Loang Akmwoye nu ke “Oiyen Luti” Lom
“Kom in luti kas, . . . kai, kaiyuk, kaifwe wi mongfusesr nukewa a luti.”—2 TIMOTE 4:2.
1. Masap fuka Jisus el sapkin nu sin met tuma lutlut nukewa lal, a me srikasrak fuka el oakiye?
FWINNE yoklana orekma mwomwo nu ke me akkeyela lun kain in mas upa puspus su Jisus el orala ke pal se el muta fwin fwalu, su eteyuk kel, el tia oana sie met ono mwomwo ku sie met orek mwenmwen, tusruktu yok eteyel la el oana sie met luti mwomwo. (Mark 12:19; 13:1) Orekma in fwakak peng mwo ke Togusrai lun God pa ma se yok emeet nu sel Jisus, a efwa oinge pa nu sin met Kristian nukewa misenge. Oasr kunokon yok lun met Kristian nukewa in tafwela orekma in orek met tuma lutlut ke inkanek in luti nu sin met nukewa in liaung ma nukewa su Jisus el sapkin.—Mattu 28:19, 20.
2. Mea kut enenu in oru in akpayeye kunokon in luti lasr?
2 In akpayeye kunokon lasr in oru met tuma lutlut, kut enenu in kafweang pal nukewa in akyokyelik etauk lasr in luti. Met sap Poul el kalem na paye ke yok sripaiyen etauk inge ke el sim nu sel Timote su welul in orekma in luti lal. El fwak: “Kom in sifwana taron kom a me luti lom. Kom in mutanu in ma inge, tu in oru oinge kom fwa sifwanu molikomla a ouyepa elos su long kom.” (1 Timote 4:16) Kain in oiyen luti su Poul el nunku ka el tia in akkalemye etauk mukena. Met luti mwomwo nukewa su met Kristian elos kafweang in oru in sun insien metu a in moklelos in ekulla moul lalos enenu in fwal sumwos nu ke Baibel. Pa inge inkanek paye nu ke oiyen luti. Ke ma inge fuka kut ku in akkeye “oiyen luti” ke pal in fwakelik peng mwo nu sin met puspus saye ke Togusrai lun God?—2 Timote 4:2.
Akkeye Inkanek in “Oiyen Luti” Mwomwo
3, 4. (a) Fuka kut ku in akyokye “oiyen luti” mwomwo? (b) Fuka Theocratic Ministry School el kasre kut in ekla met luti mwomwo?
3 Oasr sie dictionary el akuteye ke “oiyen luti” oana sie “inkanek in eis etauk su tuku ke oiyen lutlut, oiyen orekma, ku ke oiyen ma liyeyuk.” Kut enenu in loang akmwoye nu ke me enenu tolu su akkalemyeyuk inge in sang kasru met luti nukewa ke peng mwo elos in luti ke inkanek kalem a mwo. Kut ku in eis etauk sumwos nu ke me sramsram lasr ke inkanek in lotela akmwoye a in kalweni wikin pre. (Ridi Sam 119:27, 34.) Loang akmwoye nu ke oiyen luti mwomwo lun met luti puspus su ku in kasre kut mwo ke inkanek in luti lalos a in etaelos. A in kafweang pal nukewa ke inkanek in akpa fwal nu ke ma nukewa kut lotela fwa kasre kut in aksumwosye ku lasr.—Luk 6:40; 1 Timote 4:13-15.
