Ya Kom Lela God lan Sramsram Nu Sum Len Nukewa?
PAL ekasr kom liye mutom in selngun? Apkuran kut nukewa oru ma inge len nukewa, saap kut oru ke pal puspus len nukewa. Efu? Meyen kut nunku ke atesr ku naweyuk lasr.
Ridi Baibel el ku in pupulyukkin nu ke orekma lasr in liye lumasr nu ke selngun. (Jemes 1:23-25) Kas su simusyukla ke Kas lun God oasr ku ka su kasre kut in etu la mea oiya paye lasr. Ma inge “fwakisye nu ke srela lun inse a ngun.” (Hibru 4:12) Ke kas saye, ma inge srela oiyesr a lumasr su kut akkalemye ke ma oan na paye ke insiesr. Ma inge akkalemye nu sesr ke oiya su kut enenu in aksumwosye, oana ke selngun el kasre kut in akmwoye atesr.
Baibel el akkalemye oiya puspus kut enenu in aksumwosyeyuk a el kasre kut pa in oru inkanek mwo in aksumwosye oiya nukewa inge. Met sap Poul el simusla: “Baibel nukewa etuku ke ngun lun God a oasr sripe in luti, in kai, in aksumwosye, a in aketeye ma sumwosmwos nu sin met.” (2 Timote 3:16, 17) Loang nu ke me insemwomwo akosr su akkalemyeyuk ka, a tolu nu ke ma inge pa in sang kai, in aksumwosye a in akuteye ma sumwosmwos nu sin met, su oasr ma eneneyuk in aksumwosye nunak a orekma lasr. Kut fwin enenu in liye selngun pal nukewa in etu na paye fwin lumasr el fwal a mwo, orekma lasr in rid Kas lun God pal nukewa el yok sripe liki ma inge!
Ke pal se el srusrngilye Josua in kol mutanfwal Israel, Jeova God el fwak nu sel: “Buk in masap se inge fwa tia wanginla liki oalum, a kom fwa nunku ka ke len a fong, tu kom fwa ku in liaung in oru fwal nu ke ma nu kemwa su simla lu; na kom fwa oru inkanek lom in kapkapak, a na kom fwa akinsemwomwoyeyuk.” (Josua 1:8) Aok, in kapkapak a in eis kutangla ke ma nukewa su el oru, Josua el enenu in rid Kas lun God “len a fong,” pal nukewa.
Sam se meet el akkalemye pa ke me insemwomwo su tuku ke orekma in rid Baibel pal nukewa ke el akkalemye kas inge: “Insemwomwo met se su tia fwafwasryesr in papu lun met koluk, ku tu inkanek lun met sito, ku muta fwin me muta lun met aksruksruk. A el engunak in masap lun Jeova, a el nunkauk ke masap lal len a fong. A el a fwa oana soko sak eoki sisken infwal lun kof, su isus fwako la in pal la a sra pa la tia paola, a ma nu kemwa el oru fwa kapkapek.” (Sam 1:1-3) Paye la kut lungse in oana kain in met se inge.
Met puspus elos orala akwuk in rid Baibel len nukewa. Ke pal se kusensiyuk inge siyukyak nu sin sie met Kristian la efu ku el rid Baibel len nukewa, el fwak: “Nga fwin pre nu sin God pal nukewa ke lusen len se a tupanul in long yu, efu ku nga tia long pa sin God ke nga rid Kas lal len nukewa? Kut fwin lungse in sie met kawuk mwomwo, kut enenu pa in long ke ma el fwak nu sesr pal nukewa.” Aok el akkalemye ke sie me lutlut na mwomwo. Orekma in ridi Baibel el ku in lumala ke kut porongo pusren God meyen kut ku in etu ke nunak lal ke ma puspus.
Kom ku in Akpayeye Fuka Akwuk Lom in Rid Baibel Pal Nukewa
Saap kom srike tari in mutamwauk sie akwuk in rid Baibel. Ya kom ridi tari Baibel nufon ke mutamwauk nu ke safla? Pa inge inkanek mwo emeet in oasr etauk yok ke koanon Baibel. Tusruktu, kutu met elos mutamwauk in akpayeye akwuk lalos in rid Baibel nufon ke pal puspus, tusruktu elos tui in rid ma inge tokin kutu pal. Ya kom pula pa ouinge? Mea kom ku in oru in akpayeye akwuk mwomwo lom in rid Baibel nufon? Efu ku kom tia srike kas in kasru luo toko inge?
Orala schedule in rid Baibel len nukewa. Sulela pal mwomwo kais sie len su kom ku in oru orekma lom in rid Baibel. Kom orala akwuk akluo tu kom in ku in rid Baibel ke siena pal. Fwin ke kutena sripe kom tia ku in oru rid Baibel lom ke pal su kom lungse in oru, mwo kom in sulela sie pa pal in rid Baibel tu in tia lela in alukela sie len in tia rid Baibel. Ke inkanek inge kom fwa etawi me srikasrak lun met Berea in pal meeta. Baibel el akkalemye: “Elos eis kas inge ke insielos kemwa, a suk in ma Simusla len nukewa in liye ma inge la paye, ku sito.”—Orekma 17:11.
Esam pal nukewa ke akwuk mwomwo su kom lungse in akpayeye. Ke sie me pupulyuk, kom fwin rid sapta tolu nu ke limekosr ke Baibel len nukewa, kom ku in rid Baibel nufon ke lusen yea se na. Efu ku kom in tia akpayeye sulela lom in srike program se inge?
Kom fwin ridi tari Baibel nufon, kom enenu in tia tui in rid. Kom ku in rid Baibel nufon kais sie yea, a orekmakin akwuk sefwanna su kom orala. Ku kom fwin lungse in aksafyela in rid Baibel ke lusen pal loes liki yea se, saap kom ku in sulela in rid sapta se ku luo na kais sie len.
Pal nukewa kom rid Baibel, kom ku in koneak ma sasu su fwal nu ke moul lom, me lutlut mwomwo su kom tia lotela meet. Efu? ‘Akwuk lun fwal se inge ekyek pal nukewa,’ a moul lasr, luma a ma sikyuk el ekyek pa pal nukewa. (1 Korint 7:31, NW) Ke ma inge, oru sulela paye lom, in liye a orekmakin len nukewa selngun su lumeyuk nu ke Kas lun God, Baibel. Ke inkanek ouinge, kom ku in lulalfongi la kom lela God lan sramsram nu sum len nukewa.—Sam 16:8.
[Picture on page 12]
Ya kom ku in oakiye pal a akwuk lom in rid Baibel len nukewa?