Met Africa Se Su Inse Pusisel El Lungse Kas Lun God M
ET muteta in an Africa elos lut pal nu kemwa in koneak la arulanu fusrasr in mutamwauk sramsram lalos ke me sramsram puspus lun Baibel nu sin met fwin an we. Kusensiyuk oana, “Mea se inge Togusrai lun God?” ku “Ya oasr me top mwomwo nu ke ma upa oana sral, mas, meun, a orekma sulallel?” srike in akfototoye met in long. Met puspus elos insemwomwo in lela met saye in akkalemye nu selos me top ma tuku ke Baibel. Ma inge pal nu kemwa kol nu ke sie lutlut lun Baibel pal nu kemwa. A ke met lutlut elos oru kapkapek in ngun, elos ekla met Kristian su baptaisla.
Sie sin met Africa su mutamwauk emeet in sang me top ke inkanek inge akkalemyeyuk in Baibel in Orekma 8:26-40. El sie mokul Itiopia su fwafwasryesr nu Jerusalem in alu nu sin God paye, Jeova.
Oana akkalemyeyuk ke petsa tenu, mokul Itiopia el sifwil folokla nu in loomu wi sariot lal, ridi ke ma simusla. Oasr sie met el tuku nu yurol a siyuk: “Ya kom etu na paye ma kom rid?” Ke inse pusisel, met Itiopia el akilen enenu lal ke kasru a siyuk nu sin met sa, Filip met luti su met Kristian, in sroang nu ke sariot. El siyuk sel Filip in aketeye kalmeyen Ma Simusla su el tufwanu ridi. Filip el aketeye la kas inge kas palu su akpayeyuk ke mise lun Messaia, Jisus Kraist, ke yea ekasr somla. Filip el fwak pa ma puspus saye ke “peng mwo kel Jisus,” wekunang pa ke sifwil moulyuk lun Jisus.
Ke el long ma mwolanu a paye inge, met Itiopia sa el lungse in ekla met tuma lutlut lun Jisus a siyuk: “Mea ikolyuwi in baptaisla?” Tokin baptais lal, mokul Africa se inge su inse pusisel el engun a som ke inkanek lal folokla nu in loom sel, a Baibel el tia sramsramkin kel tok.
Misenge, Met Lo lun Jeova elos kasru million puspus sin met fwin fwalu nufon in lutlutkin “peng mwo” sepana inge. Apkuran nu ke onkosr million akwuk ke lutlut lun Baibel orek ke wangin molo in pal inge.