On nu sin Jeova!
“Nga fwa on a kaksakin God luk ke oasr moul yuruk.”—SAM 146:2.
1. Mea moklel Devid in orala a simusla kutu on lal?
KE EL srakna fwusr, Devid el orekmakin ao puspus in imae su apkurun nu Betleem in liaung un sip nutin papa tumal. Ke el karunganang sip u, Devid el ku in liye a tuni ma orekla sakuruk lun Jeova: oana itu nukewa in kosrao, “kosro lemnak lun imae,” a “mwon yen engyengu.” El purikyukyak na paye ke ma el liye inge, paenang el engun in simusla on in kaksak mwomwo nu sin God su orala ma sakuruk nukewa inge. On puspus su Devid el simusla ku in koneyukyak in buk lun Sam.a—Ridi Sam 8:3, 4, 7-9.
2. (a) Me kasru fuka on u ku in oru nu sin sie met? Sang me pupulyuk. (b) Mea kut ku in lotela ke fototo lal Devid nu sin Jeova in Sam 34:7, 8 a Sam 139:2-8?
2 Saap ke lusen pal inge su Devid el akmwoye oiya lal oana sie met on. Aok, el ekla met on su arlana sumat, ke sripe se inge Togusra Soul el sulel in sritelkin harp nu sel. (Soakas 22:29) On lal Devid el ku in akpwarye nunak upa lun togusra, oana on mwo ke pal inge ku in akpwarye pa met. Pal nukewa el sritelkin me sritel natul a on lal, “Soul el kela a mwola pa nunak a pulakin lal.” (1 Samuel 16:23, NW) On puspus su met on se inge el orala akpayeyuk la srakna mwo a arlana saok ne ke pal inge. Nunku ke ma inge! Ke pal inge, yea 3,000 kutu tokin Devid el isusla, million puspus sin met su tuku ke kain in sruf nukewa a muta yen nukewa fwin fwalu elos rid pal nukewa on lal Devid in eis me pwarak a in akkeye fwinsrak lalos ka.—2 Kronikel 7:6; ridi Sam 34:7, 8; 139:2-8; Emos 6:5.
Akwuk lun On nu ke Alu Paye
3, 4. Akwuk fuka orekmakinyuk ke on in kaksak nu sin God orek in len lal Devid?
3 Oasr etauk a lalmetmet lal Devid, a el orekmakin etauk a lalmetmet lal ke inkanek mwo emeet, in kaksakin Jeova. Tokin el ekla togusra in an Israel, Devid el orala akwuk ke orekma in kulansap ke loom nuknuk in alu in orekmakin pa kain in on kato puspus. Inmasrlon met Livai 38,000, oasr met 4,000 pakiyuki elos oana ‘met kaksak,’ a met 288 elos eis lutlut a akpa “in on nu sin Jeova, aok elos nu kemwa su pa.”—1 Kronikel 23:3, 5; 25:7.
4 Devid el orala on puspus su met Livai elos sritelkin a onkin. Kutena met Israel su oasr we a long ke pal se un met on inge elos onkin on kato puspus su Devid el orala elos akpwaryeyuk a akkeyeyuk na paye ke ma elos long. Tok, ke pal se tuptup in mwuleang utukla nu Jerusalem, “Devid el kaskas nu sin met leum lun met Livai in sulela ma lelos su met on, wi me on, salteri a harp a simbal, in sritalkin su arlana yok pusra, a akfulatye pusra ke engun.”—1 Kronikel 15:16, NW.
5, 6. (a) Efu ku metu ke pal in kolyuk lal Devid elos nunku akmwoye ke akwuk lalos ke on? (b) Kut etu fuka la on el arlana yok sripe ke orekma in alu lun met Israel nu sin God in pal meeta?
5 Efu ku met in len lal Devid elos nunku akmwoye a orekmakin ke inkanek yok kain in on mwomwo? Ya ma inge orek ke sripen togusra se inge el sie met on mwomwo? Mo, oasr siepa sripe, su akkalemyeyuk tokin century puspus ke pal se Togusra Hezekaia el sifwil akkeye orekma in alu ke temple. In 2 Kronikel 29:25, kut ku in rid: “A [Hezekaia] el filiye met Livai in loom sin Jeova wi simbal, wi salteri, a wi harp, fwal nu ke ma sap lal Devid, a Gad met liyaten lun togusra, a Netan met palu, tu ma sap ma sin Jeova me ke met palu lal.”
6 Aok, ke inkanek lun met palu lal, Jeova el sapkin met kulansap lal elos in kaksakunul ke inkanek lun on. Met on puspus su tuku ke sruf lun met tol elos tia enenu in oru kain in orekma a kunokon lun met Livai, in kasrelos in ku in orekmakin pal yok lalos in orala on, a in akpa ke on lalos.—1 Kronikel 9:33.
