Toeni nuh ke Orekma luhn Forfor Suc Ahkfalyeyuck Oakwuck Kac

1. Meac srihpen toeni nuh ke orekma in forfor uh?

¹ Ke sie pacl ah, Jesus el ohsun nuh sin mwet tuhma lutlut 70 lal meet liki eltahl fahsrelihk nuh ke orekma in luti laltahl ah. (Luke 10:1-11) El ahkkweyacltahl ke el ahkacsmakihnyacltahl lah eltahl tiac muhkwena, ac eltahl kolyuck sin Jeova, suc “Leum luhn kosrwacni.” El oacyacpac sang kahs in kahsruh ke orekma laltahl, ac el oakiyac tuh eltahl in tuhkweni orekma “kais luo.” Mihsenge, toeni lasr ma kuht oruh meet liki kuht som nuh ke orekma in luti uh oacpacna, tuh in ahkkweye kuht, kahsre kuht, ac oakiyac wo orekma lasr uh.

2. Puhtahkah enenuh in orek toeni ke orekma in forfor uh?

² Ke pacl inge, toeni ke orekma in luti lasr uh orek ke lusen minit 10 nuh ke 15, wekuhnacng in oraclah oakwuck ke kais sie u, in pakiyac acn in forfor, ac puhruhe. Ma inge eklac kuhtuh ke pacl inge. Muhtwacwack ke April, toeni nuh ke forfor uh enenuh in minit lihmekohsr nuh ke itkohsr na. Tuhsruhktuh, fin ma inge orek tukun miting luhn congregation, enenuh in fototo liki pacna, ke srihpen mwet ma wi ngacn engankihn tari mwe sramsram na wo suc tuhkuh ke Bible. Ke ahkfototoyeyucklac toeni nuh ke orekma luhn forfor uh, ma inge ac kahsre kuht nuhkewa in ahkyohkye pacl lasr ke orekma in luti uh. In wekuhnacng, fin oasr pioneer kuh mwet lili ma muhtwacwack ke orekma in forfor uh meet liki toeni uh orek, ac tiac paht eltahl fin tui ac wi ke toeni.

3. Toeni nuh orekma in forfor uh oakiyucki fuhkah tuh in mwe kahsruh yohk nuh sin mwet lili uh?

³ Toeni nuh ke orekma in forfor uh enenuh in oakiyucki ke inkacnek suc ac fah sang kahsruh yohk nuh sin mwet lili. Ke congregation pucspucs, arlacna wo fin u in forfor uh toeni ke kain in acn liki na acn sefanna. Ma inge ac kuh in oruh fihsracsr nuh sin mwet lili uh in som nuh ke acn in toeni ke forfor ac sahp nuh ke acn in forfor uh pac. Mwet lili uh kuh in sa na oakiyucki, ac oacyacpac fihsracsruh nuh sin mwet elder suc kol u in forfor se elan lohacng nuh sin mwet ma oasr ye liyacacng lal. Un mwet elder uh eltahl kuh in tuhkweni sramsram ke ohiyac luhn acn ac sulaclah ma wo emeet uh. Meet liki ahksahfyelah sie toeni ke puhruhe fototo se, mwet nuhkewa enenuh in etuh lah suc eltahl ac wi ac piyac acn eltahl ac orekma kac uh.

4. Efuh kuh tiac fal in nuhnkeyuck muh toeni ke orekma in forfor uh tiac yohk srihpac oacna toeni sahyac lasr uh?

⁴ Yohk Srihpac Oacna Toeni luhn Congregation: Toeni nuh ke orekma in forfor uh ma ac wo nuh sin mwet ma wi ke orekma in luti uh. Sahp tiac mwet nuhkewa ke congregation uh ac fah wi. Tuhsruhktuh, tiac kalmac pa toeni inge tiac yohk srihpac oacna toeni sahyac luhn congregation uh. In oacna toeni nuhkewa lasr ke congregation, toeni lasr ke forfor uh mwe sang se sin Jeova suc kahsre kuht in akacsruhi in ahkkahlwemye luhngse lasr nuh sin sie sin sie ac in oruh ma wo. (Hebrew 10:24, 25) Pwacnacng, mwet kol toeni ke orekma in forfor uh el enenuh in ahkolah wo tuh sramsram lal uh sang kaksak nuh sin Jeova ac in mwe insewowo nuh sin mwet wi kac. Fin kuh in orek, mwet lili ma ac wi ke orekma in forfor uh enenuh in kwacfeacng eltahl in wi toeni.

