Sie Me Srikasrak nu ke Oiyen Oaru Paye

NELMA, su orekma oana sie hairdresser ku met kalkul in an Cruzeiro do Sul, Brazil, el tufwana sun sie me sruf nu ke oaru paye lal oana sie met Kristian. Ke pal se sronot sun an sel, Nelma el eis kutu nuknuk su tuku sin sie client lal. Ke el srela nuknuk inge nu sie, el koneak la oasr mani $1,000 (U.S.) ke kutu pakut in tuhrasis el orani.

Mani su Nelma el koneak inge apkuran in fwal nu ke molin orekma lal ke malem itkosr, a el enenu na paye ma inge. Lom sel musala ke sronot, a papa tumal a tulik puspus wiyel tula pa ma puspus lalos. Ke lupan mani se inge, el ku in sang aksafyela loom sel a srakna oasr ma lula in sang kasru sou lal. Tusruktu, pulakin a ella mwomwo lal su eis akpa a fwal nu ke akwuk mwo lun Baibel tia lela elan sruokye mani inge.​—Hibru 13:18.

Arlana sa ke len toka, el sa na som nu ke orekma lal liki na ao in mutamwauk orekma a el srike in pangon met business se su sang nuknuk nu sel. Nelma el sang kulo nu sel ke nuknuk tusruktu el tafwela in akkalemye la el tia ku in sruokye ma su el koneak luen nuknuk inge. Mutan sa arlana engunak yok ke lupan mani lulap su el eis. El srela mani inge in sang moli met orekma nukewa lal. “Oaru paye el sie ma yok sripa su kom tia ku in koneak pal nukewa,” met business el fwak.

Aok, oasr kutu met elos nunku mu in akkalemye oiyen oaru paye el tia yok sripe. Tusruktu, oaru paye el sie oiya su aksaokyeyuk na paye nu sin met nukewa su kafweang in akinsemwomwoye God paye, Jeova. (Efesus 4:25, 28) “Nga tia ku in motul ke fong fwin Nga orala kutena orekma su tia tuku ke inkanek oaru paye a sumwos,” Nelma el fwak.