Kafweang in Akpayeye Akwuk Yok Sripe nu ke Moul
“Lela ma nu kemwa su oasr momong la in kaksakin Jeova.”—SAM 150:6.
1. Akuteye orekma lun sie mokul fwusr in suk ke sie akwuk yok sripe lun moul.
“NGA eis lutlut yok oana sie taktu meyen Nga lungse in orekmakin moul luk in kasru met puspus. Nga nunku pa mu oiyen pengpeng a mani yok su Nga ku in eis oana sie taktu fwa oreyu in engan,” Seung Jin su matula in an Korea, el esamak.a “Ke pal se Nga akilenak tari la arulana srikla me kasru lun sie taktu el ku in oru nu sin metu, Nga arulana asor ka. Tokin ma inge, Nga mutamwauk in lutlutkin art, tusruktu orekma luk in srolela petsa kato puspus tia na sang me kasru yok nu sin met puspus, a nga sifwilpa nunku ka a Nga pulakin mu orekma luk inge me akinsemwomwoye yu mukena. Ke ma inge Nga ekla sie met luti a tia pat Nga koneak la Nga ku in akkalemye ma puspus nu sin tulik lutlut tusruktu me luti inge el tia kas in kasru su ku in oru elos in pulakin insemwomwo paye.” In oana met puspus, mokul fwusr se inge Seung Jin el kafweang in suk ke akwuk yok sripe nu ke moul.
2. (a) Mea kalmen in oasr niyen sun a akwuk mwomwo nu ke moul? (b) Kut ku in etu fuka la oasr sie akwuk mwomwo lun Met Orekutla nu sesr in orekutla fwin fwalu?
2 In oasr akwuk paye lun moul fwa ku in kalmekin pa la enenu in oasr sripe mwomwo yok nu ke moul, in sun sie niyen sun mwomwo, a oasr sie akwuk mwomwo su kut ku in akfwalye nu ke orekma nukewa lasr. Ya metu ku in orala kain in akwuk oinge yurolos? Aok! Ke sripen kut orekla a oasr lalmetmet, nunak a pulakin, a ku lasr in sang me top mwomwo, paenang ma inge el ku in akkalemye la oasr akwuk mwomwo lun Met Orekutla nu sesr la efu ku el orekutla fwin fwalu. Ke ma inge, kut ku in koneak a akpayeye akwuk paye nu ke inkanek sefwanna kut fwin moulkin moul fwal nu ke akwuk lun Met Orekutla.
3. Mea akwuk lun God nu sin metu el kalmekin nu ka?
3 Baibel el akkalemye la ke akwuk lun God nu sesr oasr ma puspus su weang nu ka. Ke sie me pupulyuk, inkanek mwomwo su kut orekla ka el sie inkanek paye in akkalemye ke lungse paye lun God. (Sam 40:5; 139:14) Ke ma inge, in moulkin moul fwal nu ke akwuk lun God el kalmekin la kut enenu in lungse met puspus oana ma God el oru. (1 Jon 4:7-11) El kalmekin pa nu ke orekma mwo lasr in akos masap nukewa lun God, su ku in kasre kut in moulkin moul fwal nu ke akwuk mwomwo lal.—Ekklisiastis 12:13; 1 Jon 5:3.
4. (a) Mea eneneyuk in oasr nu ke akwuk paye lun moul? (b) Mea akwuk mwo a yok sripe emeet nu sin sie met el ku in kafweang in akpayeye?
