Kusensiyuk Su Tuku Sin Met Rid

Mea Poul el lungse in akkalemye ke pal se ma el fwak: “Tu pal e nu kemwa komwos mongo bred inge, a nim kup inge”?

Ke pal se el sramsram ke pal in oakiyuki lun Memorial ke mise lun Jisus, Poul el simusla: “Tu pal e nu kemwa komwos mongo bred inge, a nim kup inge, komwos fwakak mise lun Leum, nu ke pal se el sifwil tuku.” (1 Korint 11:25, 26) Kutu met elos pulakin la kas se inge “pal e nu kemwa” akkalemye la akfulat ke mise lun Kraist enenu in orek pal puspis, ku pal nu kemwa. Ke ma inge, elos oru ou inge pal puspis ke lusen yiu se. Ya pa inge ma Poul el lungse in akkalemye?

Ke pal inge apkurun yiu 2,000 somla ke pal se Jisus el oakiye Memorial ke mise lal. Ke ma inge, in akfulatye Memorial pal se ke yiu se ku in kalmekin la ma inge akfulatyeyuk tari ke pal nu kemwa mutamwauk ke yiu 33 C.E. Tusruktu, ke kutu fus sisken 1 Korint 1:25, 26, Poul el sramsram, tia ke pal e nu kemwa, a el sramsram ke fuka in akfulatye Memorial. Ke kas Greek, el tia orekmakin kas inge pol·laʹkis, su ku in kalmekin “pal puspis” ku “pal nu kemwa.” A, el orekmakin kas se inge ho·saʹkis, su ku in kalmekin “oanu kom oru pal nu kemwa,” sie idiom ku in kalmekin “ke kutena pal,” “ke pal se.” Poul el fwak: ‘Ke kutena pal kom oru ou inge, kom fwakak mise lun Leum.’a

Ke ma inge pal ekasr, enenu in akfulatye Memorial ke mise lun Jisus? Arulanu fwal in akfulatye ma inge pal se ke yiu se. Pa inge sie memorial na paye, a pal nu kemwa elos akfulatye memorial pal se ke yiu nu kemwa. In toeni nu ke ma inge, Jisus el mise ke len lun Kofwen Alukela lun met Ju su elos akfulatye pal se ke yiu nu kemwa. Arulanu fwal Poul el sramsram kel Jisus oanu “Alukela lasr, Kraist,” mise lun Kraist oanu me kise su ikasla inkanek nu ke moul nu sin met Israel in ngun, oupanu me kise ke Kofwen Alukela se meet su molela tulik se meet nu kemwa lun met Israel su isusla fwin an Ijipt a ikasla inkanek nu sin mutanfwal Israel tu elos in sukosokla liki sruo. (1 Korint 5:7; Galetia 6:16) Ma sikyuk inge su oanu sie ke ma sikyuk ke Kofwen Alukela lun met Ju su elos oru ke yiu nu kemwa siepa me akpayeye la enenu in akfulatye Memorial ke mise lun Jisus pal se ke yiu se.

Sayen ma inge, Paul el kapsreni mise lun Jisus ke siepa kofwo lun met Ju su elos oru ke yiu nu kemwa, Len in Orek Iumwe. In Hibru 9:25, 26, kut ku in rid: “A tia tu el [Jisus] fwa sifwanu esalang pal puspis, oanu met tol fulat, el ilyuk nu yen mutal yiu nu kemwa [ke Len in Orek Iumwe] ke sra, su tia sral sifwanu. . . . A inge pal siefwunnu in saflaiyen pal el sikme tari in sisla ma koluk ke kise kel sifwanu.” Ke sripen me kise lun Jisus el aolla me kise ke Len in Orek Iumwe, paenang Memorial ke mise lun Jisus enenu in akfulatyeyuk pal se ke yiu nu kemwa. Wangin ma simusla in Baibel su akkalemye la kut enenu in akfulatye Memorial pus liki ma inge.

In fwal nu ke ma inge, sie met historian pangpang John Laurence von Mosheim el reporti la met Kristian nu kemwa ke century akluo in an Asia Minor elos pala in akfulatye Memorial ke mise lun Jisus ke “len siengoul akosr nu kemwa ke malem lun met Ju pangpang [Nisan].” Tokin yiu puspis sie fasin lun met Kristendom in akfulatye ma inge pal puspis ke yiu se.

[Footnote]