Toeni nuh ke orekma in forfor uh yohk srihpac oacna toeni nuhkewa sahyac luhn congregation

5. (a) Meac kunohkohn luhn mwet elder ma liyacacng orekma in luti ke pacl in orek oakwuck nuh ke toeni luhn forfor? (b) Fuhkah oakwuck nuh sin muhtwacn lili se suc kol toeni ke orekma in forfor uh?

⁵ Ahkolah luhn mwet Kol: Sie mwet enenuh in sa na eis kunohkohn lal, tuh el in ahkolah wo nuh kac. Ma inge pwacye pac nuh ke toeni nuh ke forfor uh. Pwacye lah, ke pacl se u in forfor uh toeni ke kain in acn, mwet elder ma kol u in forfor se kuh mwet se ma aholuhl uh pa kol toeni ke forfor luhn u laltahl. Tuhsruhktuh, ke pacl se congregation uh tuhkweni ke acn sefanna ke toeni laltahl uh, mwet elder ma liyacacng orekma in luti uh pa ac pakiyac sie mwet ah in kol. Kuhtuh mwet elder ma liyacacng orekma in luti uh eltahl oraclah schedule ac sang nuh sin kais sie mwet kol ke toeni ac fihliyac pac ma inge ke acn luhn mwe fahkwack nuhkewa. Mwet elder suc liyacacng orekma in luti uh, eltahl enenuh in orekmakihn nuhnuhnkuh wo laltahl in srihsrngiyac mwet kol, ac esam lah inkacnek in luti ac orekma wo luhn mwet kol inge in orek oakwuck pa ac oruh wo toeni se. Fin wacngihn mwet elder, mukul lili suc kahsruh mwet elder, kuh kuhtwena mukul lili suc bacptais tari ac kuh in kol ke kais kuhtuh pacl, mwet liyacacng orekma in luti uh eltahl enenuh in pakiyac sie muhtwacn lili suc bacptais tari ac kuh in kol toeni uh.—Liye mwe lutlut se inge “Ke Pacl Se Sie Muhtwacn Lili El Kol.”

6. Efuh kuh yohk srihpac mwet kol se in ahkolah wo?

⁶ Ke pacl se kuht eis sie kunohkohn ke Lutlut in Oruh Ma Luhngse luhn Jeova kuh ke Mwe Ahkpah in Fahkwack Wosasuc, kuht lohacng ahkwoyac nuh kac ac ahkolah wo. Kuht suhkwac sano nwe ke pacl se kuht kahsruhsr in som nuh ke miting fah kuht muhtwacwack nuhnkuh lah meac kuht ac sramsram kac. Sie kunohkohn in kol toeni ke forfor uh enenuh in orek oacpacna. Ingena ke ahkfototoyeyucklac toeni nuh ke forfor uh, yohk srihpac na pwacye ahkolah luhn mwet kol ke toeni uh tuh in yohk ma kuht eis kac ac sahflah ke pacl fal. Eltahl oacyacpac ahkolah wo ke eltahl eis acn in forfor uh meet liki pacl in toeni.

7. Meac kuhtuh ma suc sie mwet kol el kuh in sramsramkihn?

⁷ Meac fah Sramsramkihnyuck: Ke srihpen ohiyac luhn kais sie acn in forfor uh tiac oacna sie pacl nuhkewa, mwet kuhlwacnsap oaru eltahl tiac use ma kuht enenuh in ukwe ke kais sie toeni nuh ke orekma in forfor lasr uh. Pohk se inge, “Ke Pacl in Toeni nuh ke Orekma in Forfor uh, Kom Kuh in Orekmakihn” fah ahkuhtweyac kuhtuh ma kuh in orek. Inkaiyen pacl uh, toeni uh ac fah orek oacna kihsen siyuck ac top. Ke kais kuhtuh pacl, sahp ac oasr mwe luhmah na wowo se suc ahkoeyucklac kuh sie video suc tuhkuh ke jw.org, ma fal nuh ke orekma in forfor uh. Ke mwet kol se ahkolah nuh ke toeni ke orekma in forfor uh, el enenuh in nuhnkuh ke ma ac ahkkweye ac kahsruh mwet ma ac wi forfor ke lwen sacn.

