Taran Ke “Pusren Metsa”

“A elos fwa tia fwasr tokin sie metsa a fwa kaengla lukel, tu elos tia etu pusren metsa.”​—JON 10:5.

1, 2. (a) Oiya fuka Meri el akkalemye ke pal se Jisus el panglol ke inel, a kas fuka lun Jisus in pal meeta akkalemyeyuk ke ma sikyuk inge? (b) Mea kasre kut in futoto pal nukemwa nu sin Jisus?

JISUS su moulyuk tari el liye mutan se su tu apkurun nu ke kulyuk lal su wangin koano. El etel. El pa Meri Magdalene. Apkurun nu ke yea luo somla, el akkeyella liki me akkoluk lun dimon. Mutamwauk in pal sa mutan se inge welul a met sap nukemwa lal, in karungin ke me enenu lalos len nukemwa. (Luk 8:1-3) Tusruktu, misenge, Meri el tung, el asor na paye ke sripen el etu la Jisus el mise, a inge manol wanginla pwe! Paenang Jisus el siyuk sel: “Mutan, efu kom ku tung? su kom sukan?” Nunku mu el met karungin ima, el fwak nu sel: “Leum, kom fwin wisella liki an se inge, fwakak nu sik yen kom fililye we, a Nga fwa wisella.” Na Jisus el fwak nu sel: “Meri!” El tapulla, mutan sa akilen pusra su kaskas nu sel. “Met luti!” el fwak ke engun. A el engunak ma lulap kel.​—Jon 20:11-18.

² Ma simusla akkalemye ke inkanek lun lungse su Jisus el fwakak tari ke kutu pal somla. El srikel sifwana nu ke sie met liaung sip a met tuma lutlut lal nu ke sip, el fwak la met liaung sip el pangon sip natul ke in elos a elos etu pusral. (Jon 10:3, 4, 14, 27, 28) Paye, in oana ke soko sip el akilen met liaung lal, paenang Meri el akilen pa met liaung lal, pa Kraist. Ma inge akpayeyuk pa nu sin met tuma lutlut nukemwa lun Jisus in pal inge. (Jon 10:16) In oana sip su etu in porongo a akos met liaung lal, fwa oapana nu sesr ke etauk a akos lasr nu ke ma lun ngun, su ma inge ku in kasre kut in fwasr in fwalken Met Seperd Mwo lasr, Jisus Kraist.​—Jon 13:15; 1 Jon 2:6; 5:20.

3. Mea kutu kusensiyuk su sikyuk ke me pupulyuk lun Jisus ke kalkal lun sip?

³ Tusruktu, in fwal pa nu ke me pupulyuk sapana, ku lun sip in akilen pusra ku pa in oru el an etu tia ke pusren kamwuk lal mukena a el ku in akilen pa pusren met lokwalok lal. Ma inge arulanu yok sripe meyen met puspus su lain kut elos arulanu kutasrik. Su elos an? Elos orekma fuka? Kut fwa karungin kut sifwana fuka? In etu ma inge, lela kut in liye kutupa ma Jisus el fwak ke me pupulyuk lal ke kalkal in sip.

‘El Su Tia Ilyuk Ke Mutunpot’

4. Fwal nu ke me pupulyuk lun met liaung sip, sip elos fwasr tokin su, a su elos tia fwasr toku?

⁴ Jisus el fwak: “El su ilyuk ke mutunpot el met sropu lun sip. Met liaung mutunpot el ikasla nu sel, a sip elos long pusral, a el pangon sip natul ke elos a kololosla. Ke el kol sip natul liki inkalkalu, el fwasr ye mutalos, a sip elos fwasr tukol, tu elos etu pusral. A elos fwa tia fwasr tokin sie metsa a fwa kaengla lukel, tu elos tia etu pusren metsa.” (Jon 10:2-5) Nunku, Jisus el orekmakin kas inge “pusra” pal tolu. Pal luo el sramsram ke pusren sie met liaung, tusruktu ke pal aktolu, el sramsram ke “pusren metsa puspus.” Kain in metsa fuka Jisus el sramsramkin?

5. Efu kut tia akkalemye pakoten nu sin kain in metsa su akkalemyeyuk in Jon sapta 10?

⁵ Jisus el tia aketeye ke kain in metsa su kut lungse in akkalemye ke oiyen kulang lasr ku inse pakoten lasr​—fwal nu ke sie kas su orekmakinyuk ke kas in Baibel in pal meeta su oasr kalmeye oana “lungse nu sin metsa.” (Hibru 13:2) Ke me pupulyuk lun Jisus, metsa el tia met su suliyuk. El “tia ilyuk ke mutunpot nu inkalkal lun sip a el fwanyuk ke siepana inkanek.” El sie “met pusrapasr a sie met ingunyar.” (Jon 10:1) Su met se su fwakyuk in Kas lun God inge su ekla oana met pusrapasr a met ingunyar? Setan su Devil. Kut ku in liye me akpayeye ka in buk lun Genesis.

