Ya Me Akengun Lom Mwo A Akkeye Kom?

“Komwos in suk a in etu ma a akinsewowoye Leum.”—EFESUS 5:10, Leng Sasu Ke Kas Kosrae.

1, 2. (a) Kut etu fuka la Jeova el lungse kut in engunkin moul? (b) Ke sripen pal su kut orekmakin nu ke me akengun el sie “me sang lun God” ma inge fwa mokle kut in oru mea?

BAIBEL el akkalemye kalem la Jeova el lungse kut in engunkin moul lasr. Ke sie me pupulyuk, Sam 104:14, 15 el akkalemye la Jeova el “wise mongo liki fwalu, a wain su akinsemwomwoye insien met, a oil su oru mutal in saromrom, a bred su akkeye insien met.” Paye la, Jeova pa ase me mongo su kut enenu tu kut in moul. El akkapye saku in orala me mongo, oil, a wain. Wain tia arla eneneyuk tu kut in moul, tusruktu wain ku in “akinsemwomwoye insien met.” (Ekklisiastis 9:7; 10:19) Aok, Jeova el lungse kut in engun, sessesla insiesr ke “insemwomwo.”—Orekma 14:16, 17.

² Ke ma inge, kut tia enenu in nunku mu tia mwo in orekmakin kutu pal lasr in “liye mwon yen engyengu” a ke “kiuf in imae.” Kain in orekma inge ku in akkeye kut a oru moul lasr in engun. (Mattu 6:26, 28; Sam 8:3, 4) Sie moul mwomwo a engun el sie “me sang lun God.” (Ekklisiastis 3:12, 13) Pal su kut orekmakin nu ke me akengun el me sang pa su God el ase nu sesr. Ke ma inge kut enenu in orekmakin ma inge ke sie oiya su akinsemwomwoye God.

Oru Sulela Mwo ke Me Akengun

3. Efu ku metu elos oru sulela su tia oana sie ke me akengun lalos?

³ Met su oasr nunak sumwos ke me akengun elos etu la oasr sukosok lalos in oru sulela puspus. Elos etu pa la oasr me akengun su elos tia ku in oru. Efu ku tia oana sie sulela lun met puspus ka? In kasre kut in kalem ka, kut ku in pupulyukkin sulela lasr ke me akengun nu ke sulela lasr ke me mongo. Met in an puspus elos lungse kang kain in mongo su tia oana sie. Ke inkanek ouinge, met Kristian su muta in mutunfwal puspus elos engun in oru me akengun su tia oana sie. Fwinne met su muta in an sefwanna saap elos sulela in oru ma puspus su tia oana sie. Ke sie me pupulyuk, sie met el ku in nunku mu sie me akinsemwomwoye nu sel in rid buk mwomwo, tusruktu sie met saye ku in nunku mu el tia pwar ka. Met puspus saye saap elos lungse in kasrusr ke bicycle, tusruktu met saye elos srunga in oru orekma se inge. In oana ke met puspus ku in sulela kain in mongo elos lungse, elos ku pa in sulela oiyen me akengun su elos lungse in oru.—Rom 14:2-4.

4. Efu ku kut enenu in sulela na me akengun su kut ku in oru? Me srikasrak fuka ku in kasre kut in kalem ka?

⁴ Paye la oasr sukosok lasr in oru sulela ke me akengun, ne ouinge kut tia enenu in oru me akengun nukewa su kut ke in oru. Sifwilpa nunku ke me srikasrak ke me mongo. Kalem la kut lungse in kang kain in mongo puspus. Tusruktu kut srunga in kang ma kolukla tari. Meyen ma inge ku in oru kut in mas. Ke inkanek oapana, saap kut lungse in srike kain in me akengun mwomwo puspus. Tusruktu kut fwa tia oru me akengun fokfok ku ma su akkalemye akmas, ku kutena ma su fwa aksensenye moul lasr. Ma puspus inge lain akwuk mwomwo lun Baibel. Me akengun inge ku in kunausla oiyen kawuk lasr nu sin Jeova a ku in kunausla manosr. Ke ma inge kut enenu in sulela me akengun su mwo a fwal mukena. Kut enenu in nunku akmwoye ke ma kut lungse in oru a kut in sulela kain in me akengun su ku in akinsemwomwoye kut a me akengunye Jeova. (Efesus 5:10) Kut ku in sulela fuka la piya ka me akengun su mwo nu sesr?