Ke pacl se mwet kol toeni nuh ke forfor uh oruh ahkolah lal, el enenuh in nuhnkuh lah meac ac ahkkweye ac kahsruh mwet ma ac som oruh orekma in luti ke lwen sacn

8. Meac wo in sramsramkihn ke toeni nuh ke forfor ke Saturday ac Sunday?

⁸ Ke sie mwe puhpuhlyuck, ke Saturday, inkaiyen mwet lili uh kihte Tower in San ac Awake! Inkaiyen mwet ma wi ke orekma in luti ke Saturday eltahl tiac wi ke Monday nwe ke Friday, pwacnacng sahp upac eltahl in esam mwe sramsram ma eltahl ahkpah kac ke Lutlut luhn Sucu laltahl ke ekuh. Pwacnacng, sahp wo mwet kol toeni an in kalweni sie mwe srihkasrak ke mwe sramsram suc oasr ke sra sahflah ke Orekma Luhn Tohkohsrahi Lasr uh. Kuhtuh pac ma kuh in orek pa in sramsramkihn lah fuhkah news ma sikyak ke acn sesr, kuh mwe ahkfuhlwact ke puhlan pacl se kuh in toeni nuh ke mwe sramsram lasr ke magasin kuht orekmakihn. Kuh pac in sramsramkihnyuck lah meac kuh in fwack nuh sin sie mwet in lohm suc eis magasin nahtuhsr uh, tuh elan ahkolah nuh ke fohlohk se tok uh. Fin kuhtuh mwet ke toeni nuh ke forfor uh muhtwacwack orekmakihn tari sie magasin suc kihtakat nuh sin mwet uh, mwet kol toeni an el kuh in siyuck seltahl in ahkkahlwemye kuhtuh kahs in kahsruh na fototo kuh mwe ahkkweye ke ma sikyak nuh seltahl tari. Ke Sunday, mwet kol toeni an el kuh in sulaclah in oruh pac ohiyac inge ke sie mwe kihtakat ke mahlwem sacn. Mwe rit nahtuhsr inge, oacna Good News ac Porongo God in Moul Ma Patpat ac puk inge, Baibel el Luti kuh in kihtakat ke oacna sie lwen. Pwacnacng mwet kol se el kuh in ahkuhtweyac la fuhkah sie sin mwe rit inge kuh in kihtakatlah.

9. Meac kuh in sramsramkihnyuck ke Saturday ac Sunday, oacyacpac ke pacl ma oasr orekma in kihtakat yohk?

⁹ Congregation uh fin muhtwacwack wi ke orekma in kihtakat yohk ke Saturday ac Sunday, mwet kol ke toeni an el kuh in ahkutweyac lah ac kihtakat fuhkah magasin sasuc, wi mwe solsol kuh mwe rit srihsrihk uh. El kuh pac in sramsramkihn ma eltahl kuh in oruh fin mwet se ahkkahlwemye lah el luhngse lohng. Sie pac ma el kuh in oruh ah pa el sruhmuhn ma sikyak suc ahkkahlwemye sacohkiyacn orekma in kihtakat inge.

10, 11. Efuh kuh ahkolah luhn mwet lili uh yohk srihpac nuh ke fahlac wo luhn toeni ke forfor uh?

¹⁰ Ahkolah luhn Mwet Lili: Oasr pac kunohkohn luhn mwet lili tuh in fahlac wo toeni ke orekma in forfor uh. Ke eltahl sa in ahkolah nuh ke orekma in forfor uh, sahp ke pacl in lutlut luhn sucu laltahl, oasr ma eltahl ac kuh in sruhmuhn nuh sin mwet lili sahyac. Kalmacn ahkolah wo pa oasr tari magasin ac mwe rit nuhtum an meet liki pacl kom sun acn in toeni nuh ke orekma in forfor uh tuh kom in sa na som nuh ke acn in forfor uh ac wacngihn kuhtwena ma ikolkowi.

