
“YA KOM esam mutan fwusr atalani lom su kom lungse meet ke pal se ma kom srakna fwusr a muta in an India?” pa inge Mukundbhai el simusla nu sin mwen nutul, sie tulik lutlut ke sie University fwin an United States. “El akola in payuk tukun wik ekasr. Nga nunku la kom enenu in etu ma inge.”
Efu papa se inge el akkalemye ma inge nu sin tulik nutul? Sayen ma inge, Mukundbhai pa aksafyela lungse lalos inge sie sin sie ke ku lal sifwanu ke yiu ekasr somla. Ouyepa, tulik nutul el muta tari fwin an United States a eis lutlut yok ke lusen yiu onkosr. El tia pa sim leta ku pang nu sin mutan fwusr inge ke lusen pal inge nu fon, a Mukundbhai el etu ma inge.
Na, efu el fosrnga? Meyen Mukundbhai el lalalfongi ke reincarnation, ku sifwil isusla.a Fwin lungse lalos sie sin sie ke pal se ma elos fwusr sikyuk ke sripen elos payuk tari ke moul lalos meet, na sie orekma koluk na paye fwin sie met el liksreni na in oru elos in fwasrelik ke pal inge meyen elos sun tari matwe fwal in payuk. Mukundbhai el lungse na tulik nutul in etu ma inge meet liki tulik mutan se inge el ekla mutan kien met saye ke moul lal ke pal inge.
Tuni siepa ma sikyuk. Sie tulik su akosr matwe el muta pal puspis ke sripen mas upa lal ke loom ono lun an Mumbai, India. El wi mas ke valve koluk lun heart lal. Papa a nine kiel su kasrup elos arulanu asor ke elos liye la tulik nutultul arulanu keok. Tusruktu elos fwak: “Kut enenu in inse misla ke ma se inge. Saap oasr ma koluk el oru ke pal se ma el moul meet paenang el fwal lan eis ma inge.”
Lalalfongi ke reincarnation arulanu yok ke moul lun million puspis su wi ke alu lun Hinduism, Buddhism, Jainism, Sikhism, a kutupa alu su tuku fwin an India. Experience ke moul—mutamwauk ke lungse inmaslon mokul a mutan nu ke keok upa—nunkeyuk oanu fwokin orekma su elos oru ke moul lalos meet.
Met puspis ke an Roto elos wi pa lalalfongi ke luti lun reincarnation. Sie actress lun an Merike pangpang Shirley MacLaine el akkalemye lalalfongi lal ke ma se inge. Sie met sim pangpang Laurel Phelan lun an Vancouver, British Columbia, Canada, el akkalemye la el esam moul lal ke pal 50 in pal meeta. Ke 1994 Gallup poll su orekla ke CNN/USA Today, akkalemye la pus liki 270 inmaslon 1,016 met matu elos lalalfongi ke reincarnation. Lalalfongi ke reincarnation ouyepa sie ipen New Age movement. Tusruktu mea me akpayeye ke kain in lalalfongi inge?
“Esam lom ke sie moul in pal meeta!” Pa inge sie met su lalalfongi ke reincarnation el fwak. Ke sripe se inge, ke pal se ma tulik se yiu tulo matwe pangpang Ratana lun an Bangkok el mutamwauk in “esam moul lal in pal meeta oanu sie mutan su moniyuk ke alu lal a mise ke yiu 1960 kutu,” met pupsis elos eis ma sikyuk nu sel oanu me akpayeye ke reincarnation.
Tusruktu, silalalfongi ke ma se inge yokyokelik. A oasr kutu aketeye efu kutu met elos esam moul lalos meeta.b Ke buk nutul inge Hinduism: Its Meaning for the Liberation of the Spirit. Sie Hindu philosopher pangpang Nikhilananda el fwak la ‘experience lun sie met tukun mise lal tia ku in akkalemye ke inkanek lun aketeye.’ Fwinne ou inge el srakna aketeye la “me luti ke sifwil isusla yok me akpayeye ka liki wangin.”
Tusruktu ya Baibel el sang akpayeye ke me luti se inge? A mea fwinsrak lun met mise su Kas lun God el ase nu sesr?
[Footnotes]
a The New Encyclopædia Britannica, el sang kalmen kas se inge “reincarnation” oanu “sifwil isusula lun ngun ke pal se ku pal puspis, oanu sie met, kosro, ku, ke kutu oiye, ku in fwokinsak.” Kas se inge “sifwil isusla” orekmakinyuk in akkalemye pa oiye se inge, tusruktu kas se inge “reincarnation” pa arulanu orekmakinyuk sin met puspis. Dictionary puspis ke kas India orekmakin kas luo inge.
b Srike liye sra 5-7 lun June 8, 1994, me lutlut ke Awake!
[Pictures on page 4]
Ya el akkeokyeyuk ke sripen ma koluk su el oru ke moul lal in pal meeta?