“Use Sie Pa Glass In Wain An”

ALLEN el mutawauk in nim wain alukela ma fwal ke pal se el yea 11 matwe.a El a tulik kawuk puspus lal elos sritel insaku, elos etawi ma elos liye ke petsa mukuikui. Oiya su elos etawi inge el tia paye ma na ke petsa, tusruktu wain su Allen a met kawuk lal elos numla wain na paye.

Mokul se inge su pangpang Tony el yea 40 matwe ke el mutawauk in akyokye lupan wain su el numla, tila glass se ku luo na, a el numla glass limekosr nu ke onkosr ke wain ke eku nukewa. Paenang tok, el nukin lupan wain su el numla meyen el numla wain arlana yok ke kais sie len.

Allen el mutawauk in suk ke me kasru elan ku in aksumwosye nimnim lal inge. Tony el pulesru kain in me kasru su sou lal a met kawuk lal elos srike in oru nu sel. Allen el srakna moul ke pal inge in srumun ma sikyak ke moul lal inge; Tony el mise tari ke yea kutu somla ke el sun accident ke pal se el kasrusr ke sitosa okwel tokin el numla wain alukela ma fwal.

Fwin sie met el numla wain alukela ma fwal ke el mukelana muta, fwako koluk lun orekma lal inge ku in akkolukye moul lun met puspus saye.b Orekmakin wain alukela ma fwal el ku in paenang sie met el ku in sruila a el ku in fwak ku orekmakin kas koluk a orekma koluk nu sin met saye, akmas, a ke accident ke sitosa a ke niyen orekma, a ke kain in mas ku munasla lun mano. Metu elos orekmakin lupan mani yok oasr ke billion puspus ke tala ke kais sie yea ke sripen orekma lalos in nim wain alukela ma fwal. Sayen ma inge oasr pa ma upa puspus tuku ke orekma inge nu sin met in sou lalos, a tulik natulos.

Ne ouinge, “tia met nukewa su numla wain pal nukewa sun ma upa ke nimnim lalos,” ofus lun U.S. National Institutes of Health el akkalemye, “a tia met nukewa su lungse in nimnim wain alukela ma fwal nim wain len nukewa.” Oasr met puspus su tia alcoholic elos nimnim pa alukela ma fwal ke nunikin lalos. Kutu met elos nim wain kais kutu pal na tusruktu elos ku in nim glass limekosr ke wain ke pal sefwanna.

Kom fwin oru sulela lom in nim alcohol, lupa fuka el alukela ma fwal? Kom etu fuka la fwal tari wain ma kom numla? (Soakas 23:29, 30) Me lutlut toko fwa akuteye ke ma Baibel el akkalemye in sang me top nu ke kusensiyuk inge.

[Footnote]