Sie Masap Ke Lungse Lun Insie
“A Nga fwa filiye masap Luk insielos, a Nga fwa simusla insielos.”—JEREMAIA 31:33.
1, 2. (a) Mea kut fwa aketeye ingena? (b) Fuka Jeova el akkalemyel sifwana fwin Eol Sainai?
KE ME lutlut luo su kut aketeye tari, kut lotela la ke pal se Moses el oatui liki Eol Sainai, mutal saromromelik su akkalemye mwolana lun Jeova. Kut aketeye pa ke veil se su Moses el nukom. Inge lela kut in aketeye ke sie ma su oasr kalme ka nu sin met Kristian ke pal inge.
2 Ke pal se Moses el muta fwin eol, el eis masap sin Jeova. Met Israel su tukeni nu sie ye mutun Eol Sainai, elos liye me akkalemye lun God sifwana. “Pulal a sarom, a sie pukunyeng matoltol on fwin eolu, a pusren ugug arulanu yok; a met e nu kemwa in nien aktuktuk elos rarrar. . . . A eol Sainai nufon arulanu fwofwos, meyen Jeova el oatume nu fwe in e; a kulas ka fwosryuk oanu kulasr in fwunyu, a eol sokoa nufon arulanu kusrusrus.”—Exodus 19:16-18.
3. Ke inkanek fuka Jeova el sang Masap Sengoul nu sin met Israel, a mea mutanfwal san lotela?
3 Jeova el kaskas nu sin metu ke inkanek lun lipufon, el sang nu selos masap su fwa eteyuk oana Masap Sengoul. (Exodus 20:1-17) Ke ma inge, wangin alolo la masap nukemwa inge tuku sin God Fulatlanu me. Jeova el simusla masap inge nu ke eot tupasrpasr luo—eot tupasrpasr inge Moses el sisla a fokwelik ke el liye met Israel elos orek alu nu sin calf gold soko a. Jeova el sifwil simusla masap sengoul nu ke eot. Ke pal inge, Moses el oatula us eot luo, mutal saromromelik. In pal sa, met nukemwa etu la masap nukemwa inge oasr kalme yok sripe ka.—Exodus 32:15-19; 34:1, 4, 29, 30.
4. Efu ku Masap sengoul el arulanu yok sripe?
4 Eot tupasrpasr luo su Masap Sengoul simusyukla ka filiyuki lun tuptup in mwuleang yen Mutal na Mutal ke loom nuknuk a tok in an Mutal na mutal ke temple. Masap nukemwa su simusyukla ke eot tupasrpasr luo el akkalemye akwuk puspus su arulanu yok sripe ke mwuleang lun Masap lal Moses a orala pelung mwomwo nu ke inkanek su God el fwa kol mutanfwal sa. Masap nukemwa inge sang me akpayeye ka la Jeova el karunganang mutanfwal se, sie u lun met su el sulela.
5. Ke inkanek puspus fuka masap lun God nu sin met Israel akkalemye lungse lal?
5 Masap inge akkalemye ma puspus kel Jeova, yokna ke lungse lal nu sin met nukemwa lal. Sie me sang mwomwo pa inge nu selos su akos Masap inge! Sie scholar el simusla: “Masap Sengoul lun God el arulanu mwo liki kutena akwuk ke oiya ku masap su orekla tari nu sin met ke kutena pal.” Ke Masap nukemwa lal Moses, Jeova el fwak: “Komwos fwin akos pusrek inge, a liaung mwuleang Luk; na komwos fwa ma saok Luk sin mutanfwal nu kemwa; tu fwalu nufon ma Luk. A komwos fwa sie togusrai lun met tol nu Sik, a sie mutanfwal mutal.”—Exodus 19:5, 6.
