“Komwos Moliyukla Tari Ke Sie Me Mol”
“Tu komwos moliyukla tari ke sie me mol. Ke ma inge, komwos akmwoye God in monumwos.”—1 KORINT 6:20.
1, 2. (a) In fwal nu ke Masap lal Moses, oiya fuka enenu in akkalemyeyuk nu sin met kulansap? (b) Sulela fuka ku in orek nu sin sie met kulansap su lungse leum lal?
“MET foko el sie akwuk pengpeng a yok orekmakinye sin met puspus in pal meeta,” buk se inge pangpang Holman Illustrated Bible Dictionary el fwak. El tafwela: “Akwuk ke economy lun an Ijipt, an Greece, a an Rome elos eis kasru yok ke orekma lun met foko inge. Ke century se meet ke pal lun met Kristian, sie met inmasrlon met tolu in an Italy a sie met inmasrlon met limekosr in mutanfwal puspus saye elos met foko ku met kos.”
2 Fwinne oasr pa met foko in an Israel in pal meeta, Masap lal Moses oakiye mu met foko sin met Hibru enenu in oasr karunginye. Ke sie me pupulyuk, Masap el akkalemye la sie met Israel el ku in kulansap oana met foko se tia loes liki yea onkosr. Ke yea akitkosr, el fwa fuleyukla in “illa sukosok a wangin molol.” Tusruktu masap nu kemwa su enenu in sang kurangin met foko ku met kulansap enenu in mwo a oasr orekmakinyen pakoten ka su Masap lal Moses akwuk fwal nu ka: “A met kulansap se inge fwin fwakak lemtulaiuk, ‘Nga lungsik leum luk, mutan kiuk, a tulik nutik; Nga fwa tia illa in sukosok,’ na leum lal a fwa wisel nu sin God a fwa wisel nu ke mutunoaoa ku nu ke sru in mutunoaoa; a leum lal fwa sokla srel ke sie me ol, a el fwa orekma nu sel nu tok.”—Exodus 21:2-6; Livitikus 25:42, 43; Duteronomi 15:12-18.
3. (a) Kain in me keok fuka Met Kristian in century se meet elos eis? (b) Mea mokle kut in kulansapu God?
3 Akwuk inge mwo fwal nu ke lungse lun met se sifwana in oru orekma lun sie met kos ku met kulansap el sang kalem mwomwo nu ke kain in met foko su met Kristian elos oasr ka. Ke sie me pupulyuk, met sim lun Baibel su pangpang Poul, Jemes, Piter, a Jud elos akkalemyelos sifwana oana met kulansap lun God a lun Kraist. (Taitus 1:1; Jemes 1:1; 2 Piter 1:1; Jud 1) Poul el akesmakinye met Kristian nu kemwa in an Tessalonika la elos in “forla nu sin God liki me srulela tu komwos in kulansupu God moul a paye.” (1 Tessalonika 1:9) Mea kasru met Kristian puspus inge in ekla met kulansap lun God ke lungse lalos sifwana? Srike nunku, kain in me kasru fuka mokle sie met kulansap Israel in fuleak sukosok lal sifwana? Ya tia lungse nu sin leum lal? Orekma in kulansap lun sie met Kristian el akwuk ke lungse nu sin God. Ke kut eis etauk a lotela ke God paye, kut kasreyuk yok in kulansapul ke “insiesr kemwa a ngunasr kemwa.” (Duteronomi 10:12, 13) Tusruktu, in ekla met kulansap lun God a lun Kraist, mea pa eneneyuk nu ka? Fuka ma inge sang kasru nu ke moul lasr len nu kemwa?
