Orekma El Sie Me Akinsemwomwo ku Sie Me Akasor?
“Wangin kutena ma mwo nu sin sie met liki lan . . . engun ke ma mwo in orekma lal.”—Ekklisiastis 2:24.
“TOTOLA ke saflaiyen sie len in orekma.” Ke sie survey su orek ke kutupal somla, pa inge ma sie met inmasrlon met tolu el akkalemye ke oiya se su elos pulakin. Tia sie me lut pa inge nu sin met su muta ke an su elos pulakin me keok we; meyen elos orekma ke lusen pal loeloes a wisla kutupa orekma lalos oru ke loom selos—sayen met kol lalos ke orekma elos tia wi muta akkalemye kas in kulo lalos.
Ke pal se mass production el mutamwauk in orek met orekma puspus elos pulakin mu elos oana met su wangin eneneyen me kasru lalos in sang kasru sie business. Pal nu kemwa me insemwomwo lalos a ku lalos in oru ma pupus wanginla. Paye la, oiya inge akkolukye nunak lun met nu ke orekma. Nunak in akkeye sie met in insemwomwokin in oru orekma lal sifwana fusrasr in munasla ke orekma. Engankin in oru orekma mwomwo ku pa in munasla. Kain in ma sikyuk inge ku in oru sie met in srungela orekma lal sifwana, a saap el ku in oru me lain nu ke orekma lal.
Tuni Oiya Lasr
Fwin oinge la, kut tia ku in ekulla oiya puspus su sikyak ke moul lasr pal nukemwa. Ya kom tia insese ka , la kut ku in aksumwosye ella lasr ku oiyesr? Kom fwin pula mu kom akkolukyeyuk ke kutu oiya ke orekma, mwo kom in esam mea nunak lun God a masap lal su kupasr nu ke sifwe inge. (Ekklisiastis 5:18) Met puspus elos koneak la in nunku ke ma inge oasr me insemwomwo a pulakin mwo ke orekma lalos.
God el Met Orekma Mwo Liki Met Orekma Nukemwa. God el sie met orekma. Saap kut tia nunku kel oana sie met orekma, tusruktu pa inge oiyel ke pal se meet el akkalemyel sifwana in Baibel. Me sramsram in Genesis el mutamwauk ke orekma lun Jeova in orala kosrao a fwalu. (Genesis 1:1) Nunku ke kain in orekma puspus su God el orala ke pal se el mutamwauk in orala ma nukemwa, el orekma oana met su orala design, met orala akwuk, engineer, artist, met su tuni kofwen orekma, project developer, met orekma ke ono, met su oasr etauk yok ke ma moul nukemwa, met su oasr etauk yok ke kosro nukemwa, met su oru program, met su etu kas puspus, pa inge kutu orekma lal.—Soakas 8:12, 22-31.
Fuka mwoiyen orekma lun God? Ma simusla lun Baibel el fwak la orekma inge el “mwo,” “arulanu mwo.” (Genesis 1:4, 31) Paye, ma orekla el “fwakak ku akkalemye mwolena lun God,” a kut enenu pa in kaksakunal!—Sam 19:1; 148:1.
Tusruktu, orekma lun God el tia tui ke el orala ma puspus in kosrao a fwin fwalu a ke siyanyen se meet. Jisus Kraist, mwen nutin Jeova el fwak: “Papa Tumuk el orekma, aok nu inge.” (Jon 5:17) Aok, Jeova el tafwela in oru orekma ke el sang ma puspus nu sin ma orekla lal, sang ma enenu lun ma orekla lal, a molela met kulansap oaru puspus lal. (Niemaia 9:6; Sam 36:6; 145:15, 16) Oayepa el orekmakin met lal, oana “met orekma puspus yurin God,” in sang kasru in oru kutu orekma.—1 Korint 3:9.
Orekma el sie me insemwomwo. Ya Baibel el fwak mu orekma el sie me selnga? Genesis 3:17-19 el akkalemye la God el sang kai upa nu sel Edam a If ke sripen orekma in lain lalos su sang orekma in aktoasryelos. Ke pal se el sang kas in selngawi nu sin siyanyen se meet inge, God el fwak nu sel Edam: “Ke fiyo lun mutum kom fwa mongo bred, nu ke pal kom folokla nu in foko.” Ya kas inge kas in selngawi nu ke orekma?
