Matou Tari tusruktu Srakna Oasr Ma El Oru
KE SRIPEN matou tari, met puspus elos tia ku in orekma, a elos srelulosla liki metu. Tusruktu tia pa inge ma sikyuk ke moul lal Ferdinand Rivarol, su mise ke el yea 95 matwe in an Geneva, Switzerland. El mukena muta, ke sripen mutan kiyel el mise tari a tulik mutan natul el payuk tari a oasr loom sel sifwana. Fwinne el muta ke loom sel pal nukemwa, el tia pulakin asor. El muta ke sie tepu ke luen loom pal nukemwa, orekmakin telefon, a pangon met in sramsram nu selos ke ma lun ngun.
Ke lusen moul lal Fernand su oasr orekma mwo puspus, oasr pal el kaul ke loom in kapur. Efu? Ke sripen Fernand a mutan kiyel elos ekla Met Lo moniyuk lun Jeova in yea 1939, ke Meun Lulap Akluo sun an Europe. Fernand el sruokye ku sulela lal fwal nu ke Baibel in tia akngalye kutena met. Ke sripe inge, el sisila ke orekma lal a el muta ke nien kalpous ke pal puspus—ke lusen yea limekosr tafwu—ke pal se inge el sriyukla liki mutan kiyel a tulik mutan srisrik natul.
In sifwilpa esamak, Fernand el fwak: “Met puspus elos nunku mu Nga sisla orekma mwomwo luk a sisla sou luk tia sang me kasru. Metu elos akkolukyeyu a akkalemye oiya nu sik oana sie met koluk. Tusruktu, ke Nga sifwilpa nunku ke yea puspus ke ma upa inge, Nga esamak pa ke inkanek su Jeova el oru in sang karungin kut a kasre kut. Yea puspus somla tokin ma inge, lulalfongi luk nu sin Jeova el srakna fukoko oana in pal ingo.”
Lulalfongi inge moklel Fernand in fwakak nu sin met puspus ke inkanek lun telefon fwinsrak lal ma tuku ke ma Simusla. Fwin kutu met su el sramsram nu se elos akkalemye pwar, el sifwilpa supala me rid ma tuku ke Baibel nu sin met inge. Tok, el sifwilpa pangon met inge in liye fwin elos engunkin in rid me rid inge. Kutupal, met su el sramsram nu se elos supama leta nu sel in sang kulo ka, el arulana insemwomwo ke ma inge.
Saap oasr kutu met kom osun nu se in oana Fernand el oru in sramsram nu sum ke an sum. Efu ku tia sang pal mwo in long ke ma elos fwak kom in mu ku in koneak la mea elos lulalfongi ka? Met Lo lun Jeova elos insemwomwo pal nukemwa in akkalemye nu sum ke lulalfongi lalos.