4 Jeova el Met Luti Fulat lasr. Ke u lal su liyeyuk fwin fwalu, el sang nu sin met kulansap lal nukewa fwin fwalu inkanek in kasru mwomwo nu ke oiyen kunokon in luti lalos. (Isaia 30:20, 21) Ke sripe inge, oasr akwuk in lutlut orek ke congregation nukewa su pangpang Theocratic Ministry School, su orekla in sang kasru met nukewa su enroll tari ka in ekla met luti mwomwo ke Togusrai lun God. Buk se su yok emeet elos orekmakin pa Baibel. Kas lun Jeova el akkalemye nu sesr la mea kut enenu in luti. Sayen ma inge el akkalemye ke kain inkanek in luti su mwo a fwal in orekmakinyuk. Theocratic Ministry School el akesmakinye kut pal nukewa kut in ekla met luti mwomwo kut fwin akfwalye me luti lasr nu ke Kas lun God, kut fwin orekmakin kusensiyuk mwomwo, a luti ke inkanek fusrasr, a in akkalemye insemwomwo paye nu sin met puspus. Lela kut in tuni ku lutlutkin yok kais sie me lutlut mwomwo inge. Tokin ma inge kut fwa akuteye ke inkanek mwo in sun insien tulik lutlut.
Akfwalye Me Luti Lom nu ke Kas lun God
5. Me luti lasr el enenu in fwal nu ke mea a efu?
5 Jisus, su met luti mwo emeet, el akfwalye me luti lal ke ma Simusla. (Mattu 21:13; Jon 6:45; 8:17) El kaskas, tia ke nunak lal sifwana, a ke inen El su supalma. (Jon 7:16-18) Pa inge me srikasrak mwo su kut ku in etawi. Ke ma inge, ma kut fwak ke orekma in luti peng mwo nu ke sie loom nu ke sie loom ku ke kut lutlut Baibel yurin met ke loom selos enenu in akkalemye yok ke ku lun Kas lun God. (2 Timote 3:16, 17) Me akuteye nukewa lasr fwinne kut lalmetmet el tia ku in oana sie nu ke oiya mwo a kuiye lun ma Simusla. Oasr ku lun Baibel. Kutena me lutlut yok su kut kafweang in sang kasru sie tulik lutlut in kalem ka, pa ke inkanek mwo emeet su kut ku in orekmakin in lela elan ridi mea ma Simusla el akkalemye ka.—Ridi Hibru 4:12.
6. Fuka sie met luti el ku in etu la tulik lutlut lal el kalem na paye ke me lutlut su elos lutlutkin?
6 Aok, tia kalme pa sie met Kristian su oru orekma in luti el tia enenu in akola ke sie lutlut lun Baibel. Mo tia oinge, a el enenu in nunku yok la piya ka ma Simusla su oasr ka met luti ku tulik lutlut el enenu in ridi ke Baibel ke pal in lutlut. Ke pal puspus, arulana mwo in ridi ma simusla su akkalemye ke ma kut lulalfongi ka. Arulana yok sripe pa in kasru tulik lutlut in kalem ke fus nukewa su el ridi.—1 Korint 14:8, 9.
Orekmakin Kusensiyuk Mwomwo
7. Efu ku in orekmakin mwo kusensiyuk puspus el sie inkanek mwo in luti?
7 Orekmakin kusensiyuk puspus ke inkanek mwomwo el purakak nunak a kasru sie met luti in sun insien tulik lutlut. Ke ma inge mwo in tia akuteye ma simusla nu sin tulik lutlut lom, a siyuk sel elan akuteye ma inge nu sum. Kutu pal saap kutupa kusensiyuk el eneneyuk in orek in sang kasru tulik lutlut lom in kalem ka. Fwin kom orekmakin kusensiyuk puspus in luti tulik lutlut lom, kom oru oinge, in kasrel in kalem ke sripe puspus su oasr ke sie me lutlut, a kom kasrel pa in lulalfongi na paye ke sie me lutlut.—Mattu 17:24-26; Luk 10:36, 37.