5. Kut etu fuka fwin me akengun lasr me akinsemwomwo nu sin Jeova?

⁵ Kut fwin lungse me akengun lasr in kasre kut a akinsemwomwoye Jeova, ma inge enenu in fwal nu ke akwuk mwomwo lun Baibel. (Sam 86:11) Kom enenu in orekmakin sie checklist ku ma simusla in kasre kom in oru sulela ka. Ma simusla inge enenu in oasr kusensiyuk tolu su kut ku in siyuk sesr sifwana. Kusensiyuk inge pa: mea? ngea? a su? Kut fwa sramsramkin ma tolu inge ingena.

Mea Oiyen Me Akengun Inge?

6. Kain in me akengun fuka kut fwa tia sulela in oru? Efu ku kut tia sulela ma inge?

⁶ Meet liki kut sulela kutena me akengun, kut enenu in siyuk sesr sifwana: ‘Mea oiyen me akengun inge?’ Mwo in esam pal nukewa la oasr kain in me akengun luo. Ke kain in me akengun se meet ma inge kut fwa tia oru. Ke kain in me akengun akluo, oasr oiya puspus su kut ku in sulela mu kut ku in wi oru. Mea oiyen me akengun se meet se inge? Me akengun puspus ke fwal koluk se inge weang kain in orekma puspus su lain akwuk mwomwo lun Baibel, ku kunausla masap lun God. (1 Jon 5:19) Met Kristian paye elos tia sulela kain in me akengun inge. Kutena me akengun su akkalemye ke orekma lun inutnut, orekma koluk lun mokul nu sin mokul, petsa a me rid fokfok, ku orekma sulallel. Wekunang me akengun su akkalemye ke orekma koluk lun met in akngalye met puspus saye, ku kutena me akengun su oru orekma fokfok in oana ma mwomwo. (1 Korint 6:9, 10; ridi Fwakyuk 21:8.) Kut fwin mukelana muta ku kut oasr yurin met puspus, kut fwa tia na sulela in oru kain in me akengun inge. Kut lungse in akkalemye nu sin Jeova la kut srunga “ma koluk.”—Rom 12:9; 1 Jon 1:5, 6.

7, 8. Mea ku in kasre kut in oru sulela mwomwo ke me akengun? Me srikasrak fuka kut ku in nunku ka kut fwin oru sulela ke me akengun?

⁷ Ke kain in me akengun akluo oasr orekma puspus su kut enenu in nunku ka meet liki kut oru sulela lasr. Baibel el tia akkalemye ke kain in me akengun inge. Ne ouinge akwuk mwomwo lun Baibel fwa kasre kut in eis etauk a kalem ke nunak lun Jeova ke ma mwo a ma koluk. Ke ma inge meet liki kut oru sulela ke kain in me akengun inge, kut enenu in akpayeye meet la ma inge tia lain akwuk mwomwo lun Baibel. (Soakas 4:10, 11) Tokin ma inge kut enenu in oru sie sulela su fwa kasre kut in karungin sie ella ku conscience mwomwo. (Galetia 6:5; 1 Timote 1:19) Fuka kut ku in oru sulela mwomwo? Lela kut in sifwilpa nunku ke me mongo. Meet liki kut kang sie mongo sasu, kut lungse in etu la ma fuka oasr ka. Ke inkanek oana sie, meet liki kut sulela me akengun lasr, kut lungse in etu ke oiyen me akengun se inge tu kut in ku in oru sulela fwin ma inge mwo a fwal nu sin sie met Kristian.—Efesus 5:17.

