Kahsruh Mwet Kun uh In Lutlut Kacl Jeova
1. Jesus el ahkkahlwemye fuhkah pahkomuhta nuh sin mwet kun uh?
1 Lwen na ekahsr meet liki Jesus el misac. Ke el ahkolah in som liki acn Jericho, mwet kun luo wowoyak ac fahk: “O Leum, . . . Pahkomuhtahsr!” (Matthew 20:29-34) Finne Jesus el nuhnkuh yohk ke ma upac ma ac fah sikyak nuh sel uh, el tui, pahngloltahl ma, ac onweltahllah. (Matthew 20:29-34) Kuht ac etahi ohiyen pahkotwen lal Jesus nuh sin mwet kun uh fuhkah?
2. (a) Kuht ac sang fuhkah ma loh nuh sin sie mwet kun suc kuht ohsun nuh se ke inkacnek uh? (b) Meac kuht enenuh in esam ke kuht sang kahsruh nuh sin sie mwet kun?
2 Sang Kahsruh: Kom fin ohsun nuh sin sie mwet kun ah, sahp ke inkacnek uh, fahk inem nuh sel ac siyuck in sang kahsruh nuh sel. Ke srihpen kain in mwet inge kwacna ahklahlfonyeyuck, sahp mwet kun sacn ac tiac arlac luhlahlfongi kom ke muhtwacwackiyac an. Tuhsruhktuh, kuhlwacng ac luhngse pwacye ma kom ahkkahlwemye nuh sel uh kuh in kahsrel in luhlahlfongi kom. Esam pac lah oasr kain in mwet kun, ac ma inge pa ac fahkwack luhpan kahsruh ma mwet sacn enenuh uh. Tukun kom sang kahsruh nuh sel, sahp kom kuh in fahk lah kom wi ke sie orekma in luti mwet ke Bible. Siyuck kom in riti sie fuhs an nuh sel, oacna Psalm 146:8 kuh Isaiah 35:5, 6. El fin kuh in rit Braille, suc inkacnek in rit luhn mwet kun, siyuck el fin luhngse in eis nahtuhl sie mwe rit ma oreklac ke Braille ma ac kuh in kahsrel in ahkyohkye etwacack lal ke Bible uh. Kom kuh pac in kahsrel eis nahtuhl mwe lohngyuck ma oasr ke jw.org. Fin oasr program ke computer nahtuhl an ma kuh in riti sihm ma oan ke screen nahtuhl an, sahp el ac luhngse in eis mwe rit pucspucs ke jw.org suc kuh in printiyucklac, wi mwe rit ma kuh in downloadiyuck ke RTF (Rich Text Format).—Liye pohk se inge “Ke Pacl Se Kom Kahsruh Mwet Kun Se . . . ”
3. Kuht ac konwacack fuhkah mwet kun ke acn in forfor lasr uh?
3 Suk Mwet Kun: Kuht suhkwac ohsun nuh sin mwet kun ke pacl se kuht som lohm nuh ke lohm ke srihpen puhs seltahl tiac pah in sramsram nuh sin mwet eltahl tiac etuh ma som nuh yen seltahl uh. Pwacnacng, yohk kwacfeacng ma enenweyuck in “suk” kain in mwet inge ac sang ma loh nuh seltahl. (Matthew 10:11) Yac oasr mwet wi kom orekma kuh tuhlihk lutlut wiyom ma kun? Sifacna muhtwacwack sramsram nuh sel. Fin ke acn in forfor lom an oasr lohm lutlut ma oreklac nuh sin mwet kun, siyuck kom in fihliyac ke library laltahl an kuhtuh mwe rit ma oasr ke Braille. Yac oasr mwet kom etuh ma oasr mwet kun in sucu lal an? Ke acn in forfor lom an, yac oasr kuhtwena u ma sang kahsruh nuh sin mwet kun kuh ma sang kahsruh ke lohm ma karihngihn mwet kun? Ahkuhtweyac nuh sin sie mwet ke sucu sacn, receptionist, kuh director ke u ingacn lah Mwet Loh luhn Jeova uh arlacna luhngse in kahsruh mwet kun uh, ac siyuck kom in us tuhkuh kuhtuh mwe rit ke Braille kuh mwe lohngyuck. Ahkkahlwemye nuh sel wuhlelah luhn Bible, lah ke pacl na sa God el ac fah ahkwoyelah muhtuhn mwet kun uh nwe tok. Sahp kom ac ke ahkkahlwemye nuh sel video se ma oasr ke jw.org inge pahngpahng “Without It, I Would Feel Lost,” suc sruhmuhn experience luhn sie mukul kun se suc eis kahsruh yohk ke srihpen oasr Bible nahtuhl ke Braille. Ke kom ahkuhtweyac srihpen muhtwacta lom an, sahp ma inge ac kuh in oraclah inkacnek na wo se nuh sum in ohsun nuh sin kais kuhtuh mwet kun.
