Fuka Mise Lun Jisus Ku In Molikomla

APKURAN nu ke yea 2,000 somla, ke len in Kofwen Alukela lun met Ju ke yea 33 C.E, met mwomwo se inge su wangin ma koluk lal el mise tu metu in eis moul. Su met se inge? El pa Jisus lun Nasaret. A su fwa ku in wi eis ma lane yok ke orekma yok sripe se inge? Met nukewa. Oasr sie fus in Baibel ma akkalemye arulana kalem ke akwuk in molela su tuku ke me kise lun lango inge: “Tu God el lungse fwalu oinge, tu el ase Mwen siefwanna isusla natul, tu el su lalalfongel fwa tia tula, a el fwa eis moul ma patpat.”​—Jon 3:16.

Fwinne met puspus etu fus se inge, tusruktu, met na supus pa etu ke kalmeyen fus se inge. Elos kena etu la: ‘Efu ku kut enenu me kise lun Kraist? Fuka mise lun sie met el ku in molela met nukewa liki me usru lun mise ma patpat?’ Baibel el ase me top kalem a mwomwo nu ke kusensiyuk puspus inge.

Fuka Mise el Leumi Fwin Metu

Kut metu lulalfongi mu kut orekla in moul na ke kitin pal fwin fwalu, a in pulakin me keok, a in engan kutupal, a saflaiye elos fwa mise a som nu ke sie an mwomwo. In fwal nu ke nunak oinge, mise el akwuk lun God nu sin metu. Tusruktu, Baibel, el akkalemye ke siena sripe la efu ku mise el pulakinyuk sin metu. El fwak: “Ke ma inge, oanu ke sie met ma koluk ilyuk nu fwalu, a mise ke ma koluk, a ou inge mise tuku nu fwin met nu kemwa, meyen elos nu kemwa oru ma koluk.” (Rom 5:12) Fus se inge el akkalemye la metu mise ke sripen ma koluk. Tusruktu, su, “met se” ma paenang fwako koluk nukewa lun ma koluk akkeokye met nukewa?

Buk se inge The World Encyclopedia el fwak la pus sin scientist elos lulalfongi mu met nukewa elos tuku ke sropo sefwanna, a Baibel akkalemye la sropo se inge​—pa “sie met.” Ke Genesis 1:27, kut rid: “God el orala met in lumal sifwana, in luman God el oralla; mokul a mutan el oralosla.” Ke ma inge Baibel el akkalemye la mokul se meet a mutan se meet pa ma mwo emeet ke ma orekla nukewa fwin fwalu lun God Fulatlanu.

Ma simusla in Genesis el akuteye pa kalem ke oiyen moul lun metu tokin Jeova God el orala met se meet. Ke ma sikyak a akkalemyeyuk tari ka la wangin pal se God el fwak ku sramsramkin ke mise sayen fwin seakos. (Genesis 2:16, 17) El lungse met nukewa in moul in paredais kato se fwin fwalu, elos in ku a in engan ma patpat. El tia lungse elos in keok ke sripen matou a mise. A fuka tu mise el leumi fwin met nukewa?

Genesis sapta 3 el fwakak ka la fuka tu met luo ma orekla emeet elos sulela in seakos el su Sang-Moul nu selos, Jeova God. Ke sripen ma sikyak inge paenang God el oru nununku lal oana ke ma el akkalemye tari nu selos. El fwakak nu sin met se inge: “Tu kom kutkut a nu ke kutkut kom fwa folokla.” (Genesis 3:19) Kas lun God el paye, tia pat met luo ma seakos inge elos mise.

Tia met luo ma orekla emeet inge mukena pa sun ongoiye ku me keok upa puspus. Seakos lalos inge kunausla fwinsrak mwomwo lun moul sumwosmwos su tulik nukewa natulos ku in wi pa engankin. Elos nukewa ma soenna isusla elos wi pa ke akwuk lun Jeova ke el fwakak ma inge nu sel Adam a If: “Komwos in kapak, a yokelik, a nekla fwalu, a kutangla, a leum fwin ik in mwea, a fwin mwon yen engyengu, a fwin ma moul nu kemwa, su mukuikui fwin fwalu.” (Genesis 1:28) In pal fwal sou nukewa lun metu fwa nekla fwalu in muta we in engankin moul insemwomwo a elos a fwa tia mise. Tusruktu papa matu tumalos Adam​—el pa “met se”—​su kukakunulosla in oana met sruo nu ke ma koluk, a mise pa saflaiye. Met sap Poul, su tulik pa nutin met se meeta, el simusla: “Nga ikwe mukena, kukakinyula nu ye ma koluk.”​—Rom 7:14.

