Ya Pa Inge Akwuk lun God?
RIDI kutena newspaper. Liye television, ku long ke retio. Oasr ma koluk puspus su sikyak oana ke akmas, meun, a ke orekma in aksangengye met puspus! Nunku ke ma upa su sikyak nu sum sifwana. Saap mas upa ku mise lun sie met su kom lungse pa oru kom in pulakin asor yok. Kom ku in pulakin asor lun met mwo se inge su pangpang Job, su fwak mu ma upa a me keok nukewa su el pula el “toasr liki puk in mwea.”—Job 6:2, 3.
Siyuk sum sifwana:
Ya pa inge akwuk lun God keik a ke met nukewa?
Nga ku in eis oya me kasru in muteng a in kutangla ke ma upa nukewa su sikyak ke moul luk?
Ya oasr kutena fwinsrak lasr la kut fwa liye ke oasr misla fwin fwalu?
Baibel el sang me top mwomwo nu ke kusensiyuk nukewa inge.
BAIBEL EL LUTI LA GOD EL FWA AKMWOYE MA NUKEWA FWIN FWALU.
“A el fwa ela sroninmutalos nu kemwa, a a fwa wangin pa mise, a elos fwa tia sifwil asor, ku tung, ku ngal; tu ma meeta wanginla.”—Fwakyuk 21:4
“Na met ul fwa srosro oana soko kosro hart.”—Isaia 35:6
“Na mutun met kun fwa ikakla.”—Isaia 35:5
“Elos nu kemwa su muta inkulyuku fwa . . . tuku liki.”—Jon 5:28, 29
“A met su muta we fwa tia fwak: ‘Nga mas.’”—Isaia 33:24
“A fwa pus korn fwin fwalu.”—Sam 72:16
EIS ME INSEMWOMWO YOK KE ME LUTI NUKEWA LUN BAIBEL
Nikmet sa in fwak mu ma nukewa akkalemyeyuk ke sra puspus ke mutaweyen buk se inge el me lumala mukena su tia ku in akpayeyuk. God el mwulela la el fwa akpayeye ma nukewa inge, a Baibel el akkalemye la fuka el fwa oru ma inge.
Tusruktu oasr pa ma lane puspus su Baibel el ku in kasre kom ka. Baibel el akkalemye nu sum inkanek mwomwo in kasre kom in engankin moul mwomwo fwinne ke pal inge. Srike nunku kitin pal ke me fosrnga a ma upa puspus lom. Saap oasr ma upa lom ke mani, ke moul in sou, munasla ke sripen mas upa, ku sie sin met su kom lungse el mise. Baibel el ku in kasre kom in muteng a in kutangla ke ma upa puspus lom ke pal inge, a ma inge ku in kasre kom in eis me akkeye ka ke el akkalemye me top mwomwo nu ke kusensiyuk nukewa inge:
Efu ku kut sun me keok?
Kut ku in muteng a kutangla fuka ke me fosrnga lun moul?
Fuka kut ku in oru moul in sou lasr in insemwomwo?
Mea sikyak nu sesr kut fwin mise?
Ya kut fwa sifwilpa liye sou lasr su mise tari?
Kut etu fuka la God el fwa akpayeye mwulela nukewa lal nu ke pal fwasru?
Ke sripen kom ridi buk se inge, orekma lom inge akkalemye la kom lungse in etu ke ma Baibel el luti. Buk se inge ku in kasre kom. Kom ku in liye lah oasr kihsensiyuck nuhke ke paragraph nuhkewa. Million puspus sin met elos engan in orekmakin akwuk inge ke oasr kusensiyuk a me top ke pal se elos lutlutkin Baibel yurin Met Lo lun Jeova. Kut fwinsrakkin tu kom fwa insemwomwokin pa in orekmakin akwuk inge. Kut lungse kom in eis me insemwomwo lun God ke pal inge su kom engankin ke akwuk mwomwo in lutlutkin ma Baibel el luti na paye!