Ku lun Loa

LOUN kosro soko inge su pangpang giraffe el srikasraku lusal nu ke inches 18 a fusrasr in mukuikuiyuk a arulana fukoko in kotela sran lesak ke sak. Loun blue whale el toasr oapana toasr lun soko elephant. Nunku ke ku su eneneyuk in mokle loun soko blue whale!

Loun metu el arulanu srikla in srikeyuk nu ke lupa, toasriye, a kuiya. Tusruktu, ma inge arulana ku. “Mise a moul on in ku lun loa,” Baibel el fwakak ke kitin ip na srisrik ke monin met se. (Soakas 18:21) Aok, anu pal ekasrla kut long loun met orekmakinyuk in kineak ma kikiap a kaskas kikiap su sang me kanausten, fwinne nu ke mise, nu sin met su wangin meta?

Ke inkanek su oapana, kawuk fototo se ke pal loeloes el kanausyukla ke sripen kas su akngalye ku aktoasrye. Nunak a insien met musalla ke sripen kas upa. “Putaka komwos fwa angon ngunik, a emiyuwi ke kasu?” Job el wowoyuk tung, ke me akkoluk yok su tuku sin met asrouki lal. (Job 19:2) Met sap Jemes el sang me akkalemye ke ku in kunausla lun loa su wangin me kutong nu ka: “Loun met sie laa srisrik, a konkun ke ma lulap. Liye! Lupaka etong kiten e srisrik ke akosak! A loa oana e.”​—Jemes 3:5, 6.

Ke inkanek saye, ku lun loa el ku in sang pa moul. Kas mwo a kas in akkeye ku in molela kutu met liki pulakinyen asor yok su lungse in loksakla. Kas in kasru mwomwo, fwin akosyuk a orekmakinyuk, el ku in molela met puspus su orekmakin ono koluk a met akmas liki mise. Paye, la fwako lun loun met sumwosmwos pa “soko sak in moul,” a “sie kas fwakyuk fwal oana appel in gold in kraun silfer.”​—Soakas 15:4; 25:11.

Tusruktu, inkanek se ma mwo emeet in orekmakin loa nu ka, pa in kaksakin Jeova God, fwakak mwo sasu lun Togusrai lun God, luti met puspus ke ma paye su arulana saok ke Baibel. Efu? Jisus el fwak: “Pa inge moul ma patpat, tu elos fwa ete kom God paye mukefwanna, a Jisus Kraist su kom supalma.”​—Jon 17:3; Mattu 24:14; 28:19, 20.