MWET RIT LASR UH SIYUCK . . .

Meac tiac wo ke facsin ke Christmas?

Ke lusen pacl na loeloes se fwack muh Christmas uh facsin se luhn mwet Christian in ahkfuhlwactye isuslac lal Jesus. Tuhsruhktuh, puhs sin facsin ma orekmakihnyuck ke mwe ahkfuhlwact inge oruh kuht in nuhnkuh lah fuhkah tuh ma inge in kuhpahsr nuh ke isuslac lal Jesus uh.

Sie sin ma inge pa nuh ke sramsram pihlenfong kacl Santa Claus. Santa Claus se ke pacl inge ma etweyuck ke ahluht fasrfasr ac nuknuk sruhsrah el muhtwacwacack orekmakihnyuck ke yac 1931 sin sie company ma orek mwe nihm fin acn North America. Ke yac 1950 kuhtuh, mwet Brazil srihke in ahollah Santa Claus ke sie mwet pwengpweng ke mwe akucl luhn acn we pahngpahng Grandpa Indian. Fuhkah sahflahiyac uh? Santa Claus el kuhtanguhllah Grandpa Indian. Sie mwet luti pahngpahng Professor Carlos E. Fantinati el fahk lah Santa Claus el oacyacpac “kuhtanguhllah ahwowo Jesus in oacna mwe akucl na pwacye ke pacl in ahkfuhlwact luhn December 25.” Tuhsruhktuh, yac pihlenfong kacl Santa Claus uh muhkwena pa ma kuluk ke Christmas uh? In konwacack top nuh kac uh, kuht srihke fohlohk nwe ke pacl luhn mwet Christian in pacl meet ah.

Puk se inge pahngpahng Encyclopedia Britannica fahk lah, “Ke lusen yac lofoko ke muhtwacwacyen pacl luhn mwet Christian meet ah, oasr mwe lain na yohk ke akihlenyacn lwen in isuslac luhn mwet suc tuh acnwucki ke srihpen luhlahlfongi laltahl kuh, in oacna ma sikyak nuh sel Jesus.” Efuh? Mweyen, mwet Christian in pacl sac liye muh mwe ahkfuhlwact ke lwen in isuslac uh ma tuhkuh ke facsin luhn mwet pegan, pwacnacng tiac fal in ahkfuhlwactyeyuck. Wacngihn pac ahkkahlwemyeyacn lwen se ma Jesus el isuslac ah in Bible.

Yac tolfoko kuhtuh tukun Jesus el misac, finne ke mwet Christian emeet ah lain facsin in ahkfuhlwactye kuhtwena lwen in isuslac, alu Catholic muhtwacwacack in ahkfuhlwactye Christmas. Alu inge luhngse in eklac pwengpweng pwacnacng, eltahl srihke in ahkwacngihnyelah sie ma ma tulokihneltahl inge, pa alu pegan luhn mwet Rome wi mwe ahkfuhlwact laltahl ke sie lwen in yac se ma srihk emeet lusen pacl ma oasr kahlwem [winter solstice festivals]. Penne L. Restad el suhmuhslah ke puk se lal inge Christmas in America lah “ke kais sie yac muhtwacwacack ke December 17 nuh ke January 1, inkaiyen mwet Rome inge orek kuhfa, sritacl, wohwohn, mahs ac wi ke kuhtuh pac mwe ahkfuhlwact ke eltahl oruh ahkfuhlwact laltahl nuh sin God laltahl uh. Ac ke December 25, mwet Rome inge ahkfuhlwactye isuslac luhn god faht laltahl suc tiac kuh in liyeyuck. Ke oakiyucki Christmas ke lwen se inge, alu ing? e kwacfe mwet Rome pucspucs in ahkfuhlwactye isuslac lal Jesus liki na isuslac luhn god faht se inge. Gerry Bowler suc suhmuhslah puk se inge pahngpahng Santa Claus, a Biography el fahk lah mwet Rome inge “srackna engankihn mwe nahweyuck pucspucs ke mwe ahkfuhlwact inge.” Ma sikyak na pwacye uh pa eltahl “muhtwacwacack in ahollah mwe ahkfuhlwact sasuc inge ke mwe ahkfuhlwact meet ah.”

Ma na kahlwem se lah mwe ahkfuhlwact ke Christmas inge ma tuhkuh ke facsin kuluk ke muhtwacwacackiyac. Ke puk se lal Stephen Nissenbaum pahngpahng The Battle for Christmas, el fahk lah Christmas uh oacna “mwe ahkfuhlwact ma oreklac sin mwet pegan ma luhlahlfongiyuck muh ma luhn mwet Christian.” Pwacnacng, Christmas uh tiac ahkfuhlwactye God kuh Jesus Christ, wen nahtuhl. Yac ma inge tiac arlacna yohk srihpac? Bible uh siyuck: “Ma suwohs ac ma kuluk ac akacsruhi fuhkah? Kahlwem ac lohsr ac tuhkweni fuhkah?” (Luo Corinth 6:14) In oacna sropon sahk soko ma tiac suwohs kap la, mwe ahkfuhlwact ke Christmas uh tiac pac suwohs pwacnacng ‘tiac kuh in ahksuwohsyeyuck.’​—Ecclesiastes 1:15.