Me Luti Paye Nukemwa Lun Alu Kom Ku in Koneak Oya?

SIE mokul in an Tibet el oru in for sie wheel ke el pre, oasr soko drum su oasr pre puspus ka su simusyukla ke paper pukanten. El lulalfongi mu pre lal kalweniyuk ke kais sie for lun wheel inge. Ke sie loom lulap fwin an India, met in loomu elos orekmakin sie infwokil srisrik in oru puja​—ku sie orekma ke alu lalos in kisekin me nim, mongo, a pre nu sin god mokul a god mutan puspus lalos.Tausen puspus ke mile liki an se inge, in an Italy sie mutan su oasr ke sie loom alu el sikukmutunti ye mutun ma srulela lal Mary, nine kiyen Jisus, a el pre ke el sruokye sie rosary ku me mwalmwal su oasr futi pukanten ka.

Saap kom sifwana liye me akkoluk ku me akkeye lun alu nu ke moul lun met puspus. Buk inge pangpang The World’s Religions​—Understanding the Living Faiths el fwak: “Alu . . . el oana ma se su arulanu yok sripe nu sin met puspus fwin fwalu in pal meeta nu ke pal inge.” Ke buk inge su pangpang God—A Brief History, su simusyukla sel John Bowker el akkalemye: “Wangin kutena u lun met ke kutena pal su tia oru God in oana ipen moul lalos, oana sie su ku in kasrelos a oru kutena ma nu selos. Oiya inge arulanu paye fwinne nu sin u puspus su arulanu insemwomwo ke akwuk fulat lun fwalu.”

Aok, alu el kufwusla moul lun million puspus sin met. Ya ma inge tia sie me akpayeye fukoko su akkalemye la oasr ma enenu lun met nu ke ma lun ngun a in insemwomwokin? Ke buk natul inge The Undiscovered Self, sie taktu pengpeng ke nunak ku psychologist su pangpang Carl G. Jung el akkalemye ke me enenu lun met in alu nu sin sie met in ngun kulanu a el fwak mu “oiya inge liyeyuk ke me sramsram lun metu ke pal nukemwa.”

Tusruktu, met puspus elos fwak mu wangin lulalfongi lalos nu sin God a wangin insemwomwo lalos ke alu nukemwa. Kutu met su alolo ku fwak mu wangin God ke sripen alu se su elos wi tia na kasrelos in eis ku in akinsemwomwokin me enenu lalos in ngun. Oasr kalme puspus su akkalemyeyuk ke Alu oana “lungse nu ke kutu akwuk lun kas mwomwo; oiya paye ku oaru; kunokon mwomwo ka; nunak a pulakin yok nu ka.” Ke kalme inge ke alu, apkurun met nukemwa wekunang met puspus su fwak mu elos atheist ku met ma fwak mu wangin God elos akkalemye la elos orekmakin na akwuk lun kas mwomwo, oana in pa inge alu lalos.

Ke lusen tausen yea puspus ke me sramsram lun metu, orekma puspus lun metu in akyokye ma enenu lalos in ngun paenang oasr kain in oiya puspus orek ke alu. Fwokin ma inge pa nunak puspus su tia oana sie ke alu fwin fwalu. Ke sie me pupulyuk, apkurun alu nukemwa in akkeye lulalfongi lalos nu sin sie met in ngun kulanu, nunak lalos tia oana sie nu ke met in ngun se inge la su el an a fuka eteyel. Lulalfongi puspus akkalemye pa ke yok sripaiyen molela ku in sukosokla. Tusruktu me luti lalos tia oana sie nu ke akwuk lun molela a la fuka in eis ma inge. Ke sripen oasr nunak ku lulalfongi puspus inge, paenang oasr kusensiyuk, la fuka kut ku in akilen me luti paye nukemwa lun alu su akinsemwomwoye God?