Fuka Kom Ku In Moula Liki Saflaiyen Fwal Se Inge?

BAIBEL el akkalemye saflaiyen akmwuk se inge oanu “sie len in kuskosrok, sie len in ongoiye a keok, sie len in kunausten a sukela, sie len in losr a ok, sie len in pukunyeng a losr matoltol.” (Zefenaia 1:15) Paye, tia pa inge len su kom lungse in liye ke pal fwasru! Fwinne ou inge, met sap Piter el kaifwe nu sin met lili Kristian wiel in “sano a tawi ke tuku lun len lun God, in su kosrao elos fwa wanginla ke e, a ma nu kemwa elos fwa kofelik ke fwol lulap! A, oanu mwoleaung lal, kut sano kosrao sasu a fwalu sasu, yen sumwosmwos on we.”—2 Piter 3:12, 13.

Ke fus inge Piter el tia sramsram ke kunanela lun kosrao a fwalu na paye. “Kosrao” a “fwalu” su Piter el sramsramkin ke fus inge el lumeyuk nu ke guferment koluk nu kemwa lun met a ke un met sesumwos. “Len lun Jeova” e fwa tia kunausla fwalu, a el fwa “kunausla met koluk su muta ka.” (Isaia 13:9) Nu selos nu kemwa su “mongi a tung ke me srungeyuk nu kemwa” su orek inmaslon met koluk ke pal inge, len lun Jeova sie len in molela.—Ezekiel 9:4.

Ke ma inge, fuka sie met el ku in moliyukla ke “len lulap a len in me aksangeng lun Jeova”? “Kas lun Jeova” akkalemyeyuk nu sin sie met palu lal topuk ke kusensiyuk inge: “A a fwa te oru, kutena met su fwa pangon nu ke en Jeova fwa moliyukla.” (Joel 1:1; 2:31, 32) Met Lo lun Jeova elos insemwomwo in kasru kom in lutlut ke kalmen pangpang nu ke en Jeova.