“Paye Sum, Moul El Arulanu Mwo!”

YA kom lungse in lutlut a etu kalme na paye lun moul? Magdalena su yiu siengoul alkosr matwe, sie sin Met Lo lun Jeova su muta ke siti lun Szczecin, in an Poland, el kasru classmate lal ke high school pangpang Katarzyna in oru ou inge. Katarzyna el sie sin met atheist fukoko ku sie met su tia lalalfongi God, tusruktu ke pal se Magdalena el sramsram nu sel ke Baibel, el akkalemye insemwomwo paye lal.

Fwinne Katarzyna el lungse ma Magdalena el aketeye nu sel su tuku ke Baibel tusruktu el tia ku in insese na paye ke ma se inge. Ke sie pal ke el sramsram nu sel Magdalena ke kamwuk paye, Katarzyna el fwak: “Oasr Baibel nutum; kom etu akmwuk su kom enenu in oru a kom etu piye kom ku in koneak kamwuk paye. Tusruktu, fuka nu selos kemwa su tia lalalfongi ingenu ke akmwuk inge nu kemwa?”

Sie ma ekla lulap sikyuk ke pal se Katarzyna el muteta in an London, England. El oru muteta lal nu ke branch office lun Met Lo lun Jeova in an we, a insiel arulanu insemwomwo ke kulang su akkalemyeyuk nu sel ke el muta we. In ikasla nu sel srungal a in porongo ke ma el fwak arulanu purakak insiel.

Ke pal in mutamwauk lun school year sasu in September 2001, Katarzyna el insese ke sie lutlut ke Baibel pal nu kemwa. El akkeye insemwomwo lal ke ma sap lun Baibel a el mutamwauk in orekmakin ma inge ke moul lal ke len nu kemwa. Ke sie pal su tufwanu som, el fwak nu sel Magdalena: “Nga pulakin la Nga tufwanu mutamwauk ke sie moul sasu.” El ouyepa sramsram nu sel ke sie cellphone a fwak: “Kulo ma lulap ke lutlut lasr misenge! Paye sum, moul el arulanu mwo! Sie ma mwolanu na paye in etu met su kut enenu in sang kulo ka.”