7, 8. Kut fwin yuk on ke Kingdom Hall lasr, mea ma yok sripe liki sumat in on a katoiyen pusra?
7 Saap kom fwak la, “Kut fwin sramsramkin akwuk ke on, nga tia oana sie nu sin met su yuk on ke temple in pal meeta su arlana sumat ke on, meyen pusrek tia kato!” Tusruktu tia met on nukewa ke sruf lun met Livai elos sumat ke on. In fwal nu ke 1 Kronikel 25:8, oasr pa ‘met lutlut’ ke on wi ke u se inge. Oasr pa met puspus saye ke sruf saye lun Israel su mwo pusrelos a sumat pa ke on, tusruktu Jeova el pakiye kunokon se inge in yukin on in temple nu sin met Livai mukena. Kut ku in lulalfongi ka la met Livai nukewa inge ‘sumat ke on’ ku ‘met lutlut,’ elos akpayeye kunokon lalos inge ke inse kewa lalos.
8 Devid el lungse in orala a yukin on a el arlana sumat ka. Tusruktu, ya oiyen sumat ku mwo pusra mukena pa ma yok sripe nu sin God? Devid el simusla: “Oru ke ku lom kewa in srital ke me on wi pusra lulap.” (Sam 33:3, NW) Arlana kalem me lutlut mwomwo ka: Ma yok sripe emeet pa kut in ‘oru ke ku lasr kewa’ in kaksakin Jeova.
Akwuk ke On Tokin Len lal Devid
9. Akuteye ke ma kom ku in liye a long fwin kom wi ke pal se temple kisekinyuk ke pal in kolyuk lal Solomon.
9 Ke lusen pal in kolyuk lal Solomon, akwuk ke on orekmakinyuk ke inkanek yok ke alu paye. Ke pal se temple kisekinyuk, oasr sie orchestra, su oasr met 120 ug me ugug brass lalos. (Ridi 2 Kronikel 5:12.) Baibel el akkalemye nu sesr la “met ugug [elos met tol nukewa] a met on oana sie in oru sie pusra in longyuk in kaksak a sang kulo nu sin Jeova, . . . ‘tu el mwo, tu lungkulang lal on ma patpat.’” Ke pal se pusra mwomwo lulap inge longyuk, “na loomu nenela ke sie pukunyeng,” su kalmekin la Jeova el insemwomwo ka. Paye la sie me insemwomwo yok in long pusren me sritel on nukewa inge, wekunang pusren tausan puspus sin met on su oana sie!—2 Kronikel 5:13.
10, 11. Mea akkalemye la met Kristian elos orekmakin on ke orekma in alu lalos nu sin God?
10 Met Kristian in century se meet elos orekmakin pa on ke alu lalos nu sin God. Aok, met Kristian puspus in century se meet elos oru tukeni lalos, tia ke temple ku loom nuknuk in tukeni, a ke loom sin met lili. Ke sripen me kalyai a kutupa oiya, an in tukeni lalos tia mwo ke pal puspus. Ne ouinge, met Kristian in pal san elos kaksakin God ke inkanek lun on.
11 Met sap Poul el akkeye met lili Kristian wiyel in an Kolosse: “Kafweang in . . . kaifwe sie sin sie ke sam, ke on in kaksak nu sin God, a onkin wi lungkulang insiomwos nu sin Leum.” (Kolosse 3:16, NW) Tokin Poul a Sailas elos filiyuki nu in prison, elos “pre a onkin on in kaksak nu sin God,” fwinne wangin buk in on natulos. (Orekma 16:25) Kom fwin sisila nu in prison, on ekasr ke Kingdom songs lasr kom esam in onkin?
12. Kut ku in akkalemye fuka la kut akilen saokiyen Kingdom songs lasr?
12 Ke sripen yok sripe na paye on ke alu lasr nu sin God, paenang kut enenu in siyuk sesr sifwana: ‘Ya nga akkalemye la nga aksaokye ma inge? Ya nga oru ke ku luk kewa in sa tuku ke meeting, assembly a toeni lulap in wi met lili wiyuk nukewa in onkin on in mutawauk, a ya nga sang insiuk a nunkuk nu ka? Ya nga akkeye tulik nutik in tia nunku ke pal in on inmasrlon Theocratic Ministry School a Service Meeting, ku on soko infwulwen Public Talk a Lutut lun Tauer in San mu pa inge pal in tufwoki in mongla, ku pa inge pal mwomwo lalos in som liki an in muta lalos, saap in fwasr ke kitin pal in asroela niyelos?’ On el sie ip yok ke alu lasr nu sin God. Aok, kut fwin ‘sumat ke on’ ku srakna ‘lutlut,’ kut nukewa ku in orekmakin pusrasr in sang kaksak nu sin Jeova.—Liye pa 2 Korint 8:12.
