SIFAC KE KOLO | KOM KUH IN KAHLWEM KE BIBLE

Efuh Kuh Yohk Srihpac Kom In Kahlwem Ke Bible?

“Bible uh sie puk ma etweyuck ke alu pucspucs. Tuhsruhktuh, nuh sin mwet Chinese, eltahl nuhnkuh muh puk se inge tiac ma nuh seltahl ac wacngihn srihpac.”​—LIN, CHINA.

“Nga wi ke alu luhn mwet Hindu ac nga tiacna kahlwem ke puk muhtahl ma kuht orekmakihn inge. Pwacnacng, nga ac kahlwem fuhkah ke Bible Muhtahl?”​—AMIT, INDIA.

“Nga ahkfuhlwactye Bible uh ke srihpen puk mahtuh se ac nga lohng lah pa inge puk se ma puhs emeet mwet suc luhngse in eis nahtuhltahl. Tuhsruhktuh nga soenna liye atac uh.”​—YUMIKO, JAPAN.

Fin facluh nohfohn, puhs mwet suc arlacna ahkfuhlwactye Bible uh. Tuhsruhktuh, sahp tiac arlac yohk ma eltahl etuh ke koano uh. Ma na pwacye se pa inge yohk na nuh sin million mwet suc muhta fin acn Asia. Tuhsruhktuh, ma inge pwacye pac ke acn pucspucs ma Bible uh oasr we.

Pwacnacng, sahp kom nuhnkuh, ‘Efuh kuh enenuh se in oasr kena luhk in kahlwem ke Bible uh?’ Kom fin kahlwem ke ma sihmlac in puk na sacohk se inge, koano uh ac kuh in kahsre kom in:

• Engan ac insewowo

• Kuhtanglah ma upac luhn sucu

• Muhtwacnglah mwe fosrngah

• Ahkwoye inmahsrlom nuh sin mwet sahyac

• Lahlmwetmwet ke orekmakihnyen mani

Ke sie mwe puhpuhlyuck, srihke nuhnkuh kacl Yoshiko fin acn Japan. El ke etuh lah meac Bible uh sramsramkihn ac el sulaclah muh el ac riti. Meac sikyak? El fahk, “Bible uh kahsreyuc in etuh lah oasr na pwacye srihpen moul uh ac ke finsrak nuh ke pacl fahsruh uh.” Amit, mukul se ma sramsram meet ah, el sulaclah in sifacna riti ac tuni koanon Bible uh. El fahk, “Nga arlac lut. Oasr kahs in kahsruh kac ma kuh in orekmakihnyuck sin mwet nuhkewa.”

Bible uh sang kahsruh na yohk nuh ke moul luhn mwet pucspucs. Yac kom luhngse in sifacna liye ke motom lah ma wo fuhkah ac kuh in kahsre kom kac?

[Pohk ke sra 3]

Ke kuhtuh pac mwe ahkuhtweyac lah Bible uh ac kahsre kom fuhkah, liye mwe rit se inge A Satisfying Life—How to Attain It, ma oreklac sin Mwet Loh luhn Jeova.