Nunuk Lun God Ke Met Mise

MISE lun sie met su kut lungse sie me asor na paye. Ma tula lulap, supwar, asor, me toasr upa ke sripen ma tula inge arulanu yok na paye. Tula lun sie met su elos arulanu lungse, ku in oru kutu met in pulakin la wanginla fwinsrak lalos, meyen elos fwinne arulanu kasrup, fukoko, ku elos met pengpeng, wangin kutena met fwin fwalu misinge ku in kasru met mise in sifwil moulyuk.

Tusruktu, nunuk lun Met Orekutla el siena liki. Meyen el pa lumala a orala met se meet liki kutkut, paenang el ku in sifwil orala met inge su mise tari. Ke sripe se inge, God el ku in nunku la met mise elos oanu tia mise, a elos moul ye mutal. Nu sin met kulansap oaru nu kemwa in pal meeta su mise tari, Jisus el fwak: “Tu met e nu kemwa moul nu sel.”​—Luk 20:38, footnote.

Ke pal se el srakna muta fwin fwalu, Jisus el eis ku in akmoulyeak met mise. (Jon 5:21) Ke ma inge, el srukye nunuk lun Papa tumal nu selos nu kemwa su mise ke oaru. Ke sie me pupulyuk, ke pal se kamwuk lal inge Lazarus el mise, Jisus el fwak nu sin met tuma lutlut lal: “Nga som . . . tu Nga oaksalak.” (Jon 11:11) Ye mutun met, Lazarus el mise tari, tusruktu, ye mutun Jeova a Jisus, Lazarus el motul.

Ye koko lun Jisus ke Togusrai lal, oasr “sifwil moulyuk nu sin met sumwos a met sesumwos.” (Orekma 24:15) Ke saflaiye, elos nu kemwa su e fwa sifwil moulyuk, elos fwa eis me lutlut mutal a oasr fwinsrak lalos in moul ma patpat fwin fwalu.​—Jon 5:28, 29.

Aok, mise lun sie met su kut lungse wise me asor yok su ku in on na ke lusen yiu puspis. Fwinne ou inge, kut fwin nunku met mise fwal nu ke nunuk lun God, ma inge ku in wise nu sesr me insemwomwo yok a wise nu sesr fwinsrak.​—2 Korint 1:3, 4.