4 God el orala pa akwuk nu sin metu elos in moul insemwomwo a misla yurin sie sin sie a nu sin ma orekla nukewa. (Genesis 1:26; 2:15) Tusruktu, mea kut enenu in oru tu kut fwa ku in pulakin engan, a moul mwomwo, a engankin misla? In oana sie tulik srisrik su enenu in etu la papa a nine kiyel elos tia loesla lukel a elos enenu in apkurun nu yurol tu elan ku in pulakin insemwomwo a misla, kut enenu pa in oasr fototo lasr nu sin Papa tumasr su oasr in kosrao tu kut in etu ke kalmeyen ma paye a akwuk mwomwo lun moul. (Hibru 12:9) God el orala inkanek mwo tu kut in pulakin kain in fototo mwomwo inge in oana sie tulik srisrik nu sin papa a nine kiyel, ke el lela kut in fototo nu sel a ke el long pre lasr. (Jemes 4:8; 1 Jon 5:14, 15) Kut fwin ‘fwasr wi God’ ke lulalfongi a kut fwin kawuk lal, kut fwa ku in akinsemwomwoyel a sang kaksak nu sin Papa tumasr su oasr in kosrao. (Genesis 6:9; Soakas 23:15, 16; Jemes 2:23) Pa inge akwuk mwo su yok sripe emeet nu sin sie met el an ku in kafweang in akpayeye. Met sim lun sam el simusla: “Lela ma nu kemwa su oasr momong la—in kaksakin Jeova.”—Sam 150:6.
Mea Akwuk Lom Nu Ke Moul?
5. Efu ku in suk meet ke ma mwomwo puspus lun fwalu el tia inkanek mwo se?
5 Akwuk lun God nu sesr pa in karungin kut a sou lasr ke inkanek mwomwo. Kut enenu in karungin manosr a in akmwoye akwuk lasr sifwana a lun sou lasr nu ke orekma lasr in alu nu sin God. Tusruktu, inkanek mwomwo el eneneyuk in orek nu ke ma inge, fwin kut lungse orekma lasr in suk ma enenu lasr nu ke moul el tia yok sripe liki orekma lasr in alu nu sin God su yok sripe na paye. (Mattu 4:4; 6:33) Sie me asor yok, meyen oasr met puspus su orekmakin moul a pal yok lalos in suk a eis ma puspus lun fwalu. Me pakomuta yok, kut fwin kafweang in akfwalye ma enenu lasr a kut suk mukena ma puspus lun fwalu, ma inge el tia inkanek lalmetmet a paye. Oasr sie akwuk in oeoe su tufwana orekla nu ke moul lun met kasrup puspus fwin an Asia el akkalemye la pus selos “wangin inse misla lalos, fwinne elos kasrup ye mutun met puspus a engankin moul mwomwo ke sripen me kasrup lalos.”—Ekklisiastis 5:11.
6. Kain in kas in kasru fuka Jisus el akkalemye ke orekma in suk me kasrup?
6 Jisus el sramsramkin ke “kutasrik lun me kasrup.” (Mark 4:19) Ke inkanek fuka me kasrup el sie ma kutasrik? Met puspus elos nunku mu me kasrup el ku in oru elos in engan, tusruktu nu ke ma paye el tia. “El su lungse mani fwa tia muti ke mani,” Solomon su sie togusra lalmetmet el fwak. (Ekklisiastis 5:10, The New English Bible) Tusruktu ya sie met el ku in oru niyen sun lal in suk ma puspus lun fwalu a me kasrup a el ku in srakna kulansap nu sin God ke inse kewa lal? Mo, tia ku. Jisus el akuteye: “Wangin met ku in kulansap nu sin leum luo; tu el fwa srunga sie, a lungse el ngia, ku el fwa sruokye sie, a pilesru el se ngia. Komwos koflanu kulansap nu sin God a Mammon [“Me Kasrup,” New World Translation].” Jisus el kaifwe met tuma lutlut nukewa lal elos in elosak, tia ma saok puspus lun fwalu, a “ma saok in kosrao,” kalme pa, in orala sie e mwomwo nu sin God, su “etu ma komwos enenu, meet liki komwos siyuk sel.”—Mattu 6:8, 19-25.
7. Fuka kut ku in “sruokye ku moul paye”?
7 Met sap Poul el sang kas in kai fukoko nu ke oiya se inge ke pal se el simusla nu sel Timote su welul orekma. El fwak nu sel Timote: “Kom in sap nu selos su kasrup . . . tu elos in tia filiye fwinsrak lalos nu fwin ma ekyek oana me kasrup, a in God, su ase yok nu sesr ma nu kemwa tu kut in engun ka . . . , tu elos in akola in kite me kulang, a me pakomuta, a elosak nu selos sifwana sie pelung mwo nu ke pal se su a fwa tuku, tu elos fwa ku in srukye moul ma patpat su moul paye.”—1 Timote 6:17-19.
