“Soenna Sun Pal Luk in Mise”
Oasr sie met el us sitosa in sisi kutkut lulap soko a oasr kutu ma koluk sikyak nu ka a el tia ku in akmwoyela. Sitosa soko a tia ku in tui a el kufla liki inkanek u, a fwakisye siyanyen se a tulik mokul se su yea 23 matwe su fwasr sisken inkanek u ke sidewalk. In fwal nu ke report lun New York City newspaper, siyanyen se inge elos sa na mise a tulik mokul fwusr se inge el fakfuki a sruila tia etal. Ke pal se el etalak a pulakin ma nukewa su sikyak nu sel, pa inge ma se meet su on in nunak lal: ‘Nga tia lulalfongi mu ma inge ku in sikyak. God, nunak munas lela ngan kutangla ma inge nukewa.’ El fwak, “Soenna sun pal luk in mise.”
SAAP oasr pal kom long kain in sramsram inge. Ke pal se sie met el fwin kutangla sie ma upa, kutu metu fwa fwak, ‘Tia pa inge pal lal,’ tusruktu fwin sie met el mise ke sripen accident ku ongoiye, elos ku in fwak, ‘Pa inge pal fwal lal,’ ku ‘Akwuk lun God pa inge.’ Fwin elos lulalfongi mu ma inge sikyak ke sripen pakiyuki tari, ku akwuk lun God, oiya nukewa inge oana sie. Met puspus lulalfongi la ma nukewa su sikyak nu ke moul lalos a ke kutu pana oiya saye akwuki tari ke mutaweyen ma nukewa a wangin ma elos ku in oru nu ka. A kain in nunak a lulalfongi inge oasr tari yurin metu mutamwauk in pal meeta.
Ke sie me pupulyuk, met Babulon in pal meeta elos lulalfongi la akwuk nu ke moul lun metu orek fwal nu ke akwuk lun itu nukewa a ke mukuikui nukewa lalos. Paenang elos filiye lulalfongi lalos nu ke me akul su sikyak in kosrao a ke met orek inutnut a susfwa nu ke pal fwasru nu selos. Nu sin met Grik a met Rom elos lulalfongi nu sin sie god mutan, su lulalfongiyuk mu sang kasru nu ke ma nukewa su fwa sikyak ke moul lalos. A lulalfongiyuk mu god mutan se inge pa oru in oasr ma mwomwo ku ma koluk su sikyak nu ke moul lalos, a oasr pal lungse lun god mutan inge pa orek a tia ma lungse lun god fulat lalos su pangpang Zeus a Jupiter.
Nu in an su pangpang Orient ku met Asia, su lulalfongi ke Hindus a Buddhists elos lulalfongi la ma nukewa su sikyak nu sin sie met ke pal inge tuku ke ma nukewa el orala ke moul lal in pal meeta, a fwokin orekma nukewa lal fwa sang me usru nu ke moul lal in pal fwasru. Nu sin kutu pa alu puspus saye—wekunang alu nukewa lun Kristendom—elos lulalfongi pa ke kain in luti a lulalfongi ouinge su orekmakin me luti kikiap ke luti lalos in sang nununku in fwakak ma mwo a ma koluk nu sin sie met ke pal fwasru.
Ke ma inge, tia me lut yok se nu ke pal inge ke sripen etauk a lalmetmet el yokyokelik a lulalfongi yok lun metu oasr ke ma elos liye in pal inge, wekunang pa la metu lulalfongi ke oiyen moul lalos, ma sikyak pengana len. A elos lulalfongi mu ma nukewa su sikyak ke moul lalos pakiyuki tari a wangin ma elos ku in oru nu ka. Ya pa inge ma kom pulakin a lulalfongi ke oiyen moulu? Ya akwuk lun ma puspus a moul, fwin mwo ku koluk, ku ke oiyen isus a mise fwin mwo ku koluk, paye la akwuki tari? Ya oiya nukewa ke moul lom el sikyak ke sripen ma inge pakiyuki tari? Lela ku in liye la fuka Baibel el ku in kasre kut ka in sang me top nu ke kusensiyuk puspus inge.
[Picture Credit Line on page 3]
Ken Murray/New York Daily News