Kas lun Jeova Moul
Kas Fulat Tuku Ke Buk lun Ezra
BUK ke Baibel lal Ezra mutamwauk ke me sramsram lal ke yen se ma Kronikel Akluo el aksafyela me sramsram lal. Met sim ke buk inge pa Ezra, sie met tol, el mutamwauk me sramsram lal ke pal se oasr masap su sapkinyuk sin Togusra Sairus lun an Persia in lela met lula sin met Ju su muta in an Babulon oana met sruo in foloko nu in an selos. Me sramsram kelos aksafyeyukla ke pal se Ezra el oru inkanek in aknasnasyelosla nukemwa su akfokfokyelos sifwana nu sin met puspus fwin an we. Lusen pal sa nufon ke me sramsram su akkalemyeyuk ke buk inge oasr ke yea 70—mutamwauk in yea 537 nu ke 468 B.C.E.
In simusla buk inge, oasr nien sun mwomwo lal Ezra: pa in akkalemye la fuka Jeova el akpayeye mwolela lal in aksukosokye la met kulansap nukemwa lal liki sruo in an Babulon a in folokonak alu paye in an Jerusalem. Ke ma inge, Ezra el akkalemye yok ke ma puspus su sikyak fwal nu ke ma sramsramkinyuk ke akwuk inge. Buk lun Ezra el sie me sramsram yok ke oiyen temple su sifwil musaiyukla a la fuka orekma in alu nu sin Jeova el sifwilpa oakiyuki ku orekla fwinne oasr orekma in lain a oiya sesumwos lun met kulansap nukemwa lun God. Oasr insemwomwo yok lasr ke me sramsram inge meyen kut moul pa ke pal in sifwil folokinyukyak alu paye. Met puspus elos som nu ke “eol lun Jeova,” a fwalu fwa “sesesla ke etu mwolena lun Jeova.”—Isaia 2:2, 3; Hebakkuk 2:14.
TEMPLE SIFWIL MUSAIYUKLA
In akos masap lal Sairus, oasr met Ju 50,000 folokla nu Jerusalem ye kolyuk lal Governor Sirubabel, ku Sheshbazzar. Met puspus inge su folokla elos orala sie loang ke an lalos a elos mutamwauk in sang me kise puspus nu sin Jeova.
Ke kutu yea tok met Israel nukemwa elos musaiyak pelung nu ke loom sin Jeova. Met lokwalok puspus elos suk in tulokinye orekma in sifwil musa pal nukemwa a ke saflaiye elos tia ku in eis sie masap sin togusra in sang tulokinye orekma. Met palu Heggai a Zekaraia elos akkeye metu elos in tafwela na orekma in musa lalos fwinne oasr masap in sang tulokinye orekma in musa inge. Sangeng in lain masap se su sapkinyuk sel Sairus oru met lokwalok lalos tia tulokinye orekma lalos. Oasr sie orekma in sukok orek a ma inge sang kalem mwomwo nu ke masap lal Sairus ke “loom sin God in Jerusalem.” (Ezra 6:3) Ke ma inge orekma in musa el fwasr na mwo a orekma in musa inge el aksafyeyukla.
Kusensiyuk Puspus ke Ma Simusla Eis Top Ka:
1:3-6—Ya met Israel nukemwa su tia wi folokla nu in an selos munas lulalfongi lalos? Kutu selos tia folokla nu Jerusalem saap meyen elos lungse in suk ma puspus lun fwalu ku elos tia aksaokye alu paye, tusruktu oiya inge tia oasr yurin met nukemwa. Ma se meet, ke oiyen fwufwasryesr lalos nu Jerusalem arulanu loes, oasr ke lusen mail 1,000, a enenu in orek ke lusen malem akosr ku limekosr. Yok liki ma inge, in sifwilpa muta ke sie an su musalla ke lusen yea itngoul a in sifwilpa musai a akmwoye an inge enenu in oasr mano fukoko lun met nukemwa su fwa wi ke orekma in musa inge. Ke ma inge, oasr oiya puspus su oana munas lun mano, oiyen matou, a kunokon lun sie met ke sou lal, sruokolosi in tia wi folok nu Jerusalem.