8. Fuka kut ku in etu nunak paye lun sie tulik lutlut?
8 Inkanek in lutlut su orekmakinyuk yok ke me rid puspus natusr pa ke me kusensiyuk a me top. Wangin alolo ka la, pus sin tulik lutlut lom ke Baibel elos ku in sa in sang me top nu ke kusensiyuk nukewa su oasr ke buk, ke el orekmakin me top su simusyukla tari ke paragraph puspus. Tusruktu, fwinne sie tulik lutlut el akkalemye tari me top sumwos ka, sie met luti su lungse in sun insien tulik lutlut el ku in orekmakin kutupa me kasru mwomwo. Ke sie me pupulyuk, sie tulik lutlut el ku in akuteye sumwos la mea Baibel el akkalemye ke orekma lun kosro. (1 Korint 6:18) Tusruktu, kusensiyuk mwomwo fwin sun nunak, el ku in akkalemye la mea tulik lutlut el nunku na paye ke ma el lotela. Ke ma inge met luti el ku in siyuk: “Efu ku Baibel el selngawi kutena kain in orekma in osun ke mano lun mokul a mutan su tia payuk? Mea kom nunku ke masap lun God inge? Ya kom nunku mu oasr kutena ma lane su ku in tuku fwin sie met el akos masap lun God ke oiyen moul nasnas?” Me top nu ke kusensiyuk nukewa inge ku in akkalemye nunak paye lun sie tulik lutlut.—Ridi Mattu 16:13-17.
Akkalemye Me Lutlut ke Inkanek su Fusrasr in Kalem
9. Mea kut enenu in esam fwin kut akkalemye a luti me lutlut lun ma Simusla?
9 Ma paye puspus su oasr ke Kas lun God akkalemyeyuk ke inkanek su fusrasr in kalem. Tusruktu, met puspus su kut oru lutlut Baibel nu se saap elos fosak ke me luti puspus lun alu kikiap. Kunokon lasr in oana met luti pa in oru me luti lun Baibel in fusrasr in kalem nu sin tulik lutlut lasr. Met luti mwomwo elos akkalemye me luti ke inkanek fusrasr, kalem a sumwos. Kut fwin akos akwuk inge, kut fwa tia oru ma paye in upa in kalem liki na ma eneneyuk in orek ka. Srike in tia akuteye ma puspus su tia eneneyuk. Kut tia enenu in akuteye ke kas nukewa ke sie ma simusla su kut ridi tari. A loang akmwoye nu ke ma yok sripe in akkalemye kalem ke sie me lutlut su sramsramkinyuk. Tulik lutlut se el ku in kais kutu srisrik eis etauk ke me lutlut loal ke el kapkapek ke etauk lal ke ma simusla.—Hibru 5:13, 14.
10. Mea ku in kasru in etu ke lupan me lutlut su fwa lutlutkinyuk ke sie pal in lutlut Baibel?
10 Fuka lupan me lutlut enenu in lutiyuk ke kais sie pal in lutlut? In etu ke lupan me lutlut, lalmetmet a liyaten eneneyuk. Kuiye a oiya puspus lun tulik lutlut a lun met luti tia oana sie, tusruktu kut enenu in esam pal nukewa la niyen sun lasr in oana met luti pa in kasru tulik lutlut in akkeye lulalfongi fukoko. Ke ma inge kut lela elan orekmakin pal fwal in rid, in eis kalem yok, a in eis a in lulalfongi ke ma paye su akkalemyeyuk ke Kas lun God. Kut fwa tia lutlutkin me lutlut puspus fwin el tia ku in kalem ka. Ke pal sepana, kut fwa tafwela me lutlut a akfwalye ma inge ke oiya a ku lun tulik lutlut. Fwin tulik lutlut el kalem tari ke sie me lutlut, lela kut in tafwela ke me lutlut toko.—Kolosse 2:6, 7.
11. Me lutlut fuka kut ku in lotela ke inkanek mwomwo lal Poul in luti?
11 Met sap Poul el akkalemye peng mwo ke inkanek fusrasr in kalem pal nukewa fwin el sramsram nu sin met su tufwa long. Fwinne el eis lutlut yok, el tia orekmakin kas su orekmakinyuk sin met lalmetmet. (Ridi 1 Korint 2:1, 2.) Ke sripen ma paye su oasr ke ma Simusla el akkalemyeyuk ke inkanek fusrasr paenang el oru met nukewa su paye insielos in kafweang in lutlut ka a insemwomwo in orekmakin ma elos lotela ka. Tia enenu in oasr lutlut yok lun kutena met in kalem ka.—Mattu 11:25; Orekma 4:13; 1 Korint 1:26, 27.