Mea Se Inge “Moul Paye”?
8. (a) Efu ku met puspus elos kafweang yok in eis me kasrup a oiyen pengpeng? (b) Efu ku met puspus inge elos tia akilen la ma inge el wangin sripe?
8 Nu sin met puspus, kas se inge “moul paye” el nunkeyuk mu moul mwomwo ke sripen me kasrup a me akengan su tuku ka. Sie news magazine fwin an Asia el akkalemye: “Nu selos su liye petsa mukuikui ku TV fwa oru elos in suk kena yok in eis ma elos liye ka, a elos mwemwei ke ma puspus su elos ku in eis.” Oasr met puspus su oru niyen sun ke moul lalos pa in eis me kasrup puspus a kain in moul mwomwo puspus. Met puspus elos orekmakin pal yok in suk ma puspus lun fwalu a ke sripe se inge elos tia engankin moul mwomwo lalos ke elos srakna fwusr, ke mano fukoko lalos, ke moul in sou lalos, a elos fuleak akwuk yok sripe nu ke fototo lalos nu sin God. Supus met su nunku ke oiyen moul mwomwo ke petsa mukuikui a ke media inge la ma inge nukewa el akkalemye “ngun lun fwalu”—su kalmeye pa kain in nunak oinge el kufusla billion sin met puspus a akkeyelos in lain akwuk lun God nu sesr. (1 Korint 2:12; Efesus 2:2) Kut tia ku in lut ka kut fwin liye ke pal inge la oasr met puspus elos tia insemwomwo ka!—Soakas 18:11; 23:4, 5.
9. Mea metu elos tia ku in akpayeye ku oru, a efu?
9 Na fuka met puspus su orekmakin pal, ku a ma saok lalos in sang kasru met puspus, a elos kafwaeng in akwanginyela sral ke me mongo, mas, a orekma sesumwos? Orekma mwomwo lalos inge su fwal in kaksakinyuk el sang kasru yok nu sin met puspus. Tusruktu, kafweang yok lalos inge, tia ku in ekulla akwuk lun ma puspus inge in orala nu ke akwuk mwo su oasr orekma sumwosmwos ka. Efu ku tia? Meyen ke ma paye “fwalu nufon on ke ku lun met koluk se”—Setan—a el srunga in ekulla ma inge.—1 Jon 5:19, NW.
10. Ngea met oaru nukewa elos fwa engankin “moul paye”?
10 Sie me asor yok fwin wanginla fwinsrak lun sie met ke pal fwasru a el fwinsrakkin na ke akwuk lun fwal se inge ke pal inge. “In moul se inge mukena kut fwin fwinsrak kas in Kraist, kut met pakomuta liki met nu kemwa,” Poul el simusla. “Lela kut in mongo a nim, tu lutu kut mise” pa inge oiyen nunak lun met nukewa su lulalfongi mu pa na inge oiyen moul a wangin fwinsrak saye. (1 Korint 15:19, 32) Tusruktu oasr sie fwinsrak mwomwo nu ke pal fwasru, pa ke “mwuleang lun [God], kut sano kosrao sasu a fwal sasu, yen sumwosmwos on we.” (2 Piter 3:13) In pal sa, met Kristian nukewa elos fwa ku in engankin “moul paye,” su kalmekin nu ke “moul ma patpat” su oasr moul sumwosmwos we, in kosrao ku ye kolyuk mwomwo lun Togusrai lun God!—1 Timote 6:12.