“Oru Ma Nu kemwa nu ke Mwolena lun God
4. Fuka kut ku in ekla met kulansap lun God a lun Kraist?
4 Kalmeyen sie met kulansap pa “sie met su ma lun met saye a enenu in akos ke inkanek nu kemwa.” Kut ekla ma lun Jeova ke kut mwolela moul lasr nu sel a eis baptais. “Komwos tia ma lomwos sifwana, tu komwos moliyukla tari ke sie me mol,” met sap Poul el aketeye. (1 Korint 6:19, 20) Paye la, me mol, pa me kise lun lango lun Jisus Kraist, meyen ke ma oakiyuki inge God el eiskutla oana met kulansap lal, fwinne kut wi ke u lun met akmusrala ku kut met asrouki lalos su oasr fwinsrak in moul fwin fwalu. (Efesus 1:7; 2:13; Fwakyuk 5:9) Ke ma inge, mutamwauk ke pal in baptais lasr, “kut ma lun Jeova.” (Rom 14:8) Ke sripen kut moliyukla ke sra saok lun Jisus Kraist, kut oayepa ekla met kulansap lal a oasr kunokon lasr in liaung masap nu kemwa lal.—1 Piter 1:18, 19.
5. In oana met kulansap lun Jeova, kunokon yok fuka se meet oasr yurosr, a fuka kut ku in akpayeye ma inge?
5 Met kos ku met kulansap elos enenu in akos leum lalos. Orekma in kulansap lasr el sie orekma su kut sifwana lungse in oru a kut kaifweang ke sripen lungse lasr nu sin Leum. “Tu pa inge lungse lun God,” 1 Jon 5:3 el fwak, “tu kut liaung masap lal; a masap lal tia toasr.” Paenang, nu sesr, oiyen akos lasr el me akpayeye lungse lasr a akos lasr. Ma inge kalem ke ma nu kemwa kut oru. “Komwos fwin mongo ku nim ku oru kutena ma,” met sap Poul el fwak, “komwos oru ma nu kemwa nu ke mwolanu lun God.” (1 Korint 10:31) Ke moul lasr len nu kemwa, fwinne ke inkanek srisrik nu kemwa, kut lungse in akkalemye la kut “orekma nu sin Jeova.”—Rom 12:11.
6. In oana met kulansap lun God fuka ma inge sang kasru nu ke sulela puspus su kut oru ke moul lasr?
6 Ke sie me pupulyuk, ke kut oru sulela nu kemwa, kut lungse in nunku yok ke ma lungse lun Jeova, Leum lasr in kosrao. (Malakai 1:6) Sulela upa puspus ku in me srike nu sesr ke akos lasr nu sin Jeova. Ya kut fwa loang mwo nu ke kas in kai lal a tia in akos kena lun insiesr su “kutasrik” a “koluk?” (Jeremaia 17:9) Melisa, sie mutan Kristian su soenna payuk, el baptaisla ke lusen pal na futoto ke pal se sie mokul fwusr el mutamwauk in akkalemye lungse lal nu sel. El met mwo se, a el mutamwauk tari in lutlut Baibel yurin Met Lo lun Jeova. Fwinne oinge, sie met elder el sramsram nu sel Melisa elan aklalmetmetye in esam masap lun Jeova ke payuk “in Leum mukena.” (1 Korint 7:39; 2 Korint 6:14) “Tia fusrasr nu sik in akos kas in kai inge,” Melisa el fwak. “Tusruktu ke sripen nga oru tari sie mwolela luk nu sin God in oru ma lungse lal, paenang nga sulela ngan akos masap mwolana lal.” In sifwilpa nunku ke ma sikyuk, el fwak: “Nga arulanu engan ke nga akos kas in kai inge. Mokul inge tia pat el tui in lutlut. Fwin nga sruokye na futoto luk nu sin mokul inge, saap nga lukun payukyak tari nu sin sie met selalalfongi.”
7, 8. (a) Efu kut tia enenu in nunku yok in akinsemwomwoye met puspus? (b) Sang me pupulyuk la fuka sangeng sin met ku in kutongyuki.