Nge Pusren Metsa Longyuk Ke Pal Se Meet

6, 7. Efu ku Setan el pangonyuk sie metsa a sie met pusrapasr?

⁶ Genesis 3:1-5 el akkalemye ke pusren metsa su longyuk tari fwin fwalu ke pal se meet. Ma simusla inge el fwak la Setan el tuku nu yurin mutan se meet, If, ke inkanek lun serpent soko a sramsram nu sel ke sie inkanek kikiap. Aok, ke ma simusla inge Setan el tia pangpang “sie metsa.” Tusruktu, orekma puspus lal akkalemye la el oana sie metsa su akkalemyeyuk ke me pupulyuk lun Jisus su simusyukla in Jon sapta 10. Nunku ke kutu luma su oana sie nu ke ma inge.

⁷ Jisus el fwak la metsa el tuku nu yurin met su el lungse in akkolukye ke sie inkanek tia sumwos. Ke luma oana sie, Setan el tuku nu yurin met su el lungse in akkolukye ke inkanek tia sumwos, el orekmakin serpent soko. Inkanek kutasrik inge ku in akkalemye kel Setan la pa inge oiya na paye lal​—oana sie met pusrapasr kutasrik. Oayepa, metsa su oasr in inkalkal lun sip el lungse in pusrapasr nu sin met su natu sip. Paye, la el koluk liki sie met pusrapasr, meyen nien sun lal pa in “uniye a kunausla.” (Jon 10:10) Ke luma sepana inge, Setan el sie met pusrapasr. In keapela If, el lungse in kunausla oaru lal nu sin God. Yok liki nukemwa, Setan el paenang in oasr mise nu sin met nukemwa. Paenang, el pangpang sie met akmas.

8. Fuka Setan el akkolukye kas a nunak lun Jeova?

⁸ Seakos lal Setan akkalemyeyuk ke inkanek el orekmakin in sang akkolukye kas a nunak lun Jeova. “Ya God el fwak nik komtal mongo ke sak nukemwa ke ima se inge?” el siyuk sel If. Setan el orek luma na in oana ke el oru mu el lut ke el fwak: ‘Fuka God el ku in oru ma koluk na paye?’ El tafwela in fwak: “Tu God el etu tu in len se komtal mongo ka mutomtal fwa ikakla.” Tuni kas lal: “God el etu.” Setan el fwak, oinge: ‘Nga etu ma God el etu. Nga etu nunak lal, a ma inge koluk.’ (Genesis 2:16, 17; 3:1, 5) Sie me asor, ke If a Edam elos tia mulkunla pusren metsa. A, elos porongo ma inge a eis ma lane koluk nu selos sifwana a nu sin tulik natulos.​—Rom 5:12, 14.

9. Efu ku kut enenu in tuni la pusren metsa longyuk in pal inge?

⁹ Setan el orekmakin inkanek oinge in sang keapela met kulansap nukemwa lun God ke pal inge. (Fwakyuk 12:9) El pa “papa tumun ma kikiap,” a nu selos, su oana el, su srike in keapela met kulansap nukemwa lun God, pa tulik natul. (Jon 8:44) Lela kut in tuni kutu inkanek su pusren metsa el longyuk ke pal inge.

Fuka Pusren Metsa Longyuk Tari in Pal Inge

10. Mea sie inkanek su pusren metsa ku in longyuk ka?

¹⁰ Ke kas kutasrik. Met sap Poul el fwak: “Komwos in tia tafongla ke luti sa su kain puspus.” (Hibru 13:9) Kain in me luti fuka? Ke sripen ma inge ku in ‘us kut la,’ paenang arulanu kalem la Poul el sramsram ke me luti puspus su akmunasye oiya mwo lasr in ngun. Su kaskaskin me luti inge? Poul el fwak nu sin un met Kristian elder: “A liki inmasrlomwos sifwana kutu met fwa tuyuk a luti ma sesumwos in amakin met lutlut in fwasr tukolos.” (Orekma 20:30) Paye, ke pal inge oana in pal lal Poul, kutu met su in pal meeta elos wi ke congregation lun met Kristian elos inge srike in keapela sip ke inkanek in sramsramkinyen “ma sesumwos puspus”​—tafwu paye a tafwu ke ma kikiap upa puspus. Oana met sap Piter el akkalemye ke ma inge, elos orekmakin “kas tia paye”​—kas puspus su luman paye tusruktu wangin sripe tia paye.​—2 Piter 2:3.

