KIHSEN SIYUCK LUHN MWET RIT
Meac “mwe ahkpwacyei” ac “mwe akucl” ma kais sie mwet Christian akmuhsralah uh eis sin God?—Luo Corinth 1:21, 22.
In pacl meet ah, mwe akucl ke ring se inge itactyang nuh ke clay kuh wax in ahkkahlwemye pwacyeiyacn pwepuh sacn
Mwe Ahkpwacyei: In fal nuh ke sie puk, kahs Greek se ma luhngasyucklac nuh ke “mwe ahkpwacyei” ke Luo Corinth 1:22 pa “sie kahs ma orekmakihnyuck nuh ke oakwuck ac ke business” suc kalmeyac uh pa “in ahkfalye kuhtuh srihsrihk ke molin sie ma meet liki itucklac, ac ma inge oakiyac suwohs luhn sie mwet nuh ke sie ma el ac moli, kuh in oacna sie contract ma yohk srihpac.” (Word Meanings in the New Testament, by Ralph Earle, 1986) Nuh sin mwet akmuhsralah uh, molo sahflah se kuh mwe sang se inge ahkuhtweyucki ke Luo Corinth 5:1-5, oacna in nokomacng sie mahno in nguhn ma tiac kuh in kuhlawi. In weacng mwe sang se inge pa sie moul ma oan ma pahtpaht ac wacngihn sahflahiyac.—Sie Corinth 15:48-54.
Ke kahs Greek ke pacl inge, sie pac pohloh kahs ma kuhpahsr nuh kac el orekmakihnyuck nuh ke sie ring in macruht. Mwe puhpuhlyuck se inge arlacna fal nuh seltahl suc ac fah eklac muhtwacn kiyacn Christ ke kahs in puhpuhlyuck.—Luo Corinth 11:2; Fwackyuk 21:2, 9.
Mwe Akucl: Ke pacl somlah ah, ituckyang sie mwe akucl in oacna sie signature in ahkpwacyeye ma luhn sie mwet, pwacyeiyac an, kuh inseselac luhn mwet luo. Nuh sin mwet akmuhsralah uh, ituckyang “mwe akucl” se kuh siliyucki eltahl ke inkacnek luhn nguhn muhtahl oacna eltahl ma luhn God. (Ephesus 1:13, 14) Tuhsruhktuh, mwe akucl se inge soenna oreklac ma na pwacye se lac ne ke pacl se meet liki na mwet sacn misac kuh meet liki na muhtwacwacyen lwen in ongaiyac luhlahp uh.—Ephesus 4:30; Fwackyuk 7:2-4.