7 In oana met kulansap lun God, kut tia enenu in ekla met kulansap lun met. (1 Korint 7:23) Paye, wangin sie sesr lungse in ekla met su tia pengpeng, tusruktu kut enenu in esam a nunku pal nu kemwa la oasr akwuk fulat ku masap sumwos lun Met Kristian su tia oana sie nu ke akwuk puspus lun fwalu. Poul el siyuk: “Ya nga suk in akinsemwomwoye met?” Me top lal pa: “Nga fwin akinsemwomwoye met, nga tia met kulansap lun Kraist.” (Galetia 1:10) Kut tia ku in fuleak a oru me akkoluk lun met asrouki koluk a ekla met su akinsemwomwoye met puspus. Ke ma inge, mea kut ku in oru kut fwin sun me akkoluk puspus in oru ma met elos lungse?
8 Nunku ke me srikasrak lal Elena, sie met Kristian fwusr in an Spain. Oasr tulik lutlut welul su sang sra lalos. Elos etu la Elena, el sie sin Met Lo lun Jeova, el fwa tia sang sral ku eis sra nu ke manol. Ke sie pal mwo sikyuk in aketeye nunak lal nu sin class lal, Elena el akkalemye lungse lal in oru sie me aketeye. “Paye la, Nga arulanu tufwal in oru ma inge,” Elena el aketeye. “Fwinne oinge Nga akola mwo, a oasr fwako mwo puspus ka. Nga eis sunak lun tulik lutlut puspus su wi yu ke class luk, a met luti luk el fwak nu sik la el kaksakin orekma su nga oru. Yok liki nu kemwa, Nga pulakin insemwomwo ke sripen nga akmwoye en Jeova a aketeye ke inkanek kalem sripe puspus su kasre yu in tu ku in akos kas in kai lun Baibel.” (Genesis 9:3, 4; Orekma 15:28, 29) Aok, in oana sie met kulansap lun God a lun Kraist, kut siena liki met puspus. Tusruktu, ke ma sikyuk puspus kut fwa eis sunak lun met puspus kut fwin akola in sang top ke inkanek mwo nu sin met nu kemwa su siyuk ke lalalfongi lasr.—1 Piter 3:15.
9. Mea kut ku in lotela ke sie lipufon su sikyuk nu sel met sap Jon?
9 In esam la kut met kulansap lun God ku in kasre kut pa in akkalemye inse pusisel pal nu kemwa. Ke sie pal, met sap Jon el arulanu insemwomwo a lut ke sie arurumu sakuruk ke Jerusalem in kosrao paenang el epasr nu ten in orek alu ye nien sie lipufon su kulansap oana met kaskas lun God. “Taran kom!” lipufon sa el fwak nu sel. “Nikmet oru! Nga met kulansap wiyom a wiyen met lim met palu a wiyelos su liaung kas in buk se inge. Kom alu nu sin God.” (Fwakyuk 22:8, 9) Sie me srikasrak mwomwo lun lipufon pa inge su akkalemyeyuk nu sesr nu kemwa oana met kulansap nu kemwa lun God! Kutu sin met Kristian saap elos engankin kunokon yok puspus ke congregation. Tusruktu, Jisus el fwak: “El su lungse in ekla fulat in masrlomwos fwa met kulansap lomwos, a el su lungse in met leum in masrlomwos fwa met foko lomwos.” (Mattu 20:26, 27) Oana met tuma lutlut lun Jisus, kut nu kemwa pa met kulansap.
“Kut Oru Ma Fwal Nu Sesr in Oru”
10. Sang me pupulyuk su tuku ke ma Simusla in akkalemye la met kulansap nu kemwa lun God tia pal nu kemwa fusrasr nu selos in oru ma lungse lun God.