Kasru Tulik Lutlut in Aksaokye Ma Elos Lotela Tari
12, 13. Mea ku in akkeye sie tulik lutlut in orekmakin ma el lotela tari? Sang me pupulyuk.
12 In oasr kalem mwomwo, me luti lasr enenu in sun insien sie tulik lutlut. Tulik lutlut el enenu in kalem ka la fuka sie me lutlut el orekmakinyuk nu sel sifwana, la fuka ma inge akinsemwomwoyel, a la fuka moul lal fwa kapkapek fwin el akos kas in kasru lun ma Simusla.—Isaia 48:17, 18.
13 Ke sie me pupulyuk, saap kut ku in akuteye Hibru 10:24, 25, su akkeye met Kristian nukewa in tukeni nu yurin met lili puspus in eis me akkeye su tuku ke ma Simusla a in engankin asrouki mwomwo. Fwin tulik lutlut el soenna wi ke meeting nukewa lun congregation, kut ku in akuteye ke kitin pal la fuka ma inge orek a la mea e fwa akuteyuki ka. Kut ku in fwak nu sel la meeting nukewa lun congregation el oasr ke orekma lasr in alu nu sin God a akkalemye nu sel la meeting nukewa orek in sang me kasru yok nu ke moul lasr. Tokin ma inge kut ku in suli tulik lutlut in wi ka. Fwin el akos masap lun God su oasr ke ma Simusla, el oru ma inge ke sripen el lungse in akos Jeova, a tia in akinsemwomwoye met se su oru lutlut Baibel nu sel.—Galetia 6:4, 5.
14, 15. (a) Mea sie tulik lutlut lun Baibel el ku in lotela kel Jeova? (b) Fuka etauk ke oiya mwomwo lun God el sang ma lane nu sin sie tulik lutlut ke Baibel?
14 Sie ma lane yok su tulik lutlut elos ku in eis ke elos lutlutkin Baibel a in orekmakin akwuk mwomwo a me lutlut yok sripe ka pa in etu a in lungse Jeova oana sie God na paye. (Isaia 42:8) El sie Papa su kulang a Met Orala ma nukewa a Ma Lal pa kosrao a fwalu, a el akkalemye pa oiya mwo puspus lal a ku lal nu sin met puspus su lungse el a kulansap nu sel. (Ridi Exodus 34:6, 7.) Ke pal se Moses el apkurun in kolla mutanfwal lun an Israel in som liki an Ijipt oana met sruo, Jeova el akkalemyel sifwana ke el orekmakin kas inge: “Nga fwa akpayeye ma Nga lungse in akpayeye.” (Exodus 3:13-15, NW) Kas inge el akkalemye la Jeova el fwa akpayeye kutena kunokon ku orekma su eneneyuk elan ku in akpayeye ke akwuk nukewa lal nu sin met nukewa su el sulela. Ke ma inge met Israel elos etu Jeova oana sie Met Molela, Met Meun, Met Kasru, Met Akpayeye Mwulela, a Met Akkeyelos nu ke kutupa oiya.—Exodus 15:2, 3; 16:2-5; Josua 23:14.
15 Tulik lutlut lasr elos tia eis me kasru lun Jeova ke inkanek lun mwenmwen oana ke ma orek nu sel Moses. Tusruktu, ke tulik lutlut lasr elos kapkapek ke lulalfongi lalos a ke elos aksaokye ma elos lotela tari a ke elos mutamwauk in orekmakin ma inge, wangin alolo ka la elos akilen pa ke ma enenu lun lulalfongi nu sin Jeova ke pulaik, lalmetmet a kas in kasru. Fwin elos oru ma inge, elos ku in etu pa la Jeova el sie Met Papu su lalmetmet a ku in lulalfongiyuk, sie Met Loeyuk, sie Met kulang su sang ma enenu nukewa lalos.—Sam 55:22; 63:7; Soakas 3:5, 6.