11. Fuka kas su koneyukyak in 2 Piter 2:1, 3 akkalemye ke inkanek a nien sun lun met luti kikiap?

¹¹ Piter el oayepa akkalemye ke inkanek yok lun met luti kikiap ku met puspus su som liki alu paye ke elos fwak la elos “fwa ilyuk in lukma wise me lutlut kunausten.” (2 Piter 2:1, 3) In oana met pusrapasr ke me pupulyuk lal Jisus ke kalkal lun sip el tia ilyuk “ke mutunpot a fwanyuk ke siepana inkanek,” ke inkanek oana ke sie met luti kikiap el tuku pa nu yurosr ke inkanek lukma. (Galetia 2:4; Jud 4) Mea nien sun lalos? Piter el fwak: “Elos fwa akkolukye kom.” Paye, fwinne met luti kikiap nukemwa inge elos srike in akketeye ma mwo kelos sifwana, nien sun na paye lalos pa “in pusre a in uniye a in kunausla.” (Jon 10:10) Taran ke metsa oinge!

12. (a) Fuka asrouki lasr ku in akfutotoye kut nu ke pusren metsa? (b) Mea oana sie ke inkanek lun Setan a lun metsa ke pal inge?

¹² Met asrouki koluk. Pusren metsa ku in longyuk pa sin met su kut asrouki nu se. Met asrouki koluk el akkolukye yok met fwusr puspus. (1 Korint 15:33) Esam, Setan el akkolukyel If​—su fwusr liki mokul tumal a srikla etauk lal. El fwak nu sel la Jeova el srunga elan engankin moul sukosok lal, a ke ma inge el tia fwak oana ma paye. Jeova el lungse met su el orala a el nunku ke ma mwo nu ke moul lalos. (Isaia 48:17) Oapana ke pal inge, metsa el srike komwos met fwusr in lalalfongi mu papa a nine Kristian kiyomwos elos srunga komwos in engankin sukosok lomwos. Fuka metsa inge el ku in akkolukye kom? Sie mutan Kristian fwusr el fwak: “Ke kitin pal lalalfongi luk munasla ke sripen kas in akkoluk lun tulik lutlut puspus ke loom lutlut. Elos fwak pal nukemwa la alu luk tia mwo a wangin sukosok luk ka.” Tusruktu, ma paye pa papa a nine kiyom elos lungse kom. Paenang ke pal se tulik lutlut su wi kom elos srike in fwak nu sum in tia lalalfongi papa a nine kiyom, nikmet lela kom in kiapeyukla oana If in pal meeta.

13. Devid el fwasr tokin inkanek lalmetmet fuka, a mea sie inkanek su kut ku in etawel ka?

¹³ Ke asrouki koluk, met sim lun sam el fwak: “Nga tia muta yurin met kikiap; a nga fwa tia utyuk nu yurin met kutasrik.” (Sam 26:4) In kalweni, ya kom liye oiya su oasr yurin metsa? Elos lungse in okanulosla in tia eteyuk elos​—oana Setan ke el okanla oiya paye lal ke el orekmakin serpent soko. In pal inge, kutu sin met koluk elos okanulosla in tia akilenyuk elos ke elos orekmakin Internet. Ke chat room, met matou su sulallel elos lungse in akkalemyelos sifwana oana met fwusr in penkomla nu ke sie me sruf. Met fwusr nukemwa, nunak munas karungin komwosyang sifwana komwos fwin srunga in akkolukyeyuk komwos ke ma lun ngun.​—Sam 119:101; Soakas 22:3.

14. Kutu pal, fuka met orekma ke media elos akkalemye pusren metsa?

¹⁴ Kas in lain su tia paye. Fwinne oasr kutu news report mwo ke Met Lo lun Jeova, tusruktu kutu pal met orekma ke media elos sifwana orekmakinyuk sin metsa puspus in oru broadcast koluk kelos. Nu ke me pupulyuk, oasr sie news report ke sie mutanfwal su fwakak kas kikiap ke Met Lo la elos sang kasru nu ke kolyuk lal Hitler ke lusen pal su Meun Lulap akluo orek. Ke siepa ma sikyuk, sie report el fwak mu sie sin Met Lo el akfokfokye ku kunausla loom alu puspus. In mutanfwal puspus met puspus su orekma ke media elos fwak mu Met Lo elos pilesru in sang kasru nu ke akwuk lun ono nu sin tulik natulos a oayepa elos tia nunku ke ma koluk upa su orek sin kutupa Met Lo. (Mattu 10:22) Fwinne oinge, met puspus su etekut elos etu la kain in kaskas puspus su orek in sang lain kut inge tia kas paye.