Sie Masap Simusyukla Ke Insie
6. Masap fuka el saok liki masap su simusyukla ke eot?
6 Paye, masap inge lun God arulanu yok sripe. Tusruktu, ya kom etu la oasr yurin met Kristian akmusrala sie ma su saok liki masap su simusyukla ke eot? Jeova el fwakak ke kas palu la el fwa orala sie mwuleang sasu su tia oana sie nu ke mwuleang lun masap su orekla tari nu sin mutanfwal Israel. “Nga fwa filiye masap Luk insielos, a Nga fwa simusla insielos.” (Jeremaia 31:31-34) Jisus, sie met Iumwe nu ke mwuleang sasu, el tia sang nu sin met tuma lutlut puspus lal sie ma simusla ke masap. El filiye masap lun Jeova nu ke nunak a insien met tuma lutlut lal ke ma el fwak a oru.
7. Nu sin su “masap lun Kraist” itukyang meet nu se, a su sruokye ma inge tok?
7 Masap inge el pangpang “masap lun Kraist.” Masap inge itukyang meet nu sin sie mutanfwal in ngun, su pangpang “Israel lun God” a tia nu sin met Israel in ikwe, elos su tulik natul Jekob. (Galetia 6:2, 16; Rom 2:28, 29) Israel lun God el orekla sin met Kristian nukemwa su akmusrala in ngun. Tok kutu, oasr “sie u lulap” welulos su tuku ke mutanfwal nukemwa su suk pa in alu nu sin Jeova. (Fwakyuk 7:9, 10; Zekaraia 8:23) In oana “u sefwanna” ye koko lun “met sropu sefwanna,” u luo inge sruokye a orekmakin “masap lun Kraist,” a lela ma inge in kasrelos ke ma nukemwa elos oru.—Jon 10:16.
8. Mea ma tia oana sie inmasrlon Masap lal Moses a masap lun Kraist?
8 Tia oana sie nu sin met Israel paye, su enenu in akos ku orekmakin masap lal Moses meyen elos isusla nu ke mutanfwal Israel, met Kristian elos oasr ye masap lun Kraist meyen elos sulela ma inge, sruf a yen in isusla lun sie met tia yok sripe. Elos lotela ma puspus kel Jeova a inkanek puspus lal a elos lungse in oru ma lungse lal. Ke sripen masap lun God “simusyukla insielos” paenang met Kristian akmusrala elos tia akos God mukena meyen el ku in sang kai nu selos su seakos; ku elos aksol mukena ke sripen pa inge kunokon lalos. Oiyen akosten lalos el fwal nu ke ma se su arulanu yok sripe a arulanu ku, a nu selos su wi ke u lun sip ngie elos akkalemye pa akosten lalos meyen masap lun God oasr insielos.
Masap Puspus Fwal nu ke Lungse
9. Fuka Jisus el akkalemye la lungse pa ma se ma yok sripe ke masap lun Jeova?
9 Ma yok sripe emeet ke masap nukemwa lun Jeova a kas in kasru nukemwa lal ku in akkalemyeyuk ke kas sefwanna: lungse. Ma se inge yok sripe pal nukemwa nu ke alu paye. Ke pal se siyukyak sel la piye Masap se yok emeet ke ma sap nukemwa, Jisus el topuk: “Kom fwa lungse Jeova God Lom ke insiom kemwa, a ke ngunum kemwa.” Ma se akluo pa: “Kom fwa lungse met tulan lom oanu kom sifwana.” El tafwela in fwak: “Masap nu kemwa a ma palu sripsripyuk fwin masap luo inge.” (Mattu 22:35-40) Jisus el akkalemye la, tia Masap Sengoul mukena pa oasr ka, a ma Simusla ke Baibel matu nukemwa sapkinyuk yok ke lungse.