In oana kain in met ma kunausla kain in ma orekla ma arulana yok molo, el oana ke Adam el oru ma koluk, el kunausla ma orekla kato a usrnguk lun God​—oana metu. Tulik natul Adam elos oswela tulik natulos a tulik nutin tulik natulos oswela pa tulik natulos a oinge elos isus fwako puspus. Kais sie fwil elos isusla, kapkapek, isus fwako a mise. Efu ku elos nukewa mise? Meyen elos nukewa tuku ke fwako lal Adam. Baibel el fwak: “Tu fwin ke ma koluk lun sie ma puspus mise.” (Rom 5:15) Mas, matou, a lungse in oru ma koluk, a mise paenang in oasr asor yok ke sripen Adam el oru ma koluk a fwokin ma koluk lal inge akkolukye pa sou lal sifwana. Kut nukewa tuku ke sou se inge.

Ke leta lal nu sin met Kristian fwin an Rom, met sap Poul el sim fwak ke oiyen pakomuta lun met sesumwos, wekunul sifwana, a ke meun in lain ma koluk. El fwak: “O nga met keoklanu! Su a fwa tulayula liki monin mise se inge?” Kusensiyuk na mwo se pa inge, ku fuka? Su a tulalla Poul a elos nukewa su kena ka​—in tulalosla liki kapur lun ma koluk a mise? Poul el topuk: “Nga kulo nu sin God ke Jisus Kraist Leum lasr!” (Rom 7:14-25) Aok, Met Orekutla el orala inkanek in molikutla ke inkanek lun Mwen natul, Jisus Kraist.

Kunokon lun Jisus nu ke Molela lun God ke Metu

Jisus el akuteye ke kunokon lal in molela metu liki me kapur lun ma koluk su kol nu ke mise. El fwak: “Mwen nutin met el tuku . . . in sang moul lal in moli met puspus.” (Mattu 20:28) Fuka moul lal Jisus el orekmakinyuk oana sie me lango ku me molela? Fuka mise lal akinsemwomwoye kut?

Baibel el akuteye kel Jisus la el oana sie su “wangin ma koluk lal” a “srela liki met koluk.” Ke lusen moul lal nufon, Jisus el sumwosmwos in akos Masap lun God. (Hibru 4:15; 7:26) Ke ma inge mise lun Jisus tia sikyak ke sripen ma koluk a seakos in oana ma Adam el orala. (Ezikiel 18:4) A, Jisus el insese nu ke sie inkanek in mise ma el tia enenu in oru tusruktu el orala ma inge in akpayeye ma lungse lun Papa tumal nu ke molela lun metu liki ma koluk a mise. In oana ma akkalemyeyuk tari, Jisus el insese in tuku “in sang moul lal tu in sie me molela.” Ke lungse yok se inge su wangin ma oana su akkalemyeyuk nu sin metu ke kutena pal, su akkeyel Jisus in sang moul lal ke inse mulala in ‘pulakin mise ke met nukewa.’​—Hibru 2:9.

Moul se ma Jisus el kisekunla el oana sie a fwal nu ke moul sumwosmwos se ma Adam el akwanginyela ke el orala ma koluk. Mea fwokin mise lun Jisus? Jeova El insemwomwo in eis me kise sa “tu in me mol ke met e nukewa.” (1 Timote 2:6) Ke sripe se inge paenang God el orekmakin yok moul lal Jisus in sifwilpa molela, met nukewa liki kapuri lun ma koluk a mise.

Baibel el akkalemye ke pal puspus ke orekma yok nu ke lungse lun Met Orala met. Poul el sifwilpa akesmakinye met Kristian la elos “moliyukla tari ke sie me mol.” (1 Korint 6:20; 7:23) Piter el simusla la God el tia orekmakin gold ku silfer, tusruktu el orekmakin sra lun Mwen natul in eisla met Kristian liki inkanek in moul lalos su pal nukewa kol nu ke mise. (1 Piter 1:18, 19) Ke inkanek lun me kise lun lango lun Kraist, Jeova el orala akwuk in molela metu liki mise ma patpat.

Ya Kom Fwa Eis Me Insemwomwo ke Me Lango lun Kraist?