⁸ Ke sie me pupulyuk, saap kom lungse me sritel puspus. Met puspus elos lungse pa. Me sritel puspus ku in oru met in engun. Tusruktu kutu sport oru met sritel in amei upa su ku in paenang elos akngalye sie sin sie, ku oru moul lalos in sensen na paye. Kutu me sritel arlana sensen a ku in kunausla monin met sritel. Ke kutu sport saye, metu elos akfulatye u lalos ke sie inkanek koluk a su alukela ma fwal, a ku in nunku mu mutunfwal selos mwo liki ma saye. Mea kom a oru kom fwin lungse sie me sritel su oiya inge sikyak ka? Ke kom muta nunku ke oiya puspus su weang nu ke kain in sport inge, kalem la kom a fwa oru sulela lom la me akengun se inge tia fwal nu ke nunak lun Jeova. A ma inge tia pa fwal nu ke oiyen misla a lungse su kut luti nu sin met puspus. (Isaia 61:1; Galetia 5:19-21) Tusruktu kom fwin akpayeye tari la sie me akengun el fwal nu ke akwuk mwomwo lun Jeova, na ma inge ku in akinsemwomwoye kom a akkeye kom.—Galetia 5:22, 23; ridi Filippai 4:8.

Ngea Nga a fwa Wi ke Sie Me Akengun?

9. Mea me top lom nu ke kusensiyuk se inge akkalemye: ‘Ngea nga a fwa wi ke sie me akengun?’

⁹ Kusensiyuk se meet kut akuteye tari pa: Mea? Me top lasr nu ke kusensiyuk se inge akkalemye ma kut lungse a ma kut insese ka. Inge kusensiyuk akluo pa: Ngea? Ke ma inge kut enenu in siyuk: ‘Ngea nga a fwa wi ke sie me akengun, a lupaka pal nga fwa orekmakin nu ka?’ Me top nu ke kusensiyuk akluo inge akkalemye la mea ma yok sripe nu sesr, kalme pa, ma kut nunku arlana yok sripe. Na mea ku in kasre kut in sulela la me akengun el yok sripe fuka ke moul lasr?

10, 11. Kas lun Jisus in Mattu 6:33 kasre kut fuka in sulela lupan pal su kut a orekmakin nu ke me akengun?

¹⁰ Jisus Kraist el fwak nu sin met tuma lutlut lal: “A kom fwa lungsum Jeova God lom ke insiom kemwa, a ke moul lom kemwa, a ke nunkom kemwa, a ke ku lom kemwa.” (Mark 12:30, NW) Ke ma inge kut akkalemye la lungse lasr nu sin Jeova pa ma yok sripe emeet ke moul lasr ke kut akos ma Jisus el fwak inge: “A komwos suk meet togusrai lal, a ma sumwosmwos lal, a ma inge nukemwa fwa etukot pa nu sumwos.” (Mattu 6:33) Kas lun Jisus inge ku in kasre kut in sulela la me akengun el yok sripe fuka ke moul lasr, a lupaka pal su kut enenu in orekmakin nu ka.

¹¹ Loang akmwoye nu ka la Jisus el fwak nu sesr in kafweang in “suk meet togusrai.” El tia fwak nu sesr in suk mukena ke Togusrai. Jisus el etu la kut enenu pa in oru ma puspus saye ke moul lasr sayen orekma lasr in suk ke Togusrai. Kut enenu in orekmakin pal fwal in suk ke orekma, me mongo, loom, nuknuk, in eis lutlut, me akengun, a ma puspus saye. Tusruktu ma inge nukewa tia ma yok sripe emeet ke moul lasr. Togusrai lun God pa ma yok sripe emeet. (1 Korint 7:29-31) Kut fwin kalem la mea ma yok sripe emeet, kut fwa oru me akengun a orekma saye nukewa in ma akluo na a kut suk meet Togusrai. Kut fwin oru ma inge, me akengun ku in akinsemwomwoye kut.

