Meac Kunohkohn luhn Mukul Lili Suc Kahsruh Mwet Elder uh?

Bible uh ahkkahlwemye lah oasr u luo ke mukul Christian suc karihngihn kunohkohn pucspucs ma enenweyuck ke kais sie congregation. U luo inge pa mwet elder kuh “mwet kol” ac “mwet kahsruh lalos” (ministerial servants). (Philippi 1:1) Oakwuck inge orekmakihnyuck pac ke pacl inge, oasr mwet elder pucspucs ac mukul lili suc kahsreltahl in karihngihn pac congregation uh. Orekma fuhkah mukul lili suc kahsruh mwet elder inge use nuh sesr?

Eltahl kahsruh un mwet elder. Oasr fototo wowo luhn mukul lili inge nuh sin Jeova ac fal in luhlahlfongiyuck eltahl ke oaru ac pwacye laltahl ke orekma uh. Kuhtuh seltahl srackna fuhsr ac kuhtuh mahtuh tari. Orekma laltahl uh arlacna yohk srihpac, mweyen ma inge kuhpahsr nuh ke congregation ac karihngihn orekma nuhkewa ke Lohm in Toeni uh. Ke srihpen kahsruh laltahl inge, mwet elder uh kuh in lohacng yohk nuh ke orekma in luti uh ac oacyacpac muhtwacta nuh yurin mwet lili in ahkkweyacltahl.

Orekma laltahl uh sang kahsruh na yohk. Kuhtuh sin mukul lili suc kahsruh mwet elder inge srihsrngiyucki in paing mwet ma wi ke toeni uh. Kuhtuh seltahl liyacacng kuhfa nuhkewa ma orekmakihnyuck ke sound, karihngihn kihtakatlah luhn mwe rit, oakwuck ke mani (accounts) ac pakiyac acn in forfor nuh sin mwet lili ke congregation uh. Eltahl kahsruh pac in karihngihn ac ahknwacsnwacsye Lohm in Toeni uh. Oasr pacl mwet elder uh siyuck seltahl in kahsruh mwet lili suc mahtuhoh tari. Eltahl inse muhlahlah in oruh kunohkohn nuhkewa ma ituckyang nuh seltahl inge ac ke srihpac se inge mwet lili nuhkewa ahksacohkye orekma wo laltahl uh.​—Sie Timothy 3:13.

Eltahl oakiyac mwe srihkasrak wo. Mukul lili suc kahsruh mwet elder inge srihsrngiyucki ke srihpen ohiyac wowo laltahl uh. Ke pacl se ma eltahl oruh kunohkohn laltahl ke miting, eltahl ahkkweye luhlahlfongi lasr uh. Ke eltahl sang kahsruh in kol ac oakiyac mwe srihkasrak wo ke orekma in luti pweng wo uh, eltahl ahkkweye kuht in moniyuck pac. Ke srihpen akacsruhi laltahl nuh sin mwet elder uh, ma inge oruh congregation uh engan ac inse sefanna. (Ephesus 4:16) Ke eltahl ahkkahlwemye kain in ohiyac inge, eltahl fal in kuhlwacnsap pac oacna sie mwet elder ke pacl fahsruh uh.

• Ohiyac wowo fuhkah oasr yurin mukul lili suc kahsruh mwet elder uh?

• Kahsruh fuhkah mukul lili suc kahsruh mwet elder uh oruh in ahkfalye orekma ke congregation uh?