Insemwomwokin Orekma in Sifwilpa Nunku
KUTU met elos nunku mu orekma se inge in sifwilpa nunku el arlana upa. Elos nunku mu orekma se inge in sifwilpa nunku el oana sie orekma upa su enenu in loang mwo. Kain in met inge elos ku in pulakin pa mwekin ke elos mulkunla orekma in sifwilpa nunku, yokna ke elos ridi la ma inge arlana yok sripe. (Filippai 4:8) Tusruktu, in sifwilpa nunku ke ma paye nukewa kut lotela kel Jeova, ke oiya mwomwo nukewa lal, ke orekma sakuruk nukewa lal, ke masap nukewa lal, a ke akwuk mwolana lal ku in sie inkanek in me akinsemwomwo in orekmakin pal. Efu?
Jeova God pa Met Kol Fulatlana in kosrao a fwalu a el kafofo ke orekma in akpayeye akwuk yok lal. (Jon 5:17) Fwinne Jeova el kafofo, el loang akmwoye nu ke nunak lun kais sie met su alu nu sel. Met sim lun sam Devid el etu ma inge a ke kasru lun God el simusla: “O Jeova, kom suiyuwi a ete yu. Kom etu mutenguk a tu luk. Kom etu nunkauk omeet me.”—Sam 139:1, 2.
Kutu met elos nunku mu kas lun met sim lun sam inge el oana me akmunas. Saap el ku in fwak mu, ‘Fwinne God el oasr ke an “loes,” el etu a akilen nunak koluk nukewa su tuku ke nunak luk.’ Aok, mwo nu sesr in etu la el etu a akilen nunak koluk lasr. Ma inge ku in kasre kut in lain nunak koluk, a fwin oasr yurosr kain in nunak koluk inge, mwo kut in akkalemye ma inge nu sin God. A lela kut in lulalfongi la el fwa nunak munas nu sesr kut fwin lulalfongi ke me kise lun lango lun Jisus. (1 Jon 1:8, 9; 2:1, 2) Tusruktu, ke pal sepana inge, kut enenu in esam la Jeova el tuni met kulansap lal nukewa ke inkanek mwo. El loang akmwoye ke pal se su kut nunku kel a kut aksaokyel.
“Ya Jeova el loang na paye ke nunak mwomwo lun million puspus sin met su alu nu sel?” saap kom siyuk. Aok el oru ma inge. Jisus el akkalemye yok la Jeova el nunku yok kesr ke el fwak la Jeova el etu ke mwon sparro srisrik, a el fwak pa: “Komwos mwo [“saok,” New World Translation] liki sparro puspus.” (Luk 12:6, 7) Mwon sparro tia ku in nunku kel Jeova. Ke ma inge fwin God el nunku kelos, paye la el nunku yok kesr a el insemwomwo fwin kais sie sesr nunku kel! Aok, oana Devid, kut ku pa in prekin kas inge wi lulalfongi: “Lela kas in oalik a nunak insiuk in mwo ye mutom, O Jeova, eot ku luk a met Lango luk.”—Sam 19:14.
Sie pa me akpayeye la Jeova el nunku ke orekma lun met kulansap nukewa lal in sifwilpa kalweni ke nunak lalos ma paye nukewa akkalemyeyuk ke kas lun met palu Malakai. El palye ke len lasr inge: “Na elos su sangeng sin Jeova kaskas nu sin sie sin sie; a Jeova el lipsre, a long. A sie buk in esmakin simusla ye mutal, ke elos su sangeng sin Jeova, a su nunku ke el.” (Malakai 3:16) Kut fwin akesmakinye kut la Jeova el “lipsre” ke pal su kut nunku kel ku in oru kut in engunkin orekma lasr in sifwilpa nunku. Ke ma inge lela kut in insese ke kas lun met sim lun sam su simusla ouinge: “Nga fwa nunkauk pa ke orekma lom nu kemwa, a nunku ke ma kom orala.”—Sam 77:12.