Akkalemye Lungse
16. Efu ku oiyen sumat lun sie met luti el tia ma yok sripe se nu ke orekma lasr in oana met luti?
16 Fwin kom pulakin mu kom tia sumat ke orekma in luti peng mwo, nikmet munasla a asor ka. Jeova a Jisus elos karungin akwuk inge in luti met puspus ke peng mwo su orek fwin fwalu nufon ke pal inge. (Orekma 1:7, 8; Fwakyuk 14:6) Elos ku in akinsemwomwoye kafweang lasr, a ke ma inge kas ku me luti lasr ku in sang me kasru mwomwo nu sin sie met su paye insiel. (Jon 6:44) Lungse paye lun sie met luti nu sin tulik lutlut lal ku in afwunye kutena me munas lal in luti. Met sap Poul el kalem ke yok sripaiyen lungse in akkalemyeyuk nu sin met nukewa su lutiyuk ke peng mwo.—Ridi 1 Tessalonika 2:7, 8.
17. Fuka kut ku in akkalemye insemwomwo paye nu sin kais sie tulik lutlut ke Baibel.
17 Ke inkanek oinge, kut ku in akkalemye insemwomwo paye nu sin kais sie tulik lutlut ke Baibel kut fwin orekmakin pal in eis etauk kelos. Ke kut lutlutkin sie me lutlut yok sripe lun ma Simusla nu sel, kut ku in etu ke oiyen moul lal. Kut ku in liye la el akfwalye tari moul lal nu ke kutu me lutlut su el lotela tari ke Baibel. Ke kutu oiya, saap el srakna enenu in oru me aksumwos. In sang kasru nu sin tulik lutlut in liye la fuka el ku in orekmakin nu sel sifwana ma el lotela ke kais sie pal in lutlut Baibel, kut ku in kasrel ke inkanek kulang in ekla sie met tuma lutlut paye lun Kraist.
18. Efu ku yok sripe in pre yurin tulik lutlut lasr a in akkalemye inelos?
18 Yok sripe liki nukewa, kut ku in pre yurin tulik lutlut lasr a akkalemye inel ke kut pre. El ku in kalem na paye ka la niyen sun lasr pa in kasrel in etu ke Met Oralla ke inkanek yok, in fototo nu sel, a eis ma lane ke kolyuk lun God. (Ridi Sam 25:4, 5.) Kut fwin pre nu sin Jeova in kasru kafweang lun tulik lutlut in orekmakin ma el lotela tari, ma inge ku in kasrel in liye ke yok sripaiyen sie ‘met su orekmakin kas lun God.’ (Jemes 1:22) A pal nukewa tulik lutlut el lipsre ke pre lasr su tuku ke insiesr, el ku in lotela pa ke inkanek mwo in pre. Sie me insemwomwo yok na paye in kasru tulik lutlut nukewa lun Baibel in akkeye futoto lalos sifwana nu sin Jeova!
19. Mea fwa akuteyuki ke me lutlut toko?
19 Kut akkeyeyuk in etu la oasr Met Lo puspus fwin fwalu nufon su piselos oasr ke million onkosr tafwu elos kafofo in orekmakin a akkeye “oiyen luti” mwomwo, su niyen sun lalos pa in kasru met nukewa su paye insielos in oru ma nukewa su Jisus el sapkin. Mea fwako mwo puspus su tuku ke orekma lasr in sulkakin peng mwo? Me top nu ke kusensiyuk inge fwa akuteyuki ke me lutlut toko.
Ya Kom Esam?
• Efu ku met Kristian elos enenu in akkeye “oiyen luti” mwomwo?
• Fuka kut ku in oru orekma in luti lasr in mwo?
• Kut fwin tia sumat ke orekma in luti mea ku in sang kasru in afwunye me munas lasr inge?
[Picture on page 11]
Ya kom enroll tari ke Theocratic Ministry School?
[Picture on page 12]
Efu ku yok sripe in suli tulik lutlut lom in ridi Baibel?
[Picture on page 14]
Pre yurin tulik lutlut lom a pre kel