Met sap Jon el akuteye ke lupan saokiyen me insemwomwo su tuku ke me lango lun Kraist, el simusla oinge: “[Jisus Kraist] el me iumwe ke ma koluk lasr, a tia ke ma lasr mukena, a ouyepa ke ma koluk lun met in fwalu na fon.” (1 Jon 2:2) Aok, me lango lun Kraist el ku in orekmakinyuk nu sin met nukewa. Ya kalme pa met nukewa ku in eis ma lane saoklana ke me kise lun lango lun Jisus Kraist fwinne elos tia oru kutena ma in aksaokye ma inge? Mo. Tusruktu esam ke orekma in molela met puspus su akkalemyeyuk tari ke me lutlut se meeta. Elos su kafweang in molela met pukpuk gold nukewa ma pukpuki a sremla ke sie luf loal su likiye sie kalkal nu ten in molelosla, tusruktu kais sie met ma sremla inge enenu in sroang nu in kalkal sa fwin elos lungse in moliyukla. Ke luma su oana sie, elos nukewa ma lungse in wi eis moul ke sripen mise lun Kraist fwa tia muta sano mukena me insemwomwo su tuku sin God me. Elos enenu in sifwana orekma in eis me insemwomwo ka.

Orekma fuka God El siyuk sin metu elos in oru? Jon 3:36 el fwak: “El su lulalfongi Mwen moul ma patpat lal; a el su tia lulalfongi Mwen fwa tia liye moul, a kasrkusrak lun God on fwel.” God el siyuk sesr kut in lulalfongi ke me kise lun Kraist. A oasr pa ma saye ma kut enenu in oru. “A ke ma inge kut etu, tu kut etal [Jisus], kut fwin liaung ma sap lal.” (1 Jon 2:3) Ke ma inge, arulana kalem la inkanek mwo nu ke molela liki ma koluk a mise pa kut in lulalfongi ke me kise lun Kraist a in akos ma sap lun Kraist.

Sie inkanek na oa ma kut ku in oru in akkalemye la kut lulalfongi ke me kise lun Kraist pa ke kut akkalemye kulo lasr ke kut wi ke akesmakinyeyen mise lal su el sapkin. Meet liki Jisus el mise, el akola me mongo se ma orala sie me akul yurin met tuma lutlut paye ma sruokye na lulalfongi lalos, a el fwak nu selos: “Oru ma inge in esam yu.” (Luk 22:19) Met Lo lun Jeova elos arulana aksaokye kawuk mwolana lalos nu sin Mwen nutin God, a elos akos masap sa. Ke yea inge, Akesmakinyeyen mise lun Jisus Kraist efwa orek ke Saturday, March 22, tokun fwatu tilli. Ke inse paye, kut suli kom in wi ke toeni na saok se inge in akos masap lun Jisus. Met Lo lun Jeova in an sum su kom muta we ku in akkelemye nu sum an a pal ma efwa orek ma se inge we. Ke pal se orek Me Akesmakin se inge kom ku in lotela pa kutu ma su kom enenu in oru a ke inkanek mwo su me kise lun Kraist in ku in molikomla liki me usru lun mise ma tuku ke ma koluk lal Adam.

Ke pal inge met pu na pa akkalemye kulo lalos nu ke me kise yok lun Met Oralosla a lun Mwen natul su molelosla liki kunanula ma patpat lalos. Elos nukewa su akkalemye lulalfongi lalos ka fwa engankin engan yok a me insemwomwo puspus. Met sap Piter el fwakak ke oiyen met Kristian wiyel: “Komwos lulalfongi in el [Jisus] a komwos enganak ma lulap ke engan su tia ku in fwakyuk a tingtinginu ke ma mwowo, a komwos eis safla lun lulalfongi lomwos, su molela lun ngunumwos.” (1 Peter 1:8, 9) Ke kom akyokyelik lungse nu sin Jisus Kraist a lulalfongi me kise lal, ke inkanek mwo inge kom ku in pulakin engan yok ke moul lom ke pal inge a oayepa kom ku in fwinsrakkin in moliyukla liki ma koluk a mise.

[Picture on page 4]

Jisus el sang moul lal in aksumwosyela fwako koluk nukewa lun ma koluk lal Adam

[Picture on page 6]

Akesmakinyeyen mise lun Jisus Kraist fwa orek ke Saturday, March 22, 2008, tokin fwatu tilli