Television Mwo In Orekmakin In Sang Liaung Tulik Srisrik?
KUTUPAL, in oru tulik nutum in pwar ke kom lela in liye television ke pal se kom oru orekma lom len nukemwa saap oasr nunkeya mu arulana mwo. Tusruktu fuka ma inge akkolukye tulik nutum?
“Tulik srisrik pa elos ku in akkolukyeyuk ku kasreyuk ke oiya puspus in purakak nunak su akkalemyeyuk ke sie television,” New York Times el reporti. Ke sie lutlut su orek tia loes, tulik srisrik su matwelos oasr ke yea se akkalemyeyuk nu selos sie petsa mukuikui futoto ke television su sie mutan el akkalemye oiya lal ke inkanek puspus nu ke sie me sritel. “Ke pal se mutan sa el akkalemye la el sangeng ka,” Times el akkalemye, “awowo puspus inge elos som liki me sritel inge a elos akkalemye oiyen fosnga, aten mutalos sroasol, supwarla ku elos tung. Ke pal se mutan se ke television el pwarkin me sritel, awowo inge elos engankin a lungse in sritelkin me sritel inge.”
Kalem la, television el ku in kasru ku akkolukye tulik srisrik. Mea fwako tuku ke orekmakinyen television ke lusen pal loeloes nu sin tulik srisrik? Dr. Naoki Kataoka, sie professor ke pediatrics ke Kawasaki Medical College in an Kurashiki, Japan el liye la oasr tulik srisrik puspus su arulanu misla a wangin akkalemyeyen pulakin lalos ke mutalos. Elos nukemwa liye TV ku videos ke lusen pal loeloes. Sie tulik mokul su yea luo matwel el tia ku in sramsram nu sin met a kas su el etu arulanu supus. El liye video puspus mutamwauk ke lututang nu ke eku len nukemwa mutamwauk ke pal se el yea se. Ke pal se nine kiyel el akos kas in kasru lun sie taktu, in tia sulpa lela tulik mokul se inge in liye video puspus a nine se inge el mutamwauk in sritel yurin tulik se natul inge a kas lun tulik se inge mutamwauk in yokyokelik. Aok, papa a nine elos enenu in sritel a sramsram nu sin tulik natulos.
Jeova God, Met Orala akwuk lun sou, el akkalemye ke yok sripaiyen orekma mwo emeet ke elos fwin muta yurin tulik natulos. In pal meeta el fwak kas inge nu sin met kulansap lal: “A kom fwa alken in luti ma inge [kas lun God] nu sin tulik nutum, a kom fwa kaskas ka ke kom muta in loom sum, a ke kom fwasr inkaneku, a ke kom onu, a ke kom tukakek.” (Duteronomi 6:7) Papa a nine, a tia television, ku in luti tulik ke inkanek mwo emeet ke kas a me srikasrak, ke “inkanek fwal” nu selos.—Soakas 22:6.