2:43—Su met puspus inge su pangpang Netinim? Elos tuku ke sruf saye su tia met Israel su orekma in temple oana met foko ku met kulansap. Kutu selos pa tulik nutin met Gibeon in len lal Josua a kutupa met “su Devid a leum elos sang in kulansapu met Livai.”—Ezra 8:20.
2:55—Su mwen nutin met kulansap puspus lal Solomon? Elos tia met Israel su etukyang nu selos kunokon puspus ke orekma in kulansap nu sin Jeova. Elos orekma oana met sim ku met su copy ma simusla ke temple ku elos orekma ke kutu orekma oana met kol.
2:61-63—Ya Urim a Thummim, pa ma se su orekmakinyuk fwin oasr me top eneneyuk sin Jeova nu ke sie kusensiyuk, su srakna oasr a ku in orekmakinyuk sin met Israel su sruo a sifwilpa folokla nu ke an selos? Elos su fwak mu elos weang sie sruf tusruktu elos tia ku in akpayeye ku in eis kasru in orekmakin Urim a Thummim in eis me akpayeye fwin elos wi na paye ke sie sruf ku tia. Ezra el akkalemye ma inge mukena oana sie ma su ku in orek. Wangin me akkalemye ke Ma Simusla la orekmakinyen Urim a Thummim in pal ingo srakna orekmakinyuk ku tui. In fwal nu ke fasin lun met Ju, Urim a Thummim tula ke pal se kunanula temple in yea 607 B.C.E.
3:12—Efu ku “met matou puspus su liye tari loom” sin Jeova in pal meeta elos tung? Met puspus inge srakna ku in esam ke mwolenaiyen temple se su Solomon el musaela. Temple sasu su elos liye inge el oana “ma lusrongten ye mutalos” elos fwin srikeye nu ke loom se meeta. (Haggeai 2:2, 3) Ya kaifweang lalos ku in sifwil folokonak mwolena lun temple se meet a? Elos ku in pulakin asor yok ka a ke ma inge elos tung.
4:8–6:18—Efu ku fus puspus inge simusyukla in kas Aramaic? Meyen oasr ma simusla ku fus puspus ke leta lun met kol puspus ke guferment nu sin togusra a ke me top puspus lun togusra. Ezra el orala copy ke leta puspus inge su simusyukla in kas Aramaic, kas su orekmakinyuk ke akwuk in kuka a ke guferment in len ingo. Oasr kutu pa ip lun Baibel su simusyukla in kas Aramaic ku Semitic in pal meeta ke Ezra 7:12-26, Jeremaia 10:11, a Daniel 2:4b–7:28.
Me Lutlut nu Sesr:
1:2. Ma Isaia el palye tari ke yea 200 kutu somla akpayeyuk. (Isaia 44:28) Kas palu nukemwa ke Kas lun Jeova wangin pal tia akpayeyuk.
1:3-6. In oana kutu sin met Israel su tia wi folok nu in an selos a muta na in an Babulon, Met Lo lun Jeova ke pal inge su tia ku in sroang nu ke orekma in luti peng mwo pal nukemwa ku oru orekma in kulansap in an puspus su oasr me enenu yok we elos srakna ku in sang kasru a akkeyelos su ku in wi ke orekma inge a sang me kasru ke inse mulala in akkeye orekma in luti peng mwo lun Togusrai a ke orekma in oru met tuma lutlut.
4:1-3. Met lula oaru inge elos pilesru akwuk su akkalemyeyuk nu selos su oru elos in wi ke orekma in alu lun met puspus ke alu kikiap nukemwa lalos. (Exodus 20:5; 34:12) Met kulansap nukemwa lun Jeova ke pal inge elos tia pa wi ke kutena kain in orekma lun alu kikiap nukemwa.