¹¹ Arlacna yohk srihpac in sa ahkolah ac sun acn in toeni nuh ke forfor uh minit ekahsr meet liki muhtwacwack. Pwacye lah kuht kwacfeacng in sa nuh ke toeni nuhkewa luhn congregation. Tuhsruhktuh, ma inge kuh in ahkkulukye lohacng luhn mwet sahyac uh ke kuht pahtlac nuh ke toeni nuh ke forfor uh. Fuhkah? Mukul lili ma kol toeni uh el enenuh in nuhnkuh ke ma puhkantwen meet liki el oraclah oakwuck nuh ke u. Fin suhpuhs mwet lili, sahp el ac sulaclah in suhpwaclah mwet nuhkewa nuh ke sie acn ma oreklac tari kuhtuh lohm kac. Kuhtuh seltahl fin fahsr som nuh ke toeni ke forfor ac acn in forfor uh tiac fototo nuh we, sahp el ac suhpwaclah mwet lili ekahsr inge in wi mwet ma oasr stosah okwac. Acn in forfor laltahl uh fin etweyuck muh sie acn ma nwacnwaclah ke mwet suhlallacl, sahp el ac siyuck kuhtuh mukul lili ah in weluhltahl kuh in orekma fototo nuh ke acn ma muhtwacn lili inge som nuh kac. Sahp mwet lili suc mahtuhoh kuh muhnahslah eltahl orekma ke acn ma tiac fuhlwact kuh ke lohm ma tiac arlac puhs acn in fan kac. Sahp pakiyucki nuh sin mwet lili sasuc eltahl in wi mwet lili ma pah ke orekma in luti. Tuhsruhktuh, mwet lili uh fin pahtlac nuh ke toeni uh, oakwuck pucspucs ma oreklac tari uh ac enenuh in sifwil ikihlyucklac kuh sifwil orek in fal nuh ke mwet ma pahtlac in tuhkuh an. Pwacye, ke kais kuhtuh pacl oasr srihpac wo lasr nuh ke pahtlac lasr uh. Tuhsruhktuh, kuht fin pahlah kuh kwacna pahtlac, sahp wo kuht in siyuck sesr sifacna fin srihpac uh pa kuht tiac srui ke toeni nuh ke orekma in forfor lasr uh kuh sahp kuht fin tiac kuh in oakiyac wo ma pucspucs meet liki pacl.

12. Kom fin kwacna oruh oakwuck lom sifacna ke forfor, meac kom kuh in nuhnkuh kac?

¹² Mwet lili ma toeni nuh ke forfor uh eltahl kuh in sulaclah in oruh oakwuck laltahl sifacna meet liki pacl in toeni uh muhtwacwack kuh eltahl kuh in sano in ituckyang sie mwet in weluhltahl. Kom fin kwacna oruh oakwuck lom sifacna, yac kom kuh in ahkyohkye asruoki lom ke kom wi mwet lili sahyac ac tiac mwet sefanna suc kom kawuck ac fototo nuh se pacl nuhkewa? (Luo Corinth 6:11-13) Yac kom kuh in wi sie mwet lili sasuc ah ke kais kuhtuh pacl in kahsrel in kapkapack ke inkacnek in luti lal uh? (Sie Corinth 10:24; Sie Timothy 4:13, 15) Lohacng ahkwoyac ke kuhtwena kahs in kahsruh ma ituckot nuh sum, wekuhnacng acn kom enenuh in muhtwacwack ke orekma in fahkwack. Ke sahflah toeni uh, nimet ekuhllah oakwuck ac sa in som nuh ke acn in forfor uh.

13. Mwet nuhkewa fin nuhnkuh ahkwoyac ac tuhkweni oruh ip kunacltahl uh, ma wo fuhkah toeni nuh ke orekma in luti uh fah use nuh sesr?

¹³ Tukun forfor luhn mwet tuhma lutlut 70 suc Jesus el oakiyac nuh ke orekma in luti, eltahl “fohlohkoh arlacna engan.” (Luke 10:17) Wacngihn ahlohloh kac lah toeni lal Jesus yohrohltahl meet liki eltahl muhtwacwack in luti kahsreltahl in oraclah wo ma kunacltahl uh. Mihsenge, toeni nuh ke orekma in forfor uh kuh in use pac kain in ma wo inge. Mwet nuhkewa fin nuhnkuh ahkwoyac ac tuhkweni oruh ip kunacltahl uh, toeni nuh ke orekma in forfor uh fah mwe ahkkweye, sang kahsruh, ac oakiyucki nuh sesr in ahkfahsrye orekma lasr in “mwe loh nuh sin mwet nuhkewa.”—Matthew 24:14.