12. Luk 14:28 ku in kasre kut fuka in oru sulela ke me akengun?

¹² Meet liki kut oru sulela ke sie me akengun kut enenu in nunku akmwoye ke “me mol,” ku lupan pal su eneneyuk nu ka. (Luk 14:28) In oana mani eneneyuk in moli ma puspus, oapana ke me akengun oasr pa ma saok su eneneyuk nu ka, a ma saok inge pa pal u. Kut enenu in oru sulela ke lupan pal su kut a fwa orekmakin nu ke me akengun. Kut tia enenu in orekmakin pal yok nu ke me akengun in tia eisla pal lasr nu ke ma yok sripe puspus oana lutlut lasr sifwana ke Baibel, tukeni lutlut lun sou ke Baibel, in wi ke tukeni nukewa lun congregation, ku orekma in luti peng mwo. (Mark 8:36) Tusruktu fwin sie me akengun ku in akkeye kut in kafweang nu ke orekma in kulansap lasr nu sin God, kut ku in sulela in orekmakin pal lasr in oru me akengun inge meyen ma inge ku in akinsemwomwoye kut.

Su Met Kawuk Luk?

13. Efu ku kut enenu in nunku akmwoye ke met su kut asrouki nu se ke kut oru me akengun lasr?

¹³ Kusensiyuk aktolu pa: ‘Su nga asrouki nu se ke pal se nga oru me akengun luk?’ Me top nu ke kusensiyuk se inge arlana yok sripe meyen met su kut asrouki nu se ku in kasre kut in oru sulela mwo, ku ku in kufuskutla in oru sulela su tia mwo. Ke sie me pupulyuk, kut engunkin kang mongo fwin oasr met puspus saye su wi kut mongo. Oiya se inge paye pa ke me akengun. Kut insemwomwokin me akengun kut fwin muta yurin met kawuk mwomwo lasr. Ke ma inge kut ku in kalem ka la pus inmasrlosr, yokna met fwusr, elos engunkin oru me akengun yurin met puspus. Tusruktu, meet liki kut oru sulela lasr ke me akengun, kut enenu in etu la su fwa met asrouki mwomwo a su met asrouki koluk. Ma inge fwa kasre kut in akpayeye la me akengun fwa akinsemwomwoye kut.—2 Kronikel 19:2; ridi Soakas 13:20; Jemes 4:4.

14, 15. (a) Fuka me srikasrak lal Jisus el kasre kut in sulela met kawuk mwomwo? (b) Kut fwin sulela kawuk lasr, kusensiyuk fuka kut enenu in siyuk sesr sifwana?

¹⁴ Kut fwin etawi me srikasrak lun Jisus ma inge ku in kasre kut in koneak met kawuk mwomwo. Jisus el lungse met pal nukewa. (Soakas 8:31) Ke pal se el oasr fwin fwalu, el akkalemye lungse a sunak nu sin met nukewa. (Mattu 15:29-37) Tusruktu Jisus el etu la oasr ma tia oana sie ke oiyen kulang a ke oiya su lungse in orek kawuk fototo. Paye la Jisus el kulang nu sin met nukewa, ne ouinge el tia orek kawuk fototo nu sin met nukewa. Kas lal nu sin met sap oaru 11 lal akkalemye nu sesr la fuka el sulela met kawuk fototo lal. El fwak: “Komwos met kawuk luk, komwos fwin oru ma nga sapkin nu sumwos.” (Jon 15:14; liye pa Jon 13:27, 30) Met nukewa su Jisus el sulela in kawuk fototo lal pa elos su fwasr tokol a kulansap nu sin Jeova.

