Ya Kut Enenu Sie Messaia?
SAAP kom a siyuk kusensiyuk se inge, “Ya kut enenu sie Messaia?” Aok, yok sripe in siyuk la paye Messaia el oasr sripe nu sum.
Baibel el akkalemye kalem nu sesr la kut enenu na paye sie Messaia. Sie met sumat ke masap lun met Ju ke century se meet el simusla ke Messaia: “Tu mwuleang nu kemwa lun God, aok in El.” El akkalemye kalem ke kunokon yok sripe se su Messaia el oru ke akwuk lun met Orekutla in akinsemwomwoye mutanfwal nukemwa fwin fwalu. (2 Korint 1:20) Oiyen kunokon lun Messaia el arulanu yok sripe nu ke tuku lal a moul lal fwin fwalu a pa ma yok ke kas palu lun Baibel. Tusruktu ya oasr sripen tuku lal? Efu ku kom enenu in nunku ka?
“Messaia” el kalmekin nu ke “Met Akmusrala” a el kalmekin nu ke kas pengpeng inge “Kraist.” Messaia inge el enenu in tuku ke sripen orekma in seakos lun siyanyen se meet, Adam a If. Elos orekla sumwosmwos, a oasr fwinsrak mwomwo nu selos in moul ma patpat ke Paredais, tusruktu tula fwinsrak se inge yurulos. Lipufon koluk se inge, su pangpang Setan su Devil, el kiapellos la in fwak la met Oralosla el arulana upala a tia sang sukosok nu selos, a moul lalos fwa arlana mwo fwin elos oru sulela lalos sifwana nu ke ma mwo a ma koluk.—Genesis 3:1-5.
If el kiapeyukla a lulalfongi ke kas kikiap inge. Adam, el aksaokye asrouki ku futoto lal nu sin mutan kiel liki na in sruokye oaru lal nu sin God, a el akkolukyeyukla ke orekma in lain su Devil el sramteak. (Genesis 3:6; 1 Timote 2:14) Ke sripen orekma lalos, elos oakiya sie ma su yok fwako ka su paenang elos in fuleak fwinsrak lalos sifwana nu ke moul ma patpat in paredais. Me usru se inge su elos sang nu sin tulik natulos su sonna isusla pa ma koluk a mise ke sripen ma koluk.—Rom 5:12.
Met Orekutla, Jeova, el silaklak in suk inkanek in aksumwosyela fwako koluk nukemwa ke ma su sikyak tari ke orekma in lain inge. Jeova el akkalemye kas palu se meet in Baibel, ke pal se el oru nununku nu sel Devil, el fwak: “A nga fwa filiye srunga inmasrlom a mutan se inge, a inmasrlon fute lom a fute lal. El fwa kunausla sifwom, a kom fwa kunausla kapinniel.” (Genesis 3:15) Sie scholar ke Baibel el akkalemye mu Messaia el sie kofwen me orekma lun God su “e fwa ekulla ma koluk nukemwa su tuku sin siyanyen se meet,” a ke pal sepana el fwa sang me insemwomwo nu sin metu.—Hibru 2:14, 15.
Tusruktu, saap kom etu la ingena metu tia akinsemwomwoyeyuk. A, metu arulanu pulakin la wanginla fwinsrak lalos. Ke ma inge, buk se inge pangpang The World Book Encyclopedia el fwak mu “met Ju puspus elos srakna sano ku tupan sie Messaia in tuku” a el “fwa aksumwosye ma tafongla ku ma koluk puspus a kunausla met lokwalok nukemwa lun metu.” Tusruktu, Baibel el akkalemye la Messaia el tuku tari, a el akkalemye la Jisus pa Messaia. Kut ku in lulalfongi ma Baibel el akkalemye.