Ke Pacl Se Sie Muhtwacn Lili El Kol

Sie muhtwacn lili el enenuh in orekmakihn sie ma in sunyac insifacl ke el kol toeni nuh ke orekma in forfor ac inkaiyen pacl uh el muhta na. Ma el sulaclah in sramsramkihn uh enenuh in oacna ma sie mukul lili el fah sramsram kac. El taran elan tiac oraclah in muh el luti mwet ma wi ke toeni, tuh sahp el kuh in oruh sramsram inmahsrlol ac mwet lili uh. El fin siyuck sie muhtwacn lili sahyac suc bacptais tari in oruh puhruhe, muhtwacn lili ingacn el enenuh pac in sunyac sifacl. Mukul lili se suc bacptais tari el fin wi toeni tukun muhtwacwack tari, muhtwacn lili se ingacn el ac siyuck sel elan aholuhl kol toeni sacn. Mwet elder ma liyacacng orekma in luti uh el enenuh in nuhnkuh ke ma upac suc kuh in sikyak ac sang kahs in kahsruh ma fal tuh in tiac mwe ahktihkuclkuclye kuhtwena mwet. Ke sie mwe puhpuhlyuck, fin pa oasr mukul lili suc srackna fuhsr ac bacptais tari wi ke pacl se muhtwacn lili se srihsrngiyucki in kol tuhsruhktuh mwet elder uh puhla muh el soenna ahkolah in kol toeni ke forfor uh. Ke kain in pacl se inge, mwet liyacacng orekma in luti uh el kuh in fahk nuh seltahl kewa lah muhtwacn lili ingacn pa kol toeni an, tuhsruhktuh mukul lili sacn pa ac oruh puhruhe, fin mwet elder uh puhla muh el fal in oruh. Kuh sahp oasr sie mukul lili mahtuh suc tiac sifwil lweyucklac elan kol toeni kuh oruh puhruhe luhn congregation suc mwet elder uh muhkwena etuh kac. Tiac enenuh in ahkkahlwemyeyuck, tuh mwet elder se el kuh in fahk na nuh sin muhtwacn lili ingacn lah el enenuh in kol ac puhruhe finne mukul lili ingacn oasr. Mwet elder uh eltahl oacyacpac fahk nuh sin mukul lili ngacn in etuh lwen ma oakiyucki tuh muhtwacn lili sacn in kol toeni ke orekma in forfor uh.

Ke Pacl in Toeni nuh ke Orekma in Forfor uh, Kom Kuh in Orekmakihn:

Sie mwe srihkasrak ke mwe sramsram suc tuhkuh ke Orekma Luhn Tohkohsrahi Lasr uh.
Sie video suc sang kahs in kahsruh nuh ke orekma in forfor uh ma tuhkuh ke jw.org.
Sie ip ke mwe srihkasrak wowo, oacna kahs in muhtwacwack, ma kuh in fwack ke pacl in fohlohk, kuh in ahkkahlwemye oakwuck nuh ke mwe kahsruh suc kuh in ituckyang nuh ke mwe rit ma mwet uh sruokyac.
Sie ma suhmuhslah suc ahkkweye kuh sang kahs in kahsruh nuh ke orekma in luti uh.
Sie ma sikyak wo ke orekma in forfor luhn mwet lili ke acn sum an kuh ma oasr ke mwe rit nahtuhsr.
Mwe ahkuhtweyac suc tuhkuh ke mwe lutlut ke Orekma Luhn Tohkohsrahi Lasr uh.
Mwe ahkuhtweyac suc tuhkuh ke sie mwe sramsram ke Mwe Ahkpah in Fahkwack Wosasuc.
Mwe ahkuhtweyac suc kuhpahsr nuh ke orekma in luti lasr suc tuhkuh ke Tower in San.
Mwe ahkuhtweyac suc kuhpahsr nuh ke orekma in luti lasr, oacna mwe rit suc tuhkuh ke puk inge, Ministry School ac “Come Be My Follower.”
Sie ip ke jw.org suc kuh in orekmakihnyuck ke orekma in luti uh.
Sie ip ke New World Translation suc ahksasucyeyucklac ma kuh in orekmakihnyuck nuh ke orekma in luti lasr uh.
Fuhkah in muhtwacwack sie sramsram nuh sin sie mwet suc kom sun ke acn in forfor lom, oacna mwet suc luhlahlfongi muh wacngihn God, kuh luhlahlfongi muh mwet uh tuhkuh ke ma orahkrahk, mwet Hindu, kuh mwet Buddhist.
Fuhkah in topuk sie mwet suc srihke in tulokihnyac sramsram lasr uh.
Fuhkah in kahsruh partner lom ke pacl in forfor elan sramsram nuh sin mwet ke inkacnek wo.
Fuhkah kom kuh in topuk sie mwet kom ohsun nuh se suc kahskahskihn kahs sahyac.
Fuhkah in muhtwacwack ke sie inkacnek in oruh orekma in luti suc kuhtuh mwet sahyac wi pac oruh, oacna orekma in suk mwet, sang ma loh ke telefon, sang ma loh ke acn ma puhkantwen mwet we, sifwil fohlohk nuh yurin mwet, kuh mwet lutlut Bible.
Sie mwe acsmakihn ke mwe sensen, in ahkfalye mwe sramsram lasr nuh ke enenuh luhn mwet, ohiyac wo, in oasr nuhnak wo, kuh kuhtuh pac ma sahyac.