5:1-7; 6:1-12. Jeova el ku in oru inkanek in sang kasru met kulansap nukemwa lal in kutangla.
6:14, 22. Orekma in moniyuk nu ke orekma lun Jeova ase me insemwomwo a ma lane lal.
6:21. Met Samaria su muta in an sin met Ju in pal ingo elos liye ke oiyen kapkapek ke orekma lun Jeova a elos liye pa la Met Ju puspus su sifwil foloku liki sruo su aknasnasyelos sifwana liki ma fokfok lun mutanfwal in fwal ingo, orala me akkeye yok nu sin met Samaria. Ya kut tia insemwomwo in wi ke orekma su God el sapkin nu sesr, a in wekunang orekma in sulkakin peng mwo lun Togusrai?
EZRA EL TUKU NU JERUSALEM
Yea lumngoul somla mutamwauk ke pal se loom sin Jeova su sifwil pa musaiyukla kisekinyukla. Yea se inge pa 468 B.C.E. Met lula nukemwa sin met kulansap lun God elos welul a elos us pa me kasru puspus oana mani su tuku sin metu, ke Ezra el som nu Jerusalem liki an Babulon. Mea el koneak we?
Met fwisrak puspus elos fwak nu sel Ezra: “Met Israel, a met tol a met Livai, elos tia sifwana srelosla liki met lun fwal se inge, a oru oana me srungeyuk lalos.” Sayen ma inge, “poun met fwisrak a leum kol in ma koluk se inge.” (Ezra 9:1, 2) Ezra el arulanu lut. El akkeyeyuk in “pulaik a oru.” (Ezra 10:4) Ezra el orala inkanek in aksumwosye ma koluk inge, a metu elos akos me aksumwos inge.
Kusensiyuk Puspus ke Ma Simusla Eis Top Ka:
7:1, 7, 11—Ya fus inge nukemwa sramsramkinyuk kel Artaxerxes se su suk in tulokinye orekma in musa inge? Mo. Kas se inge Artaxerxes pa sie e ku mwal orekmakinyak nu sin Togusra luo lun an Persia. Sie pa mokul inge pangpang Gaumata ku Bardiya, su orala masap in tulokinye orekma in musa temple in yea 522 B.C.E. Artaxerxes se ke pal se Ezra el tuku nu Jerusalem pa Artaxerxes Longimanus.
7:28–8:20—Efu ku met Ju puspus su muta in an Babulon elos srunga in som nu Jerusalem in welul Ezra? Fwinne pus liki yea 60 somla mutamwauk ke pal se u se meet lun met Ju elos folokla nu in an selos, srakna supus met ma muta in an Jerusalem. Orekma in folok nu Jerusalem eneneyuk nu selos in sifwilpa mutamwauk ke sie moul sasu ke ma upa su sikyak a me sensen puspus. Oiya se su sikyak in an Jerusalem in pal ingo tia fwal nu sin Met Ju puspus su engankin moul mwomwo in an Babulon su lungse in akyokye ma puspus lalos. Oasr pa me sensen ke elos oru fwufwasryesr lalos. Met puspus su sifwil folokla inge enenu in oasr lulalfongi fukoko lalos nu sin Jeova, moniyuk ke alu paye, a oiyen pulaik in som nu Jerusalem. Fwinne Ezra el akkeyel sifwana in fwal nu ke me kasru lun Jeova. Ke orekma in akkeye su Ezra el oru, sou 1,500—saap piselos oasr ke 6,000 met—elos akkeyeyuk a folokla nu in an selos. Tokin Ezra el orala kutupa inkanek in akkeyelos, oasr met Livai 38, a met Netinim 220 elos wi pa som.