Mo. A ke sripen seoaru lal Edam a If, orekma in akyokye Paredais oana imae Eden fwa tia akpayeyuk in pal ingo a in an we. Foku selngawiyuki sin God. Fiyo a orekma upa eneneyuk nu sin metu in eis ku suk ma enenu lun moul.—Rom 8:20, 21.
Baibel el akkalemye la orekma el sie me insemwomwo su ku in aksaokyeyuk. Oana ma akkalemyeyuk tari lung, God el arulanu alken ke orekma, a tia oana sie me selnga. Ke sripen el orala metu ke lumal, Jeova el sang nu selos oiya mwo a ku in kuranganang ma orekla lal fwin fwalu. (Genesis 1:26, 28; 2:15) Orekma ku kunokon inge etukyang nu selos meet liki God el akkalemye kas su simusyukla in Genesis 3:19. Fwin orekma el sie me selnga ku ma koluk, Jeova el fwa tia akkeye metu in wi oru orekma inge. Oasr orekma yok su Noa a sou lal enenu in oru meet liki a tokin Sronot. Tokin Jisus el tuku nu fwalu, met tuma lutlut puspus lal akkeyeyuk pa in orekma.—1Tessalonika 4:11.
Fwinne oinge, kut nukemwa etu la orekma el ku in sie me aktoasr ke pal inge. Pulakinyen ma upa, me sensen puspus, wangin me insemwomwo ka, su orala me asor, akutun, orekma kutasrik, a oiya koluk puspus pa kutu sropon “kokol a otunmu” su kupasr nu ka. Tusruktu orekma el tia sie me selnga. In Ekklisiastis 3:13, Baibel el akkalemye la orekma a fwako lun ma inge el oana sie me sang su tuku sin God.—Liye pok inge “Muteng Ke Me Pulakin Upa su Kupasr nu ke Orekma.”
Kom ku in kaksakin God ke orekma lom. Oiya mwo a utuftuf ke niyen orekma kaksakinyuk pal nukemwa. Oiya mwo el sie key nu ke sie ma paye in Baibel ke orekma. God el sifwana oru orekma in fwakak ke oiyen utuftuf lal. El use nu sesr lalmetmet a ku, a el lungse kut in orekmakin oiyen orekma utuftuf lasr ke sie niyen sun mwomwo. Ke sie me pupulyuk, ke lusen pal in oru orekma in musai loom alu ku tabernacle in an Israel in pal meeta, Jeova el sang lalmetmet, kalem, a etauk nu sel Bezalel a Oholiab, in kasrelos oru kunokon upa a yok sripe lalos. (Exodus 31:1-11) Ma inge akkalemye la oasr insemwomwo yok lun God ke oiya mwo nu ke orekma, design, a kutupa akwuk ke orekma lalos.
Ma inge kasre kut in oasr kalem yok lasr ke ku a oiyen met se met se nu ke orekma. Nunak inge kasre kut in liye ku a oiyen kais sie met ke orekma oana me sang sin God, su tia enenu in nunkeyuk mu ma inge tia ma yok sripe. Paenang, Met Kristian nukemwa elos enenu in kaifweyuk in oru orekma lalos oana God el nununku ke orekma lalos: “Kutena ma komwos oru, komwos in oru ke insiomwos, oana nu sin Jeova, a tia nu sin met.” (Kolosse 3:23) Met kulansap nukemwa lun God sapkinyuk in nunku yok a alken in oru orekma, ke ma inge met puspus ke niyen orekma a met puspus saye elos fwa insemwomwo in long ke peng mwo su sulkakinyuk sin met Kristian.—Liye pok inge “Orekmakin Akwuk lun Baibel ke Niyen Orekma.”