11. Efu ku in wi oru orekma nukewa in sang kasru nu ke akwuk lun Togusrai lun God el arulana yok sripe?
11 Togusrai lun God mukena pa ku in akwanginyela ma upa nukewa lun metu. Ke ma inge orekma lasr in oru ma lungse lun God in sang kasru akwuk nukewa lun Togusrai el pa orekma yok sripe se emeet su kut nukewa ku in kafweang in oru. (Jon 4:34) Ke kut wi ke orekma inge, kut ku in engankin a akkeye fototo mwomwo lasr nu sin Papa tumasr su oasr in kosrao. Kut ku in insemwomwokin pa in oru orekma inge yurin million puspus sin met lili wiyesr ke congregation lun met Kristian su kafweang pa in oru niyen sun inge ke moul lalos.
Oru Sulela Sumwos in Lafwekin Kut Sifwana
12. Akkalemye ma tia oana sie nu ke akwuk su oasr ke pal inge a ke “moul paye.”
12 Akwuk lun fwal se inge el “fwafwala na a tia on pal nukewa a lung kolukla,” Baibel el akkalemye. Akwuk nukewa lal Setan ke fwal se inge, wekunang oiyen pengpeng a ma mwomwo nukewa ka, fwa kunausyukla, “tusruktu el su oru ma lungse lun God fwa muta ma patpat.” (1 Jon 2:15-17) Me kasrup nukewa lun fwal se inge, oiyen pengpeng su oan ke kitin pal na, a me akengan lun akwuk inge, el tia oana “moul paye” su kalmekin nu ke moul ma patpat ye kolyuk lun Togusrai lun God—el ku in oasr pal nukewa a arulana fwal nu ke kafweang lasr in lafwekin kut la sifwana, su kut ku in eis fwin kut oru sulela mwomwo nu ke moul lasr.
13. Fuka sie siyanyen elos oru orekma sumwos in lafwekinelosla sifwana?
13 Nunku kel Henry a Suzanne. Elos filiye lulalfongi paye lalos nu ke mwulela lun God la met nukewa su suk meet Togusrai lun God ke moul lalos fwa eis me kasru lun God. (Mattu 6:33) Ke ma inge, elos oru sulela lalos in muta ke sie loom su tia yok molo a ma inge akfusrasrye moul lalos meyen tia eneneyuk nu selos in tukeni oru orekma in suk mani in sang moli loom kato su arulana yokla molo, a elos ku in orekmakin pal lalos in wi tulik mutan luo natulos ke orekma in sulkakin peng mwo lun Togusrai a ke kutupa orekma in akinsemwomwoye God. (Hibru 13:15, 16) Sie sin met kawuk fototo lalos el tia ku in kalem ke sulela su elos oru. El fwak nu sel Suzanne: “Kawuk, kom fwin lungse in muta ke sie loom mwomwo, kom enenu na in orekmakin a kisekunla ku a pal yok lom.” Tusruktu, Henry a Suzanne elos etu la in akinsemwomwoye Jeova meet el “oasr mwuleung ka ke moul se inge a ke moul se su a fwa tuku.” (1 Timote 4:8; Taitus 2:12) Tulik luo natulos inge ke matula elos sroang nu ke orekma lun pioneer in fwakak peng mwo pal nukewa. Oana sie sou, elos tia nunku a pulakin mu elos tia engankin ma puspus su yok sripe, a elos eis me insemwomwo yok ke elos kafweang in akpayeye niyen sun lalos in suk “moul paye.”—Filippai 3:8; 1 Timote 6:6-8.
Nikmet ‘Orekmakin Fwalu ke Inkanek Yok’
14. Kut fwin mulkunla akwuk paye lasr ma inge ku in kol nu ke ongoiye fuka?
14 Tusruktu, oasr me sensen yok kut fwin mulkunla akwuk paye lasr a kut tila sruokye ku “moul paye.” Ma inge ku in oru kut in fosrngala yok ku “nunkalanu fwalu a me kasrup a me akengan lun moul.” (Luk 8:14) Lungse yok a “nunkala lun fwal se inge” ku in oru sie met in orekmakin pal yok lal in suk ma inge ke akwuk lun ma puspus. (Luk 21:34) Oasr sie me asor, meyen oasr kutu met Kristian elos kufusyukla ke kafweang yok lalos in ekla met kasrup a elos “tafongla liki lulalfongi a sifwana fwaksilosi ke me asor puspus,” a elos tula pa fototo lalos nu sin Jeova su saoklanu. Oiya se inge el sie me asor yok meyen elos tia “sruokye ku moul ma patpat”!—1 Timote 6:9, 10, 12; Soakas 28:20.