4. Mwe lutlut fuhkah kuht kuh in lotwelah ke ma sikyak nuh sel Janet inge?
4 Janet, sie muhtwacn lili suc kun el som muhtwacta ke sie lohm luhlahp sin mwet kun. El muhtwacwack sramsram nuh sin muhtwacn fuhsr se. Janet el fahk nuh sel, “Jesus el onwelah mwet kun in ahkkahlwemye lah el ac oruh ma inge nuh sin mwet kun nuhkewa.” Eltahl tuhkweni sruhmuhn Fwackyuck 21:3, 4, ac Janet el ahkuhtweyac nuh sel lah fuhkah wuhlelah se inge ac fah ahkpwacyeyuck ke Tohkohsrahi luhn God. Muhtwacn sac suhkahslah ke kihtin pacl na el fahk: “Nga soenna lohng ma inge sin sie mwet kun. Inkaiyen mwet ma kuh in liye uh eltahl luhlahlfongi muh mwet uh kun ke srihpen sie ma eltahl kuh mwet mahtuh laltahl uh oruh. Janet el suhpwaclah sie link ke puk inge Bible el Luti nuh yohrohl ke e-mail, ac ke pacl inge eltahl lutlut Bible lwen luo ke wik se.
5. Kuht finne tiac kuh in onwelah mwet kun uh oacna ke Jesus el oruh, ma wo fuhkah tuhkuh ke kuht ahkkahlwemye luhngse nuh sin mwet kun uh?
5 Pwacye lah kuht tiac kuh in onwelah mwet kun kuh mwet ma lohsrlah muhta oacna ke Jesus el oruh, tuhsruhktuh kuht kuh in kahsruh nuhnak luhn mwet ma lohsrlah sin god luhn facl se inge, wekuhnacng mwet kun, eltahl in kahlwem ke Kahs luhn God uh. (Luo Corinth 4:4) Jesus el onwelah mukul luo ma apkuhran nuh Jericho ah ke srihpen “el pahkohmuhtahltahl.” (Matthew 20:34) Kuht fin ahkkahlwemye kain in ohiyac inge nuh sin mwet kun uh, kuht ac kuh in engankihn sie kunohkohn wo in kahsreltahl lutlut kacl Jeova, el suc ac fah ahkwoyelah muhtuhn mwet kun nwe tok ma pahtpaht.
[Mwe ahkuhtweyac srihsrihk ke sra 3]
Ke Pacl Se Kom Kahsruh Mwet Kun Se . . .
• Sramsram na nuh sel, tuhsruhktuh nimet lihksreni. Mwet kun uh tiac kuh in liye tuhsruhktuh inkaiyen pacl uh eltahl arlacna kuh in lohng wo.
• Kom ac fin pwacnuhl, oracni poum ac lwelah elan sruok kuhtuh srihk nuh lucng fin kapihn poum. El ac kuh in ukwe kom ke kom fahsr step se meet luhkel. Kom fin liye sie luhf, sahk, step, kuh kuhtwena ma el ac kuh in ikori kac, yohk srihpac kom in sensenkackuhnuhl.
• Kom sukohsohk in orekmakihn kain in kahs ma kuhpahsr nuh ke muhtahl, oacna “liye” ac “ngwetlah.” Mwet kun uh orekmakihn pac kahs inge. Eltahl “liye” ma uh ke senses sahyac ke mahnoltahl, ac eltahl oacyacpac luhmahlah ke nuhnak laltahl uh ma ahkuhtweyucki nuh seltahl uh.
• Oruh sramsram lomtacl uh ke sie acn mihs. Inkaiyen pacl uh mwet kun uh kihructruct ke acn ma okahrkahr kuh wohwohn, mweyen ac upac nuh seltahl in etuh lah meac orek siskacltahl uh.
• Ke pacl se kom ac fahlac luhkel, kom fahk elan etuh. Ma inge ac kahsrel in tiac mwekihnlac ke srihpen el sramsram nuh sin sie mwet ma wacngihnlac luhkel.
• Nwacklah sie pwepuh inge Please Follow Up (S-43), ac sang nuh sin secretary fin mwet kun sacn engan in lohng tuhsruhktuh el tiac muhta ke acn in forfor lom an.