Orekmakihn Mwe Srihkasrak luhn Mwet Pahluh Oacna Zephaniah
1. Fuhkah mwet in pacl lal mwet pahluh Zephaniah? Ac el mwe srihkasrak wo se nuh sesr mihsenge fuhkah?
1 Yac onfoko luhmngaul meet liki pacl lal Jesus, mwet Judah elos tiac elyah in okanlah alu lalos nuh sel Baal. Amon, sie Tohkohsrah kuluk, el acnwucki ac Tohkohsrah Josiah el muhtwacwacack kol. (2 Chronicle 33:21–34:1) Ke pacl sac, Jeova el srakuhlack Zephaniah tuh el in fwahkack nuhnuhkuh Lal. Fwinne Zephaniah el kuhpahsr nuh sin mwet kol luhn acn Judah, el tiac ahksrihkye pweng luhn Jeova in sang kahs in kai ke srihpen kolyuck luhn acn Judah. (Zephaniah 1:1; 3:1-4) In oacna Zephaniah, kuht kacfweacng in etahi ohiyen puhlaik lal ac tiac lwelah sucu in ahkkulukye alu lasr nuh sin Jeova. (Matthew 10:34-37) Pweng fuhkah se Zephaniah el fwahkack, ac meac sahflahiyac?
2. Meac kuht enenuh in oruh kuht in karihngihnyuck ke lwen in muhlat luhn Jeova?
2 Suk Jeova: Jeova muhkena kuh in molwelah mwet se ke lwen in muhlat lal. Pwacnacng, Zephaniah el kwacfe mwet Judah elos in suk Jeova, oruh ma suwohs, ac ahkpuhsisaclyelos ke srackna oasr pacl luhlah lalos. (Zephaniah 2:2, 3) Ma inge oacpacna ke lwen lasr uh. Oacna Zephaniah, kuht ahkkweye mwet pucspucs in suk Jeova, kuht enenuh pac in oruh, ac kacfweacng in tiac forlah luhkel Jeova. (Zephaniah 1:6) Tuhsruhktuh, kuht in suk Jeova ke kuht lutlutkihn Kahs lal ahkwoyac ac ke kuht puhruhe siyuck ke kolyuck lal. Kuht oruh ma suwohs ke kuht moulkihn sie moul nwacsnwacs. Kuht ahkpuhsisaclye kuht ke kuht ahkkahlwemye ohiyen puhsisacl ac ahkolah pacl nuhkewa in ahkos kolyuck tuhkuh ke u luhn Jeova.
3. Efuh yohk srihpac nuh sesr in sruokyac sie nuhnak wo ke orekma in forfor uh?
3 Wo Sahflahiyac: Pweng in nuhnuhnkuh lal Zephaniah mokleack kuhtuh mwet Judah inge. Tuh yohkna Josiah, suc muhtwacwacack sokol Jeova ke el srackna tuhlihk. Tok, Josiah el kol orekma na yohk se in lain mwet ma alu nuh ke ma sruhloaclah fwin acn we. (2 Chronicle 34:2-5) Mihsenge, fwinne oasr fihtac luhn Tohkohsrahi ma puhtatlac siskacn inkacnek uh, yen yotyot, kuh inmahsrlon kohkihl uh, oasr kuhtuh pac ma puhtatyang nuh ke fohk wo ac isus fahko. (Matthew 13:18-23) Kuht etuh na pwacye lah Jeova el ac tahfwelah in ahkinsewowoye kwacfeacng lasr ke kuht kahfofo in tahknelihk fihtac luhn Tohkohsrahi.—Psalm 126:6.
4. Efuh kuh kuht enenuh in sano ac tuhpanuhl Jeova?
4 Kuhtuh mwet Judah ah tiac nuhnkuh muh Jeova el ac muh ahkpwacyeye ma el fwahk ah. Tuhsruhktuh, Jeova el wuhlelah lah lwen luhlahp sac fototoyang. (Zephaniah 1:12, 14) Elos na suc muhta ke karihngihnyuck lal fah moliyucklac. (Zephaniah 3:12, 17) Ke kuht sano ac tuhpanuhl Jeova, lwelah kuht in engankihn tuhkeni lasr yurin mwet lili suc wi alu nuh sin God na wowo se lasr uh!—Zephaniah 3:8, 9.