10 In oru ma lungse lun God tia pal nu kemwa fusrasr nu sin met sesumwos. Met palu Moses el alolo in akos ke pal se God el siyuk sel in som a aksukosokyela tulik nutin Israel liki me sruo in an Ijipt. (Exodus 3:10, 11; 4:1, 10) Ke pal se el eis sie kunokon in fwakak nununku lun God nu sin met nu kemwa in an Nineve, Jona “el tuyuk in kaengla nu Tarsis liki ye mutun Jeova.” (Jona 1:2, 3) Baruk, met sim lun met palu Jeremaia, el torkaskas ke el pulakin totola. (Jeremaia 45:2, 3) Oiya fuka kut fwa akkalemye ke pal se lungse lasr sifwana el lainyuk ku tia fwal nu ke oiya in oru ma lungse lun God? Sie me pupulyuk su Jisus el akkalemye el sang me top.
11, 12. (a) Aketeye ke kas futoto me pupulyuk lun Jisus su simusyukla in Luk 17:7-10. (b) Me lutlut fuka kut ku in lotela ke me pupulyuk lun Jisus?
11 Jisus el sramsram ke sie met kulansap su liaung un kosro nutin leum lal len fon ke imae. Ke pal se met kulansap el tuku nu loom u, totola ke orekma upa ke lusen ao 12 kutu, Leum lal el tia sulel in muta a engankin mongo yuyu in eku. A, leum el fwak: “Akoela ma nak, a loskomweni a kulansupe yu nu ke pal se nga mongo a nim tari, a tok kom fwa mongo a nim.” Met kulansap se inge ku in kasrel sifwana, eis ma enenu lal tokin el kulansap tari nu sin leum lal. Jisus el aksafyela me pupulyuk inge ke el fwak: “A oinge ouyepa komwos, ke komwos oru ma nu kemwa sapkin nu sumwos, komwos in fwak, ‘Kut met kulansap su wangin sripesr. Kut oru ma fwal nu sesr in oru.’ ”—Luk 17:7-10.
12 Jisus el tia sang me pupulyuk inge in akkalemye la Jeova el tia aksaokye ma kut oru in kulansapul. Baibel el akkalemye kalem: “God el tia sesumwos in mulkunla orekma lomwos a lungse su komwos fwakak nu ke El.” (Hibru 6:10) A, me lutlut su kut lotela ke me pupulyuk lal Jisus pa sie met kulansap el tia ku in akinsemwomwoyel sifwana ku nunku ke ma mwo nu sel sifwana. Ke pal se kut mwolela moul lasr nu sin Jeova a in oru sulela tu kut in ekla met kulansap lal, kut insese in oru ma lungse lal meet liki ma lungse lasr sifwana.
13, 14. (a) Ke kain in oiya puspus su sikyuk fuka kut ku in kutangla kena lasr sifwana? (b) Efu ku kut enenu in lela ma lungse lun God in kutangla?
13 In lutlutkin Kas lun God a me rid puspus su orekla sin “met kulansap oaru a lalmetmet” pal nu kemwa, kaifweang yok eneneyuk na paye kut in oru. (Mattu 24:45) Saap pa inge ma sikyuk ku oiya yok ku in sikyuk fwin orekma in rid el upa nu sesr ku fwin sie me rid el aketeye “ma loal lun God.” (1 Korint 2:10) Tusruktu, ya kut tia oru sie akwuk in oasr pal in oru lutlut lasr sifwana? Saap kut enenu in kai kut sifwana in muta a orekmakin pal in lutlutkin sie me lutlut. Tusruktu, kut fwin tia oru oinge, fuka kut ku in akkeye oiya lasr in lungse “mongo upa fwal nu sin met matu”?—Hibru 5:14.
14 Fuka ke pal puspus ke kut tuku nu in loomu tokin len fon se ke orekma? Kut enenu in kaifwe kut sifwana in wi ke meeting nu kemwa lun met Kristian. Ku saap in fwakak peng mwo nu sin metsa tia pa inge kena paye lasr. Poul el sifwana akilen la oasr pal ke kut sulkakin peng mwo kut pulakin la kut oru ma inge ‘tia ke lungse lasr sifwana.’ (1 Korint 9:17) Tusruktu, kut oru ma inge meyen Jeova—Leum lasr in kosrao, el su kut lungse—fwak nu sesr la kut enenu in oru. A ya kut tia pulakin insemwomwo a akkeyeyuk pal nu kemwa tokin kut oru ke kaifweang lasr kemwa in lutlut, in wi meeting nu kemwa, a in fwakak peng mwo?—Sam 1:1, 2; 122:1; 145:10-13.
