Efu? ‘God, Kom Lela Ma Inge?’

RICARDO el srakna esam ke pal se el muta sisken mutan kiel ke sie infwokil in sano taktu.a Eltal kemwa arulanu sangeng in rid ma simusla ke pepu su akkalemye ma taktu el koneak ke mas lal Maria. Tokin kitin pal, Ricardo el ikasla envelope se, a elos silaklak in liye ma simusla ke report. A elos liye kas se inge “cancer,” a elos mutamwauk in tung meyen elos akilen mea kalmen kas se inge.

“Taktu el arulanu kulang,” Ricardo el esam, “tusruktu el akilen la ma sikyuk seltal tia ma fwusesr se meyen pal nu kemwa el kaifwe nu selos in lalalfongi God.”

Meet liki radiation treatment mutamwauk sel Maria, taktu lal akilen la el kofla in kutongye mokuikui lun nie leyut lal. Ke pal se ma eltal sulpa orala test elos koneak la cancer lal Maria el sun tari brain lal. Tokin wik se ke treatment lal ke radiation, elos tui. A Maria el sun coma a motul na a tia sifwil tukakak, a tokin malem luo el mise. “Nga engun meyen el sun tari saflaiyen keok lal,” Ricardo el fwak, “tusruktu, Nga arulanu asroela paenang kutupal Nga lungse pa tari in mise. Pal nu kemwa, Nga tung a siyuk sin God: ‘Efu kom lela ma inge?’ ”

Ke Pal Se Ongoiye Tuku, Kusensiyuk Puspis Sikyuk

Oanu Ricardo, met puspis fwin fwalu elos enenu in mongfwusesr ke me keok puspis. Pal puspis, met su wangin meta pa sun ongoiye a keok. Nunku ke me asor lulap su tuku ke meun su arulanu akkeokye metu. Ku nunku ke me keok a ngal su met puspis elos sun ke sripen sruinku ku rape, orekma silolel nu selos ke pal se elos srakna tulik, orekma silolel in loom, a kutupa me keok su kutu met elos oru. Ke lusen me sramsram nu kemwa lun met luman wangin saflaiyen nununku sesumwos a me akngal su met puspis elos akola in oru nu sin sie sin sie. (Ekklisiastis 4:1-3) Na, kut ku in liye pa me asor lulap su tuku ke ongoiye ku mas in nunuk, ke pulakin, a ke mano. Paenang tia me lut fwin met puspis elos siyuk, “Efu God el lela kain in me keok inge?”

Fwinne nu selos kemwa su moniyuk ke alu lalos, tia fwusesr nu selos in muteng ke me keok. Saap kom nunku pa efu sie God lun lungse, ku liki el ku in lela me keok in sun metu. Arulanu yok sripe in koneak sie top mwomwo a paye ke kusensiyuk inge meyen ma inge ku in kasre kut in srukye sie inse misla a in futoto nu sin God. Baibel el ase nu sesr top ke kusensiyuk inge. Nunuk munas loang akmwoye nu ka meyen ma inge e fwa akkalemyeyuk ke me lutlut toko an.

[Footnote]

[Pictures on page 3]

Taktu el kaifweung in akkalemye nu sesr la kut enenu in lalalfongi God