Ma Enenu Lasr Ekyek ke Pal Nukewa
13, 14. Efu ku yok sripe kut fwin yukin on ke inse kewa lasr ke pal in meeting lasr ke congregation? Sang me pupulyuk.
13 Pus liki yea 100 somla, magasin se inge Zion’s Watch Tower el akkalemye ke sie sripe mwomwo paenang on mwomwo su kut orekmakin ke alu lasr nu sin Jeova arlana yok sripe. Me rid se inge el akkalemye: “Sie inkanek mwomwo kut in ku in filiye ma paye ke nunak a insiesr pa in onkin ma inge.” On puspus lasr inge tuku ke fus puspus in ma Simusla, ke ma inge kut fwin lotela kas nukewa ke on puspus lasr el sie inkanek mwo in oru ma paye in oan ke insiesr. Met puspus su wi ke tukeni lasr ke pal se meet elos akkeyeyuk yok ke inkanek mwo lun congregation ke inse kewa lalos in onkin on lasr.
14 Ke sie fong in yea 1869, ke pal se mokul se inge pangpang C. T. Russell el tari ke orekma lal a el folokla nu in loom sel, a el long metu onkin on, ke pusrelos tuku liki sie loom. In pal san, el lulalfongi mu el tia ku in koneak ke ma paye ke God. Ke ma inge el oru sulela lal in orekmakin moul lal nu ke business lal. A el nunku mu fwin el eis mani yok, el ku in sang kasru nu ke ma enenu lun met puspus fwinne el tia ku in kasrelos in eis etauk ke God. Brother Russell el utyuk nu lun loom se inge su losr a tia arlana nasnas, a el liye oasr un met su tukeni we a orek akwuk lalos ke alu. El muta a el long ke me sramsram. Tok el simusla la ma el long ka in fong se “arlana fwal, a ke kasru lun God, tukeni se inge ku in sifwilpa akkeye lulalfongi lal ke Baibel la ma inge ma tuku sin God.” Paye la, pusren on lun met su oru tukeni lalos in pal san pa oru Brother Russell elan wi ke tukeni se inge.
15. Me akmwoye fuka nu ke etauk a kalem lasr ke ma paye oru ma ekla ke buk in on nutusr?
15 Tokin lusen sie pal, oasr me akmwoye su orek nu ke etauk lasr ke ma Simusla. Soakas 4:18 el akkalemye: “A inkanek lun met sumwosmwos oana kalem lun lenelik, su saromromelik nu ke len sumwosna.” Etauk ke ma paye su yokyokelik kol nu ke me akmwoye nu ke inkanek su kut ‘onkin ke ma paye.’ Ke lusen yea 25 somla, Met Lo lun Jeova in an puspus elos engunkin in orekmakin buk in on su oasr ke sifwe se inge On in Kaksak nu sin Jeova.b Ke yea puspus tokin buk se inge orekla, etauk ke ma paye yokyokelik na paye ke me lutlut puspus, a kutu ke kas su orekmakinyuk ke buk in on se inge el tila orekmakin ke pal inge. Ke sie me pupulyuk, ke buk in on mai nutusr ke kas English, ke kutu on su oasr ka, kas inge ‘in aknasnasyela inen God liki ma koluk nukewa’ ku “vindicated” orekmakinyuk a kas inge “in akmutalye” ku “sanctified” tia orekmakinyuk ka. Kalem la, oasr ma eneneyuk in akfwalye pa kas su kut orekmakin nu ke buk in on nutusr.
16. Fuka buk in on sasu nutusr ku in kasre kut in orekmakin kas in kasru lal Poul su simusyukla in Efesus 5:19?
16 Ke ma inge a ke sripe puspus saye, Governing Body elos insese in orala buk in on sasu su oasr ke sifwe se inge On nu sin Jeova.c Pisen on su oasr ke buk in on sasu nutusr oasr na ke on 135 ke kas English. Ke sripen pisen on kut e fwa lutlutkin ke pal inge supus liki ma meeta, paenang kut ku in filiye ke nunak lasr kas mwomwo ke kutu on sasu inge. Ma inge fwal nu ke kas in kasru lal Poul su simusyukla in Efesus 5:19.—Ridi.