Nik Met Tapulla nu ke “Ma Puspus su Wanginla Tari”
15. Fuka Jisus el oakiye sie me srikasrak ke pusisel a akos nu sin God?
15 Jisus Kraist el akkalemye pusisel a akos lal ke inkanek nu kemwa nu sin Papa tumal in kosrao. “Nga oatui in kosrao me, tia in oru ma lungse luk, a ma lungse lal su supeyume,” Jisus el fwak nu sin met tuma lutlut lal. (Jon 6:38) Ke pal se el pulakin asor yok ke imae lun Getsemane, el pre: “O Papa, fwin ku, lela kup se inge in alikiyula. Tusruktu, tia oana ma Nga lungse, a oana ma kom lungse.”—Mattu 26:39.
16, 17. (a) Nunak fuka kut enenu in akkalemye ke ma puspus su kut likiye tari tokosr? (b) Akkalemye la fuka Poul el akpayeye fwinsrak puspus lal ke akwuk lun fwalu oana “kutkut pukanten.”
16 Jisus Kraist el lungse kut in oaru pal nu kemwa nu ke sulela lasr in oana met kulansap puspus lun God. El fwak: “Wangin met fwal nu ke togusrai lun God, el fwin filiye paul nu ke plau a tapulla.” (Luk 9:62) In nunku pal nu kemwa ke ma kut likiye tari, oiya inge tia fwal in orek ke kut kulansap nu sin God. A, kut enenu in aksaokye ma kut eis tari ke kut orala sulela in ekla met kulansap lun God. Nu sin met Kristian in an Filippai, Poul el simusla: “Nga oekla ma nu kemwa oana ma tula ke mwoiyen etu luk ke Jisus Kraist luk. Ke su ma luk nu kemwa tula liki yu, a nga oekla ma inge oana kutkut, tu nga in eis Kraist.”—Filippai 3:8.
17 Nunku ke ma nu kemwa su Poul el nunku oana kutkut a filiyuki tu elan eis me sang puspus in ngun oana sie met kulansap lun God. El likiye fwintokol tia me pwar lun fwalu mukena a el likiye pa pal mwo in ekla sie met kol lun Judaism. Fwin Poul el tafwela in oru akwuk lun Judaism, saap el kulukyak nu ke sie mwal ku kunokon mwo oana mwal ku kunokon lal Simeon, mwen nutin met luti lal Poul, su pangpang Gamaliel. (Orekma 22:3; Galetia 1:14) Simeon el ekla met kol lun met Farisi a oru sie orekma yok—fwinne oasr kutu alolo lal—ke orekma in lain lun met Ju lain met Rom in yea 66-70 C.E. El mise ke meun inge, ke poun met Ju puspus su lainyuk ku ke met meun lun an Rom.