15. Fuka sie sou el eis me insemwomwo yok ke elos ‘tia arulana orekmakin fwalu’?
15 Poul el sang kas in kai la “elos su orekmakin fwalu, oana elos su tia arulana orekmakin ka.” (1 Korint 7:31) Keith a Bonnie elos akos kas in kai inge. “Nga ekla sie sin Met Lo lun Jeova ke Nga apkuran in aksafyela me lutlut luk ke dental school ku sie taktu wus,” Keith el srumon. “Oasr sulela luk su Nga ku in oru. Nga ku in eis met puspus su oasr ma upa lalos ke wuselos a Nga ku in eis mani yok ka, tusruktu fwin orek ma inge fwa ku in aksrikyela pal mwomwo lasr in oru orekma in kulansap nu sin God. Ke ma inge Nga oru sulela luk in tia orekmakin pal yok in akmwoye wus lun kutu met tusruktu in oasr pal yok lasr in oru kulansap nu sin God a in karungin ma enenu lun mutan kiyuk a tulik mutan limekosr natusr ke nunak a pulakin lalos. Fwinne tia yok mani lasr, tusruktu kut lotela in akfwalye ma inge in fwal nu ke me enenu lasr, a kut ku in eis ma nukewa su kut enenu. Met nukewa ke sou lasr fototo nu sin sie sin sie, oasr lungse yok a kut arulana insemwomwo. Tia pat, kut nukewa sroang nu ke orekma lun pioneer. Ke pal inge tulik mutan nukewa natusr elos payukyak tari, su tolu selos oasr pa tulik natulos sifwana. Sou lalos insemwomwo pa meyen elos kafweang in oru meet orekma in kulansap nu sin Jeova ke moul lalos.”
Oru Meet Akwuk lun God Ke Moul Lom
16, 17. Me srikasrak puspus fuka lun met puspus su lalmetmet a utuftuf in orekma lalos akkalemyeyuk in Baibel, a fuka elos esamyuk sin met puspus?
16 Baibel el akkalemye ke me srikasrak lun met puspus su oru akwuk lun God ke moul lalos a ke met puspus su tia oru. Me lutlut puspus ke me srikasrak inge ku in orekmakinyuk nu ke matwe nukewa, inkanek in moul lun met in mutanfwal nukewa a ke oiya nukewa. (Rom 15:4; 1 Korint 10:6, 11) Nimrod el musaela siti yok puspus, tusruktu el oru ma inge in lain Jeova. (Genesis 10:8, 9) Tusruktu, oasr met puspus saye su oru me srikasrak mwomwo. Ke sie me pupulyuk, Moses el tia nunku yok in moulkin moul mwomwo a pengpeng oana met Ijipt a tia pa inge akwuk ku niyen sun lal ke moul. A, el aksaokye kunokon lal nu sin God oana “saok yok liki me kasrup lun Ijipt nukewa.” (Hibru 11:26) Kalem la Luk su sie taktu el sang kasru nu sel Poul a nu sin met Kristian puspus saye in unwela mas lalos. Tusruktu Luk el oru orekma saok yok in unwela mas a el sang kasru nu sin met puspus oana sie met fwakak peng mwo a sie met sim lun Baibel. Nu sel Poul, el eteyuk, tia oana sie met su sumat ke Masap, tusruktu el eteyuk oana sie missionary, “sie met sap nu sin met pegan [“mutanfwal puspus,” NW].”—Rom 11:13.