10. Kut etu fuka la lungse el arulanu yok sripe nu ke masap lun Kraist?
10 Ya lungse God a nu sin met tulan el oana sie pelung nu ke masap su oasr ke insien met Kristian? Aok! Wekunang nu ke masap lun Kraist pa lungse paye ke God a nu ke sie masap sasu—su met Kristian elos enenu in akkalemye lungse su oasr oiyen lafwekunal sifwana nu sin sie sin sie. Elos enenu in lungse sie sin sie, oana ke inkanek su Jisus el lungse met tuma lutlut nukemwa lal, a el lungse in sang moul lal ke met kawuk lal. El luti met tuma lutlut puspus lal in lungse God a in lungse sie sin sie, oana ke inkanek su el akkalemye lungse nu selos ka. Lungse yok emeet su elos akkalemye nu sin sie sin sie pa akul mwo nu sin met Kristian paye nukemwa in oru in ku in akilenyuk. (Jon 13:34, 35; 15:12, 3) Jisus el sapkin nu selos in lungse pa met lokwalok lalos.—Mattu 5:44.
11. Fuka Jisus el akkalemye lungse nu sin God a nu sin metu?
11 Jisus el oakiye me srikasrak mwomwo nu ke akkalemyeyen lungse. In oana sie ma orekla in ngun ke ku sakuruk in kosrao, el insemwomwo in eis pal mwomwo lal in oru ma lungse lun Papa tumal fwin fwalu. Sayen orekma lal in kisekin moul lal tu met puspus elos fwa ku in eis moul ma patpat, el akkalemye pa nu sin metu ke inkanek fuka elos ku in moulkin moul. El inse pusisel, kulang, a nunku ke met puspus, kasrelos su aktoasryeyuk a akasoryeyuk. El ouyepa akkalemye “kas lun moul ma patpat,” sang kasru nu sin met puspus pal nukemwa in etu Jeova.—Jon 6:68.
12. Efu ku lungse ke God a ke met tulan tukeni pal nukemwa?
12 Ke payeiya, lungse nu sin God a nu sin met tulan enenu in tukeni pal nukemwa. Met sap Jon el fwak: “Lungse ma sin God me . . . Kutena met fwin fwak: ‘Nga lungse God,’ a srunga met lel, el sie met kikiap. Tu el su tia lungse met lel, su el liye, el koflanu lungse God su el tia liye.” (1 Jon 4:7, 20) Jeova el pa sropon lungse a me srikasrak mwomwo nu ke lungse. Ma nukemwa el oru oasr orekma lun lungse lal ka. Kut ku in akkalemye lungse nu sin met puspus meyen kut orekla ke lumal. (Genesis 1:27) Ke inkanek in akkalemye lungse nu sin met tulan lasr, kut akkalemye lungse lasr nu sin God.
In Akkalemye Lungse el Kalmekin in Akos
13. Kut fwin akkalemye lungse nu sin God, mea kut enenu in oru meet?
13 Fuka kut ku in lungse God, su kut koflana liye? Ke inkanek se meet su arulanu yok sripe pa in lutlut kel. Kut tia ku in lungse ku lulalfongi metsa. Ke ma inge, Kas lun God el akkeye kut in lutlut ke God ke inkanek in rid Baibel, ke inkanek in pre, a in asrouki pal nukemwa nu selos su etel tari a lungse el. (Sam 1:1, 2; Filippai 4:6; Hibru 10:25) Buk akosr su pangpang Gospel el arulanu yok sripe, ke sripen ma inge akkalemye ke oiya mwomwo lun Jeova oana ma akkalemyeyuk ke moul a orekma in luti lun Jisus Kraist. Lungse lasr in akos God a in etawi oiya mwomwo lal yokyokelik ke kut lotela ma puspus kel a sang kulo nu ke lungse su el akkalemye nu sesr. Aok, lungse God el enenu pa in oasr oiyen akosten ka.
14. Efu kut ku in fwak la masap lun God el tia me aktoasr?
14 Kut fwin lungse paye met se met se, kalme pa kut etu ma elos lungse a ma elos srunga, a kut oru ma puspus fwal nu ke ma lungse lalos. Kut srunga in aktoasryelos su kut lungse. Met sap Jon el simusla: “Tu pa inge lungse lun God, tu kut in liaung masap Lal; a masap Lal tia toasr.” (1 Jon 5:3) Masap lun God el tia me aktoasr, a tia arulana pus. Lungse el kol inkanek lasr. Kut tia enenu in memorize masap puspus in sang kasru ke ma nukemwa kut oru; lungse lasr nu sin God el kasru ku kol kut. Kut fwin lungse God, kut arulanu insemwomwo in oru ma lungse lal. Ke ma inge kut eis me insemwomwo lun God, a kut sifwana engankin ma lane puspus, masap lal akinsemwomwoye kut pal nukemwa.—Isaia 48:17.