18. Sang me pupulyuk in akkalemye la fuka me kasru lun ngun el sang me insemwomwo.
18 Pus sin Met Lo lun Jeova elos fwasr tokin me srikasrak lal Poul. “Ke lusen kutu yea tokin Nga som liki loom lutlut, Nga koneak sie orekma oana sie executive secretary nu ke sie lawyer pengpeng fwin an London,” Jean el fwak. “Nga insemwomwokin orekma luk a eis mani yok ka, tusruktu ke insiuk Nga etu la oasr ku luk in akyokye orekma luk in kulansapu Jeova. Ke saflaiye, nga sang leta luk su akkalemye la nga lungse in tari ke orekma luk inge a nga lungse mutamwauk in oru orekma lun pioneer. Nga akkalemye na paye kulo luk ke nga orala step inge ke yea 20 kutu somla! Orekma in kulansap luk ke pal nu kemwa el akkasrupye moul luk yok liki kutena orekma lun met sim su oasr ke kutena pal. Wangin kutena ma ku in sang me insemwomwo yok liki in liye la fuka Kas lun Jeova el ku in ekulla moul lun sie met. In oasr ip ke orekma inge el arulanu mwo. Ma kut sang nu sin Jeova el arulanu srik fwin srikeyuk nu ke ma puspus su el use nu sesr.”
19. Sulela fuka kut enenu in oru, a efu?
19 Oiya lasr ku ma sikyuk nu sesr ku in ekyek tokin kutu pal. Tusruktu, mwolela lasr nu sin Jeova el tia ekyek pal nu kemwa. Kut srakna met kulansap lun Jeova, a el lela kut in oru sulela lasr la fuka kut ku in orekmakin ke inkanek mwo emeet pal lasr, ku lasr, a kutupa ma saok lasr. Ke ma inge, lungse lasr nu sin God ku in liyeyuk ke sulela puspus su kut oru. Ma inge akkalemye pa lupan lungse lasr in oru in sifwana lafwekin kut. (Mattu 6:33) Ke kutena luma a ma sikyuk ke moul lasr, ya kut tia akkalemye lungse yok lasr in sang nu sin Jeova ma mwo emeet lasr? Poul el simusla: “Tu fwin oasr nunuk akola, a fwa akinsemowmwoye fwal nu ke ma on yurin sie met, a tia fwal nu ke ma wangin yurol.”—2 Korint 8:12.
“Oasr Fwako Lomwos”
20, 21. (a) Fwako puspus fuka osweyukla sin met kulansap nu kemwa lun God? (b) Fuka Jeova el akinsemwomwoyelos su sang nu sel ma mwo emeet lalos?
20 In oana sie met kulansap lun God el tia ma upa se. Ke oiya saye, el use me insemwomwo nu sesr ku el aksukosokye kut liki sie kain in moul upa su eisla insemwomwo lasr. “Ke komwos sukosok liki ma koluk, a ekla met kulansap lun God,” met sap Poul el simusla, “oasr fwako lomwos nu ke akmutalyeyuk a saflaiye, moul ma patpat.” (Rom 6:22) Orekma in kulansap lasr nu sin God el oswela fwako mwo puspus ke inkanek lun oiya mutal ke kut eis me insemwomwo puspus su tuku ke oiya mutal, ku oiya nasnas. Sayen ma inge, ma inge kol nu ke moul ma patpat ke pal fwasru.
21 Jeova el kulang nu sin met kulansap lal. Kut fwin kaifweang ke ku lasr in kulansap nu sel, el ikasla nu sesr “windo in kosrao” a okoila nu fwesr “me insemwomwo tu a fwa tia fwal an in eis.” (Malakai 3:10) Sie me insemwomwo in tafwela in orekma nu sin Jeova oana sie met kulansap nu ke pal fwasru ma patpat!
Ya Kom Esam?
• Efu ku kut ekla met kulansap lun God?
• Fuka kut akkalemye oiyen pusisel a akos lasr nu ke ma lungse lun God?
• Efu ku kut enenu in akola in oru ma lungse lun God meet liki ma lungse lasr sifwana?
• Efu ku kut tia enenu in ‘tapulla nu ke ma puspus su wanginla tari’?
[Picture on page 12, 13]
Akwuk mwo ke lungse lun sie met in ekla sie met kulansap in Israel pa sie me pupulyuk ke orekma in kulansap lun met Kristian
[Picture on page 13]
Kut ekla met kulansap lun God ke pal se kut eis baptais
[Pictures on page 13]
Met Kristian elos oru meet ma lungse lun God
[Picture on page 14]
Moses el alolo in eis kunokon lal