Sie Sramsram Na Yohk Srihpac

Wacngihn kuhtwena ma suhmuhslah sahyac luhn kuhtwena alu ma oacna Bible uh. Wacngihn kuhtwena puk sahyac ma ahkkweye luhlahlfongi luhn mwet pucspucs ke lusen pacl na loeloes. Ke pacl sacn pacna, wacngihn kuhtwena puk sahyac ma tuniyuck oacna Bible uh.

Ke sie mwe puhpuhlyuck, kuhtuh sin mwet suc lutlut yohk kac uh ahlohloh fin Bible ma oasr ke pacl inge uh kuh in luhlahlfongiyuck muh fal nuh ke ma suhmuhslah emeet ah. Sie mukul suc oruh lutlut lal ke alu el fahk: “Kuht tiac kuh in etuh fin ma suhmuhslah na pwacye ah pa kuht sifwil fohlohkuhnack inge kuh tiac. Ke lusen yac pucspucs, ma suhmuhslah ma oasr yohrohsr uh nwacnwaclah ke ma tahfonglac pucspucs ac inkaiyen ma inge siena liki ma suhmuhslah na pwacye uh ke inkacnek pucspucs.”

Kuhtuh pac mwet uh kihsen siyuckkihn suwohs ac pwacyeiyen Bible uh ke srihpen alu laltahl ma eltahl mahtuhlah kac uh. Ke sie mwe puhpuhlyuck, Faizal el lutiyuck sin sucu lal ma tiac luhlahlfongi kacl Christ muh Bible uh puk muhtahl se, tuhsruhktuh ikihlyucklac. Faizal el fahk, “Ke srihpen ma inge nga tiac arlac luhlahlfongi mwet ma srihke in sramsram nuh sihk ke Bible uh. Sahyacn ma inge, tiac Bible na pwacye uh pa eltahl us inge. Ma inge ikihlyucklac!”

Yac yohk srihpac fin Bible uh ikihlyucklac kuh tiac? Koacl, kuht srihke nuhnkuh ke kihsen siyuck inge: Yac kom luhlahlfongi ke wuhlelah pucspucs ke Bible nuh ke pacl fahsruh uh kom fin nihkihn lah wuhlelah inge sihmlac ke ma suhmuhslah na pwacye uh? (Rome 15:4) Yac kom ac orekmakihn kahs in kahsruh luhn Bible in sang oruh sulaclah ma yohk srihpac nuh ke orekma, sucu kuh alu lom uh fin pa Bible ke pacl inge uh ma tiac pwacye ac sihmlac na sin mwet uh?

Finne ma suhmuhslah emeet ke Bible uh wacngihnlac, srackna puhkantwen ma suhmuhslah mahtuh [manuscripts] ma sihmlac. Fuhkah tuh ma suhmuhslah mahtuh inge in oan na ac tiac muhsahllah, ahkkulukyeyuck, kuh ikihlyucklac? Ke kom etuh lah ma inge oan na ne mihsenge, ma inge ahkkweye fuhkah luhlahlfongi lom ke Bible ma oasr yurum ke pacl inge? Nuhnkuh ke top nuh ke kihsen siyuck inge nuhkewa ke mwe lutlut se tok ma ac fah ahkuhtweyac lah fuhkah tuh Bible uh kuh in oan na ne mihsenge.