Kusensiyuk Su Tuku Sin Met Rid

Efu Ku Baibel el sapkin nu sin met in wowoyuk fwin sie met el srike in akpusisilyel ke sruinku?

Kutena met su soennu srike me aksangeng a ma upa yok su tuku ke sruinku tia ku in kalem na paye fuka orekma koluk inge el kunausla na paye moul lun sie met. Sruinku el sie ma aksangeng na paye nu sin met su sun ma inge a ma inge ku in akkolukye lusen moul lal nu fon.a Sie mutan fwusr Kristian su akpusisilyeyuk sin met sruinku ke yiu ekasr somla el fwak: “Nga kofla in aketeye sangeng lulap su Nga pula ke fong se a Nga tia ku in fwak fwin Nga kutangla tari me asor lulap su tuku ka.” Kut kalem ka, efu met puspis elos srunga in nunku ke ma koluk inge. Aok, me sensen su tuku ke sruninku arulanu yok ke fwal koluk inge.

Baibel el tia okanla ku srunga in sramsramkin orekma lun sruinku a met su srike in oru ou inge in pal meeta. (Genesis 19:4-11; 34:1-7; 2 Samuel 13:1-14) El sang pa kai nu sin met ke ma el enenu in oru fwin me sensen ke sruinku sunol. Ma Baibel el aketeye ke ma se inge ku in konoiyukyuk in Duteronomi 22:23-27. Ma inge el sramsram ke luma luo. Ke ma sikyuk se meet, sie mokul el konielak sie mutan in siti se, a on yurol. Mutan se el tia wowoyuk ku tung in siyuk ke kasru. Tok, konoiyukyuk la oasr meta lal “meyen el tia wowoyuk, ke el muta in siti.” El fwin wowoyuk ku tung, saap sie met su muta futoto ku in tuku in kasrel. Ke ma sikyuk akluo, sie mokul el konielak sie mutan fwusr in imae, a met se “esel ke ku, a on yurol.” In lain met sruinku, mutan se inge el wowoyuk, a wangin met in molella.” Tia oanu mutan se meet, mutan se akluo el tia insese ke ma mokul koluk lungse in oru nu sel. El lainul, el wowoyuk a tung ke kasru, tusruktu el kutangulla. Tung a wowon lal akkalemye la el srunga na paye ma sikyuk nu sel; aok, wangin meta lal.

Fwinne met Kristian nu kemwa ke pal inge elos tia muta ye Ma Sap lal Moses, tusruktu akmwuk ke Ma Sap ku in kasrelos ke ma elos enenu in oru. Me sramsram inge akkalemye ke ma saok su tuku ke lain a wowoyuk tung in siyuk ke kasru. In wowoyuk a tung fwin sie met el sun me sensen ke sruinku pa sie inkanek lalmetmet. Sie met lalmetmet su etu in lain orekma koluk inge el fwak: “Fwin sie mutan el sun me sensen ke sruinku kofwen me meun lal su mwo emeet pa pusra lulap lal.” Sie mutan su wowoyuk a tung ku in purakak kutu met in tuku a kasrel, ku ma el oru inge ku in aklutye met sruinku a moklel in kaengla. Sie mutan fwusr Kristian su sun met sruinku el fwak: “Nga tung a wowoyuk ke ku luk kemwa, paenang el lut. Ke pal se el sulpa srike in tuku, Nga sulpa tung a wowoyuk ke pusra lulap a kasrusr. In pal meeta Nga nunku pal nu kemwa, ‘Fuka sie tung a wowoyuk ke pusra lulap ku in kasre yu fwin sie mokul yok a fukoko sruokyuwi ke sripen oasr nien sun siefwunnu ke nunuk lal?’ Tusruktu, Nga koneak la ma inge arulanu fukoko na paye!”

Fwinne ke sie ma sikyuk upa ke pal se mutan se akpusisilyeyuk ke sruinku a wangin molella, kaifweng lal in lain a wowoyuk tung lal tia som nu ke wangin sripe. Aok, ma inge akkalemye la el oru ma nu kemwa ke ku lal in lain met sruinku. (Duteronomi 22:26) El fwinne sun kain in ma upa se inge, tusruktu el srakna ku in srukye sie ella nasnas, akfulat ke moul lal sifwanu, a el ku in lalalfongi la el nasnas ye mutun God. Ma koluk inge su sikyuk ku in likiye nu sel sie asor lulap, tusruktu, meyen el etu la el oru ma nu kemwa ke ku lal in lain met sruinku paenang ma inge ku in kasrel in unwela kinet ke insiel.

Met Kristian mutan nu kemwa su ke pal inge arulanu keok ke kinet ke inse su met sruinku el orala elos ku in lalalfongi la Jeova el etu a akilen ngal lun insielos. Me kasru ke ma upa lalos ku in tuku ke pal se elos eis kas in akkeye a kas kulang su tuku sin met lili wielos in congregation lun met Kristian. (Job 29:12; 1 Tessalonika 5:14) Sayen ma inge, kaifweung lun sie met su sun ma upa inge in filiye nunuk lal ke ma sumwos ku in kasrel in pulakin “misla lun God su alukela ma eteyuk nu kemwa.”​—Filippai 4:6-9.

[Footnote]