9:1, 2—Fuka lupan me sensen su tuku ke orekma in payuk yurin met lun mutanfwal sa? Mutunfwal se su folokonyukla pa met liaung ke orekma in alu nu sin Jeova nu ke tuku lun Messaia. Orekma in payuk nu sin metsa su muta in an u pa me sensen na paye nu ke alu paye. Meyen kutu met elos payuk tari nu sin met puspus su orek alu nu ke ma srulela, paenang met nukemwa ke mutanfwal Israel elos ku in eis a oru pa orekma koluk lun met pegan puspus inge. Alu paye ku in wanginla ke inkanek nukemwa fwin fwalu. Nu sin su sripen tuku lun Messaia? Pa inge sripe su paenang Ezra el lut na paye ke el liye ma sikyak inge!
10:3, 44—Efu ku elos sisla pa tulik nukemwa wi mutan kiyelos? Fwin tulik inge elos mutana yurin papa tumalos, saap mutan nukemwa su payuk nu sin mokul Israel fwa sifwil foloku nu yurolos ke sripen tulik nukemwa inge. Sayen ma inge, karunginyuk lun nine kiyelos eneneyuk nu sin tulik nukemwa inge.
Me Lutlut nu Sesr:
7:10. Oana sie met su lutlut pal nukemwa ke kas lun God a met luti mwomwo ke kas lun God, Ezra el akkalemye sie me srikasrak nu sesr. El akola insiyel pal nukemwa nu ke pre in lutlutkin Masap lun Jeova. Ke el lutlutkin ma inge, Ezra el loang yok nu ke ma Jeova el fwak. Ezra el orekmakin ma el lotela tari a el kaifweang in luti met puspus.
7:13. Jeova el lungse met kulansap su oru orekma in kulansap ke inse mulala.
7:27, 28; 8:21-23. Ezra el kaksakin Jeova, el siyuk kasru sel meet liki el orala sie fwufwasryesr su oasr me sensen ka, a el lungse in oru ma inge ke inse mulala fwinne moul lal oasr ke me sensen in sang kasru mwolena lun God. Ke ma inge el akkalemye sie me srikasrak mwomwo nu sesr.
9:2. Kut enenu in loang yok nu ke kas in kai inge in “payuk in Leum mukena.”—1 Korint 7:39.
9:14, 15. Asrouki koluk ku in kol nu ke oiya su wangin insemwomwo lun Jeova ka.
10:2-12, 44. Met nukemwa su payuk nu sin metsa in pa mutan kiyelos elos auli yok a suk in aksumwosye inkanek sito lalos. Oiyelos a orekma lalos pa me srikasrak mwomwo nu sesr.
Jeova el Karunganang a Paye ke Mwolela lal
Arulanu yok sripaiyen buk lal Ezra nu sesr! Ke pal fwal, Jeova el fwa akpayeye mwolela lal in aksukosokyela met kulansap lal liki sruo in an Babulon a folokonak alu paye in an Jerusalem. Ya oiya inge tia akkeye lulalfongi lasr nu sin Jeova a ke mwolela nukemwa lal?
Nunku ke me srikasrak puspus su oasr ke buk lun Ezra. Me srikasrak mwomwo ke lungse paye nu sin Jeova akkalemyeyuk sel Ezra a sin met lula lun Israel su folokla in sang me kasru in folokonak alu paye in an Jerusalem. Buk se inge el akkalemye yok pa ke lulalfongi lun metsa nukemwa a oiyen pusisel lun met puspus su auliyuk liki ma koluk lalos. Aok, kas lal Ezra su tuku ke ngun lun God sang me akpayeye mwomwo “tu kas lun God moul a ku.”—Hibru 4:12.
[Petsa ke sra 29]
Sairus
[Petsa ke sra 29]
Cyrus Cylinder inge el akkalemye masap ke met sruo nukemwa su folokla nu in an selos sifwana
[Credit Line]
Cylinder: Petsaeyukla ke kulang lun British Museum
[Petsa ke sra 30]
Ya kom etu la mea kasrel Ezra el an oana sie met luti mwomwo?