Kihsen Siyuhk Ke Pohk
◼ Kahs in kahsruh fuhkah in Bible kuhpahsr nuhke orekmakihnyacn cell phone ke pacl in miting luhn Kihristin ac pacl in forfor?
“Ma Nukewa Ma Sikyak Fin Faclu Sikyak Fal Nu Ke Pacl La.” (Ecclesiastes 3:1): Cell phone oruh mwet uh in kuh in sramsram kuh sihm nuh sin sie mwet ke kuhtwena pacl. Tuhsruhktuh, oasr pacl ma Kihristin se tiac luhngse ma inge in ahkkolukyaclos. Ke puhpuhlyuhk, pacl in miting lasr oruh sie pacl in alu nuh sin Jeova, sie pacl in eis kahs in kahsruh, ac sie pacl in ahkkweye sie sin sie. (Deuteronomy 31:12; Psalm 22:22; Rome 1:11, 12) Yac kuht kuh in konelah cell phone lasr ke pacl se kuht sun acn in miting ac fah liye koanon ma inge tokin kuht som liki miting ah? Fwin oasr ma elyah na pwacye ac kuht tiac kuh in komelah cell phone lasr, kuht enenuh in oraclah cell phone lasr in tiac ahkkolukye mwet sahyac.
“Oru Ma Inge Nukewa ke Sripen Pweng Wo.” (1 Corinth 9:23): Oasr pacl ma fal in orekmakihn cell phone ke pacl in forfor. Ke puhpuhlyuhk, sahp mokul lili se el ac enenuh in sramsram nuh sin kuhtuh mwet lili suc forfor ke sie acn sahyac ke acn in forfor lalos. Kuhtuh pacl uh, mwet forfor uh orekmakihn cell phone in pahngon sie mwet suc luhngse in lohng kuh sie mwet lutlut ke Bible meet liki elos som nuh yohrohl, yohk na fwin mwet sac muhta ac ke acn ma loes. Fwin oasr cell phone yohrohsr, kuht enenuh in liyacng ma inge in tiac ahkkolukye sramsram lasr nuh sin mwet in lohm uh. (2 Corinth 6:3) Ke kuht soano mwet forfor sahyac, kuht in tiac orekmakihn cell phone kuh sihm nuh sin kawuck lasr. Wo kuht in lohacng nuhke orekma in forfor lasr ac nuh selos suc kuht wi orekma.
In Nuhnkuh ke Mwet Sahyac. (1 Corinth 10:24; Philippi 2:4): Kuht in tiac srihk kin pacl in sa som nuhke miting luhn forfor ac nuhnkuh ma kuht kuh in pang kuh sihm ke cell phone nuh sin kuhtuh mwet lili sahyac in konacack lah u in forfor oasr oyac. Ke pacl se kuht som pahtlac, u in forfor enenuh in sifwil pac oakiyac oakwuck in forfor. Kahlwem lah oasr pacl kuh oasr ohiyac ma sahp kuh in oruh kuht in pahtlac kuhtuh pacl uh ac wacngihn ma kuht kuh in oruh in tulokihnyac ma inge. Tuhsruhktuh ke pacl se kuht pahlah in som nuhke forfor ke pacl sa, kuht ahkkahlwemye lah kuht nuhnkuh ke oakwuck luhn Jeova, mokul lili se ma oruh miting ah, ac mwet lili wiyacsr.