15. Mea fwa mokle kut in etawi Jeova? Aketeye.
15 Lungse ke God akkeye kut in etawi oiya mwomwo puspus lal. Kut fwin lungse sie met, kut kaksakin oiya mwomwo lal a kut suk inkanek in etawel. Nunku ke oiyen futoto lun Jeova a Jisus. Elos tukeni muta in kosrao saap ke lusen billion puspus yea. Elos orekmakin lungse paye nu sin sie sin sie. Jisus el etawi inkanek sumwosmwos lun Papa tumal in kosrao paenang el ku in fwak nu sin met tuma lutlut puspus lal: “El su nuna liye Yu el nu liyel Papa.” (Jon 14:9) Ke kut akyokye etauk lasr a kulo lasr nu sin Jeova a nu sin Mwen natul, kut akkeyeyuk in etawelos. Lungse lasr nu sin Jeova, wekunang kasru su tuku ke ngun mutal lal, ku in akkeye kut in “sisla tari met matu wi orekma lal, a nukomkutyang ke met sasu.”—Kolosse 3:9, 10; Galetia 5:22, 23.
Lungse el Akkalemyeyuk
16. Fuka lungse lasr nu sin God a nu sin met tulan lasr akkalemyeyuk ke orekma lasr in sulkakin a in luti peng mwo?
16 Oana met Kristian, kut lela lungse lasr nu sin God a met tulan lasr in akkeye kut in wi pal nukemwa ke orekma in luti peng mwo lun Togusrai a ke orekma in oru met tuma lutlut. In oru ma inge, kut akinsemwomwoye Jeova God, “su lungse tu met e nu kemwa in moliyukla, a tuku in etu ma paye.” (1 Timote 2:3, 4) Ke ma inge kut ku in pulakin insemwomwo in kasru met puspus tu masap lun Kraist fwa simusyukla insielos. A kut engankin in liye ke met puspus elos ekulla oiyen moul koluk lalos a etawi oiya mwomwo nukemwa lun Jeova. (2 Korint 3:18) Paye la, orekma in kasru met puspus in etu God pa me sang saok mwolana emeet su kut ku in sang nu selos. Elos su eis oiyen kawuk lun Jeova elos ku in engankin ma inge nu tok ma patpat.
17. Efu ku sie inkanek lalmetmet in akkeye ku akyokye lungse nu sin God a nu sin met tulan liki na in akkeye lungse nu ke ma puspus lun fwalu?
17 Kut muta ke sie fwal su ma lun fwalu arulanu aksaokyeyuk, a lungse lun met puspus oasr ka. Tusruktu, ma puspus lun fwalu fwa tia on ma patpat. Ma saok inge ku in pusrapasrla sin met puspus a ku pa in kulawi. (Mattu 6:19) Baibel el sang kas in sensen nu sesr: “A fwalu wanginla, a lung kolukla, a el su oru ma lungse lun God fwa muta ma patpat.” (1 Jon 2:16, 17) Aok, Jeova el fwa muta ma patpat, a elos nukemwa pa su lungse el a kulansapul. Ke ma inge, ya tia inkanek sumwos a lalmetmet mwo se kut fwin akkeye lungse lasr nu sin God a nu sin met puspus liki na in suk ma puspus lun fwalu, su ku in on na ke kitin pal?
