Fwin Tebu lun Captain
MET pengpeng, mongo eueu, a me sramsram mwo oru sie mongo ke tebu lun captain ke oak in arulanu me akinsemwomwoye met. Tusruktu, me sramsram ke tebu lal Captain Robert G. Smith, lun oak soko inge White Star Line, akkalemye sie kofwo in ngun.—Isaia 25:6.
In yiu 1894, ke pal se el yiu 24 matwe, Robert el mutamwauk in orekma oanu sie met kol ke oak nes soko inge Kinclune of Dundee, pa inge fwafwasyesr se meet lal in raunela fwalu nu fon. Tok el ekla sie captain lun oak puspis lun White Star, oanu Cedric, Cevic, a Runic.a Ke pal se el fwafwasyesr ke oak soko ke mwea lun Atlantic, New York me nu an Liverpool, England, Robert el ekla sie met kurungin lal Charles Taze Russell ke tebu lun captain. Aenguni lal nu sel Russel purakak pwar lal Robert nu ke me lutlut lun Baibel, a meyen el lungse in akyokye etauk lal, paenang el eis sel Russel me rid puspis inge su pangpang Studies in the Scriptures.
Russell el sim leta nu sel pal nu kemwa, a ke sripe se inge, insemwomwo lal Robert ke Baibel yokyokelik. Robert el akkalemye nu sin mutan kiel etauk sasu lal. Ke lusen pal na futoto elos ekla Bible Students su arulanu moniyuk, pa inge enen Met Lo lun Jeova in pal meeta. Tokin sie pal, Robert el eis pal mwo in oru sramsram puspis ke Baibel ye mutun met nu kemwa. Ke sie me pupulyuk, in an Brisbane, Australia, el sramsram ke sifwe se inge “The Balm of Gilead” a el akkalemye fuka Kas lun God el oanu sie “ono lain ma upa nu kemwa fwin fwalu.” In an England, mutan kiel a tulik srisrik nutul elos akesrui in akkalemye nu sin met pitse pangpang “Photo-Drama of Creation,” elos sritelkin record puspis ke commentary lal Russel in pal se na elos sritelkin slides.
Robert el tutafla nu sin tulik nutul nu kemwa ma paye lun Togusrai su el eis. Ke len inge, tokin fwil limekosr somla, met 18 ke sou lal elos srakna kafofo ke orekma in sulkakin peng mwo nu sin kutu met, a sang kulo nu ke me mongo in ngun su filiyuki meet ke tebu lun captain.
Ke inkanek lun me rid a ke orekma in luti lalos nu sin kutu met ke Baibel, Met Lo lun Jeova elos kasru met puspis fwin fwalu nu fon in etu ma paye lun Baibel su purakak insiel Captain Smith. Kom ku in koneak pa me purakak yok ke tebu lun captain.
[Footnote]
a Sister ship se lal, pangpang Titanic, el muta ye koko lal Captain E. J. Smith (elos tia sou) ke fwafwasyesr safla lal su sun ongoiye.
[Picture on page 8]
Robert G. Smith
[Picture on page 8]
Charles T. Russell