15. Efu ku in lalalfongi ma nukemwa su akkalemyeyuk ke media tia sie inkanek lalmetmet?

¹⁵ Mea kut enenu in oru kut fwin sun kain in kaskas kikiap inge su metsa elos fwakelik? Mwo kut in porongo kas in kai in Soakas 14:15: “Met nukin lalalfongi kas nukemwa, a sie met lalmetmet arulanu liaung fwafwasryesr lal.” Tia inkanek lalmetmet in lalalfongi ma nukemwa su media elos akkalemye mu paye. Fwinne kut tia pilesru ke me fwakak nukemwa lun fwalu, tusruktu kut etu la “fwalu nu fon oan ke ku lun met koluk se.”​—1 Jon 5:19.

“Srike Kas Nukemwa su Etuku ke Ngun”

16. (a) Fuka oiyen sip paye pupulyukin ma paye ke kas lun Jisus su koneyukyak in Jon 10:4? (b) Mea Baibel el kaifwe kut in oru?

¹⁶ Ke ma inge, kut ku in etu na paye la fuka fwin kut asrouki nu sin sie met kamwuk ku sie met lokwalok? Esam, ke Jisus el fwak la sip elos fwasr tokin met liaung “tu elos etu pusral.” (Jon 10:4) Tia me yun ku aten met liaung pa mokle sip in fwasr tukol; ma inge sikyuk ke pusral. Oasr sie buk ke an puspus in Baibel el akkalemye la oasr sie met muteta el fwak mu sip el akilen met liaung lalos ke nuknuk lalos, tia ke pusralos. Tusruktu sie met liaung sip el topuk a fwak la pusra pa elos etu. In akpayeye ma inge, el orekmakin nuknuk lun met muteta sa a met muteta sa el orekmakin nuknuk lal. El nukomang nuknuk lun met liaung sip, a metsa el pangon sip, tusruktu sip elos tia tuku nu yurol. Elos nukin pusral. Tusruktu, ke pal se met liaung sip el panglolos, fwinne el tia nukomang nuknuk lun sie met seperd, sip nukemwa tuku nu yurol. Paenang, fwinne aten sie met el oana aten met liaung sip, tusruktu nu sin sip, tia ma inge me akpayeye la el sie met liaung. Aok, sip elos akilen pusren met se su panglolos, srikeyuk ma inge ke pusren met seperd. Kas lun God el akkalemye nu sesr in oru pa ma inge​—“akpayeye kas nukemwa su etuku ke ngun in liye fwin ma inge tuku sin God me.” (1 Jon 4:1, NW; 2 Timote 1:13) Mea fwa kasru kut in oru oinge?

17. (a) Fuka kut ku in pala ke pusren Jeova? (b) Etauk kel Jeova ku in kasre kut in oru ma fuka?

¹⁷ In etu na paye, kut enenu in eis kalem paye ke pusra, peng lun Jeova, na kut fwa ku in akilen pusren metsa. Baibel el fwak la kut ku in akyokye etauk inge. El fwak: “Srem fwa long sie kas tukum fwakang: ‘Pa inge inkaneku. Komwos fwasr we.’ ” (Isaia 30:21) “Kas” tukosr inge tuku ke Kas lun God. Pal nukemwa kut rid Kas lun God, kut long, ke kas inge oana, pusren Met Seperd Lulap lasr, Jeova. (Sam 23:1) Ke sripe se inge, ke kut lutlut yok ke Baibel, kut ku in pala in long ke pusren God. Etauk mwo fwa kasre kut in sa akilen pusren metsa.​—Galetia 1:8.

18. (a) In etu pusren Jeova mea eneneyuk nu ka? (b) In fwal nu ke Mattu 17:5, efu ku kut enenu in akos pusren Kraist?

