Fuhkah Luhmuhk Ye Muhtuhn Jeova?
1. Fuhkah Bible el oacna sie selnguhn?
1 Pacl ekahsr kom ngetwacng nuh ke selnguhn ah? Inkaiyacsr oruh lwen nuhkewa mweyen pa ac kahsre kuht in etuh acn kacsr ma enenuh in ahkwoyeyucklac. Bible el luhmweyucklac nuh ke sie selnguhn. Ke kuht riti Kahs luhn God pa inge ma ac kahsre kuht in tuni insiacsr, ac pa Jeova el liye uh. (1 Samuel 16:7; James 1:22-24) Kahs luhn God El “akilen nunak ac kena lun inse.” (Hebrew 4:12) Efuh kuh in rit Bible ac nuhnkuh yohk ke ma kuht riti lwen nuhkewa uh el kuh in kahsre kuht in liye ip ma kuht kuh in ahkkapye tuh orekma in luti lasr uh wo liki meet ah?—Psalm 1:1-3.
2. Fuhkah Bible el kuh in kahsre kuht in tuni kuht sifacna?
2 Orekmakihn Bible oacna sie Selnguhn: Ma suhmuhslah ke Bible uh, ke mwet kuhlwacnsap oaru luhn Jeova luti kuht ke ohiyac ma kahto nuh sel uh. Ke sie mwe puhpuhlyuck, David el ahkkahlwemye moniyuck ke en God. (1 Samuel 17:45, 46) Isaiah el puhlaik ac sifacna eisaclacng in som fahkwack ke acn upac in forfor kac. (Isaiah. 6:8, 9) Luhngse yohk lal Jesus nuh sin Pahpah tuhmacl inkuhsrao oruh el nuhnkuh ke orekma in forfor lal uh oacna sie mwe ahkkeye ac mwe insewowo, ac tiac sie mwe ahktoasr. (John 4:34) Mwet Kihristin in pacl meet ah moniyuck in fahkwack, luhlahlfongi nuh sin Jeova, ac tu na kuh ke sulaclah lalos in tiac fuhleack. (Orekma 5:41, 42; 2 Corinth 4:1; 2 Timohty 4:17) Ke kuht nuhnkuh yohk ke kain in mwe srihkasrak inge, ac kahsre kuht in tuni kuht sifacna ke sie inkacnek ma kuht ac kuh in ahkwoye ohiyen orekma in forfor lasr uh.
3. Efuh tiac wo in kotwaclah pacl lasr in oruh ekyek ma enenweyuck?
3 Ahkwoye ma Kuluk: Pwacye lah, wacngihn srihpac in ngetacng liye ma kuluk se kacsr ke selnguhn se ac tiac oruh kuhtwena ma. Kuht kuh in siyuck sin Jeova el in kahsre kuht in etuh na pwacye mwet se kuht uh ac kahsre kuht oruh kuhtena eklac ma enenweyuck. (Psalm 139:23, 24; Luke 11:13) Ke srihpen pacl luhlah lasr uh srihkeni ac moul luhn mwet uh oasr in sensen, lwelah kuht in tiac kotwaclah pacl lasr nuh ke ekyek ma enenweyuck uh.—1 Corinth 7:29; 1 Timothy 4:16.
4. Fuhkah nuh sin mwet se suc arlacna lohacng nuh ke Kahs luhn God ac orekma fwal nuh ke ma el riti?
4 Jeova el tuni insien mwet uh. Ma inge yohk srihpac liki ma oan lihkihn mwet se. (1 Peter 3:3, 4) Fuhkah nuh sin mwet se suc arlacna lohacng nuh ke Kahs luhn God ac orekma fwal nuh ke ma el riti? “El tia lohng mukena ac mulkunla, a el orekmakin-mwet ouinge uh God El ac fah akinsewowoye in ma el oru.” (James 1:25) Ahok, kuht fwah insewowo ac wo ke orekma in luti lasr mweyen kuht “tolyukyak ke wolana lun Leum.”—2 Corinth 3:18.