In nunku ke ma inge la orekma lasr el sang kaksak nu sin God, arulanu mwo kut in siyuk sesr sifwana la kain in oiya a kaifweang fuka kut akkalemye ke kut oru orekma lasr? Ya God el fwa insemwomwo ke orekma lasr? Ya kut insemwomwo na paye ke inkanek su kut akpaye ke orekma su ituku nu sesr? Fwin tia, oasr an in akmwoye oiya inge.—Soakas 10:4; 22:29
Orekmakin pal su oana sie ke orekma a ke ma lun ngun. Fwinne orekma ke inkanek in moniyuk yok el kaksakinyuk, tusruktu oasr siepa me enenu yok su koneyukyak nu ke me insemwomwo lun orekma a ke moul. Me enenu se inge pa in nunku yok ke futoto lasr nu sin God. Togusra Solomon, su alken ke orekma a engankin tari me kasrup puspus a me insemwomwo su moul el ku in orala, el fwak oinge: “Sangeng sin God a liaung masap lal. Tu pa inge orekma mwo kemwa lun met.”—Ekklisiastis 12:13.
Arulanu kalem la, kut enenu in orekmakin ku nunku ke ma lungse lun God ke ma nukemwa kut oru. Ya kut orekma fwal nu ke ma lungse lun God, ku saap kut orekma lain ma inge? Ya kut kaifweang in akinsemwomwoye God, ku kut srike mukena in akinsemwomwoye kut sifwana? Kut fwin tia oru ma lungse lun God, ke saflaiye kut fwa pulakin ngal ke sripen wanginla fwinsrak, asor, a me insemwomwo.
Steven Berglass el fwak mu met puspus su oasr orekma mwo lalos pangpang executives elos totola tari ‘elos suk orekma su elos lungse na paye in oru a orala ma inge oana ipen moul lalos.’ Wanginla orekma mwomwo sayen orekma in kulansap nu sin God su ku in use nu sesr me insemwomwo a ku in oru orekma mwo. In oru orekma su akinsemwomwoye God fwa tia ku in eisla liki kut me insemwomwo. Nu sin Jisus, orekma su itukyang nu sel sin Jeova el sie me akkeye, a me akinsemwomwoye oana me mongo. (Jon 4:34; 5:36) Esam pa la God, su Met Orekma Mwo Emeet, el suli kut in ekla “met orekma lal.”—1 Korint 3:9.
Orekma in alu nu sin God a in kapkapek ke ma lun ngun oru kut in fwal nu ke orekma a kunokon mwomwo. Ke sripen oasr ma upa puspus, ke alein, a ma enenu yok ke niyen orekma, lalalfongi paye a oiyen ngun lasr use nu sesr ku su eneneyuk nu ke kaifweang lasr in ekla met orekma mwomwo. Ke luma saye, ma sikyuk puspus ke moul fwin fwalu su tia sangeng sin God fwa ku in kasre kut nu ke oiya puspus su kut enenu nu ke kapkapek lun lalalfongi.—1 Korint 16:13, 14.
Ke Pal Se Orekma fwa Ekla sie Me Insemwomwo
Met nukemwa su kaifweang na paye in kulansap nu sin God ke pal inge elos ku in tupan nu ke pal fwasru ke pal se el fwa folokonak Paredais a fwalu nu fon fwa sessesla ke orekma mwomwo. Isaia sie met palu lun Jeova, el palye tari ke ma puspus lun moul ke pal inge: “A elos fwa musai loomu, a muta we; elos fwa eoki nien grepu, a mongo fwako ka. Elos fwa tia musai, a siepa muta we; elos fwa tia eoki, a siepa kangla. . . . Met sulela luk fwa engun pat ke orekma lun paulos.”—Isaia 65:21-23.
Ke pal se inge orekma el fwa sie me insemwomwo! Ke inkanek in lutlut ke ma lungse lun God nu sum a in orekma fwal nu ka, kom fwa ku in sie sin met akinsemwomwoyeyuk lun Jeova a ‘engun ke ma mwo in orekma lom nu kemwa’ pal nukemwa—Ekklisiastis 3:13.
[Picture on page 4, 5]
Met puspus elos pulakin mu arulanu srikla me kasru elos ku in sang nu ke sie business lulap
[Credit Line]
Japan Information Center, Consulate General of Japan in NY