Kom Ku In Akkalemye la Kom Lungse Na Paye On Nukewa Inge
17. Oiya fuka ku in kasre kut in akwanginyela nunak in mwekin lasr su tulokinkuti in tia wi ke on lun congregation?
17 Ya kut lela nunak tia mwo lasr mu sie me mwekin nu sesr ke sripen tia mwo pusrasr kut fwin on, paenang ma inge tulokinkuti in tia wi on ke meeting lasr ke congregation? Nunku ka ke inkanek inge: Ke kaskas lasr, ya kut tia ‘tukulkul ke ma puspus’? (Jemes 3:2) Ne ouinge, kut fwa tia lela kas sesumwos lasr in tulokinkuti in kaksakin Jeova ke orekma in luti lasr sie loom nu ke sie loom. Ke ma inge, kut fwin tia sumat ke on ma inge tia enenu in tulokinkuti in kaksakin Jeova ke inkanek lun on. Jeova su “orala oalin metu,” el insemwomwo in long pal nukewa kut orekmakin pusrasr in onkin on in kaksak nu sel.—Exodus 4:11.
18. Sang kas in kasru ke inkanek in lotela kas ke on puspus lasr.
18 Oasr CD puspus su oasr ke sifwe inge On nu sin Jeova—Wi Pusren Met orekla ke kas puspus. Ma inge akkalemye ke on sasu puspus wi pusren kain in me sritel on a pusren un met on. Sie me insemwomwo in long ke akwuk mwomwo ke kain in on nukewa inge. Fwin ma inge oasr tari ke kas su kom etu a kalem ka, kom in orekmakin pal in long ke on puspus inge; ke inkanek inge kom e fwa lotela ke kas mwomwo su oasr ke on sasu puspus lasr inge. Kas ke on puspus inge orekla ke inkanek mwo paenang kut fwin yuk soko line, fusrasr nu sum in esam ke line se toku an. Ke ma inge ke pal se kom sritelkin CDs, efu ku kom tia onkin pa on inge? Kom fwin kafweang in etu kas a tune ke on ke pal se kom muta ke loom sum, wangin alolo ka la kom ku in yuk on inge wi lulalfongi lom ke pal se kom oasr ke Kingdom Hall.
19. Inkanek puspus fuka eneneyuk in akola a orala pusren on ke kain in me sritel ke on in kaksak lasr nu sin God?
19 Fusrasr in tia nunku yok ke pusren on mwomwo su kut orekmakin ke len in special assembly, circuit assembly, a toeni lulap lasr. Oasr orekma a kafweang yok in akola a orala ma inge. Tokin on nukewa suleyukla, akwuk ke on fwa simusyukla nu sin met on 64, su wi ke un orchestra lun Watchtower, a elos fwa sritelkin on nukewa inge ke me sritel lalos. Met on nukewa inge elos fwa tuni a kalweni mwo ke lusen ao loeloes akwuk ke on inge a elos akpa a ke saflaiye elos fwa recordiye ma inge ke studio lasr in an Patterson, New York. Met sengoul inmasrlon un met on inge elos tia muta fwin an Merika, a in an saye. Elos nukewa aksaokye kunokon mwomwo lalos inge in orala on kato nu ke tukeni lasr in alu nu sin God. Kut ku in akkalemye kulo yok lasr nu ke kafweang lalos. Ke pal se chairman ke assembly lasr a ke toeni lulap lasr el suli kut in loang akmwoye ke pusren on, lela kut in muta ke an in muta lasr a loang akmwoye ke on nukewa su akoeyukla nu sesr.
20. Mea kom lungse na paye in oru?
20 Jeova el loang ke on in kaksak lasr nu sel. On lasr arlana yok sripe nu sel. Kut ku in oru insiel in engun ke inkanek lun on ke inse kewa lasr pal nukewa kut oru tukeni lasr in alu nu sel. Aok, kut fwin sumat ku srakna lutlut ke on, lela kut in “on nu sin Jeova”!—Sam 104:33.
[Footnote]
a Aok, sie tausan yea tokin mise lal Devid, lipufon puspus elos fwakak isusla lun Messaia nu sin met Ju puspus su met seperd, elos liaung pa un sip natulos in imae apkurun nu in Betleem.—Luk 2:4, 8, 13, 14.
b Buk in on inge oasr on 225 ka a oasr ke kain in kas 100 kutu.
c Ke pal inge buk in on sasu se inge On nu sin Jeova soenna oasr ke kas Kosrae, kas English mukena.
Mea Kom Nunku?
• Me pupulyuk fuka in pal meeta akkalemye la on el yok sripe nu ke alu lasr nu sin God?
• Kom fwin akos masap lun Jisus su simusyukla in Mattu 22:37, ma inge ku in kasre kom fuka in wi onkin on in kaksak nu sin Jeova ke inse kewa lom?
• Mea kutu inkanek su kut ku in akkalemye la kut aksaokye on in kaksak lasr nu sin Jeova?
[Petsac ke sra 19]
Ya kom fwak nu sin tulik nutum in tia som liki an in muta lalos fwin tia eneneyuk ke pal in on?
[Petsac ke sra 20]
Ya kom lutlutkin kas ke on sasu lasr ke loom sum?