18. Fuka sie missionary el akkalemye lungse su oasr oiyen sifwana lafwekin lal?
18 Elos su akkalemye lungse elos sang kaksak nu sin Jeova. Nunku kel Sonia, sie missionary in an Senegal. El lutlut Baibel yurin mutan se su pangpang Heidi, su eis mas inge HIV sin mokul tumal su tia lulalfongi. Tokin mokul tumal el mise, Heidi el eis baptais lal, tusruktu tia pat el munasla, a el kaul ke loom ono ke sripen mas inge pangpang AIDS. Sonia el fwak: “Met orekma nukemwa ke loom ono elos oru ku lalos nukemwa in kasru met mas nukemwa, tusruktu elos arulanu supusla. Volunteer puspus ke congregation oasr siyukyelos in sang kasru lalos in karungin ma enenu lal Heidi ke loom ono. Ke fong akluo su Heidi el oasr ke loom ono, Nga muta ke sie kiaka apkurun nu ke bed kiel a nga karunganul nu ke el mise. Taktu se su orekma kel el fwak: ‘Ma upa se meet lasru pa met puspus elos som liki met mas se fwin elos eteak mu oasr AIDS lun met mas inge fwinne ke sou fototo lun met mas se elos som pa. Efu ku kom, su tia sou nu sin met mas se inge, kom metsa, a siena sruf lom, a kom mensiskin in masek ke mas lun met se inge?’ Nga aketeye la pulakin luk pa, Heidi el ma wiyuk na paye, kut fototo oana kut tuku ke papa a nine sefwanna. Ke sripen fototo luk nu sel Heidi su oana ma wiyuk na paye, Nga insemwomwo in karunganul.” Ne oinge, Sonia el tia eis mas ke kaifweang lal in karunganul Heidi.
19. Ke sripen masap lun God on insiesr, kut orekmakin pal mwomwo nukemwa lasr nu ke mea?
19 Me srikasrak puspus ke lungse su oasr oiyen sifwana lafwekin el ku in koneyukyak inmasrlon met kulansap puspus lun Jeova. Wangin masap su simusyukla akkalemye met kulansap lun Jeova ke pal inge. A, kut liye me akpayeyen ma simula ke Hibru 8:10: “‘Tu pa inge mwuleang Nga fwa oru yurin loom sin Israel tokin len ingo,’ Jeova el fwak. ‘Nga fwa filiye masap luk ke nunkalos, a Nga fwa simusla pa nu ke insielos. A Nga fwa God lalos, a elos fwa met srak.’” Lela kut in aksaokye pal nukemwa masap ke lungse su Jeova el simusla ke insiesr, orekmakin pal mwomwo nukemwa in akkalemye lungse.
20. Efu ku masap lun Kraist sie ma su arulanu saok?
20 Sie me insemwomwo yok in kulansapu Jeova wi met lili wiyesr fwin fwalu nu fon su akkalemye pa lungse! Elos su masap lun Kraist oasr insielos elos engankin sie ma su arulanu saok su fwalu tia akkalemye ke lungse. Elos tia engankin mukena lungse lun Jeova a elos enganak pa ke me kapur fukoko ke lungse lun met lili nukemwa. “Liye, fuka mwo a me insemwomwo ke met lili elos tukeni muta inse sefwanna!” Fwinne Met Lo lun Jeova elos muta ke mutanfwal puspus, kaskaskin kas puspus su tia oana sie, a tuku ke fasin puspus, elos engankin oiya sefwanna ke alu su wangin ma oana. Tukeni ke oiya sefwanna inge orala me insemwomwo lun Jeova. Met sim lun sam el simusla: “Tu ingo Jeova El sapkin me insemwomwo, aok, moul ma patpat.”—Sam 133:1-3.
Ya Kom Ku In Topuk
• Fuka yok sripayen Masap Sengoul?
• Mea se inge masap su simusyukla ke insie?
• Lungse el orekma fuka nu ke “masap lun Kraist”?
• Ke inkanek puspus fuka kut ku in akkalemye lungse lasr nu sin God a nu sin met tulan lasr?
[Petsa ke sra 15]
Oasr yurin met Israel masap su simusyukla ke eot tupasrpasr luo
[Petsa ke sra 17]
Sonia a sie tulik mutan su muta in an Senegal ke toeni lulap lun district in yea 2004