17 Devid el esamyuk ku eteyuk, tia oana sie met kol yok a pengpeng nu sin un met meun ku sie met on a met sim on pengpeng, tusruktu el eteyuk oana “sie met su akinsemwomwoye insien God.” (1 Samuel 13:14, NW) Kut ku in esamel pa Daniel, el tia oana sie met kol lun guferment fwin an Babulon, a el eteyuk yok ke orekma in kulansap lal nu sin Jeova oana sie met palu oaru, a kut esamel pa Ester, tia ke sripen el mutan kasra lun an Persia, a ke sripen el akkalemye me srikasrak ke pulaik a lulalfongi; Piter, Andru, Jemes, a Jon elos eteyuk, tia oana met patur mwomwo, a ke sripen elos met sap mwomwo lun Jisus. A oasr sie me srikasrak su mwo emeet, pa Jisus, su kut esamel tia oana “met kamtu” se, a kut esamul ku etel oana “Kraist.” (Mark 6:3; Mattu 16:16) Met nukewa inge elos etu a kalem na paye ka la kutena kain in sumat a etauk lalos nu ke kain in orekma nukewa, ma saok su oasr yurolos, ku oiyen pengpeng su elos engankin, ke moul lalos enenu in orekmakinyuk nu ke orekma in kulansap lalos nu sin God, a tia in oru orekma nu selos sifwana. Elos etu la akwuk mwomwo a sumwos emeet pa elos in akkalemye la elos mokul a mutan su sangeng nu sin God.
18. Fuka sie met Kristian fwusr el oru sulela in orekmakin moul lal, a tok kutu mea el akilen?
18 Mokul se inge Seung Jin, su akkalemyeyuk ke mutamweyen me lutlut inge, el kalem pa ke ma yok sripe se inge. “Nga tia orekmakin ku nukewa luk nu ke orekma lun ono, orekma in sroal petsa kato, ku ke orekma luk oana met luti, tusruktu Nga oru sulela luk in orekmakin moul luk fwal nu ke mwulela luk nu sin God,” el akuteye. “Nga oru orekma in kulansap luk ke pal inge ke sie an su oasr me enenu yok nu sin met luti ke ma paye lun Baibel, in kasru met puspus elos in fwasr ke inkanek sumwos su kol nu ke moul ma patpat. Nga nunku pal nukewa mu in oru orekma lun pioneer el sie orekma su tia enenu kafweang yok nu ka. Tusruktu Nga liye ingena la Nga enenu in oru kafweang yok nu ke moul luk, ke Nga kafweang in akmwoye oiya mwomwo a ku luk in luti met puspus su tuku ke an puspus. Nga kalem ka la kut fwin orekmakin akwuk lun Jeova in pa akwuk lasr pa inge inkanek sefwanna lun moul su arulana yok sripe.”
19. Fuka kut ku in koneak akwuk mwomwo a paye ke moul?
19 Oana met Kristian, kut eis me insemwomwo yok nu ke etauk su ku in molela moul a ke fwinsrak lun me molela. (Jon 17:3) Ke ma inge, lela kut in “tia eis kulang lun God ke wangin sripe.” (2 Korint 6:1) Tusruktu, lela kut in orekmakin len a yea puspus lun ma saok nukewa lasr ke moul in kaksakin Jeova. Lela kut in akkalemye nu sin met puspus yen nukewa ke etauk su sang me akengan paye ke pal inge a su kol nu ke moul ma patpat. In oru ma inge, kut fwa ku in pulakin ma paye su tuku ke kas lun Jisus: “Insemwomwo in sang yok liki insemwomwo in eis.” (Orekma 20:35) A kut fwin oru ma inge kut fwa ku in koneak akwuk mwomwo a paye ke moul.
[Footnote]
a Kutu inen met ikulyukla.
Ya Kom Ku In Akuteye?
• Mea akwuk su mwo emeet su kut ku in oru ke moul lasr?
• Efu ku in nunku yok a suk ke ma puspus lun fwalu el tia sie inkanek lalmetmet?
• Mea se inge “moul paye” su God el mwulela ka?
• Fuka kut ku in orekmakin moul lasr nu ke akwuk lun God?