¹⁸ Mea pa weang in etu pusren Jeova? Sayen in long, akos el eneneyuk. Sifwilpa tuni Isaia 30:21. Kas lun God el fwakak: “Pa inge inkaneku.” Aok, ke inkanek lun lutlut Baibel, kut long kas in kasru lun Jeova. Tokin ma inge, el sapkin: “Komwos fwasr we.” Jeova el lungse kut in orekmakin ma kut long tari. Paenang, in orekmakin ma kut lotela, kut tia akkalemye mukena la kut long pusren Jeova a kut oayepa porongo ma inge. (Duteronomi 28:1) In porongo pusren Jeova kut enenu pa in porongo pusren Jisus, ke sripen Jeova sifwana el fwak nu sesr in oru oinge. (Mattu 17:5) Mea Jisus, Met Seperd Mwo, el fwak nu sesr in oru? El luti kut in oru met tuma lutlut a in lalalfongi “met kulansap oaru a lalmetmet.” (Mattu 24:45; 28:18-20) In porongo pusral kalmekin moul ma patpat lasr.​—Orekma 3:23.

‘Elos Fwa Kaengla Lukel

19. Oiya fuka kut fwa akkalemye nu ke pusren metsa?

¹⁹ Ke ma inge, oiya fuka kut enenu in akkalemye nu ke pusren metsa? Oana ma sip elos oru. Jisus el fwak: “A elos fwa tia fwasr tokin sie metsa a fwa kaengla lukel.” (Jon 10:5) Oasr ma luo ke oiya su kut akkalemye. Ma se meet, kut “fwa tia fwasr tokin sie metsa ke inkanek nukemwa.” Aok, enenu in sensenkin na paye sie metsa. In oana, ke kas Grik su orekmakinyuk in simusla Baibel, ke kas inge “fwa tia” lengla nu ke inkanek in akkalemye ke oiyen srunga in akos kas. (Mattu 24:35; Hibru 13:5) Akluo, kut “fwa kaengla lukel,” ku in forla lukel. Pa inge inkanek sumwos in orek in sang oru me top nu selos su oru me luti lalos tia fwal nu ke pusren Met Seperd Mwomwo.

20. Oiya fuka kut fwa akkalemye kut fwin sun (a) met luti kikiap kutasrik, (b) met asrouki koluk, (c) met orekma ke media su tia fwak ma paye?

²⁰ Paenang, ke kut sun met su kaskaskin me luti kikiap lun met su som liki alu paye, kut enenu in orekmakin Kas lun God ke el fwak: “Komwos in akulenye elos su orek srisri a me tukulkul lain luti su komwos luti ka, a forla lukelos.” (Rom 16:17; Taitus 3:10) In oapana, ke Met Kristian fwusr su sun me sensen ke asrouki koluk lalos elos enenu in orekmakin me kai lal Poul su el fwak nu sel Timote: “Kaengla liki lung koluk lun met fwusr.” A kut fwin long kaskas kikiap lun met orekma ke media, lela kut in esam kutupa me kai lal Poul nu sel Timote: “Elos [nu selos su long nu ke pusren metsa] e fwa furokla srelos liki ma paye a kufla nu ke lusrongten. A, kom in efwal in ma nukemwa.” (2 Timote 2:22; 4:3-5) Fwinne pusren metsa el arulanu mwo, lela kut in kaengla liki ma nukemwa su fwa akmunasye lalalfongi lasr.​—Sam 26:5; Soakas 7:5, 21; Fwakyuk 18:2, 4.

21. Me sang fuka soanelos nukemwa su pilesru pusren metsa?

²¹ Ke inkanek in tia porongo pusren metsa, met Kristian akmusrala elos porongo kas lun Met Seperd Lulap su koneyukyak in Luk 12:32. Ke fus inge Jisus el fwak nu selos: “Nik kom sangeng, u srisrik, tu me insemwomwo lun papa tumomwos in sot togusrai sa nu sumwos.” Oayepa, “sip ngie” elos lungse in long kas lun Jisus: “Fwasru, komwos met insemwomwo lun Papa tumuk, usrui togusrai su akola nu sumwos ke mutamweyen fwalu me.” (Jon 10:16; Mattu 25:34) Fuka mwolana lun me sang su soane kut fwin tia porongo “pusren metsa”!

Ya Kom Esam?

• Fuka Setan el fwalkin oiya lun metsa ke me pupulyuk lun Jisus ke inkalkal lun sip?

• Fuka pusren metsa longyuk tari ke pal inge?

• Fuka kut ku in akilen pusren metsa?

• Pulakin fuka kut fwa akklemye nu ke pusren metsa?

[Picture on page 27]

Meri el akilen Kraist

[Picture on page 28]

Metsa el tia tuku nu yurin sip ke inkanek sumwos

[Picture on page 30]

Pulakin fuka kut fwa akkalemye nu ke pusren metsa?