¹⁵ Ke ma inge, meet liki kom sulela sie met oana kawuk fototo lom, mwo kom in esam ma Jisus el fwak. Siyuk sum sifwana kusensiyuk nukewa inge oana: ‘Ya met se inge el akkalemye ke ma el fwak a ma el oru la el akos masap lun Jeova a Jisus? Ya el lungse ma mwo a srunga ma koluk? Ya el fwa kasre yu in suk meet Togurai ke moul luk a in sie met kulansap oaru lun Jeova?’ Fwin kom fwak aok nu ke kusensiyuk nukewa inge, na oasr sie met kawuk mwomwo lom su kom ku in welul in oru me akengun.—Ridi Sam 119:63; 2 Korint 6:14; 2 Timote 2:22.

Ya Me Akengun Lasr Akpayeyuk Mu Mwo?

16. Mea kut enenu in siyuk sesr sifwana ma ke me akengun lasr?

¹⁶ Kut akuteye kusensiyuk tolu ke me akengun: mea? ngea? a su? Meet liki kut wi ke kutena me akengun, kut enenu in nunku akmwoye ke oiya a lupan pal kut a fwa orekmakin ke me akengun lasr, a ke met kawuk su kut sulela in wi kut oru me akengun. Kut fwin lungse me akengun lasr in akkeye kut, ma inge enenu in fwal nu ke akwuk fulat lun Baibel. Kut fwin nunku ke oiyen me akengun lasr, kut enenu in siyuk sesr sifwana: ‘Mea oiyen me akengun inge? Ya pa inge kain in me akengun su Jeova el insemwomwo ka, ku ma inge akkalemye akmas, orekma sulallel ku ma fokfok?’ (Soakas 4:20-27) Kut fwin nunku ke lupan pal eneneyuk nu ka, kut enenu in siyuk ouinge: ‘Lupaka pal nga fwa orekmakin nu ke me akengun? Ya pal su nga fwa orekmakin nu ka ku in akkeye yu?’ (1 Timote 4:8) A kut fwin nunku ke met kawuk su kut sulela, kut enenu in siyuk ouinge: ‘Su fwa wi yu in oru me akengun se inge? Ya elos fwa met kawuk mwomwo nu sik, ku elos fwa met asrouki koluk?’—Ekklisiastis 9:18; 1 Korint 15:33.

17, 18. (a) Kut ku in tuni fuka in etu fwin me akengun lasr fwal nu ke akwuk lun Baibel? (b) Sulela fuka kom fwa oru ke me akengun lom?

¹⁷ Fwin me akengun lasr el tia fwal nu ke akwuk mwomwo lun Baibel ke oiya tolu inge, kalem la ma inge tia me akengun mwo. Tusruktu fwin me akengun lasr el fwal nu ke akwuk mwomwo lun Baibel ke oiya tolu su kut sramsramkin inge, me akengun lasr ku in akfulatye Jeova a ku in akinsemwomwoye kut.—Sam 119:33-35.

¹⁸ Ke ma inge, kut fwin oru sulela ma ke me akengun lasr, lela kut in kafweang in oru ma sumwos ke pal fwal a yurin met asrouki mwomwo. Aok kut lungse in akos ma Baibel el akkalemye nu sesr in oru: “Komwos fwin mongo, ku nim, ku oru kutena ma, komwos oru ma nu kemwa nu ke mwolanu lun God.”—1 Korint 10:31.

Ya Kom Ku In Akuteye?

Akwuk mwomwo ke ma simusla inge ku in kasre kom fuka in oru sulela mwomwo ke me akengun lom?

• Filippai 4:8?

• Mattu 6:33?

• Soakas 13:20?

[Diagram on page 4]

(For fully formatted text, see publication)

✔Mea

[Diagram on page 5]

(For fully formatted text, see publication)

✔Ngea

[Diagram on page 6]

(For fully formatted text, see publication)

✔Su

[Petsac ke sra 5]

Kut ku in etawi fuka me srikasrak lun Jisus in sulela met kawuk lasr a me akengun lasr?